1. ¿Jamüshii kamaneeinjanaka waya namüin na wayuu waküjakana amüin pütchi? Püküja wanee shiyaawatia. (Piirakaa sümüin tü ayaakuaakat.)

CHAʼAYAA Fiyi, eejachi wanee wawala sümaa nuʼwayuuse sünain ounejawaa wayuu sünain tü Outkajawaakat eere Sotuin Waaʼin Ouktüin Jesuu. Yalajana naya yootuin sümaa wanee wayuu, shiasaʼa müin shiʼitaka tü juyakat naaʼu yalaʼaya. Naapaka chi wawalakai tü sombrilla nümaʼanajatkat sümüin tü wayuu naashajaakalü amaa. Talatüshii maʼin naya sutuma neʼrüin süntüin tü wayuukot sünainmüin tü outkajawaakat. Saashin tia wayuukot, nnojotsü sotuin saaʼin kasain aashajaanüin achiki sümaa. Shia ponoko maʼin saaʼin tü naainjakat na wawalayuukana sümüin. ¿Kasa naainjaka sümüin? Shia tü sümakat wanee pütchi oʼunirüinjatkat nakuwaʼipa na wayuukana.

2. (1) ¿Jarat tü pütchi oʼunirüinjatkat nakuwaʼipa na wayuukana? (2) ¿Kasa waaʼinrajatka süpüla weʼitaain suluʼu wakuwaʼipa tia pütchikat?

² ¿Jarat tü pütchi oʼunirüinjatkat nakuwaʼipa na wayuukana? Shia tü nümakat Jesuu: «Anasü müleka jaaʼinrüle tü anasükat sümüin wayuu, maa aka jücheküin saaʼinreein tü anasükat jümüin» (Mat. 7:12). ¿Kasa waaʼinrajatka süpüla weʼitaain suluʼu wakuwaʼipa tia pütchikat? Waainjüinjatü piamasü kasa. Anuu tü palajatkat: «¿Talateeiche taya naainjüle tamüin wanee wayuu tü  taainjakat?». Otta tü wanee shia tüü: waainjüinjatü namüin na wayuukana tü anakat namüin (1 Cor. 10:24).

3, 4. (1) ¿Jamüshii nnojoliinjanaka woonooin neʼe sümaa tü nümakat Jesuu namaapa waya na wawalayuukana? (2) ¿Jarat tü pütchi waashajaainjatkalü achiki?

³ Eeshiireʼe woonoole sümaa tia pütchikat namaapa waya na wawalayuukana sünain anoujaa. Naashin Jesuu, woonooinjatü amaa tia pütchikat namaapa waya napüshuaʼa na wayuukana, jaʼitainna waʼünüüin naya (paashajeʼera Lucas 6:​27, 28, 31, 35). Jülüja paaʼin wanee kasa: poonooinjachire sümaa tia pütchikat namaapa pia na püʼünüükana, ¿jamakaʼa nnojoliinjachika poonooin sümaa namaapa pia na wayuu püküjakana amüin pütchi? Wayuukana naainnua, kettaashii naya süpüla katüinjatüin noʼu (Aluw. 13:​48, NM).

⁴ Waashajaa süchiki pienchisü kasa jülüjüinjatka waaʼin sünain aküjaa pütchi: 1) ¿Jaralii waküjüinjanaka amüin pütchi? 2) ¿Jalainjana waya aküjüin pütchi? 3) ¿Joujainjana waya aküjüin pütchi? 4) ¿Jamüinjatü watuma suʼttia tü pütchikat? Jülüjüle waaʼin tia, kapüleerü waaʼin nakuwaʼipa na wayuu waküjakana amüin pütchi (1 Cor. 9:19-23).

5. ¿Jarat tü pütchi jülüjüinjatkat waaʼin waküjapa pütchi?

