1, 2. ¿Jamüsü sukuwaʼipa nutuma Jeʼwaa süpüla nüküjüin tü naaʼinrajatkat na wayuu aʼyataashiikana nümüin?

WAINMA sukuwaʼipa nutuma Jeʼwaa süpüla nüküjüin tü naaʼinrajatkat na wayuu aʼyataaliikana nümüin. Kakaliairü müin shia nutuma. Sümaiwa paala, nuluwataapuʼuin Jeʼwaa wanee aapiee nümaʼanamüin wanee wayuu süpüla niʼikajaainjatüin nünüiki nümüin chia wayuukai. Eeshi yootüle Maleiwa nümaa wanee wayuu nüʼlapüinruʼu, nüküjüinjaʼa nümüin chia wayuukai tü kasa alatajatkat watta kaʼi jee shiale nuluwataainjachin nia sünain aaʼinraa wanee kasa (Núm. 7:89; Ezeq. 1:1; Dan. 2:19). Sümaiwa paala, nüneekapuʼuin Jeʼwaa wanee pütcheʼejana süpüla niʼikajaainjachin nünüiki namüin na wayuu aʼyataakana nümüin. Na wayuu oonookana sümaa tü nuluwataakalü anain naya Maleiwa, wainma tü kasa anasü neʼrakat sünainjee müin nakuwaʼipa.

² Maaʼulu yaa, ayatsia nüküjüin wamüin Jeʼwaa tü waaʼinrajatkat sükajee tü Wiwüliakat, sükajee tü nütsüinkat jee nakajee na wawalayuukana (Aluw. 9:31; 15:28; 2 Tim. 3:16, 17). Wayaawatamaata aaʼu tü nümakat Jeʼwaa wamüin, müshi nümakai wamüin: «Shiaʼaya wopukot tüü, juʼuna suluʼupünaa» (Is. 30:21, NM). Nüküjüin wamüin Jeʼwaa nükajee Jesuu tü waaʼinrajatkat süka niain wekiipüʼüin nutuma. Niasejeʼe Jesuu, nüküjüin wamüin nünüiki Jeʼwaa nükajee chi achepchiee oonookai jee kekiikai maʼin (Mat. 24:45, NM). Woonooinjatü amaa süpüshuaʼa tü nümakat wamüin Jeʼwaa, jaa müle waya nümüin, kateerü woʼu süpüla kaʼi süpüshuaʼa (Heb. 5:9).

3. ¿Kasa tü eekat süpüla mojuin atuma wakuwaʼipa nümaa Jeʼwaa? (Piirakaa sümüin tü ayaakuaakat.)

³ Nütüjaa aaʼulu Satanaa, kateerüin woʼu waneepia woonoole nümaa  Jeʼwaa. Nüchajaainjeseʼe sukuwaʼipa süpüla nnojoliinjanain woonooin nümaa Jeʼwaa. Wanee kasa eeka süpüla mojuin atuma wakuwaʼipa, shia tü waaʼinkat, kemeejarat maʼin shia süpüla waaʼinrüin kasa mojusü (Jer. 17:9). Müshijeseʼe wekirajaainjanain sünain waneeirua kasa waaʼinmajiraainjanaka oulia. Tü wanee wekirajaainjatkalü anain shia choʼujaain maʼin woʼuraajüinjanain waneepia nümüin Jeʼwaa süpüla anajiraainjatüin wakuwaʼipa nümaa, jaʼitasü kasain alatüin wamüin.

4. ¿Jamüsü sukuwaʼipa nutuma Satanaa süpüla numojujüin tü shikiiruʼujutkat tü wayuukalüirua?

⁴ Numojujüin Satanaa tü shikiiruʼujutkat tü wayuukalüirua sükajee tü alawaa nüküjakat suluʼu periódico, rewiisüta jee waneeirua kasa (paashajeʼera 1 Juan 5:19). Mayaapejeʼe nnojoluin mojuin anajaa telewisoot, aapajaa raawia, wainma tü kasa yarüttüsü niʼitaakat Satanaa suluʼupünaa tia makat sainküin mmakat süpüshuaʼa. Tia, shialeʼeya tü kasa niyouktakat Jeʼwaa (Jer. 2:13). Jamüshiijaʼa na jaleetshiikana, ojuʼitüshii maʼin suluʼu telewisoot sünain kasaalüin naya jee eesü kasaalüjiraale tü jieyuukalüiruaya. Wainma na anakana amüin tia. Nnojotpejeʼe anain shia saashin tü Wiwüliakat. Sünainjee tia, mojutsat amüinyüü tü sümakat tü Wiwüliakat (1 Cor. 6:9, 10).

