1, 2. (1) ¿Kasa nuluwataaka anain Jeʼwaa Moisés? (2) Suulia mmolojuin Moisés, ¿jamüsü nünüiki Jeʼwaa nümüin?

¿AASHI mmoleechin pia müleka nuluwataale pia Jeʼwaa nümaʼanamüin wanee wayuu mojulaakai maʼin? Chia wayuu nuluwataakai anainmüin pia, nia chi aluwataakai saaʼu süpüshuaʼa tü Mmakat. Wainmajüsüje neʼe paaʼin ¿aashi müin? Malaakaʼa joo puluwataanüin nümaʼanamüin wayuu eekai müin aka chia. Süpüla nunoujüinjachin chia wayuukai sünain shiimüin nünüikeʼejanain pia chi Maleiwa Pülashaataleekai suulia kasa süpüshuaʼa, ¿jameerü pünüiki nümüin chia wayuukai?

² Müsia neʼe nukuwaʼipa Moisés, mmotshi maʼin soʼu nuluwataain nia Jeʼwaa nümaʼanamüin faraón, nuluwataain nia Maleiwa chamüin süpüla niyuʼlüinjanain na israeliitakana Egiptojee; müliashii maʼin naya atumawaa chaʼayaa. Nuluwataain Jeʼwaa Moisés, chi wayuu anamialeekai saaʼu mmaka süpüshuaʼa soʼu kaʼikat tia (Núm. 12:3). Chia faraónkai, eʼrüi wayumüin, yaleta aaʼinchi niayaa. Ayatapajaʼaya neʼe nuluwataain Jeʼwaa Moisés nümaʼanamüin faraón süpüla nümaainjanain na israeliitakana chejeechiki (Éx. 5:1, 2). Niʼrüinjaʼa Moisés saaʼu iseerüin nüchiki tia nuluwataakalü anain nia Jeʼwaa, mülejeʼe nümüin: «¿Jaraikaʼa maʼin taya süpüla chainjachin taya nümaʼanamüin Faraón otta tamaain na nüchonniikana Israel Egiptojee?». Nüküjüin Jeʼwaa nümüin Moisés nnojoleechin nüpütüin nia nümüiwaʼa (Éx. 3:9-12, NM).

3, 4. (1) ¿Jamüshisaʼa mmotkaʼa Moisés? (2) ¿Kasa eeka süpüla mmoluin atuma paaʼin maʼaka naaʼin Moisés?

³ Mmotshi maʼin Moisés, nnojorüleereʼe nunoujüin chi faraónkai sünain shiimüin nünüikeʼejanain nia Jeʼwaa; mmotshi joo nia nnojorüleereʼe joo nanoujüin na israeliitakana sünain niainjachin ayuʼlüin naya  chejeechiki. Müshijeseʼe nümüin nümüin Maleiwa: «¿Jama müleka nnojorüle nanoujüin sünain tanüiki? ‹Paʼalain neʼe nnojoishi aashajaain Maleiwa pümaa.› ¿Jama namüle tamüin?» (Éx. 3:15-18; 4:1, NM).

⁴ Nnojoleechipajaʼa pia aluwataanüin nümaʼanamüin wanee aluwataai süpüla paashajaain nümaa maaʼulu yaa. Eesüjaʼa süpüla mmolüirüin paaʼin seema aküjaa pütchi nümüin wanee wayuu. Wainma tü watüjakat sünainjee tü nümakat Jeʼwaa nümüin Moisés ooʼulaka tü alatakat süchikijee tia.

5. (1) ¿Kasapülajatü tü wunuʼu naapakat Jeʼwaa nümüin Moisés? (Piirakaa sümüin tü ayaakuaa suluʼukat süpana 13.) (2) ¿Kasa naainjaka Jeʼwaa süpüla anainjatüin naaʼin Moisés?

