1, 2. (1) ¿Kasa alatajatka naashin Jesuu sülüʼütpa maʼin süpüla sajaʼttüin tü kasa mojusükat? (2) ¿Kasa wekirajaainjatka anain sünain ekirajaayakat tüü?

SOʼU wanee kaʼi, chajachi Jesuu saaʼu tü wutaikat Olivos, eejachi Pedro, Andrés, Santiago otta Juan nümaa. Jaʼyasü yalejee tü aʼwaajüleekat Maleiwa chaa Jerusalén. Nüküjüin Jesuu süchiki tü kasa anashaatasü alatajatkat nuluwataapa suluʼu Nuluwataaya Maleiwa jee sülüʼütpa maʼin süpüla sajaʼttüin tü kasa mojusükat. Nüküjüin eeinjachin wanee «achepchiee oonookai otta kekiikai maʼin». Chia achepchieekai nia aapüinjachika tü kasa choʼujaakat sümüin nanoula na wayuu apütünakana najapuluʼu (Mat. 24:45-47, TNM).

² Mapa süchikijee tia, nüküjataain joo namüin süchiki poloosü majayünnüü (paashajeʼera Mateo 25:1-13). Shiainjatü wekirajaaka anain tia jooluʼu. Wekirajaainjatü anain apünüinsü kasa. ¿Kasa nikirajeeka anain Jesuu sükajee tia? ¿Kasa naainjaka na wawalayuu aluwataainjanakana chaa iipünaa süka nashatüin tia  otta kaseerü neʼraka sünainjee? ¿Kasa watüjaka sünainjee tia maaʼulu yaa?

3. (1) ¿Jamapuʼusü sukuwaʼipa natuma na wawalayuukana nekirajapuʼuiwaʼaya süchiki tü majayünnüükalüirua? (2) ¿Jamüsü shiale maʼin nekirajüin na wawalayuukana sünain tü ramparakat, tü seitakat?

³ Nunoukteʼerüin chi achepchieekai tü kasa shikirajakalü anain tü Wiwüliakat maaʼutpünaa yaa. Shia wekirajaaka anain tia sünain tü palajatkat ekirajaaya. Sümaiwa paala shia nekirajapuʼuka anain kasain kayaakuayaain wanee kasa alataka saashin tü Wiwüliakat. Maaʼulu yaa, shia nekirajaka tü watüjakat sünainjee tia pütchikalüirua. Jamüsüjaʼa sümaiwa paala, shia nekirajapuʼuka maʼin na wawalayuukana jamaluʼuluin süranparase tü majayünnüükalüirua, tü seitakat, süta tü seitakat. Shiasejeʼe shiale maʼin ekirajünüin anain tia, moteerü aaʼinyüü tü anakalü süpüla washatüin. Shiakalaka wekirajaainjatüin anain tü anakalü süpüla washatüin sünain ekirajaayakat tüü.

4. (1) ¿Jarai chi kaʼwayuuseinjachikai? ¿Jamüsü watüjaaka saaʼu sünain niain niakai? (2) ¿Jarat tü majayünnüükalüirua? ¿Jamüsü watüjaaka saaʼu tia?

⁴ Süpüla watüjaain saaʼu tü nikirajakalü anain Jesuu, acheküsü watüjaain saaʼu jaraliin naashajaain achiki. ¿Jarai chi kaʼwayuuseinjachikai? Nia Jesuu. ¿Jamüsü watüjaaka saaʼu sünain niain niakai? Shia süka niyaakuayaain nia wanee wayuu kaʼwayuuseinjachikai (Luc. 5:34, 35). ¿Jaratka tü majayünnüükalüirua? Naya na aluwataainjanakana nümaa Jesuu chaa iipünaa. ¿Jamüsü watüjaaka saaʼu sünain nayain nayakana? Naashin Jesuu müshii naya maʼaka naaʼin na wayuu aʼatapajakana nalaamain sünain chuwachuwalüin naranparase (Luc. 12:32, 35, 36). Tia shia tü naainjüinjatkat na majayünnüükana, nepejüinjatü tü naranparasekat süpülapünaa nüntüin chi kaʼwayuuseinjachikai. Wanaawasü nünüiki Pablo nümaa Juan maʼaka saaʼin tü nüküjakat Jesuu nachiki na chainjanakana chaa iipünaa (2 Cor. 11:2, TNM; Alat. Map. 14:4, TNM). Napülajatü na chainjanakana aluwataain iipünaa tü nümakat Jesuu süchiki tü majayünnüükalüirua.

