NAATAWAISÜ sukuwaʼipa wayuu sainküin mmakat süpüshuaʼa kaamakale shia. Eeshii eekai naʼwaatüin sümaa muloʼuin neʼira nüchiirua chi wayuu anaajaashikai. Eeshii eekai luutain nasheʼin otta apalasiraashii naya mmoluʼu sutuma mojuin naaʼin. Eetaashii na ayonnajakana, eetaashii na ekaakana sümaa nasirajüin. Eeshii na epeʼruwaakana.

Watta joo naalii na mmotkana seema tü ouktüsükalüirua süka shipeijaʼawalin napüla naashin. Müsüjeseʼe naainjüin kasa nekiira na ouktüshiikana süpüla nnojoliinjanain jamajüin naya natuma nayolujase. Nnojotsü naainjüin tia na aküjüliikana pütchi nüchiki Jeʼwaa. Nnojotsiaajeʼe mojuin niʼyalajüle wanee wayuu nüchiirua wanee nüpüshi eekai nünaajaain. Aʼyalajüshi Jesuu otta aʼyalajüshii na nikirajüinkana soʼu ouktüin naʼaleewainyuu (Juan 11:33-35, 38; Aluw. 8:2; 9:39). Nnojoliipejeʼe naya palasükuʼu müin sünain aʼyalajaa otta nnojotsü nashatüin tü naainjakat na waneeinnua (Luc. 23:27, 28; 1 Tes. 4:13).

Anuu sünüiki tü Wiwüliakat: «Na wayuu katüshiikana oʼu, natüjaa aaʼu oukteenain naya soʼu wanee kaʼi; akanasaʼa na ouktüshiikana, nnojotsü kasain natüjaain aaʼu süka ouktüinnapain naya [...]. Nnojotsü süpüla alin wayuu napüla, nnojoishii süpüla nachumujüin otta nnojotsü süpüla üttüin naaʼin [...]. Nnojotsü kasain naʼyataain anain, nnojotsü kasain natüjaain aaʼu otta nnojotsü kasain natüjüin apüleerua suluʼu tü Seolkat» (Ecl. 9:5, 6, 10, TNM). Suluʼu wetsiikulokalüirua tüü, aküjünüsü sünain nnojoluin kasain natüjaain aaʼu na ouktüshiikana. Nnojotsü kasain jülüjüin naaʼin, nnojotsü süpüla alin wayuu napüla, nnojotsü süpüla üttüin naaʼin sooʼomüin wayuu jee nnojoishii süpüla yootuin naya sümaa wayuu. Sutuma natüjaain saaʼu tia na anoujashiikana, ¿kasa naaʼinrajatka nünaajaale wanee napüshi eekai nunoujain?

Na aküjüliikana pütchi nüchiki Jeʼwaa, nnojoishii naya sünainpünaain tü kasa mojusü aainjünakat nünaajaale wanee wayuu. Jamüshiijaʼa naya, nnojoishii aresaain naaʼu müliashii, nnojoishii naya sünainpünaain tü aainjünakat nikeraajüle juya wanee ouktüshi, nnojoishii naya eʼikajaain eküülü otta wüin amuuyuupaʼamüin nümüin chi müliashiikai, nnojoishii naya oʼunüin sünain epejawaa jee nnojoishii naya eisalüin sümüin nuʼwayuuse müliashii. Süka jamüin, kashüülain süpüshuaʼa tia noʼuluʼu Maleiwa. Saainjain tia wayuu süka sunoujain sünain ayatüin katüin soʼu tü naaʼinkat wanee wayuu süchikijee ouktüin nia (Eze. 18:4). Nayouktüin tia na anoujashiikana süka nnojoluin süpüla neküinjanain «saaʼu tü nimeesainkat Jeʼwaa otta saaʼu tü nemeesainkat na yolujaakana» (1 Cor. 10:21, TNM). Shia naaʼinraka tü sümakat tü Wiwüliakat, tü makat mayaa: «Juuʼulaa suulia jaaʼinrüin tü kasa mojusü saaʼinrakat tü manoujainsatkalüirua» (2 Cor. 6:17). Nnojotpajaʼa mapüleewalain tia, kapüleesü.

