PÜTCHI SÜNAINKA SÜTA TÜ REWIISÜTAKAT | ¿KASA NUʼTTEʼERAKA OULIA WAYA JESUU?
¿Kasa piʼreetka sünainjee ouktüin Jesuu jee süsoʼiraain naaʼin?
«Pünouja nünain chi Senyotkai Jesús puʼtteʼennaiwa nütüma.» (Aluwataaushikana 16:31.)
Nünüiki tia Pablo nümaa Silas wanaa sümaa naashajaain nümaa wanee kaatsetpüʼü chajachikai Filipos. Süpüla watüjaainjatüin saaʼu jamaluʼuluin tia namakat nümüin chia wayuukai, anashii müleka wekirajaale palajana kasanainjeein ouktaka wayuu. Wekirajaa sünain tü sümakat tü Wiwüliakat süchiki tia.
Nnojoishi akumajuushin chi wayuukai süpüla ouktüinjachin nia
«Eʼitaanüshi chi wayuukai nütüma Jehová, chi Maleiwakai, suluʼu tü apainkat süpüla naaʼinmajüinjatüin tü pünajütkat. Müshi Jehová, chi Maleiwakai, nümüin: ‹Kaatei, anuu süchon tü wunuʼukolüirua süpüshua yaa suluʼu tü apainkat süpüla piküinjatüin shia. Shiasaʼa nnojolüinjatüin piküin süchon tü wunuʼu atüjaweetkat atüma wayuu saaʼu tü anasükat je saaʼu tü mojusükat. Müleka piküle süchon wunuʼukot tüü, shiimüinshaana ouktajachin pia›.» (Génesis 2:15-17.)
Niʼitaain Maleiwa Adán suluʼu wanee apain anashaatasü, eejatü mürüt suluʼu, kachonshaatasü tü wunuʼuliakat süpüla niküinjatüin shia. Nüpülajapajaʼa Maleiwa nuulia Adán niküinjatüin süchon wanee wunuʼu, niküle süchon tia wunuʼukat, shiimain sünain ouktajachin Adán.
Nütüjaa aaʼu Adán katüinjatüin noʼu süpüla kaʼikat süpüshuaʼa noonoole sümaa nünüiki Maleiwa, katüsüjeʼe noʼu müleka nnojorüle niküin süchon tia wunuʼukat. Nnojoishijeʼe ouktüin nia maʼaka ouktüin tü mürütkalüirua.
Naashin waneeinnua wayuu, nüpülajüin Maleiwa nuulia Adán naainjiraainjachin nukuwaʼipa sümaa Eva, nnojotpejeʼe shiimain tia, süka jamüin, nümüin Maleiwa nümüin Adán sümaa Eva: «Anakaja kachonniire jia, jouluiwa na juuʼuliwoʼukana sainküin mmakat süpüshua süpüla laulaainjanain jia saaʼu tü kasa [...] mmapaʼajatkat süpüshuaʼale» (Génesis 1:28). Akaajasaʼa tü wunuʼu nekakat achon, shia wanee «wunuʼu atüjaweetkat atüma wayuu saaʼu tü anasükat je saaʼu tü mojusükat». Nia neʼe Maleiwa nümüiwaʼa aküjaka kasain anain süpüla naainjüin wanee wayuu jee kasain mojuin süpüla naainjüin (Génesis 1:28). Kojutüshijeʼe Maleiwa nümüin Adán noonooyüireje sümaa nünüiki. Talatüsüjeʼe naaʼin sümaa süpüshuaʼa tü kasa nukumajakat Maleiwa.
Ouktüshi Adán süka moonooin nia sümaa nünüiki Maleiwa
Anuu nünüiki Maleiwa nümüin Adán: «Sükajee [...] piküin süchon tü tapülajakat puulia, [...] eʼreechi pia aʼyatawaa jashichin püpüleerua sümaa piroujeeinjatüin tü pipijaainjatkat aka waneʼereʼeyajaʼa sajaʼttüin piʼyataain ouktapa pia. Aleʼejeechi ouktapa pia saʼakamüin tü mma tatükakat anainjee pia. Shiimüin sünain mmainjachin pia püchikua, süka aainjuushin pia sünainjee» (Génesis 3:17, 19).
