1, 2. ¿Jamüsü süküjünaka maʼin alawaa maaʼulu? ¿Jalasü aküjünüin tia alawaakat? (Piirakaa sümüin tü ayaakuaakat.)

AKÜJÜNÜSÜ maʼin alawaa otta emeejünüsü maʼin wayuu maaʼulu. Nnojotsü ponuin waaʼin tia süka süküjüin tü Wiwüliakat aküjülin alawaa otta emeejülin Satanaa, chi aluwataakai saaʼu wayuu manoujüinsat (1 Tim. 2:14; 1 Juan 5:19). Alüʼütsü maʼin süpüla sajaʼttinnüin tü kasa nuluwataakalü aaʼu Satanaa, müshijeseʼe jashichishaatain maʼin nia «süka nütüjaain saaʼu sünain sülüʼülüin nükalia süpüla ataʼünnaa» (Alat. Map. 12:12). Makalaka naküjüin maʼin alawaa na wayuu nuluwataakana aaʼu otta nemeejeein na aʼyataashiikana nümüin chi Maleiwa shiimainshikai.

² Eesü süküjünüle alawaa nachiki na aküjüliikana pütchi nüchiki Jeʼwaa otta süchiki tü nanoujakalü anain. Aküjünüsü tia suluʼu telewisoot, periódico otta Internet. Makalaka eein na wayuu jashichikana wamüin sutuma tia alawaa aküjünakat.

3. ¿Kasa akaaliinjeenaka waya süpüla nnojoliinjanain wemeejünüin?

³ Akatsaʼa eein süpüla nnojoliin wemeejünüin nutuma chi Yolujaakai. Süka jamüin, eesü wamaʼana tü Wiwüliakat akaaliinjaka waya süpüla wanoukteʼerüinjatüin wanee kasa (2 Tim. 3:16). Nüküjüin Pablo nemeejünüin süka alawaa noʼutku na anoujüshii chajanakana Tesalónica. Nüküjüin namüin nnojoliinjanain nashapataain aaʼin sutuma sünüiki wanee wayuu aküjaka alawaa (2 Tes. 2:1, 2). ¿Kasa shikirajaka anain waya tia nümakat Pablo? ¿Kasa waaʼinrajatka süpüla sükaaliinjüinjanain waya maaʼulu?

4. (1) ¿Kasa nüküjaka Pablo namüin na anoujüshii chajanakana Tesalónica süchiki tü nükaliakat Jeʼwaa? (2) ¿Kasa aküjünaka wamüin maaʼulu?

⁴ Sünain tü palajatkat karaloukta nüshajaka Pablo namüin na chajanakana Tesalónica, nüküjüin namüin tü naaʼinrajatkat sümaʼinruʼu naʼatapüin nükalia Jeʼwaa. Nnojotsü keeʼireein naaʼin müinjanain naya maʼaka naaʼin  na wayuu meʼraajüinkana Maleiwa. Makalaka nüküjüin namüin eejüinjatüin naaʼin süka neʼraajüin Maleiwa. «Jiakana, [...] eeinjatü jaaʼin sünain nüntajachin chi Senyotkai süpüla laülaainjatüin jaaʼin sünain süpüshua tü jaaʼinrakat», müshi nia namüin (paashajeʼera 1 Tesalónica 5:1-6). Maaʼulu yaa, waʼatapüin sajaʼttinnajatüin Babilonia tü Müleʼukat, tia shia süpüshuaʼa tü iküleesia nnojotkat shiimain. Wanaa sümaa sülatüin tia, oʼtteerü tü nükaliakat Jeʼwaa. Watüjaaitpa aaʼu tü naainjüinjatkat Jeʼwaa süpüla shikeraajüin tü keeʼireekat naaʼin. Akaʼaya suluʼu tü outkajaaleekat, aküjünüsü wamüin tü waainjüinjatkat süpüla ayatüinjatüin eejüin waaʼin. Woonoole sümaa tü münakat wamüin, icheena waya nünain Jeʼwaa otta eejeerü waaʼin waneepia sünain tü anasükat süpüla waaʼinrüinjatüin shia jee sünain tü mojusükat süpüla wayouktüinjatüin shia (Heb. 5:14).