⁵ Waküjapa pütchi, eeshii yootule waya namaa wayuu natawaika akuwaʼipa. Naatawaisü tü kasa alatakat namüin (2 Crón. 6:29). Makalaka anain jülüjüle paaʼin pütchikat tüü püküjüinjachipa pütchi: «Tayaleje chi wayuu aküjünüinjachikai amüin pütchi, ¿tachekeetche müleka nüsaküle neʼe taya chi aküjüikai pütchi maʼaka naaʼin wanee wayuu eekai kepiain nüʼütpaʼa? ¿Shiataapa tacheküin nüsaküle taya maʼaka naaʼin wanee wayuu niʼraajüinkai?». Jülüja waaʼin tia pütchikat süpüla sotuinjatüin waaʼin naatawalin nakuwaʼipa na wayuukana.

6, 7. ¿Kasa waaʼinrajatka naashichijaale wamüin wanee wayuu?

⁶ Mamaneere wamüin wanee wayuu, nnojotsü anain «malakatche maʼin» wamamaatüle sümüin. Jülüjüinjatü waaʼin kaainjaraliin waya otta eewalin tü kaʼi wojuʼitirakalü oʼu wanee pütchi airuʼulu. Alatüsü tia wamüin wayakana anoujüshiikana eerejeʼe wachajaain sukuwaʼipa süpüla kemeʼeriain wanüiki (Col. 4:6; Sant. 3:2). Pujuʼitirüle wanee pütchi airuʼulu sümüin wanee wayuu süka mojuin maʼin pukuwaʼipa soʼu kaʼikat tia, ¿püchekeerü «malakatche maʼin» pümünüle amüin? Anasüje paaʼin müleka «jamataashi eera» pümünüle amüin, ¿aashimüin? Müinjatia wakuwaʼipa nanainmüin na wayuu waküjakana amüin pütchi.

⁷ Wantiraale nümaa wanee wayuu eekai naashichijaain wamüin, nnojo mojuin wanüiki nüchiki. Eesüleʼe müle nukuwaʼipa sutuma shapaain naaʼin sutuma tü niʼyataainkat shiale tü koleejiakat jee shiale sutuma tü nüchiʼrakat. Wainmainna na wayuu kamaneekana mapa namüin na aküjüliikana pütchi. Kamaneeshii na wayuukana süka nayain kamaneein palajana na aküjüliikana pütchi (Prov. 15:1; 1 Ped. 3:15).

8. ¿Jamüshii waküjüinjanaka pütchi sümüin wayuu maʼleekalia?

⁸ Aküjüna amüinrü pütchi wayuu eekai eein. Ojuʼitawaisü suluʼu tü rewiisütakat Aapiria Wayuu tü pütchikat: «Sunoukteʼerüin nakuwaʼipa tü Wiwüliakat». Sünain tia pütchikat, aashajaana achikichii wayuu anoukteʼeraka nakuwaʼipa. Eeshii eekai kaʼruwaraliipuʼuin, eekai nasüliin otta akaijüliin. Eeshii eekai poliitikoin, eekai shikiipüʼuin wanee iküleesia otta eekai naaʼinmaain maʼin tü naʼyataainkat. Eeshii eekai naainjapuʼuin kasa eekai yarüttüin noʼuluʼu Maleiwa. Süküjünaka tü pütchikat namüin, nekirajaaka sünain tü Wiwüliakat, neeʼirataka  nakuwaʼipa otta woutiisaka naya mapa. Soto waaʼin süpülajatüin wayuu süpüshuaʼa tü Nünüikikat Maleiwa (paashajeʼera 1 Corinto 6:9-11). Eesü süpüla sunoujüin wayuu maʼleekalia nünain Maleiwa (1 Cor. 9:22, 23).

9. ¿Jamüsü kojutüinjatka wamüin nepia na wayuu waküjakana amüin pütchi?

