Anuu nünüiki David: «Nnojoiyüiya teʼrüin wanee wayuu lotokai akuwaʼipa müliain maʼin; nnojoyülia teʼrüin nüchonnii sünain ojulijakuʼu maa eküülü» (Sal. 37:​25, TNM). Tü pütchi nüshajakat David suluʼu wetsiikulokot tüü, shia tü alatakat namüin na lotokana akuwaʼipa jee alatüsü shia nümüin niakaʼiya. Nütüjaa aaʼu naapüin Jeʼwaa nümüin waneepia tü choʼujaakat nümüin. Nnojotpejeʼe shiain nüküjeein David nnojoluinjachin nülatirüin müliaa wanee anoujüshi.

Kojuyatua niʼrüin nümüliala David. Jamüshijaʼa wanaa sümaa nuʼutüneein aaʼin nutuma Saúl, ounjulaashi nia nuulia wünaʼapü. Shiasaʼa suʼunnaa tia, apalirajüsü tü eküülü eejatkat nümaʼana otta namaʼana na nümaajanakana, nujulijapünaakalaka pan nuulia Ahimélec, chi sacerdootekai (1 Sam. 21:​1-6). Soʼu tia, ojulijapünaashi neʼe pan David, nnojoipejeʼe ojulijakuʼu müin nia eküülü yalapünaa saashin tü Wiwüliakat. Nütüjaa aaʼu David, nnojolin niyüülajüin nia Jeʼwaa.

Nüküjüin Jesuu suluʼu Mateo 6:33 (TNM), naapeerüin Maleiwa süpüshuaʼa tü choʼujaakat nümüin chi wayuu palajanakai atuma tü Nuluwataayakat. Anuu nünüiki Jesuu: «Ayata jüchajaain palajana tü nuluwataayakat Maleiwa otta tü lotookalü akuwaʼipaa. Shiasaʼa süpüshuaʼa tü wanee kasakalüirua [maʼaka saaʼin jiküin, jüsüin, jüsheʼein], aapüneerü jümüin». Nüküjapejeʼe Jesuu namüin na nikirajüinkana nalatireenain jamü süka mülieenain naya atumawaa (Mat. 25:​35, 37, 40). Alatüsü tia nümüin chi aluwataaushikai Pablo; eeshi müliapuʼule maʼin nia sutuma jamü jee sutuma wüinyaasü (2 Cor. 11:27).

Naashin Jeʼwaa, wainma kasa ooʼulaküneetka aka waaʼin. Jee müsia eeshii süpüla nuuʼulaain waya weʼrüin wamüliala mayaapejeʼe jüüjüüin waya nümüin (Job 2:​3-5). Jamüshiijaʼa na wawalayuu nüpüreesajitkana Hitler, alatitshii naya jamü. Tia shia wanee sukuwaʼipa nutuma chi Yolujaakai süpüla nükatalüinjanain naya nuulia Jeʼwaa. Akanasaʼa ayatüin oonooin nümaa Jeʼwaa naya wawalayuukana, makalaka nükaaliinjüin naya. Eeshiijaʼa weʼrüle wamüliala maʼaka neʼrüin namüliala naya wawalayuukana suʼunnaa tia. Nükaliinjapejeʼe Jeʼwaa na aʼyataakana nümüin müleka müliale naya niʼrüin (1 Cor. 10:13). Soteesü waaʼin waneepia tü sümakat Filipos 1:29: «Tü müliaa jülatirakat, antüsü jünainmüin süka jüneekuushin nütüma Maleiwa süpüla jünoujainjanain nünain Cristo otta süpüla jiʼrüinjanaʼinya tü müliaakat nünainjee».

Naashin Jeʼwaa, nükaaliinjeena na wayuu aʼyataakana nümüin. Müshi nia suluʼu Isaías 54:17 (TNM): «Jaʼitairü kasain maʼin aainjüneein pümüin, amalajaajeerü shia». Pütchikat tüü otta waneeirua pütchi nümaka Maleiwa, shiiʼiyatüin sünain nükaaliinjeerüin tü nupueulosekat. Eepajaʼa süpüla sülatüin kasa mojusü nümüin wanee anoujüshi jee shiale ouktüin nia.