Pejesü Betania sünain Jerusalén, eesü maʼaka apünüin «kilómetro» (Juan 11:18). Chajachi ayuuijaain jee ouktüin Lázaro, chi naʼaleewainkai Jesuu.

Naapapa Jesuu süchiki ouktüin Lázaro, müshi nia namüin na nikirajüinkana: «Chi watünajutkai Lázaro, atunküshi nia. Chainjachikaʼa joo taya sünain achijiraa nia» (Juan 11:11). Süka nnojoluin nayaawatüin saaʼu tü nümakat Jesuu, müshi nia namüin: «Ouktüichipa Lázaro» (Juan 11:14).

Pienchi kaʼi süchikijee niʼitaanüin Lázaro, antüshi Jesuu chaa Betania süpüla nümülialüin saaʼin Marta, nushunuu chi müliashiikai. Sümakalaka Marta nümüin Jesuu: «Müleka yaajachireje pia, nnojoishije ouktüin chi tawalakai» (Juan 11:​17, 21). Nümakalaka Jesuu sümüin: «Taya atüjaka osoʼireʼeraa saaʼin wayuu. Chi eekai nünoujain tanain, jaʼitaichi ouktüin, kateerü noʼu nüchikuaʼa tatuma» (Juan 11:​25, NM).

Süpüla sunoujüinjatüin wayuu sünain tü nümakat Jesuu, müshi nia: «Lázaro, pujuittaa yalajee yaa anooipaʼamüin» (Juan 11:43). Ojuʼitaa müshijaʼa Lázaro noʼupala na wayuukana.

Paala süpülapünaa süsoʼiraain naaʼin Lázaro nutuma Jesuu, nüsoʼireʼerüin naaʼin piamashii wayuu. Wanee wayuu nüsoʼireʼeraka aaʼin shia nüchon Jairo. Wanaa sümaa tia, atunküsü tü jintutkat naashin Jesuu (Lucas 8:51-53).

¿Jamüshii natunkaka naashin Jesuu na wayuu ouktüinnapakana? Nutunküle maʼin wanee wayuu, nnojotsü kasain nütüjaain aaʼu. Müsia neʼe tü alatakat nümüin wanee wayuu eekai ouktüin. Müshi nutunkakai aaʼin süka nnojoluitpain kasain alin nümüin otta nnojoluichipain müliain nia (Eclesiastés 9:​5, paashajeʼera tü pütchikat: «Tü ouktaakat müsü aka saaʼin sütunküle maʼin wayuu»). Na nikirajüinkana Jesuu nayaawata aaʼu kasain alatüin namüin na ouktüshiikana. Saashin tü karalouktakat Encyclopedia of Religion and Ethics, tü ouktaakat namüin na nikirajüinkana Jesuu, müsü aka saaʼin atunkaa maʼin otta tü woowirakat shia eere natunküin. *

Anasü waaʼin süka watüjaaitpain saaʼu nnojoluin müliain na wayuu ouktüinnapakana, atunküshii neʼe  naya. Watüjaaitpa aaʼu tü alatakat nümüin wanee wayuu ouktapa nia, makalaka nnojoliinjanain mmoluin waya seema tü ouktaakat.

Mayaapejeʼe anain atunkaa, nnojotsü analeein atunkaa waneepia. ¿Eeshiiche süpüla nachijiraain nachikuaʼa na wayuu ouktüinnapakana maʼaka nüchijiraain Lázaro otta tü nüchonkat Jairo?

Müshi Job wanaa sümaa sülüʼülaain nükalia süpüla anaajawaa: «Ouktüle wanee wayuu [...], ¿kateetche noʼu nüchikuaʼa?» (Job 14:​14, NM).

Müshi Job nümüin Jeʼwaa: «Puunejeechi taya otta asoukteechi taya. Keeʼireesü maʼin paaʼin paainjüin shia süka pukumajalain taya» (Job 14:​15, NM). Niʼitaain maʼin naaʼin Job sünain keeʼireein naaʼin Jeʼwaa nüchijirüin nia nüchikuaʼa. ¿Amülasüche niʼitaain naaʼin Job sünain tia? Nnojorüleejaʼa.

Sutuma naapüin Jeʼwaa chi naaʼinkai nümüin Jesuu, nüsoʼireʼerüin naaʼin na wayuukana. Müsü nünüiki Jesuu suluʼu tü Wiwüliakat: «Eesü tamaʼana tü shiyaaweinkat tü Hadeskat tü süpüleekat tü ouktüsükalüirua» (Alateetkat Mapeena 1:18). Sükajee tia yaawekat, nujutalüinjatü shirouse tü woowirakalüirua maʼaka nujutalüin tü woowira eʼitaanakalü aluʼu Lázaro.

Kojuyatua süküjüin tü Wiwüliakat süsoʼiraainjatüin saaʼin wayuu süchikuaʼa. Müshi wanee aapiee nümüin Daniel, chi nünüikimaajachikai Maleiwa: «Eemeraajeechi pia, akaisaʼa pütamaajeechin püchikuaʼa mapeena» (Daniel 12:​13, NM). Müshi Jesuu namüin na saduceokana otta namüin na shikiipüʼükana tü iküleesia nnojoliika anoujüin sünain susoʼiraajeerüin saaʼin wayuu süchikuaʼa: «Nnojotsü jiyaawatüin saaʼu tü ashajuushikat suluʼu tü nüchikimaajatkat Maleiwa. Je nnojotsü jütüjaain naaʼu Maleiwa sünain pülashaatain maʼi nia» (Mateo 22:​23, 29). Müshi chi aluwataaushikai Pablo: «Otta tayaʼyaa, anoujashi [...] sünain süsoʼiraajeerüin aaʼin tü wayuu ouktüsükalüirua, makat aka wayuu eekai saaʼinrüin tü anasükat otta türa eekai saaʼinrüin tü mojusükat» (Aluwataaushikana 24:15).

¿Joujeerü süsoʼiraaka saaʼin wayuu eekai saaʼinrüin tü anasükat otta türa eekai saaʼinrüin tü mojusükat? Maʼaka nüküjüin chi aapieekai nümüin Daniel, asoʼiraajeerü naaʼin mapeena. Sunouja anainrü Marta nüsoʼiraainjachin aaʼin Lázaro mapeena (Juan 11:​24, NM).

Tü pütchi mapeena sümakat tü Wiwüliakat shia wanaapünaa sümaa nuluwataain Jesuu. Müshi Pablo: «Aluwataainjachi [Kürisüto], waneʼereʼeya nuuʼulaain suulia aluwatawaa niyamütpa Maleiwa tü nüʼünüükalüirua. Nüsünneʼerüinjatü tü ouktaakat» (1 Corinto 15:​25, 26, NM). Choʼujaasü maʼin wachuntüin süpüla nüntirüinjatüin Maleiwa tü Nuluwataayakat otta süpüla saainjünüinjatüin tü keeʼireekat naaʼin yaa saaʼu tü Mmakat. *

Keeʼireesü maʼin naaʼin Jeʼwaa nüsoʼireʼerüin naaʼin na ouktüshiikana maʼaka nüküjüin shia Job. Naaʼinrapa Jeʼwaa tia, müiria nnojoluin eein tü ouktaakat otta nnojoleena müin na wayuukana: «¿Müichimaʼaleeichejeʼe wanee wayuu ouktapa nia?».