1, 2. ¿Kaseerü naaʼinraka na naʼaleewainkana Jeʼwaa paʼaraiisüpa tü mmakat?

MÜSÜ wanee wayuu kanüliakat Monika: «Mayaapejeʼe eeirüin maʼaka apünüin shikii jaʼralimüin wouyase sünain kasaalüü. Nnojoyülia tatüjaain maʼin aaʼu süpüshuaʼa nukuwaʼipa chi taimeesekai». Eesü sülatüle tia namüin na wayuukana sümaa naʼwayuuse otta naʼaleewainyuu.

² Keeʼireesü waaʼin weʼraajüin wapüshi otta waʼaleewainyuu, ¿aashimüin? Nialeeka Jeʼwaa; weʼraajüinjachin maʼin. Jaʼitasü wekirajaain sünain tü nukuwaʼipakat, nnojoleerü watüjaain saaʼu süpüshuaʼaleʼeya (Roma 11:13). Paʼaraiisüpa tü mmakat, ekirajaweena waneepia na naʼaleewainkana Jeʼwaa süpüla kojutüinjatüin maʼin namüin tü nukuwaʼipakat (Ecl. 3:11).

3. ¿Kasa wekirajaainjatka anain?

³ Wekirajaaitpa anain suluʼu tü wanee ekirajaayakat kamaneein maʼin Jeʼwaa otta nnojoluin koʼuin nukuwaʼipa sümüin wayuu. Wekirajaajeerü anain jooluʼu süchiki piamasü nukuwaʼipa: Asülajüi otta nnojoishi macheʼein süchiirua wanee kasa. Sükajee tia, wayaawateechi aaʼu Jeʼwaa niain wanee Maleiwa «anashi maʼin [...] sümüin wayuu süpüshuaʼa otta nümüliajüin na nukumajalakana» (Sal. 145:9, NM).

4. ¿Kasa naaʼinraka wanee wayuu asülajüi?

⁴ ¿Kasa naaʼinraka wanee wayuu asülajüi? Naashin Jesuu «anakuaippaʼireʼeya chi wayuu aapakai nuulia chi aapünakai amüin» (Aluw. 20:35). Chi wayuu asülajüikai, akatatshi kaʼi, aʼyataashi maʼin otta asülajüshi kasa süpüla nükaaliinjüin wayuu. Nnojotsü naainjüin tia mojusheeka. «Asülajüi», münüshi wanee wayuu sünainjee nüsülajüin süka naaʼin, nnojotsü shiain sünainjee wainmain maʼin nüsülajala (paashajeʼera 2 Corinto 9:7). Shiimain niain Jeʼwaa wanee Maleiwa asülajüi.

5. ¿Jamüshi nüsülajüika Jeʼwaa?

 ⁵ ¿Jamüshi nüsülajüika Jeʼwaa? Naapüin tü kasa choʼujaakat namüin napüshuaʼa na wayuukana. «Anashi maʼin Jeʼwaa sümüin wayuu süpüshuaʼa». «Nüntirüin nuwarala chi kaʼikai je nüʼitirüin tü juyakat sünainmüin wayuu eekai kaainjaralin je eekai anamiain.» (Mat. 5:45.) Shiajaʼa makaʼa nünüiki Pablo namüin na manoujüinsaliikana: «Niaʼa [Maleiwa] aʼititka tü juyakat jaaʼu, otta nia aapaka tü aʼttieekat jümüin juyapü. Je niaʼaya aapaka jümüin tü jikakat waneepia süpüla emirainjanain jia otta talatüinjatüin jaaʼin» (Aluw. 14:17). Shiimain nüsülajülin Jeʼwaa sümüin süpüshuaʼa wayuu (Luc. 6:35).

6, 7. (1) ¿Jaralii na wayuu nükaaliinjeekana maʼin Jeʼwaa? (2) Püküja süchiki tü alatakat sümüin Nancy, eeʼiyataka nükaaliinjüin Jeʼwaa na aʼyataakana nümüin.