5, 6. (1) ¿Kasa nüküjaka Pablo suluʼu tü chiiruaajatkat karaloukta namüinjatka na nuwalayuu chajanakana Tesalónica? (2) ¿Kasa naainjüinjatka Jesuu soʼu palitchon kaʼi? (3) ¿Kasa wasakirüinjatka anain waaʼin?

⁵ Süchikijee nüshajüin Pablo tü palajatkat karaloukta namüin na nuwalayuu chajanakana Tesalónica, nüshajüin waneʼeya. Sünain karalouktakat tüü, nüküjüin süntajatüin tü müliaa müleʼukat. Naashin Pablo, nüntapeena Jesuu, süsaleena naainjala, «na meʼraajüinkana chi Maleiwakai [otta na nnojoliikana] kapülain naaʼin nüchiki chi Oʼtteʼerüikai chi Wasenyotsekai Jesucristo» (2 Tes. 1:6-8). Suluʼu tü kapiitulokat piama, nüshajüin Pablo tü namakat na nuwalayuukana. Antayaasü naaʼinruʼu tü nükaliakat Jeʼwaa (paashajeʼera 2 Tesalónica 2:1, 2). Na anoujüshiikana nükalioʼu Pablo, nnojotsü nayaawatüin saaʼu tü naaʼinrakat Maleiwa süpüla shikeraajüinjatüin tü nüchekakat. «Cheʼojaayülia wamüin ekirajünaa sünain tü nüchekakat chi Maleiwakai wapüleerua, je cheʼojaayülia wamüin aapinnaa süka nünüiki. Otta soʼuweena wane kaʼi, nnojoleerü cheʼojaain shia wamüin», müshi Pablo namüin (1 Cor. 13:9, 10). Ichesü maʼin nanoula na anoujüshiikana sutuma tü nüshajakat Pablo, Pedro otta waneeinnua anoujüshii chainjanaka iipünaa.

⁶ Süpüla nunoukteʼerüinjatüin Pablo tü jülüjakat naaʼin na anoujüshii eejanakana soʼu nükalia, nüküjüin namüin eeinjanain na wayuu ekirajakana alawaa süpülapünaa süntüin tü nükaliakat Jeʼwaa otta eeʼiyataainjachi «chi Eʼrüikai Wayumüin». * Süchikijee  tia, oukta meenia nutuma Jesuu napüshuaʼa na emeejünakana süka alawaa. ¿Jamüsü sülatüinjatka namüin tia? Nüküjüin Pablo amülouijeenain naya «saaʼu nayouktüin paala tü shiimüin nümakat chi Maleiwakai» (2 Tes. 2:3, 8-10). Anashii müleka wasakirüle waaʼin: «¿Kojutsüche tamüin tü shiimainkat nüchiki Maleiwa? ¿Taashajeʼerüinche tü pütchi apansaajinnakat suluʼu Aapiria Wayuu otta tü suluʼukat waneeirua karaloukta aluwataanaka wamüin?».

7, 8. (1) ¿Kasa maa nakatalaaka atuma na anoujüshiikana nükalioʼu Pablo? (2) ¿Jaralii na waaʼinmajüinjanakana oulia wakuwaʼipa?

⁷ Nnojotsü shiain neʼe nakatalaain atuma na anoujüshiikana tü alawaa ekirajünakalü anain. ¿Kasa maa nakatalaaka atuma na anoujüshiikana nükalioʼu Pablo? Müshi Pablo nümüin Timoteo: «Chi wayuu eekai niʼitaain naaʼin sünain neerü, naaʼinreerü kasa eekai eein shiiʼiree washirüinjachin nia» Naashin Pablo, eepuʼusü wayuu anoujüsü eekai «sükatalaain suulia tü sünoulakat» otta Mojushaatasü maʼin saaʼin sutuma tia (1 Tim. 6:10). Wanee kasa nakatalaaka atuma na anoujüshiikana shia sutuma tü kasa mojusü ojuʼitakat nüleʼeruʼujee wanee wayuu (Gal. 5:19-21).