5. ¿Kasa naainjüinjatka na anoujüshiikana süpüla nnojoluinjatüin sumojujüin nakuwaʼipa tü kasa yarüttüsükat?

⁵ ¿Kasa naainjüinjatka na anoujüshiikana süpüla nnojoluinjatüin sumojujüin nakuwaʼipa tia kasa yarüttüsükat? Shia naaʼinrüinjatka süpüshuaʼa tü sümakat tü Wiwüliakat. Müle shia natuma, nayaawateerü aaʼu tü eekai anain süpüla naainjüin jee tü eekai mojuin (Sal. 119:9). Wekirajaale sünain tü Wiwüliakat, wayaawatamaata aaʼu müleka shiimainre jee alawaale wanee kasa (Prov. 23:23). Naashin Jesuu, kateerü soʼu wayuu sutuma tü nünüikikat Maleiwa, tia niyuʼlüin Jesuu suluʼujee tü Wiwüliakat (Mat. 4:4). Waaʼinrüinjatüle wanee kasa, pansaainjatü sümaa tü sümakat tü Wiwüliakat. Jamüshijaʼa José, niyaawatamaata aaʼu mojeerüin noʼuluʼu Jeʼwaa müleka nüinkaale sümaa tü nuʼwayuusekat Potifar, mayaapejeʼe nnojoluin süshajünüin tü Wiwüliakat suʼunnaa tia kaʼikat. Eetaayaai neʼe jülüjeein naaʼin José niʼrüinjachin wayumüin nümüin Jeʼwaa (paashajeʼera Génesis 39:7-9). Mayaapejeʼe süpüleeruaain naaʼin José tü nuʼwayuusekat Potifar, nnojoishi nia jaa müin sümüin, nia noonooka amaa anüiki Jeʼwaa. ¿Kasa shikirajaka anain waya tia? Süpüla wayaawatüin saaʼu tü anakat süpüla waaʼinrüin jee tü mojukat, oonooinjana waya sümaa nünüiki Jeʼwaa nümüiwaʼa. Nnojoishii waya oonooinjanain sümaa tü nümakat Satanaa.

6, 7. ¿Kasa waaʼinrüinjatka suulia woonoʼolaain sümaa nünüiki Satanaa?

⁶ Nnojotsü pansaain tü ekirajünakalü anain wayuu suluʼu tü iküleesiakalüirua sümaa tü sümakat tü Wiwüliakat. Sutumajee tia, nnojoishii ekirajaweein nüchiki Maleiwa süka nnojolin jaralin ekirajüin tü shiimainkat naashin. Wainma tü kasa naainjakat Jeʼwaa süpüla mapüleeinjatüin wamüin oonowaa nümaa. Wayajaʼa neʼe aneeküinjanaka müleka niainjachire woonooin amaa niakai nuulia wanee yalejee. Aneekünüshi Jesuu nutuma Jeʼwaa süpüla naaʼinmajüinjanain na anoujüliikana nünain Jeʼwaa. Makalaka niainjachin woonooin amaa Jesuu suulia shiain woonoʼolaa amaa anüiki tü Yolujaakat (paashajeʼera Juan 10:3-5).

⁷ «Anashii müleka eere jaaʼin sünain tü pütchi jaapakat», müshi Jesuu (Mar. 4:24). Pansaashaatasü tü nüküjakat Jeʼwaa nümüin wanee wayuu, niyaawatamaatüinjeseʼe saaʼu wayuukai tü nünüikikat Jeʼwaa. Wayajaʼa neʼe aneekaka woonooinjanale  sümaa nünüiki Jeʼwaa. Eejüinjatpajaʼa waaʼin suulia niain woonoʼolaa amaa anüiki Satanaa, niainjachi woonooka amaa anüiki Jeʼwaa. Jaliakajaʼa waya suulia kamalainjüin wamüin tü muusika yarüttüsükat, wanajüin video yarüttüsü, jaa majüin waya sümaa naʼalain wanee waʼaleewain jee nayale na atüjayaakana maʼin naashin (Col. 2:8).

