1, 2. (1) ¿Jamapuʼusü nukuwaʼipa Adán sümaa Eva nakumajünaiwaʼaya? (2) ¿Kasa wekirajaainjatka anain sünain ekirajaayakat tüü?

MAʼÜNÜÜSAI Adán sümaa Eva nakumajünaiwaʼaya, mamojulasalii, kepiapuʼushii suluʼu wanee mma anashaatasü jee anashaatasü nakuwaʼipa nümaa Maleiwa, chi Kakumalakai naya (Gén. 2:7-9; Luc. 3:38). Ayaawatüna aaʼu jeʼrainjatüin kaʼi kataka oʼu naya sükajee tü aʼyatawaa niʼitaaka Jeʼwaa napüla (paashajeʼera Génesis 1:28). Nnojotsiaajeʼe choʼujaain katüinjatüin noʼu süpüla kaʼikat süpüshuaʼa süpüla jouluinjanain na nooʼuliwoʼukana. Katüinjatü noʼu süpüla naaʼinmajüin «tü kasa shirokujatkat palaa, [...] tü kasa waawatakat iipünaapünaa je [...] tü kasa mmapaʼajatkat». Naaʼinrüinjeʼe tia süpüla kaʼikat süpüshuaʼa.

² ¿Jamüsü nnojotka anain sukuwaʼipa wayuu maaʼulu yaa? ¿Jamüsü joutka maʼin tü kasa mojukalü atuma waaʼin? ¿Jamüsü ouktaka wayuu maʼleekalia? ¿Kasa naaʼinrüinjatka Maleiwa süpüla nüsünneʼerüin tü ouktaakat? Aküjünüsü tia otta waneeirua pütchi suluʼu tü Wiwüliakat. Wekirajaa sünain tia.

3, 4. (1) ¿Jamüsü nünüiki Maleiwa nümüin Adán sümaa Eva? (2) ¿Jamüsü choʼujaaka noonooinjanain sümaa tü nümakat Jeʼwaa?

³ Katüinjatiaa noʼu Adán sümaa Eva süpüla kaʼikat süpüshuaʼa. Süpüla tia, eküinjana, asanalüinjana jouktai, asüinjana wüin jee atunküinjana. Eepajaʼa wanee kasa analeeka maʼin, paaʼinwajiraainjana nümaa Jeʼwaa, chi eekai atuma kasa süpüshuaʼa (Deut. 8:3). Oonooinjanapajaʼa naya nümaa Maleiwa eeweere naya süpüla kaʼikat süpüshuaʼa. Anuu nünüiki namüin: «‹Kaatei, anuu süchon tü wunuʼukolüirua süpüshua yaa suluʼu tü apainkat süpüla piküinjatüin shia. Shiasaʼa nnojolüinjatüin piküin süchon tü wunuʼu atüjaweetkat atüma wayuu saaʼu tü anasükat je saaʼu tü mojusükat. Müleka piküle süchon wunuʼukot tüü, shiimüinshaana ouktajachin pia›, nümakalaka» (Gén. 2:16, 17).

⁴ Suluʼu tü apainkat Edén, eejatü «tü wunuʼu atüjaweetkat atüma wayuu saaʼu tü anasükat je saaʼu tü mojusükat». Eejatü shia süpüla sütüjaanüin aaʼu niain neʼe Jeʼwaa nümüiwaʼa aküjaka kasain wayuu tü anakat jee tü mojukat. Nütüjaa aaʼu Adán anale wanee kasa jee mojule shia, ¿aashin nukumajayaain nia Maleiwa maʼaka naaʼin niakai? Niyaawata aaʼu Adán sümaa Eva niainjachin Maleiwa aluwataaka naaʼu, sotowaisejeseʼe naaʼin tia neirakaʼawaipa sümüin tia wunuʼukat. Jamüshiijaʼa neküle tü süchonkot, müshi nnojoikai choʼujaain Maleiwa namüin. Jee ouktajana wanaa namaa na nooʼuliwoʼukana maʼaka nümatüjülin Jeʼwaa namüin.

5. ¿Jamüshii nnojoikaʼa noonooin Adán jee müsia Eva nümüin Jeʼwaa?

