1, 2. ¿Jamüsü jülüjüinjatka maʼin waaʼin tü sümakat Salmo 45?

 EESHI wanee aluwataai pülashi amoʼushi süpüla nütkaainjachin süchiirua tü shiimainkat jee tü lotookalü akuwaʼipaa. Süchikijee najaʼlajeʼerüin na nüʼünüükana, kasaatshi nia sümaa tü nümüraajüinkat. Nnojoishi motuukain aaʼin nia sümaa nuʼwaajünüin süpüla kaʼika süpüshuaʼa. Tia, shia tü saashajaakalü achiki Salmo kapiitulo 45.

² Akatsaʼa nnojoluin shiain neʼe saashajaain achiki Salmo 45 tü alatakat nümüin wanee aluwataai anakai akuwaʼipa. Jülüjüinjatü maʼin waaʼin tü saashajaakalü achiki süka sünainpünaain shia tü wakuwaʼipakat maaʼulu otta tü wakuwaʼipainjatkat mapeena. Makalaka anain wekirajaale sünain tü sümakat Salmo 45.

3, 4. (1) ¿Jarat tü «kasa anashaatasü maʼin» waküjakalü achiki maaʼulu? ¿Jamüsü waaʼin sutuma? (2) ¿Kasa pütchi waküjaka «nüchiki wanee aluwataai»? (3) ¿Kasa waaʼinrajatka süpüla müin wanüiki «maʼaka saaʼin sukuwaʼipa nüshajia wanee wayuu atüjakai ashajaa»?

³ ( Paashajeʼera Salmo 45:⁠1.^[1]) Eesü wanee «kasa anashaatasü maʼin» talataka maʼin atuma naaʼin chi eeʼiraikai. Tia, shia nüchiki wanee aluwataai. Tü pütchikat «Talatüsü maʼin taaʼin» suluʼu hebreo, «poolotusü» jee «oposonojusü» maluʼulu. Müsüjeseʼe nüküjeein maʼin süchiki tü nütüjaakalü aaʼu otta müin nünüiki maʼaka saaʼin «sukuwaʼipa nüshajia wanee wayuu atüjakai ashajaa».

 ⁴ ¿Jama wayakana? ¿Waküjeeinche maʼin süchiki tü watüjaakalü aaʼu? Tü pütchi anasükat süchiki Nuluwataaya Jesuu shia wanee «kasa anasü maʼin» antaka suluʼumüin waaʼin. Analeesia maʼin aküjaa tia pütchikat soʼujee juyaka 1914. Süka jamüin, nnojoluin süküjünüin achiki wanee aluwataaya eeinjatka mapeena nutuma Maleiwa, shia aküjünaka achiki eeitpain tia aluwataayakat chaa iipünaa. Tia, shia tü pütchi anasükat süchiki Nuluwataaya Maleiwa waküjaka «sainküin mmakat süpüshua süpüla saapünüinjatüin sütüma wayuu süpüshua» (Mat. 24:14). ¿Talatüsüche waaʼin shiiʼiree waküjüin tia pütchikat? ¿Waküjüinche maʼin tü pütchi anasükat süchiki Nuluwataaya Maleiwa? Aküjüshii waya pütchi «nüchiki wanee aluwataai» maʼaka naainjüin shia chi eeʼiraikai. Waküjüin süchiki Nuluwataaichipain Jesuu suluʼu Nuluwataaya Jeʼwaa otta waküjüin namüin na wayuukana napüshuaʼa süpüla jüüjüüinjanain naya sümüin tia aluwataayakat (Sal. 2:​1, 2, 4-9, 12). Wanaa sümaa waküjüin pütchi sükajee tü Wiwüliakat, müsü wanüiki «maʼaka saaʼin sukuwaʼipa nüshajia wanee wayuu atüjakai ashajaa».

5. (1) ¿Kasa tü alanaʼaleekat maʼin nünain Jesuu? (2) ¿Kasa nüküjaka achiki Jesuu sümaa kemeʼeriain nünüiki? ¿Kasa waaʼinrajatka süpüla washatüin nukuwaʼipa?

