1, 2. (1) ¿Kasa nüküjaka Jesuu namüin na nikirajüinkana? (Piirakaa sümüin tü ayaakuaakat.) (2) ¿Kasa choʼujaaka süpüla watüjüin sünainjee tü nümakat Jesuu süchiki tü anneetkalüirua sümaa tü kaaʼulakalüirua?

YOOTÜSHI Jesuu süchiki wanee kasa anasü, yalajachi Pedro, Andrés, Santiago nümaa Juan aapajüin nünüiki. Nüküjüin namüin nüchiki wanee achepchiee oonookai, nüküjüin süchiki tü poloosükat majayünnüü jee müshiʼiya na achepchiee aapünakana amüin woʼot nneerümaajatkat. Mapa, nüküjüin nüchiki «chi Shipayakai Wayuu» wanaa sümaa süsalainjatüin wayuu nutuma saaʼu saainjala. Nükatalüinjana na wayuukana maʼaka sükatannüin tü anneetkat suulia tü kaaʼulakat. Otta naashin Jesuu, eeshii waneeinnua wayuu «na tawalayuukana» nümakana amüin «chi aluwataaikai» (paashajeʼera Mateo 25:31-39; Mateo 25:40, 41; * Mateo 25:42-46).

² Akaataajaʼa wayakana, choʼujaasü maʼin watüjaain saaʼu jamaluʼuluin tü nümakat Jesuu, süka jümüin, eejeenain  na kateenakana oʼu waneepia jee na oukteenakana naashin Jesuu. Müshiijeseʼe wekirajaainjanain sünain jamaluʼuluin shia otta kasain waaʼinrüinjatüin süpüla katajatüin woʼu. Choʼujaasü watüjaainjatüin saaʼu pütchikat tüüirua: ¿Jamüsü sukuwaʼipa nutuma Jeʼwaa süpüla watüjaainjatüin saaʼu tü nüküjakalü achiki Jesuu? ¿Jamüsü watüjaaka saaʼu sünain choʼujaain waküjüin pütchi naashin Jesuu? ¿Jaraliinjana aküjaka pütchi? ¿Jamüshii woonooinjanaka maaʼulu yaa nümüin chi aluwataaikai sümaa wakaaliinjüinjanain na nuwalayuukana?

3, 4. (1) ¿Kasa watüjaainjatka aaʼu sünainjee tü nümakat Jesuu süchiki tü anneetkalüirua sümaa tü kaaʼulakalüirua? (2) ¿Kasa aküjünaka suluʼu Aapiria Wayuu ojuʼitaka soʼu juyaka 1881 süchiki tü anneetkalüirua sümaa tü kaaʼulakalüirua?

³ Süpüla wayaawatüin saaʼu jamaluʼuluin tü nümakat Jesuu süchiki tü anneetkalüirua jee tü kaaʼulakalüirua choʼujaasü watüjaain saaʼu tüü: ¿Jarai chi «Shipayakai Wayuu», chi aluwataaikai, na nuwalayuukana chi aluwataaikai? ¿Jarat tü anneetkalüirua jee tü kaaʼulakalüirua? ¿Joujeerü nükatatka Jesuu tü anneetkalüirua suulia tü kaaʼulakalüirua? ¿Jamüshii anneerü jee kaaʼula namünaka na wayuukana nutuma Jesuu?

⁴ «Chi Shipayakai Wayuu» jee chi aluwataaikai nia Jesuu, ojuʼitüsü tia suluʼu Aapiria Wayuu soʼu 1881. Saashin tia rewiisütakat, na nuwalayuukana chi aluwataaikai naya na aluwataainjanakana chaa iipünaa namaʼaleʼeya na yaainjanakana kepiain Mmapaʼa. Wanee kasa aküjünaka suluʼu tia rewiisütakat shia naneeküneenain na makana aka saaʼin anneerü jee kaaʼula suʼunnaa tü miit juya nuluwataajeetkalü oʼu Jesuu. Jee müsia suluʼu tia rewiisütakat, aküjünüsü kateerüin noʼu süpüla kaʼikat süpüshuaʼa na anneerü nümakana amüin Jesuu, süka jamüin, aipüraliin naya maʼaka naaʼin Jeʼwaa.

