1, 2. ¿Jaralii na nüneekaka Jesuu süpüla naapüin tü kasa choʼujaakat sümüin wanoula? ¿Jamüsü watüjaainjatka saaʼu tia?

«TAWALAYUWAA, taküjeein jümüin kojuyatuairüin antüin tajapüluʼumüin karalouktairua aashaajaka süchiki tü alatakat tamüin; antüsü wanaapünaa sümaa tü kaʼi choʼujaakalü oʼu shia.» Müsü sünüiki wanee wawala suluʼu wanee karaloukta suluwataaka suluʼumüin weteet chaa Brooklyn. ¿Alatüirü pümüin tü alatakat sümüin? Eesüjaʼa süpüla müin shia. Nnojotsü ponüinjatüin waaʼin tia.

² Süka naapüin wamüin Jesuu tü kasa choʼujaakat sümüin wanoula, shiiʼiyatüin wamüin nikeraajüin Jesuu tü nümakat. ¿Jaralii na nüneekakana süpüla tia? Nia «chi achepchiee oonookai otta kekiikai maʼin». Nüneeküin süpüla naapüinjatüin tü eküütkat wanaapünaa sümaa tü kaʼi choʼujaakalü oʼu shia namüin na nüchepchiakana (paashajeʼera Mateo 24:45-47 *). * Nüneeküin Jesuu chia achepchieekai süpüla naapüin tü kasa choʼujaakat sümüin nanoula na anoujüshiikana. Makalaka watüjaainjatüin saaʼu jaralin chi achepchiee nüneekakai Jesuu. Süka jamüin, kateerü woʼu waneepia otta aleeweena waya nümaa Jeʼwaa (Mat. 4:4; Juan 17:3, NM).

3. ¿Kasapuʼu wanoujaka anain nüchiki chi achepchiee oonookai otta kekiikai maʼin?

³ ¿Jamaluʼulu tü nümakat Jesuu nüchiki chi achepchiee oonookai otta kekiikai maʼin? Sümaiwa paala, wanoujapuʼu anainrü laülaain chi achepchieekai naaʼu na wanee achepchieekana soʼujee juyaka 33 sünain tü miʼiraa kanüliakat Pentecostés. Otta wanoujapuʼu anainrü nayain na anoujüshii chainjanakana iipünaa chi achepchiee oonookai otta kekiikai maʼin. Otta wanoujapuʼu anainrü nayain na anoujüshii chainjanakana  iipünaa na wanee achepchiee naashajaakana achiki Jesuu. Otta wanoujapuʼu anainrü nüneekünüin chi achepchieekai soʼujee 1919 süpüla laülaain nia saaʼu tü kasa eekat nümaʼana chi nülaamainkai. Wekirajaa anainrü süchikuaʼa tü nümakat Jesuu nüchiki chi achepchiee oonookai otta kekiikai maʼin, makalaka anain wapansaajüle tü wanoujapuʼukalü anain süchiki tia (Prov. 4:18). Wekirajaa sünain tü nümakat Jesuu nüchiki chi achepchieekai süpüla watüjaain saaʼu jamüin wanainpünaaka shia; jaʼitairü waʼatapüin chainjanain waya iipünaa jee shiale yaain waya saaʼu mmaka.

4-6. ¿Jamüshii wanoujaka sünain shikeraajüin tü nümakat Jesuu nüchiki chi achepchiee oonookai otta kekiikai maʼin süchikijee juyaka 1914?

⁴ Nnojotsü ekeraajüin soʼujee juyaka  33 tü nümakat Jesuu nüchiki chi achepchiee oonookai otta kekiikai maʼin. Watüjaa aaʼu tia sünainjee tü wanee wersiikulokalüirua. Wekirajaa sünain tia.

⁵ Tü nümakat Jesuu nüchiki chi achepchiee oonookai otta kekiikai maʼin, nüküjüin shia sümaʼaleʼeya tü kasa wayaawatüinjatkat akajee niweetüinjachin otta sülüʼülüin sükalia süpüla sajaʼttüin tü kasakalüirua (Mat. 24:3,). Tü nümakat paala Jesuu suluʼu Mateo 24:4-22, ekeraajüsü piantua. Tü palajatkat shikeraajia, alatüsü soʼujee juyaka 33 sünainmüin juyaka 70. Otta tü wanee, alatüsü shia soʼutpünaa wakalia. ¿Ekeraajeetche piantua tü nümakat Jesuu nüchiki chi achepchiee oonookai otta kekiikai maʼin? Nnojo.