Jamüsüjaʼa chayaa África otta suluʼupünaa waneeirua mma, wainma kasa aainjünaka nekiira na ouktüshiikana. Shiasaʼa nnojorüle naainjüin tia naashin nayakana, jashicheena na napüshi ouktakana otta eesü süpüla sülatüin kasa mojusü namüin. Mojusü anüikii namüin na aküjüliikana pütchi nüchiki Jeʼwaa saaʼujee nnojoluin naainjüin tia kasa naainjakat na manoujainsaliikana. Eeshii eekai ayouktünüin sutuma napüshi jee na kepiakana pejepünaa nanain sutuma tia. «Mapüsheesalii jia. Mojutsai jümüin müliashii», münüshii naya natuma na wayuu kasayuukana nanain. Eeshii na jashichijaakana sutuma nayeein laülaweein saaʼu tü nikiirainjatkat müliashii. ¿Kasa waaʼinrajatka süpüla nnojoliinjanain peʼipaain waya namaa na wayuu makana akuwaʼipa? ¿Kasa waaʼinrajatka süpüla nnojoliinjanain waya sünainpünaain  wanee kasa eekai mojeerüin atuma wakuwaʼipa nümaa Jeʼwaa?

Suluʼu waneeirua mma, nünaajaale wanee wayuu naya aküjakana tü aainjünajatkat na laülaayuukana jee na kasayuukana nünain müliashii. Müleka nünaajaale wanee wayuu kasakai pünain sümaa nunoujain nünain Jeʼwaa, acheküshi püküjüin namüin na püpüshi manoujüinsaliikana nayainjanain na aküjüliikana pütchi nüchiki Jeʼwaa akumajüin sukuwaʼipa tü aainjünajatkat nikiira. Süka jamüin, pansaajeerüin tü naainjakat sümaa tü sümakat tü Wiwüliakat (2 Cor. 6:14-16). Tü aainjünajatkat soʼu tia, pansaainjatü sümaa tü sümakat tü Wiwüliakat süpüla anainjatüin naaʼin na anoujiraakana wanaa wamaa jee na eʼraajakana sukuwaʼipa tü wekirajaakalü anain suluʼu tü Wiwüliakat.

Müleka nayale aashajaanüin amaa na laülaashiikana suluʼu tü outkajaaleekat süpüla nayainjanain oʼunirüin sukuwaʼipa tü aainjünajatkat nüka müliashii, kaaliinjatü napüla na laülaashiikana nüpüshi chi müliashiikai jee naküjüinjatü namüin tü anakat süpüla aainjünaa wanaapünaa sümaa tü sümakat tü Wiwüliakat. Eere wanee wapüshi manoujüinsai aainjeekai wanee kasa mojuka noʼuluʼu Maleiwa, waashajaainjachi amaa nia süka anakalü akuwaʼipa, waküjüinjatü nümüin sünain nnojoluinjatüin müin sukuwaʼipa tia süka wanoujain nünain Jeʼwaa (1 Ped. 3:15). Macheʼere maʼin nia süchiirua tia, shia anaka aluʼu woʼunüle yalejee (1 Cor. 10:20). Eeshii süpüla noʼunüin na nüpüshi anoujakana suluʼumüin tü Piichi Outkajaaleekat süpüla naapajüin  tü pütchi achechereetkat naaʼin. Eeshii süpüla noʼunüin suluʼumüin wanee piichi eekai anain süpüla saainjünüin tia outkajawaakat (Roma 15:4). Ayatüinjatia kojutüin atumawaa tia outkajawaa aainjünajatkat, jaʼitaichi nnojoluin nülüʼüjünüin müliashii suluʼumüin tü outkajaaleekat (Deut. 34:5, 6, 8). Eesü mojule naaʼin na wawalayuu kaamakashiikana sutuma tü aainjünakat namüin natuma na napüshi manoujüinsaliikana. Anapajaʼa naaʼin Jeʼwaa namaa naya wawalayuu oonookana sümaa nünüiki suʼunnaa tia makat. Naapeeria Jeʼwaa namüin tü yalayalaakat aaʼin (2 Cor. 4:7).

Süpülapünaa nünaajaain wanee anoujashi, nüshajüinjatü nünüiki suluʼu wanee karaloukta süchiki tü aainjünajatkat nüka nümülooipa. Müle shia nutuma, paaʼinwajiraajeena na nüpüshikana sünain tü aainjünajatkat nüka. Nüshajüinjatü sünain tia karalouktakat jalainjachin niʼyalajünüin aaʼu, jaralinjachin oʼunitkai sukuwaʼipa tia (Gén. 50:5). Nipirmaajapeena tia karalouktakat chia wawalakai, anasü müleka naainjüle tia noʼupala kojuyashii wayuu kasakana nünain süpüla kojutüinjatüin shia amüinyüü. Süpülapünaa saainjünüin wanee kasa, akumajünüinjatü sukuwaʼipa palajana saashin tü Wiwüliakat. Chi aaʼinrüinjaikai tia, nnojotsü naʼatapajüinjatüin laülaain nia süpüla naaʼinrüinjatüin tia otta nnojotsü naaʼinrüinjatüin tia mayeinpa neʼe nia (Prov. 22:3; Ecl. 9:12).