8. (1) Püküja jamüin naainjireeka waya kasa mojusü Satanaa (2) ¿Kaseerü alataka wamüin müleka mojut mojut majüle shiʼipaʼaya nünüiki Maleiwa wamüin?

⁸ Niʼitaain Satanaa kasa mojusü wapüleerua. Süka jamüin, nütüjaain saaʼu shiiʼireein maʼin waaʼin tü kasa mojusükat. Sutumajee tia, kapüleejaasü maʼin wamüin oonowaa nümaa Jeʼwaa (Juan 8:44-47). Jamüshijaʼa wanee wayuu jülüjüle maʼin naaʼin wanee kasa mojusü, naaʼinreerü tia kasa mojusü nnojotkat nücheküin paala (Roma 7:15, 16). ¿Jamüsü naainjaka kasa mojusü chia wayuukai? Shia süka mojut mojut majüin shiʼipaʼaya nünüiki Maleiwa nümüin. Piamasü kasa kaainjalaka aaʼujee chia wayuukai: nnojotsü niyaawatüin aaʼu mojuin tü naainjakat jee eesü shiale saaʼu kamalaitpain shia nümüin. Eesüjaʼa shiale joo saaʼu nnojoluin naashajeʼerüin tü Wiwüliakat maʼakaapuʼu paala nutuma, eesüjaʼa shiale saaʼu nnojoluichipain nuʼuraajüin maʼin nümüin Maleiwa. Eesü shiale saaʼu makatawalin nia suulia tü outkajawaakat, müsüjeseʼe naainjüin kasa mojusü mapa. Ayatüsia naainjüin shia sümaa nütüjaain saaʼu mojuin shia. ¿Kasakaʼa waaʼinrüinjatüin suulia washatüin nukuwaʼipa wayuukai chia? Wayaawatamaatüle saaʼu mojuin wanee kasa watuma, wanoukteʼeramaatüinjatü. Niale woonooin amaa anüiki Jeʼwaa nümüiwaʼa, nnojoleerü kasajatüin wamüin nanüiki na ekirajüliikana sünain alawaa (Prov. 11:9).

9. ¿Kaseerü alataka wamüin wayaawatümaatüle saaʼu mojuin wakuwaʼipa?

⁹ Sütüjaanamaatüle aaʼu wanee ayuulii nünainka wanee wayuu, achajaanamaatüsü tü shipinjatkat suulia ouktajüin chi wayuukai. Müsüjaʼaya neʼe nukuwaʼipa chi wayuu ayaawatamaatakai saaʼu mojuin nukuwaʼipa, nüchajaamaatüin sukuwaʼipa süpüla nnojoluin naaʼinrüin tü nüchekakat chi Yolujaakai (2 Tim. 2:25, 26). Wayaawatüle saaʼu eein kasa yarüttüsü wekiiruʼu, ¿kasa waaʼinramaatüinjatka? Wasünneʼeramaatüinjatü suluʼujee wekii tia, shia ayatüinjatka waaʼinrüin tü nümakat wamüin Jeʼwaa (Is. 44:22). Waaʼinrüle wanee kasa mojusü, ayateeria sotuin shia waaʼin mayaapejeʼe wanoukteʼerüin wakuwaʼipa mapa.

10, 11. (1) ¿Kasa naainjaka wanee wayuu eekai yaletüin naaʼin? (2) ¿Jameena waya washatüle nakuwaʼipa Coré, Datán ooʼulaka Abiram?

¹⁰ Watüjaa aaʼu kemeejaralüin tü waaʼinkat, eesü süpüla sumojujüin wakuwaʼipa nümaa Jeʼwaa. Eesü piamasü kasa eeka süpüla sumojujeʼerüin wakuwaʼipa nümaa Jeʼwaa. Tü palajatkat shia yaletüle waaʼin suʼupala wayuu jee tü wanee shia keeʼireere waaʼin wanee kasa nnojotka wakoroloin. Jamüshijaʼa wanee wayuu yaletayaakai aaʼin,  nia anaka suulia wayuu süpüshuaʼa naashin. Chia wayuukai, naaʼinrüin tü naaʼinreekat naashin, nnojoishi jaralinjachin achiaain nia süchiirua wanee kasa, jaʼitainna wawalayuuin na achiaakana nia, mojutsat nanüiki nümüin. Müle nukuwaʼipa chia wayuukai, müsü moʼukai saaʼin nikii suulia nünüiki Jeʼwaa.