⁵ ( Paashajeʼera Salmo 45:⁠2.^[2]) Nnojotsü aashajaain maʼin tü Wiwüliakat süchiki jamapuʼuin nuʼupünaa otta nütapaʼa Jesuu. Süka maainjalain jee mamojulain nia, wayuu «anashichoin maʼin». Tü alanaʼaleekat maʼin nünain Jesuu shia noonooin waneepia nümaa Jeʼwaa. Nnojotsü shiain süka wayuuin «anashichoin maʼin» nia. Nüküjüin tü pütchi anasükat süchiki Nuluwataaya Maleiwa sümaa kemeʼeriain nünüiki (Luc. 4:​21, 22; Juan 7:46). ¿Washatüinche nukuwaʼipa Jesuu sünain aküjaa pütchi? ¿Kemeʼeriasüche wanüiki sümüin wayuu waküjapa pütchi? (Col. 4:⁠6.)

6. ¿Kasa naaʼinraka Jeʼwaa süpüla anainjatüin nukuwaʼipa Jesuu süpüla kaʼika süpüshuaʼa?

⁶ Kojutüshi maʼin Jeʼwaa nümüin Jesuu. Makalaka anain maʼin nukuwaʼipa sünain aküjaa pütchi otta süchikijee naapajiraain nikii sünain ouktaa. Müshi chi aluwataaushikai Pablo: «Sünain wayuuin nia, nnojoishi yaletayaain nukuaippa suʼupala wayuu, ayatshia jüüjüüin nümüin Maleiwa sünain ouktajachin nia. Mayaainje mojutajachin nia sünain oʼutinnaa aaʼin sünain wane [wunuʼu lotusü], nnojotsü niyouktüin tü nüchekakat Maleiwa nüpüleerua. Je saaʼujee tü naaʼinrakat Cristo, eʼitaanüshi nia nütüma Maleiwa süpüla kojutüinjachin sütüma wayuu süpüshua. Aapünüsü laülawaa nümüin sünain kojutüinjachin nia sütüma wayuu noulia napüshua na sülaülashiikana mmakat, otta suulia kasakat süpüshua eekai eein. Nücheküin chi Maleiwakai süpüleerua süsapainyoʼukainjatüin wayuu süpüshua nümülatuʼumüin Cristo sünain neeʼiyatüin sünain kojutüinjachin nia natüma, na eekana katüin oʼu maaʼulu yaa ooʼulaka na ouktüinapakana, otta müshiʼiya natüma na aapiee chakana iipünaa. ‹Pia Wasenyotseka›, meena napüshua nümüin Jesucristo sümaa naʼwaajeenain chi Washikai Maleiwa sükajee tia» (Filip. 2:8-11). Süpüla anainjatüin nukuwaʼipa Jesuu süpüla kaʼika süpüshuaʼa, asoʼireʼennüsü naaʼin nutuma Jeʼwaa otta naapüin kataa oʼu waneepia nümüin (Roma 6:9).

7. ¿Kasa kojutüleeka maʼin anainjee Jesuu nutuma Jeʼwaa noulia na waneeinnua?

⁷ ( Paashajeʼera Salmo 45:​6, 7.^[3]) Sutuma kojutüin maʼin nümüin Jesuu tü lotookalü akuwaʼipaa otta nüʼürülain maʼin tü kasa mojutükalü atuma chi Nüshikai, nüneeküin nia Jeʼwaa süpüla niainjachin Aluwataain suluʼu tü Nuluwataayakat. Niʼyotuin Jeʼwaa naaʼu Jesuu «tü seita talatakalü atuma saaʼin wayuu» otta kojutüleeshia maʼin nia nutuma noulia na wanee nuuʼuliwoʼukana David aluwataaka saaʼu Judá. ¿Kasa tü kojutüleekat maʼin anainjee nia? Palajana, shia sutuma niain Jeʼwaa aneekaka Jesuu süpüla nuluwataainjachin; nüneekaleʼeinya nia süpüla niainjachin «chi sacerdote müloʼushikai» (Sal. 2:2; Heb. 5:​5, 6). Tü wanee kasa kojutüleekat maʼin anainjee nia, shia süka nüneekünüin nükajee chi naaʼinkai Maleiwa, nnojotsü oʼyotunüin seita saaʼu nikii. Tü  nuluwataayakat chejeʼewat chaa sirumatuʼujee, nnojotsü yaajeʼewalüin mmapaʼajee.