Eeshi anoujashi eekai nnojoluin nücheküin nüshajüin tü aainjünajatkat nüka nünaajaapeena. Choʼujaapajaʼa nüshajüinjatüin tia süka niiʼiyateerüin sünain laülaain naaʼin sünain anoujaa otta niiʼiyatüin alin nüpüla na nüpüshi anoujiraakana wanaa nümaa (Filip. 2:4). Nnojorüle naainjüin tia, atkaajiraajeerü neʼe tü nüpüshikalüirua saaʼujee tü aainjünajatkat nüka. Eeshii joo nayale amojujaain anoula na nüpüshi anoujakana sutuma sünainpünaain naya wanee kasa nnojotka anain saashin tü Wiwüliakat.

Jamüsüjaʼa sukuwaʼipa wayuu chaa África, aainjüshii wainma kasa nikiira müliashii suulia joo jashichijüin naaʼin na nutuushinuu kakaliainnakana anaajaain. Eeshii na aainjakana tia shiiʼiree «aʼwaatawaa suluʼu nawashirüin ooʼulaka suluʼu tü naaʼinrakat» (1 Juan 2:16). Wainma kasa naainjaka otta wainma nneerü kettaka sünain tü naainjakat nikiira müliashii. Eeshii eekai neʼitaain niyaakua müliashii suluʼupünaa kaaye jee jalapünaa yaa shiiʼiree wainmainjatüin wayuu oʼunakana sünain alapajaa. Eetaashii na eʼitaakana niyaakua müliashii sünain camiseta. Neitajüin mapa tia sümüin wayuu süpüla saʼatüinjatüin shia niʼikünapa. Eeshii eekai nayaʼlajüin kojon eekai kojutüin maʼin süpüla «pounuataayai nüta müliashii», sümüinjatüin wayuu. Eetaasü joo wanee mma chayaa África, eere sukumajinnüin tü natainjatkat na anaajaakana, eesü eekai müin aka saaʼin kemion, eesü eekai müin aka saaʼin katünasü jee shiale müin aka saaʼin anua. Naainjüin tia naya wayuukana süpüla sütüjaanüinjatüin aaʼu washinnuuin naya. Eetaashii joo na ayuʼtkana müliashii suluʼujee tü kojon eʼitaakalü aluʼu nia süpüla nujulereʼennüin saaʼu wanee kaama akumajuushika nüpüla. Ouktüle wanee jierü, aʼaneʼenüsü shia maʼaka saʼanaaya wanee wayuu kasaalüinjatka. Kaüliijanasü shia atumawaa otta kachepasü shia atumawaa. ¿Anasüche naainjüle na anoujashiikana tia makat?

Müleka laülaale naaʼin wanee wayuu sünain anoujaa, nnojoleerü nüshatüin tü kasa naainjakat na manoujainsaliikana. Nütüjaa aaʼu nnojoluin «niʼikalain chi Maleiwakai» tü kasa mojusü naainjakat na manoujainsaliikana nünaajaale napüshi, maʼaka saaʼin «aʼwaatawaa suluʼu nawashirüin» (1 Juan 2:15-17). Jülüjeesü maʼin waaʼin wakuwaʼipa suulia washatüin  nakuwaʼipa na manoujainsaliikana (Gal. 5:26). Suluʼupünaa tü mmairua eere mmoluin wayuu seema shipeijaain napüla saaʼin wayuu ouktüsü, watta saalii wayuu oʼunaka sünain wanee ouktaa. Shiasaʼa sutuma tia, kapüleesü namüin na nüpüshikana müliashii jülüjüin naaʼin süpüshuaʼa tü kasa aainjünakat. Müshiijeseʼe wainmain na aainjakana tü kasa mojukat noʼuluʼu Maleiwa. Eeshii eekai müin oukteekai naaʼin sünain aʼyalajaa otta muloʼu nekiisa, eeshii eekai naʼwachiraain naaʼu müliashii, eeshii eekai naashajaain nümaa, eeshii eekai niʼitaain nneerü jee waneeirua kasa sünain nüsheʼin müliashii. Saainjünüle tia nümüin wanee anoujashi eekai nünaajaain, mojeerü pütchi nüchiki Jeʼwaa otta nachiki na aʼyataakana nümüin (1 Ped. 1:14-16).