⁸ Watüjaaitpa aaʼu jamüin nüküjaka Pablo namüin na anoujüshii chajanakana Tesalónica eeinjatüin naaʼin noulia na wayuu ekirajakana alawaa. Naʼakajee na anoujüshiikana, eejana wayuu ekirajaka alawaa «shiiʼiree noushikajaainjanain na anoujashiikana süchiirua» (2 Cor. 11:4, 13; Aluw. 20:30). Anasü nünüiki Jesuu nachiki na anoujüshii chajanakana Éfeso süka najünajaain namaʼanajee chi wayuu eekai kamaʼüralin. Nayaawata aaʼu ekirajüliin alawaa na wayuu ajünajaanakana (Alat. Map. 2:2). Makalaka nümüin Pablo namüin na anoujüshii chajanakana Tesalónica: «Tawalayuwaa, sükajee tajütüüshin nütüma chi Wasenyotsekai Jesucristo, taluwataain jooluʼu jia sünain nnojolüin wanaawajiraain jaaʼin namaa na juwalayuu akulajaakana aaʼin sünain aʼyatawaa süka moonooloin naya sümaa tü wekirajapüʼükat anain jia» (2 Tes. 3:6, 10). Nnojoire anain süpüla naʼaleewajaanüin amaa wanee wayuu eekai nukulajaain aaʼin sünain aʼyatawaa, ¡nialeekajaʼa wanee wayuu eekai nikirajüin sünain alawaa, nnojoishi aʼaleewajaanüinjachin amaa! Mojusü aʼaleewajawaa namaa wayuu eekai müin nakuwaʼipa. Waaʼinmajüinjatü wakuwaʼipa noulia maaʼulu yaa (Prov. 13:20).

9. ¿Jamüsü waaʼinmajüinjatka wakuwaʼipa nuulia chi wayuu ekirajakai süchiki wanee kasa nnojotka suluʼuin tü Wiwüliakat?

⁹ Alüʼütsü maʼin tü müliaa müleʼukat otta tü kaʼi najaʼttirajatkalü oʼu Maleiwa tü kasa nuluwataakalü aaʼu chi Yolujaakai. Makalaka jülüjüinjatüin maʼin waaʼin tü aküjünakat namüin na anoujüshiikana nükalioʼu Pablo. Nnojotsü anainjatüin neʼe waaʼin sutuma anamiashaatain Maleiwa wamüin, waaʼinrüinjatü tü keeʼireekat naaʼin. Nnojorüle waaʼinrüin tia, eesü süpüla nnojoluin katüin woʼu waneepia yaa saaʼu tü Mmakat jee shiale chaa iipünaa (2 Cor. 6:1, NM). Waaʼinmajüinjatü wakuwaʼipa nuulia chi wayuu ekirajakai süchiki wanee kasa nnojotka suluʼuin tü Wiwüliakat jee chi mojukai anüiki süchiki tü nupueulosekat Jeʼwaa (2 Tes. 3:13-15).

10. ¿Kasa pütchi nachecheraainjatka achiirua na anoujüshii chajanakana Tesalónica?

¹⁰ Nüküjüin Pablo namüin na nuwalayuukana katsüinjatüin naaʼin sünain anoujaa. Achecheraainjana maʼin naya süchiirua tü pütchi ekirajünapuʼukalü anain naya (paashajeʼera 2 Tesalónica 2:15). ¿Kasa pütchi nikirajapuʼuka anain naya? Nnojotsü shiain tü alawaa shikirajakalü anain tü iküleesia nnojotkat shiimain. Shia tü kasa nikirajakalü anain Jesuu, tü nikirajakalü anain Pablo otta waneeinnua anoujüshii waneepiakana  nümaa Maleiwa. Süpüshi tü pütchi nekirajakalü anain suluʼusü shia tü Wiwüliakat. Müshi Pablo namüin na nuwalayuu chajanakana Corinto: «Talatüsü maʼi taaʼin süka nnojolüin motüin jaaʼin tü kasa anasü taaʼinrapüʼükat jaʼaka, je süka ayatüin jia sünain jünoujain tü shiimüinkat» (1 Cor. 11:2). Neʼitaainjatü naaʼin na anoujüshiikana sünain tia pütchikat süka nümaʼanajeejatüin shia Maleiwa.

11. ¿Jarat tü piamasü kasa eekat süpüla sülatüin wamüin?