⁵ Süpüla anainjatüin naaʼin Moisés, nükaaliinjüin nia Jeʼwaa süpüla nuʼunüinjachin nümaʼanamüin faraón. Müsü suluʼu tü Wiwüliakat mayaa: «Anuu nünüiki Jeʼwaa nümüin Moisés: ¿Kasa wayuu türa pajapuluʼukat? ‹Wunuʼu neʼe tü tajapuluʼukat› nümakalaka Moisés nümüin. Shiasejeʼe nümakaʼa Maleiwa nümüin: ‹pujuta mmoluʼu türa wunuʼukat› nujutüinjeseʼe shia mmoluʼu Moisés, wüijaʼalaa sümakaʼa; apattajaashijeseʼe Moisés sümaʼanajee süka niʼrüin wülitpain shia. Niajeseʼe Jeʼwaa nümakalaka nümüin Moisés: ‹paapaa süka süsin›, naapaainjaʼa shia süsipünaa, wunuʼujaʼalaa sümakaʼa najapuluʼu. Tia, süpülajatü nanoujüin na israeliitakana ooʼulaka Faraón sünain nuluwataaushin nutuma Jeʼwaa» (Éx. 4:2-5, NM). Wüijaʼalaa müsü wanee wunuʼu nutuma Maleiwa süka pülain nia. Aluʼuinjaʼa jooluʼu, nnojorüle sunoujüin wayuu sünain nünüiki Moisés, aainjeechi nia kasa pülasü süka tü wunuʼukat süpüla sunoujünüin sünain shiimüin nuluwanaajalain nia Jeʼwaa. Shiasejeʼe mapa nümakaʼa Maleiwa nümüin Moisés: «Pülüʼüjüinjatü waneepia türa wunuʼukat süpüla paainjüin kasa pülasü süka» (Éx. 4:17, NM). Sutuma tia, nnojoluichipa mmoluin Moisés süpüla oʼunaa Egiptomüin, eere naashajaainjachin nümaa faraón ooʼulaka namaa na israeliitakana (Éx. 4:29-31; 7:8-13).

6. (1) ¿Kasa wekirajüinjatka aka tü wayuukalüirua waküjapa pütchi? ¿Jamüsü wekirajüinjatka wayuu süka tü Wiwüliakat? (2) ¿Jamaluʼulu tü pütchi nümakat Pablo: «Nikettaajüin Maleiwa süpüshuaʼa tü nümakat, pülashaatasü maʼin tü nünüikikat»?

⁶ Müsüjaʼaya neʼe wakuwaʼipa, waküjüinjanapa pütchi nüchiki Maleiwa, shiainjatü wekirajaka aka wayuu tü Wiwüliakat süpüla sunoujüinjatüin sünain nuluwanaajalain waya Maleiwa. Eesü wayuu mojutka amüin tü Wiwüliakat, «karaloukta neʼe» müshii sümüin. Kojutpajaʼa shia süka Nünüikin shia Jeʼwaa (2 Ped. 1:20, 21). Aküjünüsü suluʼu tü Wiwüliakat tü kasa anasü eejeetkat nutuma Maleiwa Nuluwataapeena. Müshijeseʼe müin Pablo süchiki tü Wiwüliakat: «Nikettaajüin Maleiwa süpüshuaʼa tü nümakat, pülashaatasü maʼin tü nünüikikat» (paashajeʼera Hebreokana 4:12, NM). ¿Jamaluʼulu «nikettaajüin Maleiwa süpüshuaʼa tü nümakat»? Ayatsia naaʼinrüin süpüshuaʼa tü nüküjatüjütkaʼaya, maluʼulu tia (Is. 46:10; 55:11). Eeʼiranajaasü naaʼin wanee wayuu niyaawatapa saaʼu nikettaajüin Maleiwa tü nümakat. Niyaawata aaʼu tia sutuma naashajeʼerüin tü Wiwüliakat.

7. ¿Kasa waaʼinrüinjatka süpüla lotuinjatüin wakuwaʼipa sünain ekirajaa tü shiimainkat?

⁷ Shia wekirajüinjatka aka wayuu tü Wiwüliakat süka Nünüikin shia Maleiwa. Neʼrüle na wayuukana sünain müin shia watuma, nanoujeerü anain tü wekirajakalü anain naya. Süka jamüin, shiain tü Nünüikikat Maleiwa. Müshijeseʼe lotuinjatü pukuwaʼipa sünain ekirajaa tü shiimainkat nümüin Pablo nümüin Timoteo (2 Tim. 2:15). ¿Kasakaʼa waaʼinrüinjatüin süpüla washatüin nukuwaʼipa Timoteo? Waneeküinjatü wanee pütchi suluʼujee tü Wiwüliakat süpüla waashajeʼerüinjatüin shia nümüin chi wayuu waküjakai amüin pütchi. Tia süpülajatü kettaleein shia nikiiruʼu chi wayuukai. Shiaʼaya akumajünaka apüla tü karalouktachein ojuʼitakat soʼu tü juyakat 2013.

8. ¿Jamüsü nünüiki wanee wawala süchiki tü karalouktachein jekennuukat?