Saashin tü Wiwüliakat, ouktapa wanee wayuu nnojotsü süpüla kasain naainjüin. Shiasejeʼe sutuma watüjaain saaʼu tia, nnojoliinjana waya sünainpünaain wanee kasa mojuka saashin tü Wiwüliakat (Éf. 4:17-19). Soʼu tü kaʼi niʼitaanakalü oʼu Jesuu, nnojotsü wainmain maʼin tü kasa aainjünakat nüka, eʼitaanamaatüshi maalü (Juan 19:40-42). Müle watuma nukuwaʼipa wanee wayuu kasakai wanain maʼaka saaʼin tü aainjünakat nüka Jesuu, nnojotsü mojuin tia (1 Cor. 2:15, 16). Nünaajaale wanee wapüshi, nnojotsü wainmainjatüin maʼin kasa waainjüinjatka nikiira suulia neʼe waainjaʼalüin wanee kasa nnojotka anain naashin Jeʼwaa.

Aluʼuinjaʼa sukuwaʼipa wayuu wattapünaa, süchikijee niʼitaanüin wanee aamakaa, eʼitaanüsü muusika otta ayonnojoyaa müsü tü wayuu alapajaasükalüirua. Asaayaa müshii naya, eeshi chi eekai nümaʼüjiraain nukuwaʼipa sümaa wanee jierü nnojotka nuʼwayuusein. «Aleinjatüjaʼaya sümaa müinjatüin sukuwaʼipa atumawaa süka wakuwaʼipainjaʼa shia», mayaa müshii na aainjakana tia. Nnojotsü mojuin maʼin naaʼin. Makaʼa naainjüin tia, shia süpüla neeʼiyatüin nujutü chi müliashiikai otta taasia süpülajatü joo anainjatüin naaʼin chi müliashiikai sünain oʼunaa eemüin saaʼinpülee tü ouktüsükalüirua naashin.

Saashin tü Wiwüliakat, anaʼleesia nümüin wanee wayuu mojule naaʼin suulia nüsirajakuʼu nümüin süka aneerüin mapeena naaʼin (Ecl. 7:3). Nünaajaale wanee wapüshi, anasü müleka waashajeʼerüle suluʼu waaʼin süchiki tia alatakat nümüin jee müsia sünain susoʼiraajeerüin naaʼin mapa. Wayakana aikana maʼin apüla Jeʼwaa, anaʼleesia wamüin tü kaʼi ouktakalü oʼu waya suulia tü kaʼi jemeikalü oʼu waya (Ecl. 7:1). Sukuwaʼipamaajatüle yolujaa tü aainjünakat sünain wanee alapajawaa, nnojotsü anain müleka sünainpünaale wanee anoujashi makat aka tia. Müleka nuʼunüle sünain tia, mojuteechi Maleiwa nümüin otta mojuteena na nuwalayuukana nümüin.

Watta naalii wayuu maaʼulu yaa mmotka seema tü ouktüsükalüirua. Nnojotpajaʼa müin wakuwaʼipa wayakana aʼyataashiikana nümüin Jeʼwaa, müshiijeseʼe waapashaatain analuʼut nümüin Jeʼwaa saaʼu nikirajüin waya sünain tü shiimainkat süchiki tia (Juan 8:32). Nünaajaale wanee wapüshi, wakumajüinjatü sukuwaʼipa tü aainjünajatkat nüka müliashii wanaapünaa sümaa tü sümakat tü Wiwüliakat. Shiimainsaʼaya waʼyalajüin ouktüle wanee wapüshi, watüjaapejeʼe saaʼu susoʼiraajeerüin saaʼin tü ouktüsükalüirua (Éf. 5:8; Juan 5:28, 29). Nnojoliipejeʼe waya müin oukteʼereekai waaʼin sümaa weʼira otta wekiisa waʼyalajapa nüchiirua müliashii maʼaka naaʼin na manoujainsaliikana. Makaʼa nakuwaʼipa shia süka nnojoluin natüjaain saaʼu susoʼiraajeerüin naaʼin na ouktüshiikana (1 Tes. 4:13). Nnojoishii waya mmoluin seema tü ouktüsükalüirua süka watüjaain saaʼu nnojoleenain waya jamajüin sutuma otta nnojoleena waya mmoluin seema asoukta saaʼu tü wanoujakalü anain (1 Ped. 3:13, 14).

Waaʼinrüle tü nümakat Jeʼwaa sünainpünaa tia, nayaawateerü aaʼu na wayuukana sünain wanoujain nünain Jeʼwaa (Mal. 3:18). Saashin tü Wiwüliakat, müiria nnojoluin tü ouktaakat mapa (Alat. Map. 21:4). Makalaka anain wulere tü wakuwaʼipakat sümaʼinruʼu waʼatapajüin nikeraajüin Jeʼwaa tia nümakat. Jee müsia, nnojo washatüin tü kasa mojusü saaʼinrakat tü manoujainsatkalüirua (2 Ped. 3:14).