5. (1) ¿Joujeerü shikeraajaka tü süchikikat tü poloosükat majayünnüü? (2) ¿Jamüsü watüjaaka saaʼu tia?

⁵ Tü nümakat Jesuu süchiki eejüinjatüin saaʼin tü majayünnüükalüirua sümaa sajapuluʼujüin tü süranparasekat, ekeraajüsü shia maaʼulu yaa. ¿Jamüsü watüjaaka saaʼu tia? Shia süka «antüshi chi kaʼwayuuseinjachikai», sümüin tü Wiwüliakat (Mat. 25:10). Antajachi Jesuu saashin Mateo kapiitulo 24 otta 25. Mekiisattua süküjünüin tia suluʼu tia kapiitulokalüirua. Aküjünüsü tia suluʼu Aapiria Wayuu ojuʼitaka juulioʼu soʼu 2013. Antajachi Jesuu sajaʼttiamüin tü müliaa miyoʼusükat saashin tü pütchi wekirajaaitpakalü anain. Yala aküjünüsü sünain nüntajachin süpüla süsalainjatüin saainjala tü mojulaasükalüirua otta süpüla najaʼttirüinjatüin shia suʼunnaa tü mülia miyoʼusükat.

6. ¿Kasa nikirajeeka achiki Jesuu süka tü nüküjakat?

⁶ ¿Kasa nikirajeeka achiki Jesuu süka tü nüküjakat? Ayatüinjachin oonooin waneepia chi achepchieekai nümaa Jesuu. Chi achepchieekai naya na wawalayuu aapakana tü kasa choʼujaakat sümüin nanoula na nawalayuukana maaʼulu yaa. Eejüinjatü naaʼin naya wawalayuukana naashin Jesuu süpüla noonooinjanain waneepia sümaa tü nümakat namüin. Shiasejeʼe wanaa sümaa naashajaain Jesuu süchiki tü poloosükat majayünnüü, naya kamüinjanaka napüshuaʼa na wawalayuu chainjanakana aluwataain iipünaa, na katayüliikana oʼu maaʼulu yaa. Eejüinjatü naaʼin naya wawalayuukana süpüla naluwataainjanain chaa iipünaa  (Mat. 25:13). ¿Oonooshiiche na anoujashii chainjanakana iipünaa sümaa tü nümakat Jesuu namüin? Wekirajaain sünain tia.

7, 8. (1) ¿Jamüsü eejaka saaʼin tü majayünnüü kekiikat maʼin? (2) ¿Kasa naainjaka maaʼulu yaa na chainjanakana iipünaa?

⁷ Eesü jaʼraisü majayünnüü maaʼin aaʼinrü naashin Jesuu. Müshii naya naashin süka nnojoluin yapain naya sünain aʼatapajaa chi kaʼwayuuseinjachikai. Eetaasü joo wanee jaʼraisü majayünnüü kekiisü maʼin naashin. Müshii naya naashin Jesuu süka yapain naya sünain aʼatapajaa chi kaʼwayuuseinjachikai. ¿Jamüsü yapaka tia majayünnüükalüirua? Shia süka eejüin naaʼin nüpüla. Siraainjatü saʼwaika saaʼu chuwatüin naranparase na polooshiikana majayünnüü. Na majayünnüü kekiikana maʼin alüʼüjüshii seita süsüneʼe naranparase suulia shiyokojooin. Aluʼusaʼa tü maaʼin aaʼinkalüirua, nnojotsü kasain sülüʼüjüin. ¿Kasakaʼa naaʼinrüin na aluwataainjanakana chaa iipünaa sünain aʼatapajaa Jesuu?