⁸ Tia karalouktachein jekennuukalüirua, malirayuusü sukuwaʼipa tü pütchi ashajünakat suluʼu, mapüleejeetkalaka shia pümüin püküjapa pütchi süka. Anuujeseʼe nünüiki wanee wawala alapalaai naaʼu na wawalayuukana chayaa Hawái (Estados Unidos) süchiki tü karalouktacheinkat: «Anashaatasü tü karalouktacheinkat süpüla aküjaa pütchi sainküin piichi ooʼulaka eere jouluin maʼin wayuu». ¿Jamüsü mapüleeka ekirajaa wayuu süka? Naashin chi wawalakai, shia saaʼujee anain maʼin tü pütchi asakinnakalü anain  tü wayuukalüirua, müsia tü wanee anakalü atuma shia naashin, shia süka süshajünüin apünüinsü pütchi sünain; nüneeka nümüinjatü neʼe chi wayuukai tü pütchi pansaakat sümaa tü asakinnakalü anain nia.

9, 10. (1) ¿Kasa waaʼinrüinjatka süpüla weeʼiyatüin tü sümakat tü Wiwüliakat namüin na wayuukana sükajee tü karalouktacheinkalüirua? (2) ¿Jarat tü karalouktachon anakat maʼin pümüin püküjapa pütchi? ¿Jamüsü anaka maʼin shia?

⁹ Ashajünüsü waneeirua wetsiikulo suluʼu tü karalouktacheinkat süpüla waashajeʼerüin nümüin chi waküjakai amüin pütchi. Anuu sukuwaʼipainjatka putuma: ¿Eejeetche wanee kaʼi nnojoleetkalü oʼu müliain wayuu? Jaʼitaichi «aa», «nnojo», «jamüin paajüin» nümüin chi wayuukai. Piiʼiyata nümüin tü pütchi ashajünakat suluʼujee tü Wiwüliakat suluʼuka süpana piama. Paashajeʼera nümüin Alateetkat Mapeena 21:3, 4.

¹⁰ Müinjatia putuma nüka chi karalouktachonkai: ¿Jara kanüikika tü Wiwüliakat? Jaʼitairü jaralüin nüneeküin chi wayuukai sünainjee tü apünüinsükat pütchi, piiʼiyata nümüin tü sümakat tü Wiwüliakat sünain tü karalouktachonkat suluʼu süpana piama. Püma nümüin: «Tü pütchi ashajünakat suluʼu tü Wiwüliakat, nünüiki Maleiwa». Paashajeʼera nümüin 2 Timoteo 3:16, 17.

11, 12. (1) ¿Kasa aneetka atuma paaʼin pikirajüle wanee wayuu süka tü karalouktacheinkalüirua? (2) ¿Kasa pikirajaainjatka anain nümaa chi wayuu puuyantajachikai anainmüin nüchikuaʼa?

¹¹ Yooteere chi wayuukai süchiki tü karalouktachonkat, pikirajaa nia sooʼomüin. Püpüta nüpüla tü karalouktachonkat. Jee paashajeʼera nümüin waneeshiaakaijeʼe wetsiikulo suluʼujee tü Wiwüliakat, anashaateerü paaʼin paainjüle tia. Ekirajaajeechi pia nümaa nüchikuaʼa mapa.

¹² Suluʼu süpüshuaʼa tü karalouktacheinkat, eesü wanee pütchi «Püsakireʼera paaʼin» müsü. Tia, suluʼusü süpanaka pienchi. Ashajünüsü waneʼeya suupünaajee tia pütchikat, eere süsakinnüin süchiki wanee kasa. Shiasaʼa suupünaajee tia, eesü waneeirua pütchi suluʼujeejatka tü Wiwüliakat, tia pütchikalüirua, pikirajaainjatü anain nümaa chi wayuu puuyantüinjachikai anainmüin nüchikuaʼa. Jamüsüjaʼa nuluʼu chi karalouktachonkai: ¿Jameetche sukuwaʼipa wayuu watta kaʼi? Ashajünüsü wanee pütchi suluʼu süpanaka pienchi maka mayaa: «¿Kasa naaʼinrajatka Maleiwa süpüla anain maʼin sukuwaʼipa tü mmapaʼakat nutuma?». Tü pütchi pikirajaainjatkalü anain nümaa chi wayuukai, shia tü sümakat Mateo 6:9, 10 otta Daniel 2:44. Müinjatia sukuwaʼipa tia putuma nüka chi karalouktachonkai: ¿Kateetche noʼu nachikuaʼa na wayuu ouktakana? Ashajünüsü wanee pütchi suluʼu süpanaka pienchi maka mayaa: «¿Kasanainjeeshii laülaaka jee ouktaka waya?». Shia pikirajaainjatka anain nümaa chi wayuukai tü sümakat Génesis 3:17-19 otta Roma 5:12.