¹¹ Nüneeküin Jeʼwaa Moisés nümaa Aarón süpüla nayain nekiipüʼüin na israeliitakana süpüla nalatüinjanain tü anoouishiikat. Akatsaʼa yaletüin naaʼin Coré, Datán ooʼulaka Abiram, nnojoishii jaa müin sümüin nünüiki Moisés ooʼulaka sümaa nünüiki Aarón. Naashin nayakana, naʼwaajeechi Jeʼwaa süka naaʼin namüiwaʼa. Nnojoishi choʼujaain namüin Moisés ooʼulaka Aarón. ¿Kasaka naainjüin Jeʼwaa naka naya wayuu eʼrüliikana wayumüin? Nuʼuta aaʼinchii namaʼaleʼeya na wayuu namaajanakana (Núm. 26:8-10). Müleka weʼrüliijaale wayumüin nümüin Jeʼwaa, nnojoleerü anain wakuwaʼipa maʼaka naaʼin naya wayuukana. Saashin tü Wiwüliakat, mojeerü nukuwaʼipa wanee wayuu müleka yaletüle naaʼin (Prov. 16:18; Is. 13:11).

12, 13. (1) ¿Jamüsü mojuka nukuwaʼipa wanee wayuu sutuma keeʼireein naaʼin wanee korolo nnojotka nümüin? Püküja wanee sukuwaʼipa. (2) ¿Kasa naainjüinjatka wanee wayuu suchuntaale naaʼin wanee korolo nnojotka nümüin?

¹² Anuutaajaʼa joo tü wanee kasa eekat süpüla sumojujeʼerüin wakuwaʼipa nümaa Jeʼwaa. Shia nüchiki chi wayuu keeʼireekai aaʼin wanee kasa nnojotka nükoroloin. Chi wayuu makai akuwaʼipa, naaʼinrüin tü eekai eein süpüla nümaʼanain tü keeʼireekat naaʼin. Müsü nukuwaʼipa Guehazí, chi aʼyataaikai nümüin Eliseo. Anapa Naamán suulia tü ayuulii nünainjatkat, niʼikajaain nüsülain nümüin Eliseo. Niyouktajapajaʼa Eliseo tia niʼikajaalakat Naamán nümüin. Akaisaʼa Guehazí, isasü naaʼin süchiirua tia ayouktajuushikat. Aashajaashijeseʼe Guehazí nüleʼeruʼu sünain maa: «Maʼaka yaain taya shaʼwatüin nuʼupala Jeʼwaa, awataashijaʼa paala taya nüchiirua [Naamán] süpüla naapüin tamüin tü nüsülajüinjatiaakat paala». Aʼluwataashi Guehazí nujuunajee Eliseo, wattashi apantajaain nüchiirua Naamán. Shiasejeʼe nüsaʼwatapa nia, aküjüshi nia alawaa nümüin Naamán, mülejeʼe saapünüin nümüin maʼaka 34 kiilo nneerü pülaata jee müsia piamasü kuluulu nüsheʼinjatü. Shiasejeʼe nüntapa Guehazí nümaʼanamüin Eliseo, aküjataalashi nia alawaa nümüin chiaʼayaa. ¿Kasakaʼa alatüin nümüin Guehazí sutuma müitpain nukuwaʼipa? Alataasü nünain tü ayuulii nünainjatkat paala Naamán (2 Rey. 5:20-27, NM).

