Süka niain Jeʼwaa * kakumalain süpüshuaʼa tü kasakalüirua otta süka pülashin maʼin nia, nüsirü tü kasa mojusü alatakat naashin noʼutku na wayuukana. Akatsaʼa nnojoluin shiimain tia süka sümüin tü Wiwüliakat:

•  «Lotusü nukuwaʼipa Jeʼwaa sünain süpüshuaʼa tü kasa naaʼinrakat.» (Salmo 145:​17, NM.)

•  «Lotusü sukuwaʼipa süpüshuaʼa tü kasa naainjakat Jeʼwaa otta ayatüsia nikeraajüin tü nümakat; matüjüinsai nia aainjaa kasa mojusü.» (Deuteronomio 32:​4, NM.)

•  «Aipürai maʼin Jeʼwaa sümaa nümüliajülin wayuu.» (Santiago 5:​11, NM.)

Nnojoishi aainjüin kasa mojusü chi Maleiwakai. Naashin noʼutku na wayuukana, nia Maleiwa aainjiraka kasa mojusü tü wayuukalüirua. ¿Shiimainchejeʼe tia? Nnojo. Müsü tü Wiwüliakat nüchiki: «Chi wayuu eekai naaʼinreein kasa mojusü, nnojotsü anain müleka ‹nia Maleiwa kaainjalaka atüma taya› nümüle. Watüjaa aaʼuchi chi Maleiwakai sünain nnojolin kaainjaleein je sünain nnojolüin naaʼinrireein wayuu kasa mojusü» (Santiago 1:13). Matüjüinsai aainjaa kasa mojusü chi Maleiwakai otta nnojotsü nuluwanaajüin wayuu sünain aainjaa kasa mojusü. ¿Jaratka kasirüin tü kasa mojusü alatakat?

Anuu wanee kasa müliaka atuma saaʼin wayuu saashin tü Wiwüliakat: «Eesü süpüla sülatalaa sümüin wanee kasa nümüin wanee wayuu» (Eclesiastés 9:​11, NM). Eeshi ouktaleere wanee wayuu sujunnajaʼalaa sümüle wanee kasa naaʼu, eeshi isale nia suuliayaʼasan. Sümaiwa paala, nüküjüin Jesuu süchiki wanee kasa alatalaa maka. Ojuttüsü wanee toore naaʼu poloo mekiisalümüin wayuu. Ouktüshii naya napüshuaʼa (Lucas 13:1-5). ¿Kasanainjeeshii ouktaka naya? Nnojoishii ouktüin naya sünainjee tü kasa mojusü naaʼinrapuʼukat, ouktüshii naya süka yalajanain naya süʼütpaʼa tia toorekat. Akaʼaya maaʼulu, alatalaa müsü kasa mojusü. Soʼu tü kashikat eneeroʼu 2010, akutkujaʼalaa müsü tü mmakat chaa Haití, ouktüshii maʼaka 300.000 wayuu. Nnojotsü jaralüin sükaʼalirajüin. Akaʼaya tü ayuuliikat, eesü süntalaa sümüle nünain wanee wayuu.

Eesüjaʼa süpüla sümüin wayuu: «¿Jamüsü nuuʼulaaka Maleiwa sülatüin tia? ¿Jamüshii nnojoliika naaʼinmajüin na wayuu anamiakana?». Süpüla naaʼinmajüin Maleiwa na wayuukana, nütüjaainjatü aaʼu joujainjatüin sülatüin wanee kasa namüin. Watüjaa aaʼu nütüjüin Maleiwa süpüleerua nüküjüin süchiki tü kasa alatüinjatkat. Mayaapejeʼe müin tia, jülüjeesü waaʼin pütchikat tüü: ¿Nüküjüinche süpüshuaʼa tü kasa alatajatkat? (Isaías 42:⁠9.)