⁵ Nüküjüin Adán sümüin Eva tü nümakat Maleiwa nümüin. Sütüjaa aaʼu tia pütchikat, mülejeʼe süküjüin shia sümüin tü wüikat (Gén. 3:1-3). Yootoyoosü tü wüikat nutuma Satanaa, nnojoipuʼushi maajüin nia nümaiwa, anapuʼushi süka nüchoin nia Maleiwa. Yolujaashi nia mapa süka nuluwataweein maʼaka naaʼin Maleiwa (puʼwanaajireʼera sümaa Santiago 1:14, 15). Nnojotsü ouktajatüin Eva naashin chi Yolujaakai moonooinre shia nümaa Maleiwa. Alaaichipa Maleiwa naashin, mayaashi neʼe nia süpüla naaʼinrüin tü keeʼireekat naaʼin. Meerü aka shia naaʼin Maleiwa naashin (Gén. 3:4, 5). Shiküinjeseʼe süchon tü wunuʼukat, laülaweesüjaʼa neʼe saaʼu sukuwaʼipa sümüiwaʼa. Oonooshi joo Adán sümaa sünüiki, nikakalaka süchon tü wunuʼukat (Gén. 3:6, 17). Nimeejüin Eva chi Yolujaakai (paashajeʼera 1 Timoteo 2:14). Niküin Adán süchon tü wunuʼukat sümaa nütüjaain saaʼu mojeerüin nukuwaʼipa sutuma. Anamiayaashi chi Yolujaakai paala, nütüjaapejeʼe aaʼu mojeerüin nukuwaʼipa Adán sümaa Eva sutuma tü nümakat namüin.

6, 7. ¿Kasa naainjaka Jeʼwaa nümüin Adán sümaa Eva sutuma neʼrüliijaain wayumüin nümüin?

⁶ Eʼrüijaashi wayumüin Adán sümaa Eva nümüin Jeʼwaa. Eerejeʼe niain kakumalain naya, niain aapaka kasa namüin. Niʼrüin Jeʼwaa süpüshuaʼa tü kasa mojusü naainjakat (1 Crón. 28:9; paashajeʼera Proverbios 15:3 *). Nütüjawee aaʼu Jeʼwaa aire nia nüpüla Adán, Eva jee Satanaa. Nuuʼulaainjeseʼe naya sünain aaʼinraa tü anakat saaʼin namüin. Mojukalaka maʼin naaʼin Maleiwa sutuma naaʼinrüin kasa mojusü na nüchoinkana (puʼwanaajireʼera sümaa Génesis 6:6). Süsalashii naainjala nutuma Jeʼwaa. Süka jamüin, niain neʼe Jeʼwaa aikkaleʼetka wanee pütchi müleka anale jee mojule shia.

⁷  «Müleka piküle süchon wunuʼukot tüü, shiimüinshaana ouktajachin pia», müsü nünüiki Maleiwa nümüin Adán. Ouktajachiaa nia naaʼinruʼu soʼuleʼeya kaʼikat tia. Aashajaashi Jeʼwaa mapa nümaa Adán jee sümaa Eva motsopa kaʼikat (Gén. 3:8). Süka lotuin maʼin nukuwaʼipa Jeʼwaa, naapajüin palajana nanüiki naya wayuukana süchiki naainjala (Gén. 3:9-13). Süchikijee tia, nüküja nümüsia Jeʼwaa namüin ouktajanain naya (Gén. 3:14-19). Müleka ouktatüjüliire naya nutuma Jeʼwaa, nnojoishiijee jouluin na nooʼuliwoʼukana sainküin mmaka süpüshuaʼa (Is. 55:11). Mayaapejeʼe eemaatüin tü kasa mojusükat sutuma kaainjalain Adán sümaa Eva, nuuʼulaain naya Jeʼwaa kakaliain süpüla wainmain nachonnii. Otta anainjatü nakuwaʼipa nachonnii watta kaʼi. Müshii ouktakai naaʼin nümüin Jeʼwaa naya kaainjalashiikana soʼujeʼereʼeya tü kaʼi kaainjalakalü oʼu naya. Waneepajaʼa neʼe kaʼi katüin noʼu. ¿Suluʼu jamüin? Miit juya, «müsia aka saaʼin wane kaʼi neʼe nümüin chi Maleiwakai» (2 Ped. 3:8).