⁶ Nükaaliinjeein maʼin Jeʼwaa na wayuu aʼyataakana nümüin. Nüküjüin tia David wanaa sümaa nümüin: «Jintüitpuʼushi taya tamaiwa, akaisaʼa laülaaichipain joo taya. Nnojoiyüiya teʼrüin wanee wayuu lotokai akuwaʼipa müliain maʼin; nnojoyülia teʼrüin nüchonnii sünain ojulijakuʼu maa» (Sal. 37:25, NM). Wainma wawalayuu eʼraka shikeraajüin suluʼu nakuwaʼipa tia pütchikat. Wekirajaa süchiki tü alatakat sümüin Nancy, wanee pürekutsoot.

⁷ Müsü shia: «Choʼujaasü maʼin tamüin 66 dólares süpüla tawalaajüinjatüin tü piichi kaluʼukat taya. Maʼletsesat taya wanaa sümaa tia. Taküjaka nümüin Jeʼwaa tü alatakat tamüin. Shiasaʼa soʼu kaʼikat tia, toʼunaka taʼyataaleruʼumüin. Aʼyataasü taya suluʼu wanee oikkaalee eküülü. Nnojotsü jülüjüin taaʼin nasülajüinjanain tamüin nneerü na wayuu antakana sünain ekaa. Aipuʼusü maʼin shiiʼiree wayuu soʼu aikat tia. Shiasaʼa süntapaatakalaka wainma wayuu. Tojuʼitapa sünainjee taʼyataain, tayaawajüin tü asülajünakat tamüin, eejatü tü choʼujaakat maʼin tamüin: 66 dólares». Sünainjee tia, sütüjaa aaʼu Nancy nüsülajüin Jeʼwaa tü choʼujaakat sümüin (Mat. 6:33, NM).

8. ¿Kasa naaʼinraka Jeʼwaa napüleerua napüshuaʼa na wayuukana?

⁸ ¿Kasa naaʼinraka Jeʼwaa napüleerua napüshuaʼa na wayuukana? Naapüin chi nüchonkai süpüla ouktajachin nia naaʼu. Nüküjüin tia Jesuu wanaa sümaa nümüin: «Süka alin maʼin nüpüla Maleiwa na wayuukana, naapüin chi waneeshikai Nüchon süpüla nnojoliinjanain ouktüin na eʼitaakana naaʼin nünain otta süpüla katüinjatüin noʼu waneepia» (Juan 3:16, NM). Tia, napülajatü napüshuaʼa na wayuu eʼitaakana naaʼin nünain. Na aainjakana tia, müinnia nnojoliin ouktüin (Juan 10:10, NM). ¡Shiimainya niain Jeʼwaa wanee Maleiwa asülajüi!

9. ¿Kasa waaʼinrajatka süpüla wasülajüliinjanain maʼaka naaʼin Jeʼwaa?

 ⁹ ¿Kasa waaʼinrajatka süpüla wasülajüliinjanain maʼaka naaʼin Jeʼwaa? «Süka  naapüin wamüin [Jeʼwaa] süpüshua tü cheʼojaakat wamüin, süpüla talatüinjatüin waaʼin», waaʼinrajatü tia sümüin wayuu. Asülajüliinjana waya süpüla talatüinjatüin naaʼin (1 Tim. 6:17-19). Anasü maʼin waaʼinrüle tia süpüla wakaaliinjüin na wapüshikana otta na müliakana aaʼin (paashajeʼera Deuteronomio 15:7, NM *). ¿Kasa waaʼinrajatka süpüla wasülajüliinjanain? Eeshii wawalayuu achajaakana sukuwaʼipa nasülajüin wanee kasa wanaa sümaa neʼrüin süsülajünüin kasa namüin. Wainma wawalayuu asülajülii anaka maʼin süpüla washatüin nakuwaʼipa.

10. ¿Kasa maa waaʼinrajatka süpüla wasülajüliinjanain?