8. (1) ¿Jamüsü watüjaaka saaʼu naaʼinreerüin Jesuu tü anasükat? (2) ¿Jamüsü lotoko sukuwaʼipa nuluwataaya Jesuu?

⁸ Soʼu juyaka 1914, niʼitaain Jeʼwaa chi Nüchonkai sünain Aluwatawaa. Nnojotsü koʼuin nukuwaʼipa sümüin wayuu otta naaʼinreerü tü anasükat namüin na wayuu nuluwataakana aaʼu. Lotusü sukuwaʼipa nuluwataaya süka niain Jeʼwaa keʼinaajalain nia sünain aluwatawaa. Tü nuluwataayakat Jesuu, eejeerü süpüla kaʼika süpüshuaʼa. ¿Talatüshiche pia sutuma piʼyataain nümüin Jeʼwaa otta nümüin chi Aluwataai nüneekakai?

9, 10. (1) ¿Joujatü nijittaain Kürisüto tü nüchajaruutsekat niatapünaa? ¿Kasapülajatü naainjaka tia? (2) ¿Kasa naainjeetka Kürisüto mapa?

⁹ ( Paashajeʼera Salmo 45:⁠3.^[4]) Nuluwataain Jeʼwaa chi Aluwataai nüneekakai sünain ejittawaa nüchajaruutse niatapünaa. Sükajee tia, nuluwataain nia süpüla süsalainjanain nutuma napüshuaʼa na ayouktakana nuluwataaya Jeʼwaa (Sal. 110:2). «Pülashikalee», münüshi Kürisüto süka niain wanee Aluwataai matüjüinkai ayamünnaa. Nijittaain nüchajaruutse niatapünaa, soʼu juyaka 1914. ¿Kasapülajatü naainjaka tia? Süpüla niyamülüin Satanaa sümaa tü aapiee nümaajatkalüirua otta süpüla nujutüin naya chejee iipünaajee yaa saaʼumüin tü Mmakat (Alat. Map. 12:7-9).

¹⁰ Tia, shia neʼe suʼttia tü naaʼinrakat chi Aluwataaikai. Süka jamüin, isayüliain nüpüleerua süpüla «nüyamülüinjatüin» tü nüʼünüükalüirua (Alat. Map. 6:​1, 2). Najaʼlajeʼerüinjatü Jeʼwaa süpüshuaʼa tü kasa nuluwataakalü aaʼu Satanaa yaa Mmapaʼa. Nnojoleechi aainjüin kasa mojusü Satanaa otta tü yolujaakalüirua. Tü ajaʼttinnajatkat palajana shia süpüshuaʼa tü iküleesiairua nnojotka shiimain. Najaʼttireerü Jeʼwaa tia nakajee na poliitikokana (Alat. Map. 17:​16, 17). Süchikijee tia, najaʼttireerü Jesuu sukuwaʼipa tü nuluwataayakat Satanaa. Süpüla najaʼlajeʼeraleeinjatüin Kürisüto tü nüʼünüükalüirua, nujuteechi Satanaa otta tü yolujaakalüirua suluʼu tü ishikat. Süka jamüin, niain Kürisüto «chi aapiee laülaashikai saaʼu tü Ishikat» (Alat. Map. 9:​1, 11; 20:1-3). Wekirajaa sünain jameerüin sukuwaʼipa tia saashin Salmo 45.

11. ¿Jamaluʼulu nütkaain Kürisüto «süchiirua tü shiimainkat»?