¹³ Müleka suchuntaale naaʼin wanee wayuu wanee korolo nnojotka nümüin, nüsünneʼeramaatüinjatü shia suluʼujee nikii suulia mojujüin nukuwaʼipa sutuma mapa. Mojusiaʼaya maʼin süntajaale suluʼumüin naaʼin wanee wayuu tia. Majatsejeʼe nukuwaʼipa Acán soʼu naapaain wanee korolo nnojotka nümüin. Anuujeseʼe nünüiki nütüjaanapa aaʼu sünain niain aapaain tia makat: «Teʼrüinjesejeʼe wanee kuluulu kojutüsü chejeʼewat Sinar jee müsia 4 liiwüra shiatapünaamüin pülaata otta taasia 1 liiwüra ooro. Tia saʼakajatü shia tü korolo wasünalakat noulia na waʼünüükana. Kamalainsüjeseʼe tamüin tia korolokalüirua, taapaainsejeseʼe shia tamüin». Eetaayaai müin nüsünneʼereekai saaʼin suluʼujee nikii tia kasa mojusü suchuntaakat naaʼin, nuʼluwajüin tia korolokalüirua, chasü nuunjulüin shia nipialuʼu. Sütüjaanapa saaʼu sutuma wayuu sünain niain aʼluwajüin Acán, nüküjaleʼeinya Josué nümüin sünain süsalainjachin nia nutuma Jeʼwaa. Aʼinaʼannüshi süka ipa wanaʼaleʼeya namaa na nüpüshikana suʼunnaa tia kaʼikat, ouktüshii napüshuaʼa (Jos. 7:11, 21, 24, 25, NM). Nnojotsü anain suchuntaale waaʼin wanee korolo nnojotka wamüin, eejüinjatü waaʼin suulia tia (Luc. 12:15, NM). Eeʼewaijeerü tü kaʼi süntajaakalü oʼu suluʼu wekii kasa yarüttüsü. Müle shia, anasü müleka wasünneʼeramaatüle shia suluʼujee wekii suulia kaainjalajüin waya sutuma (paashajeʼera Santiago 1:14, 15).

14. ¿Kasa waaʼinrüinjatka müleka süntajaale suluʼumüin waaʼin waaʼinreein wanee kasa mojusü?

¹⁴ Mojeerü wakuwaʼipa müleka yaletüle waaʼin jee keeʼireere waaʼin wanee korolo nnojotka wamüin. Wayaawatüle saaʼu mojuin tia, waaʼinreerü tü nümakat wamüin Jeʼwaa (Deut. 32:29). Nüküjüin wamüin Jeʼwaa aneerüin wakuwaʼipa müleka waaʼinrüle tü sümakat tü Wiwüliakat. Mojeerü wakuwaʼipa naashinya müleka nnojorüle waaʼinrüin  tü nümakat wamüin suluʼu tü Wiwüliakat. Süntajaale suluʼumüin waaʼin waaʼinreein wanee kasa mojusü maʼaka saaʼin tü wekirajaaitpakalü anain, acheküsü jülüjüin waaʼin palajana nnojoleerüin anain wakuwaʼipa sutuma, nnojoleerüin anain sukuwaʼipa wapüshi jee müsia nnojoleerüin anain wakuwaʼipa nümaa Jeʼwaa.

15. ¿Kasa waaʼinrüinjatka süpüla nükaaliinjüinjanain waya Jeʼwaa maʼaka naainjüin shia nüka Jesuu?

¹⁵ Nükaaliinjüin waya Jeʼwaa sünain tü kasa choʼujaakat wamüin (Sal. 1:1-3). Nüküjüin wamüin Jeʼwaa tü waaʼinrajatkat suʼunnaa choʼujaain shia wamüin (paashajeʼera Hebreokana 4:16). Oʼuraajüshi waneepia Jesuu nümüin Jeʼwaa, eerejeʼe pülashin Jesuu. Nükaaliinjüinjaʼaya nia Jeʼwaa sünain tü kasa choʼujaakat nümüin. Nuluwataain Jeʼwaa wanee aapieeirua nümaʼanajeejatü süpüla nakaaliinjüinjachin Jesuu, naapüin Maleiwa tü nütchinkat nümüin, akaaliinjünüshi Jesuu nutuma Jeʼwaa soʼu tü kaʼi nüneekakalü oʼu na polooshiikana piamamüin nikirajüin. «Anii chi Tachonkai aishikai tapüla. Talatüshi maʼi taya nümaa», müshi Jeʼwaa nümüin Jesuu (Mat. 3: 17; 17:5; Mar. 1:12, 13; Luc. 6:12, 13; Juan 12:28). Waküjüinjatü süpüshuaʼa tü suluʼukat waaʼin nümüin Jeʼwaa maʼaka naainjüin shia Jesuu (Sal. 62:7, 8; Heb. 5:7). Müle shia watuma, aneerü maʼin wakuwaʼipa nümaa Jeʼwaa süpüla waʼwaajüinjachin nia.