Müsü tü Wiwüliakat nüchiki: «Chashi sirumatuʼu chi Wamaleiwasekai; nukumajüin süpüshuaʼa tü kasa anakat saaʼin nümüin» (Salmo 115:​3, NM). Shiimain tia, nukumajüin Jeʼwaa tü kasa anakat saaʼin  nümüin. Müsia neʼe sukuwaʼipa nutuma wanaa sümaa nüküjüin süchiki tü kasa alatüinjatkat. Müshi Jeʼwaa nümüin Abrahán wanaa sümaa mojushaatain nakuwaʼipa na wayuu kepiakana chaa Sodoma sümaa Gomorra: «Anasü saaʼin tamüin müleka tashakatüle sünainmüin tü pueulokalüirua tatüjaaiwa saaʼu müleka shiimüinre tü taapakat achiki sünain mojulaain naya, müshi nümüin» (Génesis 18:​20, 21). Nia neʼe Jeʼwaa aneekaka nütüjaweere saaʼu wanee kasa, nnojotsiaajeʼe shiain saaʼu isain shia nüchiki. Akatsaʼa tia, shiiʼiyatüin wamüin nnojoluin nüküjüin Jeʼwaa süpüshuaʼa tü kasa alatüinjatkat (Génesis 22:12). Müsü tü Wiwüliakat nüchiki: «Anashaatasü sukuwaʼipa tü kasa nukumajakat», nüküjüin tü kasa alatajatkat wanaapünaa sümaa tü keeʼireekat naaʼin. Nnojoishi nia nachiiruaakuʼu namüin na wayuukana süpüla noonooinjanain nümaa (Deuteronomio 32:​4, NM). * Watüjaaitpa aaʼu eein süpüla nüküjüin Jeʼwaa sülatüinjatüle jee nnojoluinjatüle sülatüin wanee kasa.

Süpüshi tü kasa mojusü alatakat, nia kasitka chi wayuukai. Müsü tü Wiwüliakat süchiki tia: «¿Kasa kaainjaleeka atüma wane wayuu? Kaainjaleeshi süka noonooin sümaa tü kasa mojusü keeʼireekat naaʼin. Müleka naaʼinrüle tü mojusükat keeʼireekat naaʼin, kaainjalaa tia. Je müleka nnojoire nuuʼulaain suulia kaainjalaa, oukteechi» (Santiago 1:​14, 15). Alatüsü kasa mojusü sutuma naainjüin chi wayuukai tü kasa mojusü keeʼireekat naaʼin. Sutuma kaainjaralin nia, naainjeein maʼin tü kasa mojusü keeʼireekat naaʼin, makalaka sülatüin kasa mojusü sünainjee (Roma 7:21-23). Kakaliairü maʼin aainjünüin tü kasa mojusükat, makalaka eein maʼin tü müliaakat. Na wayuu mojulaakana, naainjirüin kasa mojusü na waneeinnua süpüla wanaawainjanain naya namaa (Proverbios 1:10-16).

¿Jamüshii nnojoliika nükaaliinjüin waya Maleiwa? ¿Jamüsü nuuʼulaaka waainjüin kasa mojusü? Süpüla watüjaain saaʼu tia, jülüja waaʼin tü wakumajiakat nutuma. Saashin tü Wiwüliakat, nukumajüin waya chi Maleiwakai maʼaka saaʼin nukuwaʼipa niakai. Müsüjeseʼe washatüin tü nukuwaʼipakat (Génesis 1:26). Nukumajüin waya süpüla waneeküinjatüin tü kasa anakat saaʼin wamüin. Makalaka eein süpüla waneeküin alinjachire nia wapüla jee woonooinjanale sümaa nünüiki (Deuteronomio 30:​19, 20). Nnojotsü nüpüleeruaain waaʼin Jeʼwaa shiiʼiree waaʼinrüinjatüin wanee kasa. Jamüsüjaʼa nüpüleeruaale waaʼin, nnojotsüje süpüla waneeküin tü anakat saaʼin wamüin, müsüje wakuwaʼipa maʼaka saaʼin wanee kemion oʼunaka eepünaweere suʼuninnüin. Jee müsia tü kasa alatakat sümüin wayuu maaʼulu yaa, nnojotsü aleinjatüin neʼe. Talatüsü maʼin waaʼin süka kojutüin waya nümüin Maleiwa otta nuuʼulaain waneeküin tü wakuwaʼipainjatkat. Nnojoliipejeʼe niyüülajaleeinyain waya Jeʼwaa süpüla müliainjatüin waaʼin.

Müleka wasakirüle wanee hindú jee niale wanee budista süka tü pütchi sünainkat süta karalouktakat tüü, eeshiijaʼa süpüla namüin: «Alatüsü kasa mojusü namüin na wayuu anamiakana sutuma tü karma münakat».