13. Süpüla woʼttüin sünain ekirajaa wayuu sünain tü Wiwüliakat, ¿kasa waaʼinrüinjatka süka tü karalouktacheinkat?

¹³ Püküja pütchi nümüin wanee wayuu süka tü karalouktacheinkalüirua, wanee sukueena, puʼtta sünain pikirajüin nia sünain tü Wiwüliakat. Süsapoʼujee  tü karalouktacheinkat, eesü wanee código QR münüsü (código de respuesta rápida). Nükaniaajüle tia wanee wayuu süka wanee serulaat, ojuʼiteerü wanee video eere süküjüneerüin nümüin anain nikirajaale namaa na aküjüliikana pütchi nüchiki Jeʼwaa. Müsia suluʼu tia karalouktacheinkat, aküjünüsü namüin na wayuukana nekirajaainjanain sünain tü poyeetokot Pütchi anasü nutuma Maleiwa. Jamüsüjaʼa suluʼu tü karalouktachonkot: ¿Jarai chi aluwataakai saaʼu wayuu sainküin mmaka? Yala aküjüsü shikirajaanüinjatüin anain tü ekirajaayakat 5. Müsia neʼe sukuwaʼipa nüka chi karalouktachonkai: ¿Kasa choʼujaaka süpüla anain sukuwaʼipa wayuu sümaa süpüshi? Aküjünüsü yala shikirajaanüinjatüin anain tü ekirajaayakat 9. Müle sukuwaʼipa watuma tü karalouktacheinkat, shieerü wekirajaka aka wayuu tü Wiwüliakat soʼu tü kaʼi waküjakalü oʼu pütchi namüin jee wouyantapa nepialuʼumüin. Müle shia watuma, wainmeena na wayuu wekirajakana sünain tü Wiwüliakat. ¿Kasa maa paaʼinrüinjatka süpüla pikirajüin wayuu sünain tü Wiwüliakat püküjapa pütchi?

14, 15. ¿Kasa waaʼinrüinjatka süpüla washatüin nukuwaʼipa Pablo sünain aküjaa pütchi?

¹⁴ Jülüjüsü naaʼin Pablo nakuwaʼipa na wayuukana süka nücheküin nükaaliinjeein wayuu süpüshuaʼa (paashajeʼera 1 Corinto 9:19-23). ¿Jamüsü makaʼa sukuwaʼipa nutuma Pablo? Süpüla nükaaliinjüin «na judíokana [...,] na gentilekana [...,] wane wayuu eekai isayüliʼinya achiki nünoujain». Nükaaliinjeein «wayuu süpüshua» süpüla suʼttaainjatüin soʼutku wayuu (Aluw. 20:21). ¿Kasa waaʼinrüinjatka süpüla «suʼtteʼennüinjatüin wayuu süpüshua» maʼaka nutuma Pablo? (1 Tim. 2:3, 4.)

¹⁵ Suluʼu tü karalouktakat Waʼyataain nümüin Maleiwa, ashajünüsü jamüinjatüin wanüiki waküjapa pütchi. Paaʼinra tü ashajünakat sünain. ¿Jama müleka mamalainre namüin tü pütchi aküjünakat suluʼu tia karalouktakat? ¿Jaratche saaʼin pümüin tü pütchi kamalainjeetkat namüin? Süpüla pütüjaain saaʼu tia, jülüja paaʼin palajana tüü: ¿Kasa tü shapaakalü atuma naaʼin na wayuukana? ¿Kasache naashajaweeka achiki na wayuu püküjüinjanakana amüin pütchi? Pütüjaapa saaʼu tü pütchi kamalainjeetkat namüin na wayuukana, püneeka wanee pütchi suluʼujee tü Wiwüliakat kamalainjeetka namüin. Anuu sukuwaʼipa nutuma wanee wawala alapalaai naaʼu na wawalayuukana sümaa nuʼwayuuse: «Wasaküin palajana chi wayuu waküjüinjachikai amüin pütchi, shiasejeʼe mapa, ‹taashajeʼerüin paala pümüin wanee pütchi suluʼujeejatü tü Wiwüliakat› wamüshijaʼa mapa nia, ‹motsoʼochon neʼe› wamüshi». Joʼu wekirajaai sünain waneeirua pütchi kamalainjeetka namüin na wayuukana, tü anakat süpüla wasakirüin anain naya ooʼulaka waneeirua pütchi suluʼujeejatka tü Wiwüliakat. Tü wekirajaainjatkalü anain naaʼinrüirü shia waneeinnua wawalayuu, kamalainsü sümüin wayuu. Aneerü puuʼulaküle shiaʼayaa.