¹⁰ ¿Kasa maa waaʼinrajatka süpüla wasülajüliinjanain? Akatalüinjana waya kaʼi, aʼyataainjana maʼin waya süpüla wakaaliinjüin na wayuukana otta watütüleʼerüinjatü naaʼin (Gal. 6:10). Anasü maʼin jülüjüle waaʼin pütchikat tüü: «¿Akatatshiche taya kaʼi otta jülüjüsüche taaʼin tü alatakat namüin na waneeinnua süpüla takaaliinjüin naya? Müleka eere süpüla taaʼinrüin wanee kasa naluwataaka anain taya na waneeinnua, ¿jüüjüüshiche taya namüin? ¿Jeʼratuaitche tatalateʼerüin naaʼin wanee tapüshi jee wanee tawala?» Müleka wasülajüliire, aleeweena maʼin waya nümaa Jeʼwaa otta namaa na wapüshikana (Luc. 6:38; Prov. 19:17).

11. ¿Kasa waaʼinrajatka süpüla wasülajüliinjanain nümüin Jeʼwaa?

 ¹¹ ¿Kasa waaʼinrajatka süpüla wasülajüliinjanain nümüin Jeʼwaa? Müsü tü Wiwüliakat wamüin: «Kojutü putuma Jeʼwaa süka tü kasa kojutsü pümaʼanakat» (Prov. 3:9, NM). Tü kasa kojutsü wamaʼanakat shia tü kaʼi wakatalakat süpüla waʼyataain  maʼin nümüin Jeʼwaa otta tü kasa eekat eein wamaʼana. Akaʼaya na tepichikana, eeshii süpüla nasülajüliin nümüin Jeʼwaa. Müshi wanee wayuu kanüliakai Jason: «Tü nneerü wejitüinjatkat suluʼu tü kaaja eekat suluʼu tü outkajaaleekat, waapüin namüin na wachonniikana süpüla nejitüinjatüin shia. Talatsü maʼin naaʼin süka natüjaain saaʼu nasülajüin nümüin Jeʼwaa». Naainjüle tia na tepichikana, asülajüliijeena naya nümüin Jeʼwaa miyoʼuyuupa naya (Prov. 22:6).

12. ¿Kasa naaʼinraka wanee wayuu nnojoikai macheʼein süchiirua tü nümakat?

¹² Tü wanee nukuwaʼipakat Jeʼwaa anaka maʼin shia nnojolin macheʼein nia süchiirua tü nümakat. ¿Kasa naaʼinraka wanee wayuu nnojoikai macheʼein süchiirua tü nümakat? (Tito 3:1, 2.) Nnojoishi masütaajüin süchiirua tü nümakat otta nnojoishi eʼrüin wayumüin namüin na waneeinnua. Tü naaʼinrakat shia kamaneein nia otta jülüjüin naaʼin jamüin nakuwaʼipa na waneeinnua. Jülüjüsü naaʼin tü namakat, anale shia, «anasü saaʼin tamüin», müshi namüin otta nuʼwanajaain tü jülüjakat naaʼin.

13, 14. (1) ¿Kasa naaʼinraka Jeʼwaa eeʼiyataka nnojolin macheʼein nia süchiirua tü nümakat? (2) ¿Kasa shikirajaka anain waya tia naainjakat Jeʼwaa nümüin Lot?

¹³ ¿Kasa naaʼinraka Jeʼwaa eeʼiyataka nnojolin macheʼein nia süchiirua tü nümakat? Jülüjüsü naaʼin tü suluʼukat naaʼin na aʼyataakana nümüin. Nnojoishi masütaajüin süchiirua tü nümakat. Weʼrüin tia sükajee tü nukuwaʼipakat Lot. Wanaa sümaa naʼajüinjatüin Jeʼwaa tü pueulokot Sodoma sümaa Gomorra, nuluwataain Lot sünain awatawaa saaʼumüin wanee uuchi. Niasaʼa Lot, nuchuntaka nümüin Jeʼwaa nuʼunüinjachin suluʼumüin wanee pueulo pejesü. Nuchuntüin Lot nuʼwanajaainjatüin Jeʼwaa tü nümakat nümüin (paashajeʼera Génesis 19:17-20).