Süsalashi Adán nutuma Maleiwa süka niküin süchon tü wunuʼu nüpülajakat nuulia. Mojutsai Maleiwa nümüin saaʼu müitpain nukuwaʼipa. Aluwataweeshi Adán saaʼu nukuwaʼipa nümüiwaʼa müleje niyouktajüin sümaa nünüiki Maleiwa. Mojupejeʼe nukuwaʼipa Adán sünainjee tia.
Ayatshiaʼaya ouktüin Adán mapa makaajüleʼe nümüin paala Maleiwa nümüin. Ayatshijaʼa aleʼejüin sünain mmain Adán nüchikuaʼa wanaa sümaa ouktüin nia, shiatüjülia neʼe nukuwaʼipakat tia, nnojoishi nia katakuʼu müin oʼu (Génesis 2:7; Eclesiastés 9:5, 10).
Ouktüsü wayuu saaliijee kaainjalain Adán
«Kaainjalashi Adán nuulia Maleiwa sükajee niyouktajaain sümaa nünüiki nümüin. Ouktakalaka nia saaliijee. Je sükajee kaainjalain Adán, oʼttüsü wayuu ütamüinreʼeya sünain kaainjalaa. Ouktakalaka naya saaliijee.» (Roma 5:12.)
Sutuma moonooin Adán sümaa nünüiki Maleiwa, ouktaleeshia nia süpüla kaʼikat süpüshuaʼa. Maleeirümaʼaka ouktüin wayuu süpüshuaʼa saaʼu saainjala maʼaka naaʼin Adán.
Süchepchiasü wayuu süpüshuaʼa kaainjalaa süka nuuʼuliwoʼuin shia Adán. Shiasejeʼe sutuma tia, ouktüsü wayuu ütamüinreʼeya. Shiimain tia, müshijeseʼe müin Pablo yaa: «Tayakai, maa aka wayuu süpüshua sünain keʼirukuin, süchepchiashi taya kaainjalaa». «Süka joʼuushin taya sümaa taainjala, ayatshia müin aka kapükai taya. [...] Aluʼutaʼaleeshija maʼi taya süchepchiaka taainjala. Kasataalejese tajuittinnüin maalü suulia. [...] Tatüjaa aaʼulu sünain tajuittinneechin maalü nütüma chi Wasenyotsekai Jesucristo. Taapakalaka maʼi joo müleʼoshaata analuʼut saaʼu tia» (Roma 7:14, 24, 25).
Ouktüshi Jesuu saaʼu wayuu süpüshuaʼa süpüla suʼttaainjatüin
Ajütüüshinka Jesuu «nütüma chi Nüshikai süpüla nuʼtteʼerüinjatüin wayuu yaa suluʼu mmakat süpüshua» (1 Juan 4:14).
Naapüin Jeʼwaa nikii chi Nüchon waneeshikai süpüla suʼttaainjatüin wayuu süpüshuaʼa suulia ouktaa. Nnojoipejeʼe müin nia maʼaka naaʼin Adán süka maainjalain nia (1 Pedro 2:22). Nnojoirejeʼe nuʼutünüin aaʼin Jesuu, yaashije nia saaʼu mmakat süpüla kaʼikat süpüshuaʼa.
Asoʼiraasü naaʼin Jesuu nutuma Jeʼwaa apünüin kaʼi süchikijee nuʼutünüin aaʼin. Meʼrujusai nia nüsoʼiraapa aaʼin jee oʼunüshi nia mapa chaa iipünaamüin. Nikeraajüin Jesuu tü nuluwataakalü apüla nia Jeʼwaa: ouktüinjachin nia süpüla suʼtteʼennüinjatüin wayuu süpüshuaʼa, anakalaka tia noʼuluʼu Jeʼwaa. Chi wayuu eʼitaakai naaʼin nünain Jesuu, shiimüin sünain nuʼtteʼenneechin (Roma 3:23, 24; 1 Juan 2:2).
Sutuma naapajiraain nikii Jesuu, eesü süpüla katüin woʼu süpüla kaʼikat süpüshuaʼa. Müsüjeseʼe müin tü Wiwüliakat mayaa: «süka ouktüin nia saaʼu saainjala wayuu, nnojoleerü aapünüin shikii süpüla ouktaa, nümüliajeerü chi Maleiwakai» (Hebreokana 2:9).