16. Püküjüinjachipa pütchi, ¿jamüinjatü pünüiki süpülapünaa paashajeʼerüin Isaías 14:7?

¹⁶ Kepiale pia suluʼu wanee mma eere jouluin maʼin atkawaa, eeshi süpüla pümüin nümüin chi wayuu püküjüinjachikai amüin pütchi: «‹Nnojoluitpa atkawaa sainküin mmaka süpüshuaʼa, talatashaatasü saaʼin tü wayuukalüirua› sümüle tü periódicokat, ¿jameerü paaʼin sutuma tia? Aküjünüsü tia suluʼu Isaías 14:7. Yaa suluʼu tü Wiwüliakat, aküjünüsü aneerüin saaʼin wayuu mapa». Piiʼiyata nümüin eere süküjünüin tia suluʼu tü Wiwüliakat, süchikijee maa nümüin naashajeʼeraiwa shia.

17. Püküjüinjachipa pütchi, ¿jamüinjatü pünüiki süpülapünaa paashajeʼerüin Mateo 5:3?

¹⁷ Aire maʼin shiiʼiree aʼyatawaa suluʼu tü mma kepiakalü aluʼu pia, eeshi süpüla pümüin nümüin chi wayuu püküjüinjachikai amüin pütchi: «¿Jeʼrainjatche maʼin nneerü nükanajüinjatka wanee wayuu süpüla anainjatüin nüpüshi?». Süchikijee nusouktüin, püma nümüin: «Eeshii na wayuu wainmaleekaʼaya akanain suulia tia, ayatapajaʼaya neʼe mojuin saaʼin nüpüshi. ¿Kasache maʼin tü talateetkalü atuma naaʼin naya wayuukana?». Paashajeʼera nümüin Mateo 5:3, süchikijee, püma nümüin pikirajeechin nia sünain tü Wiwüliakat.

18. Süpüla pümülialüin naaʼin wanee wayuu, ¿jamüinjatü pünüiki süpüla paashajeʼerüin Jeremías 29:11?

¹⁸ Sülatüle wanee kasachiki suluʼu tü mma eere kepiain pia, eeshi süpüla pümüin nümüin chi wayuu püküjüinjachikai amüin pütchi: «Yaapünaashireʼe  taya soʼukai süpüla taashajeʼerüin pümüin wanee pütchi amülialeetka paaʼin (paashajeʼera Jeremías 29:11 *). Nnaalein, apünüinsü kasa naainjüinjatka Maleiwa wapüleerua saashin pütchika yaʼayaa, anuʼusaʼa shia: ‹Nnojoleena jia müliain aaʼin, taapeerü wanee anaa jümüin otta aneerü jukuwaʼipa tatuma watta kaʼi›. Anasüjaʼa waaʼin sutuma müinjatüin wakuwaʼipa mapa, ¿aashi müin? ¿Jameetche sukuwaʼipa nutuma Maleiwa süpüla anainjatüin wakuwaʼipa?». Süpüla nütüjaainjatüin saaʼu tia chi wayuukai, piiʼiyata nümüin wanee ekirajaaya eere süküjünüin sünain shiimüin tia, suluʼujee tü poyeetokot Pütchi anasü nutuma Maleiwa.

19. Süpüla paashajaain nümaa wanee wayuu anoujakai, ¿jamüinjatü pünüiki süpüla paashajeʼerüin Alateetkat Mapeena 14:6, 7?