⁶ Sünainjee tü nümakat Jesuu suluʼu Mateo 24:29, aashajaashi nia süchiki tü kasa alatajatkat wakalioʼu (paashajeʼera Mateo 24:30, 42, 44). Wanaa sümaa naashajaain süchiki tü müliaa miyoʼushaatakat, müshi nia: «Shiʼreechi taya wayuu, tayakai, chi Shipayakai Wayuu, sünain antaa saʼaka tü sirumakat». Otta müshi nia namüin na wayuu eekana maaʼutpünaa: «Anakaja müleka eere jaaʼin tapüla tayakai, chi Jüsenyotsekai, süka taleʼejüinjachin tachikua jünainmüin soʼuweena wane kaʼi matüjaajuukat aaʼu jütüma». * Aashajaashi Jesuu nüchiki chi achepchiee oonookai otta kekiikai maʼin wanaa sümaa yootuin nia süchiki tü kasa alatajatkat maaʼutpünaa. Makalaka wanoujüin sünain shikeraajüin tü nümakat nüchiki chi achepchieekai süchikijee juyaka 1914. Soʼu juyaka tia oʼttüsü sükalia tü kasakalüirua süpüla sajaʼttüin. ¿Shiimainchejeʼeya tia?

7. ¿Kasa nnojotka atüjaanüin aaʼu soʼu juyaka 1914? ¿Jamüsü matüjaajuka saaʼu?

⁷ Soto paaʼin tü nüsakirakalü anain Jesuu: «¿Jarai maʼin chi achepchiee oonookai otta kekiikai maʼin[?]». Atüjaana aaʼu pütchikat tia nakalioʼu na aluwataaushiikana. Wekirajaaitpa anain, naainjüin kasa pülasü na aluwataaushiikana süka eein Maleiwa namaa. Otta atüjaana aaʼu tia sutuma tü wayuukalüirua (Aluw. 5:12). Akatsaʼa nnojoluin atüjaanüin aaʼu jaraliin nüneeküin Jesuu soʼu juyaka 1914. Soʼu juyakat tia, antüsü sükalia süpüla shiʼyonoojünüin tü trigokat. Otta akatannüinjatü tü mojuui keimsesükat suulia tü trigokat (Mat. 13:36-43). Wanaa sümaa nakotchojünüin na anoujüshiikana, wainma na wayuu anoujakana naashin nünain Jesuu. Makalaka wasakirüinjanain sünain tüü: «¿Jamakuwaʼipalüinjatü sütüjaanüin aaʼu jaraliin na anoujüshii chainjanakana iipünaa?». Watüjaa aaʼu tia sünainjee tü nümakat Jesuu. Ayaawatüneena aaʼu jaraliin na anoujüshii chainjanakana iipünaa sünainjee tü nanoulakat.

8. ¿Jamüshii nayainjanaka na anoujüshii chainjanakana iipünaa chi achepchieekai?

⁸ Chi achepchieekai nayainjana na anoujüshii chainjanakana iipünaa yaayüliika mmapaʼa. Sacerdote naya otta nükatalüin naya Maleiwa süpüla naküjainjanain süchiki tü naaʼinrakat sünain anashaatain maʼin shia. Neenaküin naya saʼakajee tü piyuushikat süpüla nekerolüinjanain saʼakamüin tü nuwaralakat (1 Ped. 2:9). Makalaka nayainjanain aapüin tü kasa choʼujaakat sümüin nanoula na anoujüshiikana. Nayainjana ekirajaka süchiki tü shiimainkat (Mal. 2:7; Alat. Map. 12:17).

9. ¿Nayaleʼeya napüshuaʼa na anoujüshii chainjanakana iipünaa chi achepchiee oonookai otta kekiikai maʼin? ¿Jamüsü makaʼa pünüiki?

 ⁹ ¿Nayaleʼeya napüshuaʼa na anoujüshii chainjanakana iipünaa chi achepchiee oonookai otta kekiikai maʼin? Nnojo. Nnojoishii naya aapüin tü kasa choʼujaakat sümüin nanoula na anoujüshiikana sainküinpünaa mmaka. Jülüja paaʼin wanee kasa: naʼakajee na anoujüshii chainjanakana iipünaa, eeshii eekai laülaashiin eere noutkajaain jee eeshii na aʼyataakana neʼe neʼipajee na laülaashiikana. Ekirajüshii naya wayuu sainküin piichi jee eere noutkajaain. Jüüjüüshii naya sümüin tü pütchi aluwataanakalü anain naya chejee Brooklyn. Nnojoishii naya aapüin tü kasa choʼujaakat sümüin nanoula na wawalayuukana sainküinpünaa mmaka. Naʼakajee na anoujüshii chainjanakana iipünaa, eeshii wawalayuu jieyuu. Otta nnojotsü antüin suluʼumüin naaʼin nekirajüinjanain na anoujüshiikana (1 Cor. 11:3; 14:34).