⁹ Aküjüshii waya pütchi sainküin piichi (Mat. 10:11-13). Mojushiipejeʼe wamüin shikerotule wayuu wepialuʼumüin jee shiale suluʼu wapaatiase, ¿aashimüin? Anasü waaʼin suluʼu wepia otta nnojoishii waya eʼnnüin sünain tü kasa waainjakat. Tia, shia tü keeʼireekat waaʼin. Müshiijaʼa neʼe na wayuukana, shia keeʼireeka naaʼin tia nepialuʼu. Kojutüinjatü wamüin nepia na wayuu waküjakana amüin pütchi. ¿Piiʼiyatüinche süka pukuwaʼipa kojutüin pümüin nepia na wayuukana? (Aluw. 5:42.)

10. ¿Jamüsü eeinjatka waaʼin sünain tü wakuwaʼipakat?

¹⁰ Maaʼulu yaa wainma wayuu eekai kamaʼüralüin, müsüjeseʼe eejüin naaʼin na wayuukana nepialuʼu (2 Tim. 3:1-5). Makalaka nnojoluinjatüin waainjüin wanee kasa eimmolojoka na wayuukana. Wantüle nipialuʼumüin wanee wayuu sümaa wataletüin tü miichoʼukot, nnojo wanaʼlaain suluʼupünaa tü wentaanakat jee nnojo waraittüin waya peesüʼütpünaa. Paainjüle tia eere püküjüin pütchi, eesü süpüla mojushiin shia namüin na wayuukana. Eeshi süpüla pülirajünüin. Mayaainjeʼe wachajaainjanain na wayuukana nepialuʼupünaa, ee waaʼin sünain tü wakuwaʼipakat (Aluw. 10:42). Anasü maʼin tü pütchi walüʼüjakalü achiki namüin na wayuukana otta weʼikajüin süchiki namüin süka keeʼireein waaʼin anain nakuwaʼipa (Roma 1:​14, 15). Weisalajüinjatpejeʼe wakuwaʼipa suulia waainjajüin wanee kasa eekai mojushiijeerüin namüin na wayuukana. Müshi chi aluwataaushikai Pablo: «Suulia mojujain sünüiki wayuu tamüin sünain nnojoluin nanoujain tü taküjakat namüin, taaʼinreein tü anasükat waneepia noʼupala» (2 Cor. 6:3). Kojutüle wamüin nepia na wayuu waküjakana amüin pütchi, kapüleerü naaʼin aapajaa tü pütchi weʼikajakalü achiki namüin (paashajeʼera 1 Pedro 2:12).

11. ¿Jamüsü keeʼireeka waaʼin motsoʼoin nümaʼa wanee wayuu sünain yootoo wamaa?

¹¹ Wayakana aküjüliikana pütchi nüchiki Jeʼwaa, kupaashii waya weinshi. Süpüla wekeraajüinjatüin tü waʼyataainkat, watüjaainjatü aaʼu jalapüshinjanain woʼttüin otta kasainjatüin woʼttüin anain palajana (Éf. 5:16; Filip. 1:10). Nüntüle wanee wayuu suʼunnaa maʼin tü waʼyataainkat, «nnojoleerü joo tojuteʼerüin tü taʼyataainkat», eeshii wamüle. Makalaka keeʼireein waaʼin motsoʼinjatüin nümaʼa sünain yootoo wamaa. ¿Kasa waaʼinrajatka süpüla weʼitaain suluʼu wakuwaʼipa sünain aküjaa pütchi tü nümakat wamüin Jesuu?

12. ¿Kasa waaʼinrajatka süpüla watüjaain saaʼu joujain anain antaa nepialuʼumüin na wayuukana?

¹² Acheküsü piyaawatüinjatüin saaʼu joujain maʼin anain antaa nepialuʼumüin na wayuukana. Jülüja paaʼin joujawalin jimatüin na wayuukana nepialuʼu. Pütüjaapa saaʼu, pünta soʼu tia kaʼikat otta soʼu tia oorakat. Suluʼupünaa waneeirua mma, jimatüshii na wayuukana aliikawai. Müle nakuwaʼipa na wayuukana eere kepiain pia, eeshi süpüla püküjüin pütchi sainküin piichi soʼu oorakat tia (paashajeʼera 1 Corinto 10:24). Aneerü pukuwaʼipa nutuma Jeʼwaa sünain aküjaa pütchi müleka pajayatüle na wayuukana soʼu tü oora anakat maʼin.