¹⁹ Nunoujüle chi wayuu püküjakai amüin pütchi, eesü süpüla müin pünüiki nümüin: «¿Jameechi nüntüle wanee aapiee nümaʼanajeejachi Maleiwa pümaʼanamüin? ¿Pürütkaajeechi nia süpüla paapajüin tü pütchi niʼikajaakat pümüin? (paashajeʼera Alateetkat Mapeena 14:6, 7.) Anuu nünüiki chi aapieekai: ‹Anakaja kojutule jütüma chi Maleiwakai›, ¿jaraichejeʼe eera chi Maleiwa naashajaakai achiki? Süpüla watüjaain naaʼu jaralin nia, anuu nünüiki chi aapieekai nüchikuaʼa: ‹Süka niain kakumalain kasakat süpüshua chaʼaya iipünaa, je süka niain kakumalain tü mmakat›. ¿Kasaichia maʼin nünülia Maleiwakai chia?». Süchikijee, paashajeʼera Salmo 124:8, müsü pütchika mayaa: «Nieechi akaaliinjaka waya Jeʼwaa, chi Kakumalakai tü sirumatuʼukat ooʼulaka tü mmakat». Süchikijee paashajeʼerüin tia pütchikat, ayata paashajaain nüchiki Jeʼwaa nümüin wayuukai.

20. (1) Süpüla püküjüin nümüin wanee jimaʼai jee shiale sümüin wanee majayülü kasaichin nünülia Maleiwa, ¿jamüinjatü pünüiki süpüla paashajeʼerüin Proverbios 30:4? (2) ¿Jarat tü pütchi suluʼujeejatkat tü Wiwüliakat anaka maʼin pümüin püküjapa pütchi?

²⁰ Anuu pünüikinjatü müleka paashajaainjachire nümaa wanee jimaʼai jee shiale sümaa wanee majayülü: «Taashajeʼerüin paala pümüin motsomüin wanee pütchi anashaatasü maʼin (paashajeʼera Proverbios 30:4). ¿Jarai chi aashajaanakai achiki yaʼayaa? ¿Aashin nnojoluin eein wanee wayuu eekai müin akuwaʼipa maʼaka naaʼin chi waashajeʼerüichipakai achiki? Aluʼuinja chi aashajaanakai achiki yala, nia chi Kakumalakai kasa süpüshuaʼa. * ¿Kasaichiche nünülia chia makai? Aküjünüsü tia suluʼu tü Wiwüliakat, taashajeʼerüin paala pümüin».

21, 22. (1) ¿Kaseerü alataka müleka anale maʼin süneekia watuma wanee pütchi suluʼujee tü Wiwüliakat? (2) Süka pülashaatain nünüiki Maleiwa, ¿kasa waainjüinjatka süka?

²¹ Anale maʼin süneekia watuma tü pütchi waashajeʼerüinjatkat nümüin wanee wayuu suluʼujee tü Wiwüliakat, eesü süpüla suʼwanajeʼereʼerüin naaʼin. Jamüsüjaʼa piamasü wawalayuu australiajeʼewalii, antüshii shipialuʼumüin wanee wayuu, aküjüshiijana pütchi sümüin nüchiki Maleiwa. Sümaka wanee wawala sümüin tia wayuukot: «¿Kasaichiche saaʼin pümüin nünülia Maleiwa?». Saashajeʼerakalaka tü wawalakat Salmo 83:18. Sümaka tü wayuukot: «¡Eeyaai neʼe tatüjaain saaʼu müin nünülia Maleiwa, ainküsü neʼe taaʼin naküjapa shia tamüin! Süchikijee noʼunüin na aküjakana pütchi tamüin, oʼunüsü taya suluʼumüin wanee oikkaalee karaloukta süpüla tachajaain suluʼu waneeirua Wiwülia shiimainrejeʼe tia namakat tamüin. Eetasüjaʼa maʼaka 56 kiloometüro oʼunüshii. Tachajaain shia suluʼu diccionarioyaa, shiimüinya Jeʼwaain nünülia Maleiwa. Wainmainjeʼe eera tü kasa ashajünakat suluʼu tü Wiwüliakat nnojotka tatüjaain aaʼu, maa müsü taaʼin taleʼeruʼu». Sutuma tia, ekirajaasü shia sünain tü Wiwüliakat wanaa nümaa chi suʼwayuuseinjachikai, woutiisaka naya mapa.

²² Aʼwanajaasü naaʼin wanee wayuu naashajeʼerüle tü Wiwüliakat, shiasejeʼe sutuma nütüjaain saaʼu shikettaajüin nünüiki Maleiwa waneepia, niʼitaashaataleʼeinya naaʼin sünain (paashajeʼera 1 Tesalónica 2:13). Payalashaatasü nünüiki Maleiwa süpüla shiiʼiranajaainjatüin naaʼin wanee wayuu sutuma, pülashaatasü; eeyaai müin neʼe wanüiki. Nikettaajüin Maleiwa süpüshuaʼa tü nümakat, pülashaatasü maʼin tü nünüikikat. ¡Shia anaka aluʼu wekirajüle wayuu süka Wiwüliakat!