10. ¿Jarai chi achepchiee oonookai otta kekiikai maʼin?

¹⁰ ¿Jarai chi achepchiee oonookai otta kekiikai maʼin? Soto paaʼin nüneeküin Jesuu palitchon wayuu süpüla nottonojüin eküülü sümüin wainma wayuu. Müsia neʼe tü naainjakat Jeʼwaa nükajee chi achepchieekai; nüneeküin palitchon anoujüshii chainjanakana iipünaa süpüla nayainjanain aapüin tü kasa choʼujaakat sümüin nanoula na anoujüshiikana maaʼutpünaa. Kottüshii naya sünain aʼyatawaa chayaa Brooklyn. Chi achepchieekai naya na Laülaashii Jülüjakana Aaʼin na Aküjüliikana Pütchi sainküin Mma. Mayaainjeʼe nümüin Jesuu: «Chi achepchiee oonookai otta kekiikai maʼin», kojuya naya. Makalaka chi achepchiee oonookai otta kekiikai maʼin namünüin na Laülaashii Jülüjakana Aaʼin na Aküjüliikana Pütchi sainküin Mma süka paaʼinwain naya sünain tü naainjakat otta tü naneekakat. Müshii waneeshikai naaʼin.

11, 12. (1) ¿Jarat tü piamasü aʼyatawaa eʼitaanakalü anain chi achepchieekai? (2) ¿Jouajachi niʼitaain Jesuu chi achepchieekai süpüla ekiraa na waneeinnua achepchieekana? ¿Jaralii nüneekaka?

¹¹ Wanaa sümaa naashajaain Jesuu nüchiki chi achepchiee oonookai otta kekiikai maʼin, niʼitaainjachi nia chi nülaamainkai sünain piamasü kasa. Eʼitaanüshi nia süpüla ekiraa na waneeinnua achepchieekana. Otta eʼitaaneechi nia süpüla laülaain saaʼu süpüshuaʼa tü kasa eekat nümaʼana chi nülaamainkai. Tü naashajaakalü achiki Jesuu nüchiki chi achepchieekai, ekeraajüinjatü shia sükalioʼu sülüʼülüin süpüla sajaʼttüin tü kasakalüirua. Makalaka niʼitaanüinjachin chi achepchieekai sünain tia piamasükat aʼyatawaa süchikijee 1914; tü juya eekalü oʼu Jesuu sünain aluwatawaa.

¹² ¿Joujachi eʼitaanüin chi achepchieekai süpüla  ekiraa na waneeinnua achepchieekana? Süpüla watüjaain saaʼu tia, jülüja waaʼin tü alatakat soʼu juyaka 1914. Soʼu juyakat tia, wainma na wayuu anoujakana nünain Jesuu naashin. ¿Jaralii nüneeküinjanaka Jesuu süpüla niainjachin chi achepchiee oonookai otta kekiikai maʼin? Atüjaana aaʼu tia wanaa sümaa nüntüin Jesuu nümaa chi Nüshikai sünain anaʼlawaa sümüin sukuwaʼipa tü aʼwaajaakat Maleiwa. Alatsü tia soʼujee 1914 sünainmüin 1919 (Mal. 3:1). * ¡Talatüsü maʼin naaʼin Jeʼwaa nümaa Jesuu süka nantüin nanain waneeinnua wayuu aikana apüla Jeʼwaa otta kojutkana amüin tü Wiwüliakat! Mayaainjeʼe eein tü kasa nanoukteʼerüinjatkalü akuwaʼipa, jüüjüüshii naya wanaa sümaa nachiaanüin (Mal. 3:2-4). Na wayuu Ekirajaaliikana sünain tü Wiwüliakat, nayashii na anoujüshii makana aka saaʼin trigo. Soʼujee 1919, nüneeküin Jesuu naʼakajee na anoujüshii chainjanakana iipünaa waneeinnua anoujüshii süpüla nayainjanain chi achepchiee oonookai otta kekiikai maʼin. Otta eʼitaanüshii naya süpüla ekiraa na waneeinnua achepchieekana.