13. ¿Kasa maa waaʼinrajatka süpüla weeʼiyatüin namüin na wayuukana kojutüin naya wamüin?

¹³ ¿Kasa maa waaʼinrajatka süpüla weeʼiyatüin namüin na wayuukana kojutüin naya wamüin? Wantiraale nümaa wanee wayuu  eekai kamalain nümüin tü wanüikikat, eeshii süpüla yotuin waya nümaa, nnojoliipejeʼe kamaʼainjanain maʼin waya. Nnojotsü watüjaain aaʼu naainjüinjachire wanee kasa suʼunnaa tü oora wantakalü oʼu. Nüküjüle wamüin kupaain nia, waküja nümüin motsoʼoinjatüin wamaʼa. Motsoʼoinjatpajaʼa wamaʼa (Mat. 5:37). Süchikijee yootuin waya nümaa, wasakira nia sünain joujain anain nümüin waleʼejüin wachikuaʼa. Eeshii na wawalayuu makana namüin na wayuukana: «Seeshi taya tachikuaʼa, ¿jamüsüjaʼa saaʼin pümüin tayamaajüle pia süpülapünaa tantüin yaamüin?». Wantüle nepialuʼumüin na wayuukana soʼu tü oora anakat namüin, washatüin nukuwaʼipa Pablo, müshi nia: «Tü taaʼinrakat, nnojotsü tapülainjatüin tamüiwa, süpülajatü suʼtteʼennüinjatüin wayuu wainma» (1 Cor. 10:33).

14-16. (1) ¿Jamüshii waküjamaatüinjanaka namüin na wayuukana jamüin wantaka nepialuʼumüin? Püküja wanee shiyaawatia. (2) ¿Jamawaisü nüküjia pütchi wanee wawala alapalaaikai naaʼu na wawalayuukana?

¹⁴ Jülüjataa paaʼin piyamaajünüle nutuma wanee wayuu nnojoikai piʼraajüin. Nüsakiraka pia süchiki tü eküülü pikaajakat. Eeshijaʼa süpüla pümüin: «¿Jaraiche eera? ¿Kasache keeʼireeka naaʼin?». Eesüjaʼa paapajüle motsoʼo nünüiki jee mapa piyokojooin tü serulaatkat. ¿Jama piyamaajünüle nutuma wanee wayuu sümaa nüküjüin pümüin tü nünüliakat, nüküjüle pümüin niʼyataain süchiirua anainjatüin shiküin wayuu otta nüküjüle pümüin nükaaliinjeein pia? ¿Kaseerü paainjaka? Eesüjaʼa paapajüle tü nünüikikat. ¿Pücheküinche  yootuin pia nümaa wanee wayuu kojutükai atuma pia otta pansaakai atuma nünüiki? Müshiʼiya na wayuukana, nacheküin müinjatüin wakuwaʼipa namüin yootopa waya namaa nüchiki Maleiwa.

¹⁵ Suluʼu waneeirua mma, waküjatüjülüinjatü namüin na wayuukana jamüin wantaka namaʼanamüin. Anasü maʼin tü pütchi weʼikajaakat namüin na wayuukana otta shia wanee kasa nnojotka natüjaain aaʼu. Nnojotpejeʼe anain majaale neʼe wanüiki namüin na wayuukana: «Pülalejeʼe pia, ¿kasaje punoukteʼeraka sünainjee tü kasa mojusü eekat maaʼulu?». Anasü maʼin tü püsakirakalü anain süka pütüjaweein saaʼu tü suluʼukat naaʼin na wayuukana otta püküjeein namüin tü sümakat tü Wiwüliakat. Nnojotpejeʼe müin shia namüin na wayuukana, eeshii nameenüle: «¿Jaraikai wayuukai chii? ¿Kasakai naashajaaka achiki?». Shia anaka aluʼu wemeʼejüle naaʼin (Filip. 2:​3, 4, 5). ¿Kasa waaʼinrajatka süpüla wainküin tia?