¹¹ Suluʼu tü karalouktakat Hebreokana, nüküjüin Pablo süchiki piamasü kasa amalajaaka atuma nunoula wanee wayuu otta nuuʼulaaka atuma suulia anoujaa (paashajeʼera Hebreokana 2:1; 3:12). Naashin Pablo eesü süpüla seemiajaain tü wanoulakat otta wooʼulaain suulia anoujaa nünain Jeʼwaa. Jamüshijaʼa wanee wayuu eekai suluʼuin wanee anua sotpaʼa süchi, eesü süpüla nnojoluin nütüjaain saaʼu suʼunajachoin nümaa tü anuakat. Akatsaʼa nütüjaʼaleein saaʼu wattaleepa nia. ¿Jama niale niakai ojunaka süchiki tü anuakat? Nieechi wattaka atuma tü anuakat. Müsia tü alatakat nümüin chi wayuu emeejünakai otta chi eemiajaakai anoula.

12. ¿Kasa eeka süpüla seemiajaain atuma wanoula?

¹² Emeejünüshii noʼutku na anoujüshii chajanakana Tesalónica. ¿Jama wayakana, eesüche süpüla sülatüin wamüin tia? Jülüjüle maʼin waaʼin tü kasa keejiakat wamüin, waneepiale waya sünain tü kanüliakat redes sociales, sünain aashajeʼeraa otta aluwanaajaa mensaaje jee shiale jülüjüin maʼin waaʼin tü naainjakat na ashaittüliikana, eesü süpüla nnojoluin eejüin waaʼin otta seemiajaain wanoula. Akaʼaya waashajaapa nümaa Jeʼwaa, meeʼiratüinjeerü tü wanüikikat, nnojoleena waya ekirajaain sünain tü Wiwüliakat, nnojoleena waya oʼunüin sünain tü outkajawaakat otta nnojoleena waya ojuʼitüin sünain aküjaa pütchi. ¿Kasa waaʼinrajatka süpüla nnojoliinjanain wemeejünüin?

13. (1) ¿Jameerü sünüiki wayuu naashin chi aluwataaushikai Pedro? (2) ¿Kasa jülüjüinjatka waaʼin süpüla icheinjatüin wanoula?

¹³ Süpüla icheinjatüin wanoula, jülüjüinjatü waaʼin sülüʼülüin süpüla sajaʼttinnajatüin tü kasa nuluwataakalü aaʼu Satanaa. Nnojoliinjana waya aʼaleewajaain namaa na nnojoliikana anoujüin sünain sülüʼülüin süpüla sajaʼttüin tü kasa mojusükat. Müshi chi aluwataaushikai Pedro: «Wainmeerü wayuu eekai kaleʼeruʼuin süchiki kaainjalaa. Nemeʼerainpaleena jia saaliijee tü jünoulakat sünain maa jümüin: ‹¿Pansaayaasükalajeʼe tü namakat na nünüikimaajanakana Maleiwa sünain niitaainjachin Cristo? ¿Jalakaʼa nia? Nnojotsü kasain eeʼiranajaayaain süchikijee ouktüin na watuushinuukana. Müsü wanaawakai saaʼin wamüin kasa süpüshua maa aka paala sümaiwa sükumajaiwaʼaya tü mmakat›, meena naya» (2 Ped. 3:3, 4). Süpüla jülüjüinjatüin waaʼin sülüʼülüin süpüla sajaʼttinnajatüin kasa mojusü, waashajeʼerüinjatü otta wekirajaainjatü anain tü Wiwüliakat weinshi. Kakaliairü aküjünüin nachiki eeinjanain na ekirajaka alawaa otta ayatayülia müin shia maaʼulu. Ayatayüiya «chi Eʼrüikai Wayumüin» sünain aainjaa kasa mojusü namüin na aʼyataashiikana nümüin Maleiwa. Makalaka jülüjüinjatüin maʼin waaʼin sülüʼülaain tü nükaliakat Jeʼwaa (Sof. 1:7).

14. ¿Jamüshii wojuʼitajanaka waneepia sünain aküjaa süchiki tü pütchi anasükat?

¹⁴ Süpüla eeinjatüin waaʼin sünain tü wanoulakat otta nnojoliinjanain wemeejünüin süka alawaa, ojuʼitajana waya waneepia sünain aküjaa süchiki tü pütchi anasükat. Jesucristo, chi nekiipüʼükai na anoujüshiikana, nuluwataain na nikirajüinkana süpüla nekirajüinjanain na wayuukana sainküin tü mmakat. Noonoole sümaa tü nümakat Jesuu, icheerü tü nanoulakat (Mat. 28:19, 20). Süpüla waaʼinrüinjatüin tia, aküjüinjana waya pütchi sümaa talataa aaʼin.  ¿Aküjüshiiche pütchi mojusheeka na anoujüshii chajanakana Tesalónica? Naashin Pablo, kacheʼeinjana waya nümüin chi naaʼinkai Maleiwa otta nnojotsü mojutüinjatüin wamüin tü aküjaakat pütchi (1 Tes. 5:19, 20, NM). Akaʼaya tü pütchi waküjakat, eejüsü waaʼin sutuma.