13. ¿Jaralii naʼakaka na achepchiee ekinnakana? ¿Jamüshii naʼakaka naya?

¹³ ¿Jaralii na waneeinnua achepchieekana? Naya na ekinnakana; na aapünakana amüin tü kasa choʼujaakat sümüin nanoula. Sümaiwa paala, nayapuʼushii neʼe na anoujüshii chainjanakana iipünaa; aluʼusaʼa jooluʼu nayainnapa na anoujüshii yaainjanakana mmapaʼa otta na chainjanakana iipünaa. Kottüshii naya nutuma Jesuu süpüla naaʼinmajüinjanain (Juan 10:16). Naapüin chi achepchieekai tü kasa choʼujaakat sümüin nanoula na chainjanakana iipünaa otta na yaainjanakana mmapaʼa. ¿Jama na Laülaashii Jülüjakana Aaʼin na Aküjüliikana Pütchi sainküin Mma, chi achepchiee oonookai otta kekiikai maʼin? Choʼujaasü saapünüin namüin tü kasa choʼujaakat sümüin nanoula. Nayakana waneʼewai nakua müshii aka naaʼin napüshuaʼa na anoujüshiikana; naʼakashii na achepchiee ekinnakana naashin Jesuu.

14. (1) ¿Kasa aluwataanaka anain chi achepchieekai? ¿Kasa jülüjüinjatka naaʼin? (2) ¿Kasa nüchiaaka oulia Jesuu chi achepchiee oonookai otta kekiikai maʼin? (Paashajeʼera tü pütchikat: «Müleka nnojorule jüüjüüin nia...».)

¹⁴ Wainma tü kasa nuluwataakalü anain Jesuu chi achepchiee oonookai otta kekiikai maʼin. Sümaiwa paala, wanee achepchiee naaʼinmajüinjana na wanee achepchiee eekana nipialuʼu chi nülaamainkai (Luc. 12:42). Müsüjaʼa neʼe maaʼulu tü naainjakat chi achepchiee oonookai otta kekiikai maʼin: naaʼinmajüinjana napüshuaʼa na aʼyataakana nümüin Jeʼwaa. Jülüjüinjatü naaʼin tü kasa eekat nümaʼana chi nülaamainkai, tü aküjaakat pütchi, tü ekirajünajatkat sünain wanee outkajawaa miyoʼu, sukumajia tü karaloukta aküjünakalü aka pütchi, wekirajaaka anain wamüiwaʼa otta sünain tü outkajawaakat. Na wanee achepchieekana, naʼatapajüinjatü naapüin chi  achepchieekai süpüshuaʼa tü kasa sünainpünaakat nanoula.

15, 16. ¿Joujaleechi niʼitaanaka chi achepchieekai saaʼu süpüshuaʼa tü kasa eekat nümaʼana chi nülaamainkai?

¹⁵ ¿Joujaleechi niʼitaanaka chi achepchieekai saaʼu süpüshuaʼa tü kasa eekat nümaʼana chi nülaamainkai? Müshi Jesuu: «Talateerü maʼin naaʼin chia achepchieekai nüleʼejapa chi nülaamainkai müleka ayatüle naaʼinrüin süpüshuaʼa tü niʼitaakat nüpüleerua. Shiimüin tü tamakat jümüin, niʼitaajeechi nia laülaain saaʼu süpüshuaʼale tü kasa eekat nümaʼana» (Mat. 24:46, 47, NM). Nüleʼejapa Jesuu, niʼitaajeechi chi achepchieekai süpüla laülaain nia saaʼu süpüshuaʼa tü kasa eekat nümaʼana. Naainjeerü Jesuu tia ayatüle naaʼinrüin chi achepchieekai süpüshuaʼa tü niʼitaakat nüpüleerua: aapaa tü kasa choʼujaakat sümüin nanoula na anoujüshiikana. Makalaka nnojolinjachin niʼitaanüin uatuwoʼushi sünain tia piamasükat aʼyatawaa. ¿Joujaleetka sülatüin tia? ¿Jameerü sukuwaʼipa? Süpüla watüjaain saaʼu tia, watüjaainjatü aaʼu joujainjachin nüleʼejüin Jesuu otta kasain wayuu süpüshuaʼa tü kasa eekat nümaʼanakat.