¹¹ ( Paashajeʼera Salmo 45:⁠4.^[5]) Chi Aluwataaikai nnojoishi atkaain süchiirua mma jee süpüla laülaain nia saaʼu tü pueulokalüirua. Atkaashi nia «süchiirua tü shiimainkat, süchiirua tü lotookalü akuwaʼipaa jee nnojoluinjatüin tü pülaakalü aaʼin». ¿Jamaluʼulu nütkaain «süchiirua tü shiimainkat»? Nia neʼe Jeʼwaa anaka süpüla Aluwatawaa saaʼu kasa süpüshuaʼa. Tia, shia tü shiimain atkaanakalü achiirua. Naashin Satanaa, nnojoishi anain Jeʼwaa süpüla aluwatawaa, makalaka niʼrüin wayumüin nümüin. Soʼujeʼereʼeya tia, mojusü sünüiki tü yolujaakalüirua otta tü wayuu nümaajatkalüirua Satanaa süchiki nuluwataaya Jeʼwaa. Makalaka nütkaainjachin chi Aluwataai nüneekakai Jeʼwaa süpüla niiʼiyatüinjatüin niain neʼe Jeʼwaa anaka süpüla aluwatawaa saaʼu kasa süpüshuaʼa.

12. ¿Jamaluʼulu nütkaain chi Aluwataaikai süpüla «nnojoluinjatüin tü pülaakalü aaʼin»?

¹² Atkaashi chi Aluwataaikai süpüla «nnojoluinjatüin tü pülaakalü aaʼin». ¿Jamaluʼulu tia? Mayaapejeʼe niain chi Waneeshikai nüchoin Maleiwa, nnojotsü pülain naaʼin otta jüüjüüshi nia waneepia nümüin chi Nüshikai süka niain aluwataain saaʼu kasa süpüshuaʼa (Is. 50:​4, 5; Juan 5:19). Napüshuaʼa na wayuu nuluwataakana aaʼu chi Aluwataaikai, nashatüinjatü nukuwaʼipa. Nnojotsü pülayaainjatüin naaʼin otta oonooinjana naya nümaa Jeʼwaa süka niain aluwataain saaʼu kasa süpüshuaʼa. Naya müle kepiainjanakana saaʼu tü mma jeketkat na wayuu aainjakana tia (Zac. 14:​16, 17).

13. ¿Jamaluʼulu nütkaain Kürisüto «süchiirua tü lotookalü akuwaʼipaa»?

¹³ Wanee kasa nütkaakalü achiirua Kürisüto shia «süchiirua tü lotookalü akuwaʼipaa». Tia, shia tü nümakat Maleiwa süchiki tü kasa anasükat jee tü kasa mojusükat (Roma 3:​21, NM; Deut. 32:4). Müshi Isaías nüchiki Jesukürisüto: «Aluwataainjachi wanee aluwataai lotuinjachika aluwataaya» (Is. 32:​1, NM). Sutuma nuluwataaya Jesuu, eejeerü wanee «jeketü sirumatuʼu jee wanee jeketü mma waʼatapajaka» otta eeinjatü tü lotookalü akuwaʼipa suluʼu (2 Ped. 3:​13, NM). Napüshuaʼa na wayuu kepiainjanakana suluʼu tia mma jeketkat, oonooinjana sümaa tü nuluwataakalü anain Jeʼwaa (Is. 11:1-5).

14. ¿Kasa wayuu tü «kasa pülasü» naaʼinreetkat Kürisüto süka tü najapü nikiakat? (Piirakaa sümüin tü ayaakuaa suluʼukat süpana 8.)

¹⁴ Awateʼetshi neʼejena chi Aluwataaikai sümaa nülüʼüjüin nüchajaruutse niatapünaa (Sal. 45:3). Akatsaʼa antüitpain sükalia süpüla niyuʼlüinjatüin nüchajaruutse süka tü najapü nikiakat. Naashin chi eeʼiraikai, aaʼinreechi Jesuu «kasa pülasü» (Sal. 45:​4, NM). Nütkaapa Jesuu süpüla najaʼlajeʼerüinjatüin tü kasa nuluwataakalü aaʼu Satanaa, aaʼinreechi «kasa pülasü» shiyoʼujaainjatka atuma naaʼin na nüʼünüükana. Nnojotsü watüjaain maʼin saaʼu jameerüin sukuwaʼipa tia nutuma. Akatsaʼa ayoʼujaajeerüin maʼin naaʼin na nnojoliikana jaa müin sümüin tü nümakat Maleiwa otta na nnojoliikana jüüjüüin nümüin chi Aluwataaikai ( paashajeʼera Salmo 2:​11, 12 a). Wanaa sümaa naashajaain Jesuu süchiki sajaʼlajaainjatüin kasa mojusü, müshi nia: «Ayoʼujaajeerü saaʼin wayuu süpüshua [...], süka nnojolüin sütüjaain saaʼu tü oʼotaainjatkat yaa saaʼu mmakat». Shiasaʼa nümaka süchikijee tia: «Soʼuweena kaʼikat tia, shiʼreechi taya wayuu, tayakai, chi Shipayakai Wayuu, sünain antaa saʼaka wane siruma. Anashaateerü maʼi tü tantiakat, süka tanteechin sünain pülashin je sünain eʼitaaushin nütüma Maleiwa süpüla aluwatawaa» (Luc. 21:25-27).