8, 9. ¿Kasa alataka namüin na nuuʼuliwoʼukana Adán sutuma sülataain nanain tü kaainjalaakat? (Piirakaa sümüin tü ayaakua suluʼukat süpana 22.)

⁸ ¿Kasaka alatüin namüin na nuuʼuliwoʼukana Adán sümaa Eva? Müshi Pablo suluʼu Roma 5:12: «Kaainjalashi Adán nuulia Maleiwa sükajee niyouktajaain sümaa nünüiki nümüin. Ouktakalaka nia saaliijee. Je sükajee kaainjalain Adán, oʼttüsü wayuu ütamüinreʼeya sünain kaainjalaa. Ouktakalaka naya saaliijee». Chi palajaikai maʼin ouktüin nia Abel (Gén. 4:8). Shiasaʼa mapa, laülaashii jee ouktüshii na wanee nüchonniikana Adán ooʼulaka na nüikeyuukana. ¿Kaainjalashiiche maka ouktüin naya? «Saaʼujee moonooin Adán sümaa nünüiki Maleiwa, oʼttüsü wayuu ütamüinreʼeya sünain kaainjalaa», müshi Pablo (Roma 5:19). Alataasü nanain na nuuʼuliwoʼukana Adán sümaa Eva tü kaainjalaakat jee tü ouktaakat. Choʼujaashi wanee wayuu akaaliinjüinjanaka naya suulia tia. Mayaapejeʼe nnojoluin watüjaain saaʼu jamüin sukuwaʼipa süpüla sülataain tia nanainmüin, weʼrüin mojuin wakuwaʼipa sutuma tia.

⁹ Saashin tü Wiwüliakat, tü kaainjalaakat jee tü ouktaakat müsü aka saaʼin wanee kuluulu eeka saaʼu wayuu süpüshuaʼa (Is. 25:7). Süküjüin tü Wiwüliakat sünain ouktüin wayuu süpüshuaʼa nünainjee Adán (1 Cor. 15:22, NM). Müshijeseʼe nümüin Pablo: «Kasataalejese tajuittinnüin maalü suulia [kaainjalaa]» (Roma 7:24, 25). ¿Jarai akaaliinjeechika Pablo? *

10. (1) ¿Jarat tü pütchi suluʼujeejatkat tü Wiwüliakat aküjaka najaʼlajeʼereerüin Maleiwa tü ouktaakat? (2) ¿Kasa shikirajaka anain waya tia pütchikat nüchiki Jeʼwaa nümaa Jesuu?

¹⁰ Nia Jeʼwaa akaaliinjeechika Pablo. Müsüjeseʼe sümüin tü Wiwüliakat mayaa: «Müiria nnojoluin ouktaa. Nnojoleerü aʼyalajaa naashin Jeʼwaa, chi Laülaakai saaʼu kasa süpüshuaʼa» (Is. 25:8 NM). Nüsünneʼereerü Jeʼwaa tü müliakalü atuma saaʼin wayuu jee müsia tü ouktaakat, meechi aka naaʼin chi wayuu akaaliinjaka nüchon suulia tü müliakalü atuma naaʼin, nülaʼajaajeerü nüʼwüira. Chi akaaliinjeechikai Jeʼwaa sünain tia, nia Jesuu. Müsüjeseʼe sümüin tü Wiwüliakat nüchiki Jesuu: «Sünainjee nnojoluin noonooin Adán sümaa nünüiki Maleiwa, ouktüsü wayuu süpüshuaʼa. Katapajaʼa soʼu wayuu süpüshuaʼa nünainjee Kürisüto» (1 Cor. 15: 22, NM). Müshi Pablo mapa: «Taapüin joo analuʼutka nümüin Maleiwa saaʼu naapüin nikii chi nüchonkai» (Roma 7:25, NM). Ayatsia alin wayuu nüpüla Maleiwa mayaapejeʼe kaainjalain Adán sümaa Eva. Akaʼaya Jesuu, ayatsia alin wayuu nüpüla. Eejachia nia sünain akaaliinjaa Jeʼwaa wanaa sümaa nukumajünüin Adán sümaa Eva (Prov. 8:30, 31). ¿Kasa aainjünüinjatka süpüla taashinjatüin wayuu suulia saainjala jee ouktaa?