¹⁶ ¿Joujaleechi nüleʼejaka Jesuu? Pansaasü wamüin tia sutuma tü wanee wersiikulokalüirua. Wanaa sümaa saashajaain Mateo 24:30, 42, 44 süchiki nüntajachin Jesuu, shia süküjeeka achiki nüntajachin sünain akatalaa na wayuukana maʼaka sükatannüin kaaʼula suulia anneerü. * Ekeraajüinjatü tia suʼunnaa tü müliaa miyoʼushaatakat.

17. ¿Kasa wayuu tü kasa eekat nümaʼana Jesuu?

¹⁷ ¿Kasa wayuu süpüshuaʼa tü kasa eekat nümaʼana? Nnojotsü shiain neʼe naashajaain achiki Jesuu tü kasa eekat nümaʼana yaa saaʼu mmaka. Wainma kasa laülaaka aaʼu nia chaa iipünaa. Müshi Jesuu: «Laülaashi taya nütüma chi Tashikai Maleiwa saaʼu wayuu süpüshua yaa mmaluʼu  ooʼulaka saaʼu tü kasakalüirua süpüshua chakat iipünaa» (Mat. 28:18; Éf. 1:20-23). Süpüshi tü kasa nümaʼanakat shia tü Aluwataaya naapakat Maleiwa nümüin soʼujee 1914, eere nuluwataainjachin namaa na anoujüshii chainjanakana iipünaa (Alat. Map. 11:15).

18. ¿Kasa naainjüinjatka palajana chi achepchieekai süpüla laülaain nia saaʼu süpüshuaʼa tü kasa eekat nümaʼana chi nülaamainkai?

¹⁸ ¿Kasa watüjaaka aaʼu sutuma pütchikat tia? Nüntapa Jesuu sünain akatalaa na anoujüshiikana maʼaka sükatannüin anneerü suulia kaaʼula, nünteechi anain chi achepchieekai sünain naapüin tü kasa choʼujaakat sümüin nanoula na anoujüshiikana. Süchikijee tia, niʼitaajeechi nia süpüla laülaain saaʼu süpüshuaʼa tü kasa eekat nümaʼana. Aapüneerü tia nümüin chi achepchieekai, chapa nia chaa iipünaa sünain aluwatawaa nümaa Kürisüto.

19. ¿Alanaʼaleesia tü aapünajatkat nümüin chi achepchieekai suulia tü aapünajatkat namüin na waneeinnua chainjanakana iipünaa?

 ¹⁹ Sünainjee tia, ¿alanaʼaleesia tü aapünajatkat nümüin chi achepchieekai suulia tü aapünajatkat namüin na waneeinnua chainjanakana iipünaa? Nnojorüleejaʼa. Mayaainjeʼe pansaain paala wanee kasa aapünajatka namüin palitchon wayuu, eesia shia süpüla saapünüin namüin na waneeinnua. Soto paaʼin tü nüküjakat Jesuu namüin na poloo waneemüin aluwataaushiikana süpülapünaa ouktüin nia (paashajeʼera Lucas 22:28-30). Nüküjüin namüin naluwataainjanain nümaa chaa iipünaa sükajee waneepiain naya nümaa. Akatsaʼa nüküjüin namüin mapa naluwataainjanain nümaa napüshuaʼa na  144.000 chainjanakana iipünaa (Alat. Map. 1:1; 3:21). Müsia neʼe sukuwaʼipa tü nüküjakat Jesuu suluʼu Mateo 24:47. Niʼitaainjachi chi achepchiee oonookai otta kekiikai maʼin süpüla laülaain saaʼu süpüshuaʼa tü kasa eekat nümaʼana. Sünainjee tia, watüjaaitpa aaʼu naluwataainjanain nümaa Jesuu napüshuaʼa na  144.000 chainjanakana iipünaa (Alat. Map. 20:4-6).

20. ¿Kasa niʼitaaka apüla Jesuu chi achepchiee oonookai otta kekiikai maʼin? ¿Kasa waaʼinrajatka sutuma tia?

²⁰ Ayatsia naapüin Jesuu tü kasa choʼujaakat sümüin nanoula wainma wayuu nakajee palitchon wayuu maʼakaapuʼu naainjüin shia sümaiwa paala. Nüneeküin chi achepchiee oonookai otta kekiikai maʼin süpüla naapüin tü kasa choʼujaakat sümüin nanoula napüshuaʼa na anoujüshiikana; jaʼitainna chainjanain iipünaa jee yaainjanain yaa mmapaʼa. Talatsü maʼin waaʼin sutuma tia, ¿aashimüin? Shiimainre talatüin waaʼin, jüüjüü waya nümüin chi achepchiee oonookai otta kekiikai maaʼin (Heb. 13: 7, 17).