¹⁴ Wanaa sümaa paapüin nüchiki Lot, eesüjaʼa süpüla matsüin nunoula otta eʼrülin nia wayumüin saaʼin pümüin. Nükaaliinjüinjee Jeʼwaa Lot eepünaale nia. Akatsaʼa nuchuntüin nümüin Jeʼwaa nuʼunüinjachin suluʼumüin wanee pueulo pejesü süka shiyoʼujaain naaʼin. ¿Jamakaʼa nünüiki Jeʼwaa? «Anasü saaʼin tamüin», müshi nümüin. Nuuʼulaaka nuʼunüin suluʼumüin tia pueulokot (paashajeʼera Génesis 19:21, 22). Sükajee tia, watüjaaitpa aaʼu nnojolin macheʼein Jeʼwaa süchiirua tü nümakat.

15, 16. ¿Kasa naaʼinraka Jeʼwaa napüleerua na israeliitakana? (Piirakaa sümüin tü ayaakuaa suluʼukat süpana 13.)

¹⁵ Wekirajaa jooluʼu süchiki tü naaʼinrakat Jeʼwaa napüleerua na israeliitakana. Mojule wanee israeliita, nnojorüle anneerü otta kaaʼula nümaʼana süpüla nüsülajüin nümüin Jeʼwaa. Nasülajüinjatü piamasü wüchii toomasü jee shiale piamasü süchonniichein. ¿Jama nnojorüle toomasü namaʼana? Asülajüinjana palitchon ariina. Nnojotpejeʼe shiainjatüin wanee ariina eekai mojuin. Shiainjatü wanee ariina eekai anain maʼin, maʼaka saaʼin tü aapünapuʼukat namüin na eʼiyoukana (Gén. 18:6, NM). ¿Jamüshi nnojoika ichein Jeʼwaa süchiirua tü nümakat sükajee tia? (Paashajeʼera Levítico 5:7, 11).

¹⁶ Jülüjataa paaʼin piale wanee israeliita mojuka maʼin. ¿Jameechi pia püntapa suluʼumüin tü aʼwaajüleekat sümaa pülüʼüjüin palitchon ariina? Japüijeechi pia süka pülüʼüjüin neʼe ariina otta na waneeinnua nantirüin mürüt. Akatsaʼa sotuin paaʼin kojutüin maʼin nümüin Jeʼwaa tü püsülajakat nümüin. Süka jamüin, anain maʼin tü ariina püsülajakat nümüin. Müshi nümakai Jeʼwaa namüin na israeliita mojukana: «Tatüjaa aaʼu isain jüchiki jüsülajüin tamüin tü kasa nasülajakat  na waneeinnua. Akatsaʼa talatüin taaʼin sümaa tü jüsülajakat tamüin süka jaaʼinrüin shia süka süpüshuaʼa jaaʼin». Shiimain maʼin nnojolin ichein Jeʼwaa süchiirua tü nümakat. Jülüjüsü naaʼin tü kasa wainkakat otta tü isakat wachiki (Sal. 103:14).

17. ¿Kasa aʼyatawaa talataka amaa Jeʼwaa?

 ¹⁷ Talatsü waaʼin süka watüjaain saaʼu talatüin Jeʼwaa sümaa tü aʼyatawaa waainjakat nümüin süka süpüshuaʼa waaʼin (Col. 3:23). Müsü wanee wawala jaʼapüirü kanüliaka Constance: «Tü kamalainkat maʼin tamüin shia taashajaain nüchiki Maleiwa namüin na wayuukana. Makalaka ayatüin taya maaʼulu sünain aküjaa pütchi otta ekirajaa wayuu. Eesü mojuwaire taaʼin süka isaitpain tachiki taʼyataain maʼin nümüin Jeʼwaa. Talatapajaʼa taaʼin süka tatüjaain saaʼu alin taya nüpüla Jeʼwaa, kojutüin nümüin tü taainjakat otta nütüjaain saaʼu tü kasa isakat tachiki».