11. ¿Kasa naainjaka Jeʼwaa süpüla nnojoluinjatüin ouktüin wayuu?

¹¹ Ouktüshi Adán nutuma Jeʼwaa saaʼu naainjala. Müsüjeseʼe kaainjalain jee ouktüin wayuu maʼleekalia (Roma 5:12, 16). Müsü tü Wiwüliakat: «Nükajee Adán, saaʼu kaainjalain nia, eʼitaanüsü wayuu süpüshua nütüma Maleiwa süpüla süsalainjatüin saainjala» (Roma 5:18). ¿Kasa naainjüinjatka Jeʼwaa süpüla nnojoluinjatüin ouktüin wayuu? ¿Jamüsü sukuwaʼipa nutuma süpüla ayatüinjatüin naaʼinrüin tü nüpansaajakat paala nümüin Adán? Naashin Jesuu, antüshi nia süpüla «taashinjatüin wayuu wainma suulia saainjala sünainjee ouktüin» nia (Mat. 20:28). Nia neʼe Jesuu anaka süpüla aaʼinraa tia süka maainjalain nia. ¿Jamüshi niaka anain süpüla alaʼajawaa saainjala wayuu? (1 Tim. 2:5, 6.)

12. ¿Kasa naainjaka Jeʼwaa süpüla naainjüin tü nüpansaajakat paala?

¹² Sutuma maainjalain Jesuu, katüinjatü noʼu süpüla kaʼika süpüshuaʼa maʼaka katüinjatiaain noʼu Adán. Akatsaʼa keeʼireein naaʼin Jeʼwaa jouluinjatüin nuuʼuliwoʼu Adán sainküin Mmaka süpüshuaʼa. Aapajiraashi nikii Jesuu süpüla ouktaa süka miyoʼuin maʼin naalin Maleiwa nüpüla, naaliin na nuuʼuliwoʼukana Adán jee süpüla eeinjatüin süchikuaʼa tü amülouikat nutuma Adán. Asoʼireʼennüsü naaʼin Jesuu nutuma Maleiwa (1 Ped. 3:18). Anasü wakuwaʼipa noʼuluʼu Maleiwa mapa süka anain nümüin naapajiraain nikii Jesuu saaʼu waainjala. Sutuma tia, kateerü noʼu süpüla kaʼikat süpüshuaʼa na nuuʼuliwoʼukana Adán. Müshi Pablo: «Maa aka sümakat tü ashajuushikat: ‹Akumajünüshi Adán, chi palajachikai wayuu, sünain saapünüin kataa oʼu nümüin›. Otta Cristo, nia aapaka kataa oʼu sümüin wayuu» (1 Cor. 15:45).

13. ¿Kaseerü naainjaka Jesuu naka na wayuu ouktüinnapakana?

¹³ Soʼu palit kaʼi, nnojoleerü ouktüin wayuu maʼleekalia süka naapajiraaichipain nikii Jesuu. Nüsoʼireʼereerü Jesuu saaʼin tü wayuu ouktüsükalüirua süpüla kepiainjatüin yaa mmapaʼa (Juan 5:28, 29).

14. ¿Jamüinjatü sukuwaʼipa süpüla maainjalainjanain na wayuukana?

¹⁴ ¿Jamüinjatü sukuwaʼipa süpüla maainjalainjatüin wayuu? Nüneeküin Jeʼwaa Jesuu jee na 144.000 anoujüshiikana süpüla Naluwataainjanain saaʼu wayuu sainküin mmaka (paashajeʼera Alateetkat Mapeena 5:9, 10). Na 144.000 anoujüshiikana, nounteerü nakaaliinjüin wayuu süka kepiapuʼuin naya yaa saaʼu mmakat otta natüjaa aaʼu jamüin sukuwaʼipa wayuu. Soʼutpünaa tü miitkat juya, Jesuu namaa na 144.000 anoujüshiikana, nakaaliinjeena na wayuukana süpüla maainjalain naya (Alat. Map. 20:5, 6).