Süpüla watüjaain saaʼu jamüin sülataka kasa mojusü, wekirajaa sünain tü sümakat tü Wiwüliakat süchiki tü kasa ouktakalü anainjee wanee wayuu. Müshi Jeʼwaa nümüin Adán, chi palajachikai wayuu: «Kaatei, anuu süchon tü wunuʼukolüirua süpüshua yaa suluʼu tü apainkat süpüla piküinjatüin shia. Shiasaʼa nnojolüinjatüin piküin süchon tü wunuʼu atüjaweetkat atüma wayuu saaʼu tü anasükat je saaʼu tü mojusükat. Müleka piküle süchon wunuʼukot tüü, shiimüinshaana ouktajachin pia, nümakalaka» (Génesis 2:​16, 17). Nnojoishijeʼe ouktüin Adán müleka noonoole nümaa Maleiwa otta nnojoire kaainjalain nia. Ouktüshi nia sünainjee tü naainjalakat. Kachoinpa Adán sümaa Eva, «oʼttüsü wayuu ütamüinreʼeya sünain kaainjalaa. Ouktakalaka naya saaliijee» (Roma 5:12). Ouktakaʼaka wanee wayuu shia sünainjee tü naainjalakat (Roma 6:23). Müsü tü Wiwüliakat: «Chi wayuu eekai ouktüin, nuwalaajüitpa tü naainjalakat» (Roma 6:​7, NM). Jaʼitairü wainmain naainjala wanee wayuu, nuwalaajüin shia süpüshuaʼa süka ouktüichipain nia.

Saashin tü wayuukalüirua, makaʼa müliain wayuu maaʼulu sainküin mmaka süpüshuaʼa, shia sutumajee tü karma münakat. Na anoujakana sünain tia, nnojotsü shapaain naaʼin süka müinjatüinya neʼe shia naashin. Jaʼitairü nachajaashaatain sukuwaʼipa, ayatajatia neʼe alatüin kasa mojusü namüin. Naashin nayakana, süpüla nnojoluinjachin joʼuuin nüchikuaʼa wanee wayuu sümaa niʼrüinjatüin nümüliala, wayuuinjachi anamia nia otta eesü tü nikirajaainjatkalü anain. Tia nanoujakalü anain naya wayuukana, nnojotsü suluʼujeejatüin tü Wiwüliakat. *

Chi shikiishikai maʼin tü kasa mojusükat nia Satanaa, nnojoishi niain neʼe chi wayuukai nümüiwaʼa. Niapuʼushi wanee aapiee chi Yolujaakai nümaiwa paala, nümaapuʼushi Maleiwa. Shiasaʼa müin niyouktüin tü shiimüinkat, makalaka niain kaainjalain atuma na wayuukana (Juan 8:44). Nia shikiishikai maʼin tü eʼraakat wayumüin chayaa Edén (Génesis 3:1-5). Naashin Jesuu, chi Yolujaakai nia «chi Kamaʼüraikai» otta chi aluwataakai saaʼu wayuu sainküin mma (Mateo 6:13; Juan 14:30). Wainma wayuu aaʼinraka tü keeʼireekat naaʼin Satanaa. Naainjüin tü kasa mojusü keeʼireekat naaʼin otta nasürülüin nekii suulia tü kasa nuluwataakalü anain Jeʼwaa (1 Juan 2:​15, 16). Müsü 1 Juan 5:19: «Tü wayuu manoujainsatkalüirua suluʼu mmakat süpüshua, nia aluwataaka saaʼu chi Yolujaakai». Eeshii waneeinnua aapiee wanaawakana nümaa Satanaa. Saashin tü Wiwüliakat, eʼikeʼennüsü wayuu sainküin mmaka nutuma Satanaa otta natuma na yolujaakana. Müliasü maʼin waaʼin sutuma tia (Alateetkat Mapeena [Apocalipsis] 12:​9, 12). Chi shikiishikai maʼin tü kasa mojusükat nia Satanaa.

Watüjaaitpa aaʼu nnojoluin niain Maleiwa kasirüin tü kasa mojusü alatakat sümüin wayuu. Nnojotsü müliain saaʼin wayuu nutuma. Nüküjüin wamüin najaʼttirajatüin tü kasa mojusükat. Sünain tü wanee pütchikat wekirajaweerü anain tia.