⁸ Yapashii naya maaʼulu süpüla naaʼinrüin süpüshuaʼa tü nuluwataakalü anain naya Jeʼwaa. Wainma tü kasa naaʼinrakat maaʼulu. Nooʼulaain waneeirua kasa süpüleerua naʼyataain nümüin Jeʼwaa. Nnojotpejeʼe naaʼinrüin tia mojusheeka. Ayatüshiʼiya naya oonooin nümaa Jeʼwaa waneepia, jaʼitasü nnojoluin natüjaain saaʼu joujaleerüin nükalia Jeʼwaa, süka jamüin, alin Jeʼwaa napüla jee müshia Jesuu. Nnojotsü kachiiruain naaʼin washirüü, amaʼüjirawaa akuwaʼipaa, nnojotsü kapülain naaʼin nakuwaʼipa namüiwaʼa maʼaka naaʼin na manoujainsaliikana. Na chainjanakana aluwataain iipünaa, eejüsü maʼin naaʼin maʼaka saaʼin tü majayünnüü kekiikat maʼin. Yapashii naya sümaa eejüin naaʼin sünain aʼatapajaa Jesuu, jaʼitashi müin kamaʼakai naaʼin (Filip. 2:15).

9. (1) ¿Jamüsü nünüiki Jesuu namüin na chainjanakana iipünaa? (2) ¿Kasa naainjaka na wawalayuu chainjanakana iipünaa shiʼipajee tü pütchi makat: «Anii antüin chi kaʼwayuuseinjachikai»? (Paashajeʼera tü nootakat.)

⁹ Shiimainrejeʼe yapajüin tü jaʼraisükat majayünnüü kekiika maʼin, ¿jamaka natunkajakaʼa naashin Jesuu süpülapünaa nüntüin chi kaʼwayuuseinjachikai? Nüküjüin tia Jesuu süpüla eejüinjatüin naaʼin na aluwataainjanakana iipünaa suulia jülüjüin naaʼin wanee kasa naata sümaʼinruʼu aʼatapajaa. Nüküjüin Jesuu tia, süka eein süpüla nnojoluin eejüin naaʼin wanee wayuu aʼatapajakai. Müsüjeseʼe eejüin maʼin naaʼin naya wawalayuukana maaʼulu yaa. Jamüsüjaʼa tü majayünnüü naashajaakalü achiki Jesuu, saapüin wanee pütchi makat: «Anii antüin chi kaʼwayuuseinjachikai», yapasüjeseʼe tü poloosükalüirua majayünnüü nüpüla chia wayuukai. Jaʼraisüpejeʼe neʼe tü eejakalü aaʼin (Mat. 25:5, 6; 26:41). Müsüjeseʼe eejüin naaʼin waneepia na wawalayuu chainjanakana iipünaa maaʼulu yaa sünain naʼatapüin Jesuu. * Wekirajaa sünain tü alatajatkat nüntapa chi kaʼwayuuseinjachikai.

10. ¿Kasa eeka süpüla wasakirüin anain süchiki tü namakat na majayünnüü motokana aaʼin seita namaa na eekana amaʼana shia?

¹⁰ Na majayünnüü motokana aaʼin seita müshii namüin na eekana amaʼana shia: «Anasü jüsülajüle wamüin süpüshi tü seita  jümaʼanakat». «Nnojo» sümakalaka tü ajulijünakalüirua aaʼu. Alatüsü tia süpülapünaa nüntüin chi kaʼwayuuseinjachikai (paashajeʼera Mateo 25:8, 9). Tü nüküjakalü achiki Jesuu, eesü süpüla shikeraajeerüin süpülapünaa sülatüin tü müliaa miyoʼusükat. Eesüjaʼa süpüla wasakireʼerüin waaʼin sünain tüü: «Nnojoliire noonooin noʼutku na aluwataainjanakana chaa iipünaa, ¿nnojoleenache kaaliin naya napüla na oonookana waneepia?» Süpülapünaa sajaʼttüin tü müliaa miyoʼusükat, kettaajeerü nejeetse Maleiwa nanain na aluwataainjanakana chaa iipünaa.

