1. Püküja süchiki jamüin nnojotka anain nümüin Jeʼwaa tü naainjakat waneeinnua wayuu aʼyataakana nümüin (piirakaa sümüin tü ayaakuaakat).

EETAASHII waneeinnua wayuu shaʼwatüin soʼuluʼu tü aʼwaajüleekat Jeʼwaa sümaa kajapüipayaain namüin wanee müsü aka saaʼin iita süpülajatü aʼajaa wunuʼu jemeta eejuu. Eejachi Aarón yala, chi laülaashikai napüleerua na sacerdootekana jee müshia eejachi Coré namaa 250 wayuu nümaajannuu (Núm. 16:16-18). Napüshuaʼa naya wayuukana müshii naʼwaajakai aaʼin Jeʼwaa. Nnojoipejeʼe aʼwaajünüin Jeʼwaa nutuma Coré otta na nümaajanakana, wayuu yaletayaa aaʼinchii naya, eʼrülii wayumüin otta shia neʼe jülüjaka naaʼin nakuwaʼipa namüiwaʼa. Nayeeshii neʼe sacerdooteka (Núm. 16:1-11). Saaʼin namüin nayakana, anainjatiaa nümüin Jeʼwaa tü naaʼinrakat. Nnojotpajaʼa anain tia nümüin Maleiwa. Süka jamüin, nütüjaain aaʼu mojuin tü suluʼukat naaʼin. Naʼwaajayaain neʼe Maleiwa otta shia keeʼireeka naaʼin kojutüin naya sutuma wayuu (Jer. 17:10).

2. (1) ¿Jamüsü nünüiki Moisés? (2) ¿Kasa alataka süpüla shikeraajüin tü nümakat?

² Wanee kaʼi süpülapünaa sülatüin tia, müshi Moisés: «Watta, watta maalü, niiʼiyateerü Jeʼwaa sünain jaraliin nümaain» (Núm. 16:​5, NM). ¿Kasa naainjaka Jeʼwaa süpüla sütüjaanüin aaʼu jaraliin nümaain otta jaraliin na aʼwaajayaakana neʼe nia? Nujuʼitirüin Jeʼwaa wanee siki iipünaajee, saʼajakalaka Coré namaa na 250  wayuu nümaajanakana (Núm. 16:35; 26:10). Akaisaʼa nnojolin ouktüin Aarón nutuma Jeʼwaa. ¿Jamüshi nnojoika ouktüin nia? Süka shiimain nunoula nünain Jeʼwaa otta niain niʼinaajalain Jeʼwaa süpüla sacerdooteinjachin nia (paashajeʼera 1 Corinto 8:3).

3. (1) ¿Kasa alataka soʼu nükalia chi aluwataaushikai Pablo? (2) ¿Kasa shikirajaka anain waya tü naainjakat Jeʼwaa nüka Coré otta na nümaajanakana?

³ Maʼaka miit kiniento juya süchikijee tia, soʼu nükalia chi aluwataaushikai Pablo, alatüsü wanee kasa meematüsü aka saaʼin tü alatakat nükalioʼu Moisés. Eejana waneeinnua wayuu anoujayaakana otta ekirajüshii naya sünain alawaa. Ayatüshii naya outkajaain namaa na anoujüshii shiimainshiikana. Naya wayuukana, nekirajüin na wawalayuukana sünain alawaa. Müshii aka saaʼin erü simoluuna saʼaka anneerü. Eesüjaʼa süpüla namalajeʼerüin nanoula na wawalayuukana (2 Tim. 2:16-18). Nütüjaa aaʼu Pablo nnojolin süpüla nimeejünüin Jeʼwaa natuma na anoujayaakana. Süka jamüin, naashajeʼerüin tü naainjakat Jeʼwaa nüka Coré otta na wayuu nümaajanakana. Wekiraja sünain tü nüshajakat Pablo nümüin Timoteo.

4. (1) ¿Kasa mapüleeka nümüin Jeʼwaa naashin Pablo? (2) ¿Kasa nümaka Pablo nümüin Timoteo?

⁴ Sükajee tü nüshajakat Pablo nümüin Timoteo, niiʼiyatüin sünain mapüleein nümüin Jeʼwaa ayaawataa naaʼu na anoujayaakana nünain. Süchikijee nüküjüin Pablo sümalajaain nanoula noʼutku na anoujüshiikana natuma na ekirajüliikana sünain alawaa, müshi nia: «Ayatapajaʼaya eein tü nikirajakalü anain waya Maleiwa, tü makalü aka saaʼin sukuwaʼipa süikkalaaya wanee piichi otta müsü wanee ashajuushi sünain: ‹Nütüjaa aaʼu Jeʼwaa jaraliin na nümaajanakana›. Otta waneʼeya, müsü mayaa: ‹Niyouktüinjatü tü kasa mojusükat chi wayuu achuntakai nünülia Jeʼwaa›» (2 Tim. 2:18; 2 Tim. 2:​19, NM).