15, 16. ¿Jaralii na surulaat nümaainjanakana Kürisüto sünain tü atkawaakat?

¹⁵ Suluʼu tü karalouktakat Alateetkat Mapeena aküjünüsü sünain nüntajachin chi Aluwataaikai sünain pülashin nia. Müshi chi aluwataaushikai Juan: «Teirakaakalaka. Teʼrakalaka saaʼin jutatüin chaa iipünaa eere chi Maleiwakai. Eweeta müshia wane ama kasuutai maʼi. Je nünülia chi naajuchikai, «Lotokai Akuaippa» münüsü. Lotüsü maʼi nukuaippa sünain kasalajanain saainjala wayuu sümüin nütüma, je sünain nütkaain sümaa tü nüʼünüükalüirua. Je na nusurulaatsekana, keʼejenajüshii naya ama kasuutannuu. Kasheʼinjashii naya kuluulu «lino» anashaatasü, kasuusü je wulesü maʼi. Otta chi amaajuchikai, ojuittüsü wane chajaruuta kasasü maʼi naanüküluʼujee, tü nükanajeetkat aka na nüʼünüükana sainküin mmakat süpüshua. Je nuluwataapa saaʼu wayuu, meʼrujeechi amüin. Eʼitaaushi nia nütüma Maleiwa süpüla süsalainjatüin saainjala wayuu nütüma, chi Maleiwa jashichikai maʼi sümüin tü kaainjarannuukat» (Alat. Map. 19:​11, 14, 15).

¹⁶ ¿Jaralii na surulaat nümaainjanakana Kürisüto sünain tü atkawaakat? Wanaa sümaa nijittaain nüchajaruutse niatapünaa süpüla nujutüin Satanaa otta tü yolujaakalüirua chaa iipünaajee, eejana na aapieekana nümaa (Alat. Map. 12:7-9). Sutuma tia, watüja aaʼu eejeenain naya nachikuaʼa nümaa Kürisüto soʼu Armagedón. ¿Jara maa eeinjatka saʼaka tü nusurulaatsekalüirua Kürisüto? Müshi Jesuu namüin na anoujüshii chainjanakana aluwataain nümaa chaa iipünaa: «Je chi eekai nükanajuuin chi Kamaʼüraikai nütüma sümaa ayatüin naaʼinrüin tü tachekakat nüpüleerua süntaleepaʼa sükalia tü sajaʼlajaainjatkat oʼu kasakat süpüshua, laülaajeechi nia tatüma saaʼu wayuu sainküin mmakat süpüshua. Maa aka niʼitaain taya chi Tashikai süpüla laülawaa sünain nümüin tamüin: ‹Teʼitaain pia süpüla aluwatawaa saaʼu wayuu süpüshua sünain meʼrujuinjachin amüin pia. Eekai shiʼrüin pümüin suʼunnaa puluwataain, asaichijaweerü pütüma maa aka saaʼin amüchi eekai süsottüin› » (Alat. Map. 2:​26, 27). Makalaka eejeenain na anoujüshii chainjanakana iipünaa naʼaka na nusurulaatsekana Kürisüto. Asoʼiraajeerü naaʼin chaa iipünaa süpülapünaa tia atkawaakat. Eeinjana naya nümaa Jesuu naainjapa «kasa pülasü» süpüla najaʼttirajatüin tü mojulaasükalüirua.

17. (1) ¿Jamaluʼulu joyotuin Kürisüto naaʼu wanee ama kasuutai? (2) ¿Kasa kayaakuayaaka tü chajaruutakat otta tü uraichikat?