16. ¿Kasa waaʼinrüinjatka süpüla nükaaliinjüinjanain waya Jeʼwaa?

¹⁶ Nüshajirüin Jeʼwaa tü Wiwüliakat süpüla anainjatüin nukuwaʼipa wanee wayuu sutuma, nnojotpejeʼe nüpüleeruain saaʼin wayuu süpüla naainjüinjatüin tü suluʼukat tü Wiwüliakat. Süpüla waapaain sümaa tü nümakat Jeʼwaa suluʼu tü Wiwüliakat, acheküshii wachuntüin nümüin tü nütsüinkat, nnojoleerü shia naʼalijirüin woulia (paashajeʼera Lucas 11:9-13). Müsü wanee pütchi suluʼu tü Wiwüliakat: «Anashii müleka eere jaaʼin sünain tü pütchi jaapakat» (Luc. 8:18). Nnojoleerü anain wakuwaʼipa müleka wayuule piama oʼupünaachii waya. Jamüshiijaʼa weʼrajataale peliikula eere jaʼyain wayuu maichesat sümaa sümaʼüjiraain sukuwaʼipa, seetaaleena joo waya sünain wachuntayaain kaaliinwaa nümüin Jeʼwaa suulia makat aka tia, nnojoleena nükaaliinjüin waya süka mojuin tia waaʼinrakat. Süpüla naapüin wamüin Maleiwa tü nütsüinkat, acheküshii waaʼinrüinjanain kasa anasü. Eesü tü nütsüinkat Maleiwa sünain tü outkajawaakalüirua. Jamüshijaʼa nuʼunüle wanee wawala sünain tü outkajawaakalüirua, niyaawateerü aaʼu müleka anale jee mojule nukuwaʼipa noʼuluʼu Jeʼwaa. Müleka mojule nukuwaʼipa, nunoukteʼeramaatüin shia suulia mojujüin nukuwaʼipa sutuma tia kasa mojusükat (Sal. 73:12-17; 143:10).

17. ¿Jamüsü mojeetka nukuwaʼipa wayuu shimeejüle nia tü naaʼinkat?

¹⁷ Eeshi wanee wayuu nnojoipünaakai anain akuwaʼipa nümaa Jeʼwaa. Chi wayuukai nia David, chi aluwataapuʼukai saaʼu Israel. Tepichiiwaʼaya David, nükanalüin Goliat, wanee surulaat miyoʼu maʼin. Surulaatshi David mapa, aluwataashi nia mapa saaʼu tü wayuu chejeʼewatkat Israel, wainma tü kasa anasü naainjakat chia wayuukai. Süchikijee süpüshuaʼa tia kasa anasü naainjakat, shimeejüin nia tü naaʼinkat, nüinkaakalaka sümaa Bat-seba sümaa nnojoluin nuʼwayuusein shia. Shiasaʼa süchikijee, nuʼutira aaʼinchi Urías, chi suʼwayuusekai Bat-seba. Süsalashi David nutuma Jeʼwaa saaʼu naainjala. Ayaawajaashi David suulia naainjala wanaa sümaa nüchiaain nia Jeʼwaa. Müsüjeseʼe anajiraain nukuwaʼipa nümaa Jeʼwaa (Sal. 51:4, 6, 10, 11).

18. ¿Kasa choʼujaaka nümüin wanee wayuu süpüla noonooin sümaa nünüiki Jeʼwaa?

¹⁸ Nnojoliinjana waya aʼwaataain suluʼu wakuwaʼipa sünain nnojoleenain waaʼinrüin kasa mojusü, tia shia tü shikirajakalü anain waya tü sümakat 1 Corinto 10:12. Sutuma eein tü kasa isawaikat nüchiki wanee wayuu, choʼujaasü nükaaliinjünüinjachin süpüla niainjachin noonooin amaa anüiki Jeʼwaa, suulia niain noonoʼolaa amaa anüiki Satanaa (Jer. 10:23). Choʼujaasüjeseʼe woʼuraajüinjanain nümüin Maleiwa weinshi sümaa jüüjüüin waya nümüin chi naaʼinkai. Woonoo sümaa tü nümakat Jeʼwaa wamüin.