15. ¿Kasa eeka süpüla wekirajaain anain soʼu tü Ai Waʼwaajakalü oʼu Maleiwa sümaa Wapüshi?

¹⁵ Nakaaliinjüin maʼin nachonnii otta naʼwayuuse na wawalayuukana süpüla natüjüinjanain aküjaa pütchi. Wanaa sümaa nekirajaain sümaa napüshi, eeshii na ekirajaakana sünain tü nanüikinjatkat sünain aküjaa pütchi. Eeshii süpüla wekirajaain sünain tü kasa kamalainkat namüin na wayuu achekakana tü pütchikat. Wekirajaain sünain tü pütchi waküjüinjatkat namüin wouyantapa nepialuʼumüin, tü pütchi natüjaweekalü aaʼu otta jalapüshin jimataka oʼu naya nepialuʼu. Eeshii wawalayuu yapaka atuma tü ekirajaanajatkalü anain suluʼu tü outkajaaleekat otta tü nanüikinjatkat nayalerapa najapü. ¿Eesüche süpüla müin sukuwaʼipa watuma? Wayalerüle wajapü sünain tü outkajawaakat, katchinjeerü wanoula otta nnojoleena waya emeejünüin süka alawaa (Sal. 35:18). Waʼwaajüle Maleiwa sümaa wapüshi, nnojoleerü waküjüin wanee kasa nnojotka suluʼuin tü Wiwüliakat otta nnojoleerü woʼtchejaain amaa tü wanoujakalü anain.

16. ¿Kasa jülüjaka naaʼin na chainjanakana iipünaa süpüla nayaawatüinjatüin saaʼu wanee kasa otta nnojoliinjanain nemeejünüin?

¹⁶ Eeirü sükalia nutuma Jeʼwaa sünain apansaajiraa sümüin tü nupueulosekat jamaluʼuluin wanee pütchi suluʼujee tü Wiwüliakat. Jülüjüle waaʼin tia pütchikat, weʼitaajeerü waaʼin sünain naapeerüin wamüin Jeʼwaa kasa anasü. Na chainjanakana iipünaa, aluwataainjana nümaa Jesuu. Süka jülüjüin naaʼin tia, atüjüshii naya süpüleerua nayaawatüin saaʼu wanee kasa otta nnojoishii emeejünüin süka alawaa. Müsü namüinjatkai saaʼin tü pütchi nüshajakat Pablo namüin na anoujüshii chajanakana Tesalónica, tü makat mayaa: «Aapüshi analuʼut taya jaaʼu waneepia nümüin chi Maleiwakai. [...] Saaʼu joonooinapain sümaa tü shiimüin nünüikikat chi Maleiwakai, akatannüshii jia nünainmüin nütüma chi Naaʼinkai suulia kaainjalaa» (2 Tes. 2:13).

17. ¿Jamüsü katchinka waaʼin sutuma tü pütchi suluʼukat 2 Tesalónica 3:1-5?

¹⁷ Na kepiainjanakana waneepia saaʼu tü Mmakat, jülüjüinjatü naaʼin nakuwaʼipa suulia nemeejünüin süka alawaa. Kepiainjachire pia saaʼu tü Mmakat, katchinjeerü paaʼin sutuma tü nümakat Pablo namüin na anoujüshii chajanakana Tesalónica (paashajeʼera 2 Tesalónica 3:1-5). ¡Waapüin tü analuʼutkat nümüin Jeʼwaa saaʼu nütütüleʼerüin waaʼin sükajee pütchikat tia! Saashin tü karalouktakat Tesalónica, nnojotsü jülüjüinjatüin waaʼin wanee kasa nnojotka suluʼujeejatüin tü Wiwüliakat. Süka sülüʼülaain maʼin süpüla sajaʼttajatüin tü kasa mojusükat, ¡anashaatasü maʼin wamüin tü pütchi wekirajaaitpakalü anain!