¹⁶ Anuu tü naainjakat wanee wawala alapalaakai naaʼu na wawalayuukana. Nüsaküin palajana na wayuukana otta nüküjüin nünülia namüin. Süchikijee, naapüin tü karalouktakat ¿Pücheküin pütüjaain saaʼu tü shiimainkat? Nümaka namüin: «Weitajüinreʼe soʼukai karalouktakat tüü namüin na wayuukana. Aashajaasü süchiki aipiruasü kasa natüjaweekalü aaʼu na wayuukana. Anuu tü pümüinjatkat». Naashin chi wawalakai müshii nasanatkai aaʼin na wayuukana natüjaapa saaʼu jamüin wantaka nepialuʼumüin otta ayatüshiʼiya yootuin naya wamaa. Mawaisü nünüiki chi wawalakai namüin na wayuukana: «¿Eeiria püsakirüin anain pütchikat tüü?». Naneeküle na wayuukana wanee pütchi, nujutalüin tü karalouktakat süpüla nüküjüin tü sümakat tü Wiwüliakat. Nnojorüle naneeküin na wayuukana wanee pütchi, nia aneekaka tü pütchi naashajaainjatkalü achiki, nnojoishi nüpüleeruain aaʼin na wayuukana süpüla naneeküin wanee pütchi. Naatawaisü natuma na wayuukana süküjia tü pütchikat, püneeka tü anakat saaʼin pümüin. Suluʼu waneeirua mma, yootuinjana na wayuukana süpülapünaa naküjüin jamüin nantaka nipialuʼumüin wanee wayuu. Shia anaka aluʼu kapürale waaʼin nakuwaʼipa na wayuukana maʼaka wacheküin kapülain saaʼin wayuu tü wakuwaʼipakat. Kamaneeinjana waya namüin süpüla naapajüinjatüin wanüiki.

17. ¿Kasa waaʼinrajatka süpüla waainjüin namüin na wayuukana tü kasa anasü wachekakat saainjünüin wamüin?

¹⁷ ¿Kasa waaʼinrajatka süpüla waainjüin namüin na wayuukana tü kasa anasü wachekakat saainjünüin wamüin? Jülüjüinjatü waaʼin naatain nakuwaʼipa na wayuukana waneʼewai nakua. Kojutüinjatü wamüin tü nepiakat. Wajayatüinjatü tü oora jimatakalü oʼu naya süpüla waküjüinjanain pütchi namüin. Otta kapülainjatü waaʼin tü nakuwaʼipakat.

18. ¿Jamüsü waaʼinrüinjatka kasa anasü namüin na wayuukana maʼaka wacheküin saainjünüin wamüin?

¹⁸ Anashantasü maʼin waainjüle namüin na wayuukana tü kasa anasü wachekakat saainjünüin wamüin. Kamaneere waya namüin na wayuukana otta kapürale waaʼin nakuwaʼipa, neʼreerü naatain wakuwaʼipa, waküjeerü namüin tü sümakat tü Wiwüliakat otta naʼwaajeechi Maleiwa (Mat. 5:16). Waainjüle tia waküjapa pütchi, kamalainjeerü sümüin wayuu tü wanüikikat (1 Tim. 4:16). Talatüsü waaʼin sutuma naapaain sümaa tü pütchikat na wayuukana. Nnojorülejeʼe naapaain sümaa, nnojoluinjatü mojuin waaʼin (2 Tim. 4:5). Washata nukuwaʼipa chi aluwataaushikai Pablo, müshi nia: «Taaʼinrüin kasa süpüshuaʼa süpüleerua aküjaa pütchi anasü, süpüla sünainpünaain taya namaa na waneeinnua» (1 Cor. 9:​23, NM). Makalaka waaʼinrüinjatüin kasa anasü namüin na wayuukana maʼaka wacheküin saainjünüin wamüin.