11. (1) ¿Kaseerü alataka süpülapünaachon maʼin tü müliaa miyoʼusükat? (2) ¿Jameerü pütchi namüin na nnojoliikana eejüin aaʼin nachuntüle kaaliinwaa maʼaka saaʼin tü majayünnüü malüʼüjüinkalüirua seita?

¹¹ Süpülapünaachon maʼin süntüin tü müliaa miyoʼusükat, kettaajeerü nejeetse Maleiwa nanain na anoujashii chainjanakana aluwataain iipünaa (Alat. Map. 7:1-4). Tia nejeetsekat, shiyaakuayaasü shiimain nayainjanain aluwataain iipünaa. ¿Kaseetka alatüin namüin na nnojoliikana eejüin aaʼin jee na moonooinkana süpülapünaa tü müliaa miyoʼusükat? Nnojoleerü eʼitaanüin nanain tü nejeetsekat Maleiwa. Ainkuujeerü naaʼin naya wayuukana neʼrapa tü müliaa miyoʼusükat otta neʼrapa sajaʼttinnüin süpüshuaʼa tü iküleesia nnojotkat shiimain. Yala, natüjaajeerü aaʼu nnojoluin yapain naya sünain aʼatapajaa Jesuu. ¿Jama müleka nachuntüle kaaliinwaa? «Nnojo», müneena naya maʼaka namünüin amüin na majayünnüü maaʼinkana aaʼin. Jamüshiijaʼa naya, aʼalijinnüsü noulia seita natuma na kamaʼanakana shia. Sutuma kaʼlein maʼin aika wanaa sümaa tia, nnojotsü jaralüin oikküin seita namüin. Nnojoliinnapaka naya süpüla nekerotüin eemüin chi kaʼwayuuseinjachikai.

12. (1) ¿Kaseerü alataka namüin na anoujashii chainjanakana iipünaa nnojoliika oonooin? (2) ¿Kaseerü alataka namüin na makana aka saaʼin tü majayünnüü maaʼinjasatkat?

¹² Suʼunnaa tü müliaa miyoʼusükat, nnojoliire noonooin noʼutku na aluwataainjanakana iipünaa, nnojoleena naya akaaliinjünüin natuma na oonookana waneepia. ¿Kaseerü alataka namüin? Alateerü namüin tü alatakat sümüin tü majayünnüü maaʼinjasatkat: «Na majayünnüü apanapakana nia, ekerotshii jooluʼu nümaa suluʼumüin tü miichikat sünainmüin tü ekawaakat. Je nekerolapa, süsürünnakalaka soʼu tü miichikat». Sülüʼütpa maʼin süpüla sujutaain tü müliaa miyoʼusükat, kotteena nutuma Jesuu chaa iipünaa na anoujashii aluwataainjanakana nümaa (Mat. 24:31; 25:10; Juan 14:1-3; 1 Tes. 4:17). Niyouktajeena amaa na nnojoliikana oonooin nümaa. «Tepayachee, pujutala wapüleerua», eeshiijaʼa süpüla namüin nümüin Jesuu. «Nnojoliinapain jamajanain jia tamüin», nümeechikalaka Jesuu namüin (Mat. 7:21-23; 25:11, 12).

13. (1) ¿Maluʼutche nünüiki Jesuu nnojoliinjanain noonooin noʼutku na wawalayuu chainjanakana aluwataain iipünaa? Püküja jamüin maka pünüiki. (2) ¿Jamüsü watüjaaka saaʼu niʼitaain naaʼin Jesuu nanain na nuwalayuukana? (Piirakaa sümüin tü ayaakuaa suluʼukat süpana 13.)