5. ¿Jamüsü shikirajia sutuma tü Aapiria Wayuu ojuʼitakat soʼu 1923 süchiki tü anneetkalüirua jee tü kaaʼulakalüirua?

⁵ Kakalia mapa, nüpansaajirüin Jeʼwaa sukuwaʼipa tü nümakat Jesuu. Tü Aapiria Wayuu ojuʼitakat oʼutuupüroʼu 15 soʼu 1923 süpansaajirüin tia sükajee waneeirua wetsiikulo. Saashin tia rewiisütakat, nia Jesuu «chi Shipayakai Wayuu», na nuwalayuukana naya na aluwataainjanakana nümaa jee müsia tü anneetkalüirua naya na kepiainjanakana saaʼu tü Mmakat. ¿Joujainjana nüneekaka Jesuu na makana aka saaʼin anneerü? Nüneekeena naya yaaiwaʼaya saaʼu tü Mmakat na aluwataainjanakana nümaa. Müsüleʼe tia süka süküjüin tü Wiwüliakat eeinjanain anoujashii aküjaka pütchi wanaa namaa na chainjanakana iipünaa. ¿Jamüshii anneerü nümaka Jesuu namüin? Shia süka nanoujain nünain Jesuu otta süka anainjatüin nakuwaʼipa sutuma nuluwataaya Maleiwa.

6. ¿Jamüsü süpansaajia tü nümakat Jesuu soʼu juyaka 1995?

⁶ Sümaiwa paala, ekirajünapuʼusü müin aka saaʼin aneerü na achekakana nünüiki Maleiwa otta müin aka saaʼin kaaʼula na ayouktakana shia. Apansaajinnüsü tia soʼu juyaka 1995. Ekirajaana anainrü tü sümakat Mateo 24:29-31 sümaa Mateo 25:31, 32 (paashajeʼera). Sünainjee tia, aküjünüsü süsalainjatüin saainjala wayuu soʼuweena tü kaʼi nünteetkalü oʼu «chi Shipayakai Wayuu», suʼunnaa tü müliaa miyoʼusükat. *

7. ¿Kasa wayaawataka aaʼu maaʼulu sünainjee tü nümakat Jesuu süchiki tü anneetkalüirua otta tü kaaʼulakalüirua?

 ⁷ Pansaʼaleeitpa maʼin wamüin maaʼulu tia nümakat Jesuu. ¿Jarai «chi Shipayakai Wayuu» otta chi aluwataaikai? Nia Jesuu. ¿Jaralii na nuwalayuukana chi aluwataaikai? Naya na nüneekakana Jeʼwaa nükajee chi naaʼinkai. Aluwataainjana naya nümaa Jesuu chaa iipünaa (Roma 8:16, 17). ¿Jaralii na makana aka saaʼin anneerü otta na makana aka saaʼin kaaʼula? Naya na wayuukana napüshuaʼa. ¿Joujaleerü süsalaka saainjala wayuu? Sajaʼttiamüin tü müliaa miyoʼusükat. ¿Jamüshii anneerü otta kaaʼula namüneenaka? Meena aka saaʼin anneerü müleka nakaaliinjale na aluwataainjanakana iipünaa otta meena aka saaʼin kaaʼula nnojoliire nakaaliinjain naya. Waapüin analuʼut nümüin Jeʼwaa saaʼu nüpansaajirüin wamüin tü nümakat Jesuu suluʼu Mateo 24 otta 25.

8, 9. «Naaʼinrüin tü anasükat», ¿jamüshi nümaka Jesuu namüin na makana aka saaʼin anneerü?