¹⁷ ( Paashajeʼera Salmo 45:⁠5.^[6]) Amoʼushi chi Aluwataaikai, kasuutai chi neʼejenakai. Tia shiyaawasesü nütkaainjachin süchiirua wanee anaa, wanee atkawaa anaka noʼuluʼu Jeʼwaa (Alat. Map. 6:2; 19:11). Alüʼüjüshi nia chajaruuta sümaa uraichi. Müsü tü pütchikat: «Eweeta müshia wane ama kasuutai je wane wayuu naaʼu. Je chi naajuchikai, kajapuluʼushi wane uraichi sümaa jatüirua. Saapünakalaka joo nümüin chi amaajuchikai wane kotse maa aka nakotse na sülaülakana mma. Nuwateʼetkalaka maʼi chajee iipünaajee maa aka naaʼin wane surulaat eekai nüshutüinjachin saaʼu nüʼünüü süpüla nüyamülüinjatüin». Tü chajaruutakat otta tü uraichikat, shiyaakuayaasü  tü kasa nüyamülüinjatkalü aka Jesuu na nüʼünüükana.

18. ¿Kasa alatajatka sutuma kasainjatüin shiʼichi tü jatü nümaʼanakat chi Aluwataaikai?

¹⁸ Nüküjüin chi eeʼiraikai kasainjatüin shiʼichi tü jatü nümaʼanakat chi Aluwataaikai, tü nuʼutüinjatkalü aka naaʼin na nüʼünüükana otta nüyamülüinjatka aka wainma wayuu. Alateerü tia sainküin mmaka süpüshuaʼa. Müshi Jeremías süchiki tia: «Palasimuʼulaajeerü süpaʼapünaa tü mmakat süpüshuaʼa tü wayuu ouktakat nutuma Jeʼwaa» (Jer. 25:​33, NM). Akaʼaya nünüiki Juan süchiki tü alatajatkat, müsü mayaa: «Teʼrakalaka joo wane aapieekaʼiya shaʼwatüin chaa naaʼu chi kaʼikai sünain nuwoorolooin sümüin süpüshua tü samutkalüirua chaa iipünaa sünain maa: ‹Jüshakata jumaala sünainmüin wane ekawaa müleʼo maʼi yapasü jüpüla nütüma Maleiwa, jikaiwa asalaa, neʼiruku na aluwataashiikana, neʼiruku na sülaülashiikana surulaat ooʼulaka tü surulaatkalüirua, shiʼiruku ama ooʼulaka tü amaajutkalüirua, je shiʼiruku tü wayuukolüirua süpüshua, eekai achepchieein ooʼulaka eekai laülaain sümüiwa, eekai shiʼnnaajuushin ooʼulaka eekai meʼnnaajuuin›, nümakalaka» (Alat. Map. 19:​17, 18).

19. ¿Kasa naaʼinrajatka Kürisüto süpüla najaʼlajeʼeraleeinjatüin tü nüʼünüükalüirua?

¹⁹ Süchikijee najaʼlajeʼerüin chi Aluwataaikai tü kasa nuluwataakalü aaʼu Satanaa yaa saaʼu tü Mmakat, ayateechi awateʼerüin neʼejena süpüla niyamülüinjatüin tü nüʼünüükalüirua (Sal. 45:4). Najaʼlajeʼeraleeinjatü tü nüʼünüükalüirua sükajee nujutüin Satanaa otta tü yolujaakalüirua suluʼu tü ishikat. Yalainjana naya süttüin waneʼereʼeya nojuʼitüin süchikijee tü miitkat juya (Alat. Map. 20:​2, 3). Meechi ouktakai naaʼin Satanaa otta tü yolujaakalüirua süka nnojoleerüin naaʼinrüin kasa mojusü. Makalaka nnojoleerüin saainjinnüin wayuu kasa mojusü otta oonoojeerü nümaa chi Aluwataaikai. Süpülapünaa paʼaraiisüin tü Mmakat, eejeerü wanee kasa talateetka atuma saaʼin wayuu nümaa chi Aluwataaikai otta namaa na anoujüshii chainjanakana iipünaa. Wekirajaweerü anain kasain wayuu tia sünain tü wanee ekirajaayakat.