5, 6. (1) ¿Kasa kayaakuayaaka tü pütchikat «süikkalaaya wanee piichi» makat? ¿Jeʼratua süshajünüin suluʼu tü Wiwüliakat tia pütchikat? (2) ¿Jamüsü naaʼin Timoteo sutuma tü nümakat Pablo?

⁵ Tü pütchikat «süikkalaaya wanee piichi» makat suluʼu tü Wiwüliakat, wainma sukuwaʼipa. Jamüsüjaʼa shia, shiyaakuayaasü tü mmakat Jerusalén otta tü naaʼinrakat Jesuu süpüla shikeraajüin tü keeʼireekat naaʼin Jeʼwaa (Sal. 87:​1, 2; 1 Cor. 3:11; 1 Ped. 2:6). Uatua neʼe süshajünüin suluʼu tü Wiwüliakat tü pütchikat «süikkalaaya wanee piichi» makat. ¿Kasache nüküjeeka Pablo sükajee tia pütchikat?

⁶ Wanaa sümaa nüküjüin Pablo tü pütchikat «süikkalaaya wanee piichi» makat, nüküjaleein tü nümakat Moisés suluʼu Números 16:5 nüchiki Coré otta na nümaajanakana. Nüshajüin tü alatakat nükalioʼu Moisés süpüla nütütüleʼerüin naaʼin Timoteo. Nüküjüin nümüin Timoteo sünain nütüjaain aaʼu Jeʼwaa jaraliin na eʼrüliikana wayumüin suluʼu tü outkajaaleekat. Otta kasalajaneerüin namüin tü neʼralakat wayumüin. Nnojoishi aawalaain Jeʼwaa suulia aaʼinraa tü keeʼireekat naaʼin sutuma tü kasa mojusü naainjakat Coré. Otta nnojoishi aawalaain nia sutuma tü naainjakat na ekirajüliikana sünain alawaa nükalioʼu Pablo. Mayaapejeʼe nnojoluin nikirajüin maʼin Pablo süchiki tü pütchikat «süikkalaaya wanee piichi» makat, ayatsia neʼe kooʼomüin nunoula Timoteo nutuma sümaa niʼitaain maʼin naaʼin nünain Jeʼwaa.

7. ¿Jamüsü watüjaaka saaʼu lotuin tü nukuwaʼipakat Jeʼwaa waneepia? ¿Jamüsü watüjaaka saaʼu pansaajeerüin nünüiki Jeʼwaa waneepia wamüin?

⁷ Matüjüinsat aʼwanajawaa tü pütchi suluʼukat tü Wiwüliakat. Müsü Salmo 33:11: «Ayateerü eein süpüla kaʼika süpüshuaʼa tü nünüikikat Jeʼwaa; ayateerü naaʼinrüin waneepia tü jülüjakat naaʼin». Saashin waneeirua wetsiikulo, ayateerü eein süpüla kaʼika süpüshuaʼa tü Nuluwataayakat Maleiwa, ayateerü alin wayuu nüpüla waneepia, lotuin nukuwaʼipa otta pansaajeerü nünüiki waneepia wamüin (Éx. 15:18; Sal. 106:1; 112:9; 117:2). Müsü Malaquías 3:6: «Shiimain tayain Jeʼwaa; matüjüinsat  aʼwanajawaa tü takuwaʼipakat». Akaʼaya suluʼu Santiago 1:17, aküjünüsü «matüjüin aʼwanajawaa nukuaippa» Jeʼwaa.

8, 9. ¿Kasa shikirajaka anain waya tü «ashajuushi» nüküjakalü achiki Pablo?