Niaʼa neʼe Jeʼwaa nümüiwaʼa eejachika amaʼana shipi tü ouktaakat, nnojotsü jaralüin eejatüin amaʼana shia süka kaainjalain wayuu süpüshuaʼa. Ajuʼittinnüsü wayuu süpüshuaʼa suluʼujee saainjala nutuma Jeʼwaa, süka jamüin, alin shia nüpüla. Naapüin chi waneeshichonkai Nüchon süpüla nülaʼajaainjatüin saainjala wayuu süpüshuaʼa (Roma 5:6-8).
Asoʼiraasü naaʼin Jesuu, akaweeria wayuu mapa
«Shiimüin maʼi sünain nüsoʼiraain aaʼin Cristo süchikijee ouktaa. Je sükajee süsoʼiraain naaʼin, watüjaa aaʼut sünain süsoʼiraainjateerüin waaʼin wayakanaya süchikijee ouktaa. Soto jaaʼin nüchiki Adán paala sümaiwa. Ouktüshi nia saaliijee naainjala. Maleeirümaʼaka ouktüin wayuu süpüshua saaʼu saainjala maa aka naaʼin. Otta nünainjee Cristo, suuntüin jooluʼu wayuu katüin soʼu. Osoʼiraajeerü waaʼin waya anoujashiikana wapüshua süka wanaawajiraain waaʼin nümaa.» (1 Corinto 15:20-22.)
Shiimüin sünain süsoʼiraain naaʼin mapa Jesuu süchikijee nuʼutünüin aaʼin. Saashin tü Wiwüliakat, eeʼiyataashi nia sümüin 500 wayuu sümaiwa paala. Shiimain sünain müin tia, müsüjeseʼe nüküjüin shia Pablo namüin na nuwalayuu corintojeʼewaliikana wanaa sümaa nümüin: «Anaayülia wainma noʼutku katüin oʼu maaʼulu yaa» (1 Corinto 15:3-8).
Shiimainjaʼa sünain susoʼiraajeerüin saaʼin wayuu süka nüsoʼiraaichipain aaʼin Jesuu. Shiimainya tia, müshijeseʼe müin Jesuu yaa: «saapeerü tanüiki süpüshua tü wayuu ouktüsükalüirua sümaa sujuitteerüin mmaapüjee» (Juan 5:28, 29).
Nnojoleechi ouktüin chi wayuu eʼitaakai naaʼin nünain Jesuu
«Süka alin maʼin nüpüla Maleiwa na wayuukana, naapüin chi waneeshikai Nüchon süpüla nnojoliinjanain ouktüin na eʼitaakana naaʼin nünain otta süpüla katüinjatüin noʼu waneepia.» (Juan 3:16 TNM.)
Aküjünüsü suluʼu tü karalouktakat Génesis jamakuwaʼipalüin ouktakaʼa wayuu süpüshuaʼa. Jee müsia yala, aküjünüsü sünain sumojujaain tü mma Edén münakat. Aluʼuinjaʼa suluʼu tü karalouktakat Alateetkat Mapeena, aküjünüsü sünain susoʼiraajeerüin saaʼin wayuu süpüshuaʼa jee paʼaraiiseerüin tü Mmakat mapa. Suʼunnaa tia kaʼikat, aneerü sukuwaʼipa wayuu suluʼu kaʼikat süpüshuaʼa. Müsüjeseʼe sümüin tü Wiwüliakat mayaa: «Müiria nnojolüin ouktaa» (Alateetkat Mapeena [Apocalipsis] 21:4). Shiimainshaata tia saashin tü wetsiikulokot 5. Nikeraajeerü tia Jeʼwaa süka nuuntüin naaʼinrüin süpüshuaʼa tü nümakat.
Shiimainrejeʼe pümüin sünain nikeraajüin Maleiwa tia, ayataʼaya pikirajaain nünain Jesuu jee piʼitaa paaʼin nünain. Müle shia putuma, wainmeerü kasa anasü naapaka Jeʼwaa pümüin maaʼulu yaa jee kateerü poʼu süpüla kaʼikat süpüshuaʼa yaa saaʼu tü Mmakat paʼaraiisüpa shia. Paʼaraiisüpa tü Mmakat, «Müiria nnojolüin ouktaa, mojuu aaʼin, aʼyalajaa, je saalii ayuulii».