18. ¿Kasa naaʼinrajatka na kachonshiikana süpüla nashatüin nukuwaʼipa Jeʼwaa?

¹⁸ ¿Kasa waaʼinrajatka süpüla washatüin nukuwaʼipa Jeʼwaa? Soto waaʼin tü naaʼinrakat nümüin Lot. Mayaapejeʼe niain pülashin Jeʼwaa, jülüjüsü naaʼin tü nümakat Lot otta «anasü saaʼin tamüin», müshi nia nümüin. Kachonle pia, püshata nukuwaʼipa Jeʼwaa. Jülüja paaʼin tü namakat na püchonniikana. Müleka anale shia, «anasü saaʼin tamüin», eeshi süpüla pümüin namüin. Saashin tü rewiisütakat Aapiria Wayuu ojuʼitaka settienpüroʼu 1, 2007, eeshii na wayuu ooʼulaakana nasouktüin nachonnii sünainpünaa tü kasa napülajüinjatkat noulia. Chi wayuukai sümaa tü nuʼwayuusekat nayainjana aneekaka jalapüshinjanain nantüin na nachonniikana. Na anoujüshiikana eesü süpüla jülüjüin naaʼin tü namakat na nachonniikana. Eesüjaʼa süpüla neeʼiratüin tü oora nantajatkalü oʼu na nachonniikana, naaʼinrüle tia jülüjüinjatü naaʼin tü sümakat tü Wiwüliakat. Müle sukuwaʼipa natuma na kachonshiikana, nayaawateerü aaʼu na tepichikana jamüin süpülajünaka wanee kasa noulia otta jüüjüüjeena naya sümüin tü münakat namüin.

19. ¿Kasa naaʼinrajatka na laülaashiikana suluʼu tü outkajaaleekat süpüla nashatüin nukuwaʼipa Jeʼwaa?

¹⁹ ¿Kasa naaʼinrajatka na laülaashiikana suluʼu tü outkajaaleekat süpüla nashatüin nukuwaʼipa Jeʼwaa? Jülüjüinjatü naaʼin tü kasa nainkakat otta tü isakat nachiki na nawalayuukana. Soto waaʼin talatüin naaʼin Jeʼwaa sümaa tü kasa nasülajakat na israeliita mojukana. Akaʼaya maaʼulu, eeshii na wawalayuu nnojoliikana aküjüin maʼin pütchi sutuma ayuulin jee laülaayuuin naya. Mojule naaʼin sutuma tia, jüküjüinjatü namüin alin naya nüpüla Jeʼwaa otta kojutüin nümüin tü naʼyataainkat (Mar. 12:41-44).

20. Püküja jamüin nnojoliinjanaka wooʼulaain suulia aʼyatawaa nümüin Maleiwa.

²⁰ Tia wekirajaakalü anain nnojotsü maluʼuluin wooʼulaainjanain suulia aʼyatawaa nümüin Maleiwa (Mat. 16:22). Aʼyataainjana maʼin waya süchiirua tü kasa sünainpünaakat Nuluwataaya Maleiwa. Nnojoishii müinjanain waya maʼaka naaʼin na moʼurulakana sünain aaʼinraa wanee kasa (Luc. 13:24). Jülüjeesü waaʼin piamasü kasa: Nnojoliinjana waya ooʼulaain suulia aʼyatawaa nümüin Maleiwa otta jülüjüinjatü waaʼin nnojoluin nuchuntüin wamüin tü kasa isakat wachiki. Soto waaʼin talatüin maʼin naaʼin Jeʼwaa sümaa tü kasa waaʼinrakat nümüin süka süpüshuaʼa waaʼin. Talatsü waaʼin süka waʼyataain nümüin wanee Maleiwa nnojoikai ichein süchiirua tü nümakat. Suluʼu tü wanee ekirajaayakat wekirajaajeerü anain sooʼomüin piamasü nukuwaʼipa Jeʼwaa (Sal. 73:28).