⁸ Sümaiwa paala, sünain süikkalaaya wanee piichi ashajünapuʼusü wanee pütchi otta nünülia chi akumajakai shia jee shiale nünülia chi kakorolokoi tü piichikat. Nia Pablo ashajakai palajana süchiki sukuwaʼipa süikkalaaya wanee piichi. * Piamasü kasa aküjünaka sünain tü ashajuushikat sünain tü süikkalaaya piichi nüküjakalü achiki Pablo. Tü palajatkat ashajuushi, müsü mayaa: «Nütüjaa aaʼu Jeʼwaa jaraliin na nümaajanakana». Otta tü wanee pütchikat, müsü mayaa: «Niyouktüinjatü tü kasa mojusükat chi wayuu achuntakai nünülia Jeʼwaa». Sutuma tia pütchikat sotojoosü waaʼin tü sümakat Números 16:5 (paashajeʼera). *

⁹ ¿Kasa shikirajaka anain waya tü «ashajuushi» nüküjakalü achiki Pablo? Piamasü kasa watüjaka sünainjee tia: 1) Aishii nüpüla Jeʼwaa na wayuu waneepiakana nümaa. 2) Niyouktashaatain Jeʼwaa tü kasa mojusükat. ¿Jamüsü nanainpünaaka tia na ekirajüliikana sünain alawaa suluʼu tü outkajaaleekat?

10. ¿Jamüsü naaʼin waneeinnua anoujüshii nükalioʼu Pablo sutuma tü naainjakat na ekirajüliikana sünain alawaa?

¹⁰ Sutuma tü naainjakat na ekirajüliikana sünain alawaa, shapaasü naaʼin Timoteo ooʼulaka waneeinnua anoujüshii jüüjüükana nümüin Maleiwa. «¿Jamüshiiche ayatayüliika waʼakain naya sümaa nekirajüliin sünain alawaa? ¿Anasüche nümüin Jeʼwaa nukuwaʼipa wanee anoujüshi jüüjüükai nümüin sümaa nukuwaʼipa wanee ekirajüi sünain alawaa?», makajasaʼa naaʼin naleʼeruʼu noʼutku naya anoujüshiikana (Aluw. 20:​29, 30).

11, 12. ¿Jamüsü kooʼomüinka nunoula Timoteo sutuma sünüiki tü karaloukta nuluwataakat Pablo nümüin?

¹¹ Kooʼomüinsü nunoula Timoteo sutuma sünüiki tü karaloukta nuluwataakat Pablo nümüin. Nüküjüin Pablo nümüin Timoteo anain Aarón noʼuluʼu Jeʼwaa, akaisaʼa Coré namaa na nümaajanakana, niyouktüin naya Jeʼwaa sümaa najaʼlajeʼerüin naya. Naashin Pablo, nütüjaa aaʼu Jeʼwaa jaraliin  na nümaakana jaʼitainna eein wayuu anoujayaaka naʼaka na anoujüshii shiimainshiikana.

¹² Matüjüinsat aʼwanajawaa nukuwaʼipa Jeʼwaa otta eesü süpüla weʼitaain waaʼin nünain waneepia. Niyouktashaatain Jeʼwaa tü kasa mojusükat, makalaka süsalain nutuma na nnojoliikana ayaawajaain suulia naainjala. Nüküjüinya Pablo nümüin Timoteo niyouktüinjanain na ekirajüliikana sünain alawaa. Süka jamüin, niain wanee wayuu achuntakai «nünülia Jeʼwaa». *

13. ¿Kasa tü weʼitaainjatkalü anain waaʼin?

¹³ Müshiʼiya wayakana, sütütüleʼerüin waaʼin tü nüshajakat Pablo nümüin Timoteo. Anashaatasü nümüin Jeʼwaa süka waneepiain waya nümaa otta atütülaasü waaʼin sutuma watüjaain saaʼu tia. Jülüjüshii waya naaʼin Jeʼwaa. Müsü tü Wiwüliakat: «Nünanajüin Jeʼwaa süpüshuaʼa tü mmakat süpüla nükaaliinjüin süka nütchin na oonookana nümaa süka süpüshuaʼa naaʼin» (2 Crón. 16:9, NM). Weʼitaa waaʼin sünain nnojoleerüin motuin naaʼin Jeʼwaa tü waainjakat süpüla waʼwaajüin nia (1 Tim. 1:5; 1 Cor. 15:58).

14. ¿Jaralii na wayuu nülerajakana akuwaʼipa Jeʼwaa?

¹⁴ Sutuma tü nüshakat Pablo nümüin Timoteo, sotusü waaʼin niyouktüin Jeʼwaa na anoujayaakana nünain. «Nünanajüin Jeʼwaa süpüshuaʼa tü mmakat» sümaa niʼrüin na nnojoliikana aʼwaajüin nia süka süpüshuaʼa naaʼin. Saashin Proverbios 3:32, nülerajüin Jeʼwaa chi wayuu emeejüikai. Nülerajüinya Jeʼwaa chi wayuu piamakai oʼupünaa. Jaʼitaichi nuunjulajüin suulia wayuu süchiki tü naainjalakat, nnojotsü süpüla nuunjulajüin shia nuulia Jeʼwaa. Tia shia sutuma pülain maʼin Jeʼwaa sümaa lotuin nukuwaʼipa. Müsü tü Wiwüliakat: «Chi eekai nuunjulajüin süchiki naainjala, mojeerü nukuwaʼipa» (Prov. 28:13, NM; paashajeʼera 1 Timoteo 5:24 otta Hebreokana 4:13).