15, 16. (1) «Nüsünneʼerüinjatü tü ouktaakat», ¿jamaluʼulu tia pütchikat? ¿Joujeerü süsünneʼennaka tü ouktaakat? (2) ¿Kaseerü naainjaka Jesuu saashin 1 Corinto 15:28?

¹⁵ Kettaapa tü miitkat juya, maainjaleerü wayuu jee nnojoleerü ouktaa. Anuu nünüiki Pablo süchiki tia: «Sünainjee nnojoluin noonooin Adán sümaa nünüiki Maleiwa, ouktüsü wayuu süpüshuaʼa. Katapajaʼa soʼu wayuu süpüshuaʼa nünainjee Kürisüto. Katatawaisü sukuwaʼipa tia, palajana nia Kürisüto, süchikijee naya na anoujüshii chainjanakana iipünaa nümaa Kürisüto niweetapa. Süchikijee  tia, anteerü sükalia sajaʼttaleeinjatka oʼu kasa mojusü, nüleʼejirapa süchikuaʼa tü Aluwataaya aapünakat nümüin nutuma chi Nüshikai, najaʼttirapa süpüshuaʼa tü aluwataayakalüirua sainküinjee mmaka. Aluwataainjachi nia, waneʼereʼeya nuuʼulaain suulia aluwatawaa niyamütpa Maleiwa tü nüʼünüükalüirua. Shiasaʼa süchikijee tia, nüsünneʼerüinjatü tü ouktaakat» (1 Cor. 15:22-26, NM). Nnojoleerü jaralüin ouktüin süka kateerüin soʼu wayuu süpüla kaʼikat süpüshuaʼa (Is. 25:7, 8).

¹⁶ Müsü nünüiki Pablo: «Je jüüjüüpa kasakat süpüshua nümüin Cristo chi Nüchonkai Maleiwa, jüüjüüjeechi nia nümüin chi Nüshikai. Nieechikalaka Maleiwa laülaain saaʼu kasakat süpüshuaʼale» (1 Cor. 15:28). Ekettaajeerü süpüshuaʼa tü naainjüinjatkat Jesuu. Talatashaateerü naaʼin sutuma shikeraajüin tü keeʼireekat naaʼin Jeʼwaa süpüleerua wayuu. Nieechi Jeʼwaa aluwataaka saaʼu kasaka süpüshuaʼa.

17. ¿Kaseerü alataka nümüin Satanaa?

¹⁷ ¿Kaseetka alatüin nümüin chi kamaʼüraikai, Satanaa münakai? Aküjünüsü tia suluʼu Alateetkat Mapeena 20:7-15. Süchikijee tü miitkat juya, niʼikeʼereena Satanaa na wayuu anainnapakana akuwaʼipa. Ajaʼttinneena wanaa nümaa Satanaa na wayuu oonookana nümaa. «Ouktaleeinjana naya» süpüla kaʼikat süpüshuaʼa saashin tü Wiwüliakat (Alat. Map. 21:8, NM). Naya makana akuwaʼipa, nnojoleena naya asoʼiraain aaʼin nachikuaʼa, müinnaleʼeya. Aluʼuinjaʼa na wayuu aikana apüla Jeʼwaa jee na oonookana nümaa, eejeena süpüla kaʼikat süpüshuaʼa.

18. ¿Kaseerü alataka süpüla nikettaajüin Maleiwa tü nümakat?

¹⁸ Eejeena na wayuukana süpüla kaʼikat süpüshuaʼa, nnojoleechi jaralin ouktüin. Anajiraajeena nümaa Jeʼwaa na wayuukana. Nikettaajeerü Maleiwa süpüshuaʼa tü nüpansaajatüjütkalia, jaʼitashi nnojolin Adán. Wainmeerü wayuu eeka saaʼu tü Mmakat, naaʼinmajeerü tü mürütkalüirua jee müsia tü wanee kasakalüirua. Nnojoleerü ouktüin wayuu mapa. ¡Talatashaatasü waaʼin sutuma watüjaain saaʼu tia!