¿Shiimainche tü iküleesia sünainpünaakat atkawaa?
Alberto, nia wanee wayuu alatirakai poloo juya sünain surulaalüin nia. Müshi nia: «Müshi chi kapüchiinakai wamüin: ‹Eeshi Maleiwa jümaa›. ‹¿Jamüshiche toʼutajachika saaʼin wayuu wanaa sümaa sümüin tü Wiwüliakat: «Nnojo puʼutüin saaʼin wayuu»?›, maa müshi taya sutuma tia».
Ray, surulaatpuʼushi nia palaanain suʼunnaa tü kasachiki eejatkat soʼu juyaka 1939 sünainmüin 1945. Müshi nia nümüin chi kapüchiinakai: «¿Jamüshi yaaka pia wamaa suluʼu tü anuakat sünain aresawaa waaʼu süpüla wakanajüin otta chataain aresaain na waʼünüükana süpüla nakanajüin?». «¿Jaratche joo atüjaaka saaʼu nukuwaʼipa chi Senyootkai?», nümaka neʼe chi kapüchiinakai.
Nnojorüle punoujüin sünain tia, nnojoishi piain neʼe alatüin amüin tia.
¿KASA SHIKIRAJAKA ANAIN TÜ WIWÜLIAKAT?
Tü pütchi alanaʼaleekat sünainjee tü aluwataanakalü anain waya shia tüü: «Anasü aire püpüla wayuu süpüshua maa aka alin pia püpülajiraa» (Marcos 12:31). Naashin Jesuu alinjatü wapüla wayuu süpüshuaʼa; jaʼitairü naatain suumain. Müshi nia namüin na nikirajüinkana: «Shiimüinre sünain aijiraain jia jüpüla, ayaawatüneena jia sütüma wayuu süpüshua sünain tekirajanain jia» (Juan 13:34, 35). Ayaawatüneechi aaʼu wanee wayuu sünain shiimain nunoujüin müleka aire nüpüla wayuu. Nnojotsü nuʼuteein aaʼin wayuu, shia keeʼireeka naaʼin naapajiraain nikii saaʼu.
Shia naainjaka tia na anoujüshiikana. Müsü wanee karaloukta: «Naashin na shikiishiikana tü iküleesiakat maʼaka naaʼin Tertuliano nümaa Orígenes, nnojoishii süpüla nuʼutüin saaʼin wayuu na anoujüshiikana, makalaka nayouktüin süchiki susurulaatsein naya Roma».
¿KASA NAAINJAKA NA AKÜJÜLIIKANA PÜTCHI NÜCHIKI JEʼWAA?
Sainküinshii mma na aküjüliikana pütchi. Sukumajaale wanee kasachiki noumainpaʼa, nachajaain sukuwaʼipa süpüla aijiraain naya.
¿Shikirajüin tü iküleesiakat sünain aijiraainjanain na wayuukana?
Soʼu juyaka 1994, wanaa sümaa peʼipaajiraain na wayuukana hutus namaa na wayuukana tutsis chayaa Ruanda, nnojoishii sünainpünaain tia kasachikikat na aküjüliikana pütchi nüchiki Jeʼwaa. Akaaliinjiraashii na hutus otta tutsis aküjüliikana pütchi, natüjaa aaʼu eein süpüla noʼutünüin aaʼin saaliijee tia. Antüna aaʼuchii piamashii hutus sünain ounjulaa waneeinnua tutsis, namünaka natuma na surulaatkana: «Müinjatia tü eekai sükaaliinjüin tutsis». Noʼutünakalaka aaʼin (Juan 15:13).
¿Jamüsü saaʼin pümüin tü naainjakat na aküjüliikana pütchi? ¿Pansaasüche sümaa tü nikirajakalü anain Jesuu süchiki aijiraainjanain waya?