¹³ Sünainjee müin nünüiki Jesuu, ¿maluʼutche tia nnojoliinjanain noonooin noʼutku na wawalayuu chainjanakana aluwataain iipünaa? Nnojo, nnojotsü maluʼuluin nünüiki Jesuu. Süpüla watüjaain saaʼu tia, wekirajaa sünain Mateo kapiitulo 24. Wanaa sümaa naashajaain Jesuu nüchiki wanee achepchiee nnojoluinjachikai jüüjüüin, nnojotsü maluʼuluin eeinjanain na nnojoliinjanakana oonooin. Naapirüin neʼe Jesuu na chainjanakana iipünaa. Naya aneeküinjanakana namüiwaʼa noonooinjanale jee nnojoliinjanale noonooin  sümaa tü eʼitaanakat napüleerua. Akaajaʼaya neʼe nakuwaʼipa na majayünnüükana, eeshii jaʼraishii kekiika maʼin otta jaʼraishii na maaʼinkana aaʼin. Müshia Pablo, naapirüin na nuwalayuu aluwataainjanakana iipünaa (paashajeʼera Hebreokana 6:4-9; anasü paashajeʼerüle Deuteronomio 30:19). Nnojotsü meeʼerain tü nümakat Pablo namüin na nuwalayuukana, nütüjaapejeʼe saaʼu sünain ayateenain oonooin na nuwalayuukana. Niʼitaain naaʼin Jesuu sünain noonoojeenain na wawalayuu aluwataainjanakana iipünaa, müshiijeseʼe nikirajüin naya sükajee tü saainjakat tü poloosükat majayünnüü. Nütüjaa aaʼu noonoojeenain waneʼewai nakua otta cheenain naya aluwataain nümaa.

14. ¿Jamüsü eeka süpüla anain nakuwaʼipa na yaainjanakana kepiain mmapaʼa sünainjee tü nümakat Jesuu süchiki tü poloosükat majayünnüü?

¹⁴ Eesü tü watüjakat sünainjee tü nümakat Jesuu süchiki tü poloosükat majayünnüü, naashin niakai eejüinjatü waaʼin. Mayaapejeʼe namüinjatüin tia pütchikat na wawalayuu chainjanakana iipünaa, wapülajatia shia wayakana yaainjanakana saaʼu tü mmakat (Juan 10:16). ¿Jamüsü wapülajatka tia? Shia süka müin nünüiki Jesuu: «Tü tamüitpakat jümüin, süpülajatü wayuu süpüshuaʼaya: ‹Ee jumata jaaʼin tapüla›» (Mar. 13:37). Shia keeʼireeka naaʼin Jesuu yapajüinjanain sümaa eejüinjatüin naaʼin napüshuaʼa na anoujashiikana. Eesü süpüla washatüin nakuwaʼipa na aluwataainjanakana iipünaa sümaa kojutuleʼeinyain wamüin tü aküjaakat pütchi. Anashii sotule waaʼin na majayünnüü nnojoliikana alüʼüjüin seita, ojulijüshii naaʼu na alüʼüjakana. Nnojo washatüin tü nakuwaʼipakat. Nnojoishii nayainjanain oonooin na wawalayuukana wooʼopünaa, nnojoishii nayainjanain yapajüin, nnojoishii nayainjanain eejüin aaʼin wooʼopünaa. Wayainjana aainjaka tia. Alüʼütshi Jesuu süpüla süsalainjatüin saainjala wayuu süpüshuaʼa nutuma otta wasoukteenain waneʼewai wakua nümüin. Müshiijeseʼe yapajüinjanain waya.

15. ¿Jamüsü anaka wamüin wayakana anoujashiikana kasaalüinjachin Jesuu?

¹⁵ Anasü wamüin tü nümakat Jesuu süchiki tü miʼiraa aainjünakat shikiira kasaalüü. Sajaʼttapeena Armagedón cheena nümaa Jesuu na wawalayuu aluwataainjanakana iipünaa, sünteetka nükalia chi Anneetchonkai süpüla kaʼwayuuseinjachin nia (Alat. Map. 19:7-9). Otta aneerü wakuwaʼipa wayakana kepiainjanaka saaʼu tü mmakat. ¿Jamüsü aneetka wakuwaʼipa? Shia süka aneerüin wakuwaʼipa sutuma nuluwataain Jesuu namaa na chainjanakana iipünaa. Müshiijeseʼe yapajüinjanain maʼin waya sümaa eejüinjatüin maʼin waaʼin, jaʼitainna yaainjanain waya kepiain saaʼu mmaka jee chainjanale waya iipünaa. Weʼreetka anain wakuwaʼipa nutuma Jeʼwaa, tü nüküjakat achiki wamüin.