15. ¿Kasa tü nnojoluinjatkat waaʼinrüin? ¿Jamüsü nnojotka anain waaʼinrüle tia?

¹⁵ Naʼakajee na wayuu aʼyataakana nümüin Jeʼwaa, naya wainmaleeka maʼin na aikana apüla nia süka süpüshuaʼa naaʼin. Nnojoleechi eein wanee wawala eekai süpüla nimeejüin Jeʼwaa sükajee nunoujayaain nünain. Akatsaʼa eein süpüla sülatüin tia maaʼulu yaa maʼaka sülatüin nükalioʼu Moisés otta nükalioʼu Pablo (2 Tim. 3:1, 5). ¿Anasüche waliʼratüle na wawalayuukana sünain manoulain naya nünain Jeʼwaa? Nnojotsü anain waaʼinrüle tia ( paashajeʼera Roma 14:10-12, NM otta 1 Corinto 13:7, NM). Müleka shiale jülüjüin waaʼin nnojoluin shiimain nanoula na wawalayuukana nünain Jeʼwaa, eesü süpüla sumojujaain wanoula.

16. (1) ¿Kasa waaʼinrüinjatka süpüla nnojolinjachin waʼwaajayaain neʼe Jeʼwaa? (2) ¿Kasa shikirajaka anain waya tü pütchi makat:  Jiyaawata saaʼu tü jaaʼinrakat?

¹⁶ Eejüinjatü naaʼin na anoujüshiikana sünain tü naaʼinrakat waneʼewai nakua (Gal. 6:4). Süka kaainjalain waya, eeshii süpüla waʼwaajüin neʼe Jeʼwaa sutuma keeʼireein waaʼin wanee kasa nünainjee (Heb. 3:12, 13). Makalaka jülüjüinjatüin waaʼin wakuwaʼipa suulia joo waʼwaajayaain neʼe Jeʼwaa. Anashii wasakireʼerüle waaʼin: «¿Kasache taʼwaajaka anainjee Jeʼwaa? ¿Taʼwaajüinche nia süka alin nia tapüla? ¿Taʼwaajüinche nia süka keeʼireein taaʼin niain Aluwataain taaʼu? ¿Taʼwaajataapasaʼa neʼe nia saaʼu anainjatüin neʼe takuwaʼipa nutuma suluʼu tü Paʼaraiisükat?» (Alat. Map. 4:11). Wayakana wapüshuaʼa, wasakireʼerüinjatü waaʼin sünain tia pütchikalüirua. Müle shia watuma, wasünneʼereerü woulia tü kasa mojusü suluʼukat waaʼin müleka eere shia.

17, 18. ¿Jamüsü shiimainjatka maʼin wanoula nünain Jeʼwaa?

¹⁷ Shiimainre tü wanoulakat nünain Jeʼwaa, wainmeerü kasa anasü weʼraka sünainjee tia.  Müsü Salmo 32:2: «Anataʼaleeshijaʼa maʼin chi wayuu maainjalakai naashin Jeʼwaa ooʼulaka chi wayuu eekai nnojolin nimeejülin». Chi anoujüshi ooʼulaakai suulia piamain nukuwaʼipa, talateerü naaʼin maaʼulu otta talateerü naaʼin süpüla kaʼika süpüshuaʼa.

¹⁸ Sütüjaajeerü aaʼu wayuu nutuma Jeʼwaa jaralin kaainjaralin jee piamain akuwaʼipa. Ayaawatüneena aaʼu «jaralin lotuin akuwaʼipa otta jaralin mojulaain; atüjaaneerü aaʼu jaralin aʼyataain nümüin Maleiwa otta tü eekat nnojoluin shiʼyataain nümüin» (Mal. 3:18, NM). Sümaʼinruʼu waʼatapajüin tia, soteesü waaʼin «naaʼinmajüin Maleiwa waneepia chi wayuu eekai aaʼinrüin tü anasü nüchekakat nüpüleerua, je naapüin nünüiki wanaa sümaa nüchuntüin nümüin» (1 Ped. 3:12).