⁸ «Jüküja pütchi», nnojoishi müin Jesuu soʼu naashajaain süchiki tü anneetkalüirua otta tü kaaʼulakalüirua. Shikirajapajaʼa waya tia pütchikat sünain waküjüinjanain maʼin pütchi. ¿Jamüsü watüjaaka saaʼu tia?

⁹ Shiyaakuayaasü neʼe nutuma Jesuu tü nümakat soʼu naashajaain süchiki tü anneetkalüirua otta tü kaaʼulakalüirua. Nnojotsü shiain nüküjeein wamüin waapüinjatüin nasheʼin, neküin na aluwataainjanakana iipünaa otta waaʼinmajüinjanain naya ayuuire naya jee wanaʼlaainjanain namüin püreesale naya. Shiyaakuayaa neʼe nutuma Jesuu tia. «Naaʼinrüin tü anasükat», müshi nia namüin süka nanoujain sünain nuwalayuuin Jesuu na aluwataainjanakana iipünaa otta nakaaliinjain naya (Mat. 10:40-42; 25:40, 46; 2 Tim. 3:1-5).

10. ¿Kasa naaʼinrajatka na kepiainjanakana saaʼu tü Mmakat süpüla nakaaliinjain na nuwalayuukana Jesuu?

¹⁰ ¿Jamakaʼa wakaaliinjainjanaka na nuwalayuukana Jesuu? Wekirajaa sünain tia. Süpülapünaa naashajaain Jesuu nachiki na makana aka saaʼin anneerü otta na makana aka saaʼin kaaʼula, aashajaashi nia namaa na nikirajüinkana süchiki tü alatajatkat sülüʼütpa süpüla sajaʼttüin kasa süpüshuaʼa (Mat. 24:3). Nüküjüin namüin süküjünüinjatüin maʼin pütchi süchiki Nuluwataaya Jeʼwaa sainküin tü Mmakat (Mat. 24:14). Wanaa sümaa naashajaain süchiki tü woʼot nneerümaajatkat, nüküjüin naʼyataainjanain maʼin sünain aküjaa pütchi na aluwataainjanakana iipünaa. ¿Jamakaʼa süpüla naküjüinjanain pütchi maaʼulu yaa sainküin tü Mmakat sümaa palitchoin naya? Saashin tü nümakat Jesuu süchiki tü anneetkalüirua otta tü kaaʼulakalüirua, akaaliinjünüinjana naya natuma na yaainjanakana kepiain saaʼu tü Mmakat. ¿Jamüinjatü sukuwaʼipa natuma? Aküjüinjana maʼin naya pütchi wanaajiraa namaa. Nnojoishii aapüinjanain neʼe nneerü jee natütüleʼerüin naaʼin na chainjanakana iipünaa.

11. ¿Kasa eeka süpüla wasakirüin anain sünainjee tü nümakat Jesuu?

¹¹ Maaʼulu yaa eeshii maʼaka oocho miyoone wawalayuu. Wainma na yaainjanakana kepiain saaʼu tü Mmakat. Nnojotpejeʼe eʼitaanüin najapuluʼu naküjüinjanain pütchi. Naya neʼitaaka ajapuluʼu na aluwataainjanakana iipünaa (Mat. 25:14-18). Sünainjee müin sukuwaʼipa nutuma Jesuu, eesüjaʼa süpüla müin tü wasakirakalü anain: «Nayalejeʼe eʼitaanüin ajapuluʼu tü aküjaakat pütchi na aluwataainjanakana iipünaa, ¿nnojoliinjanaka aküjüin pütchi na yaainjanakana kepiain saaʼu tü Mmakat?»  Aküjüinjana pütchi. Wekirajaa sünain jamüin naainjainjatka tia.

12. ¿Kasa shikirajaka anain waya tü nümakat Jesuu suluʼu Mateo 28:19, 20?

¹² Nuluwataain Jesuu napüshuaʼa na nikirajüinkana sünain aküjaa pütchi. Süchikijee süsoʼiraain naaʼin Jesuu, nuluwataain na nikirajüinkana sünain aküjaa pütchi otta ekirajaa wayuu süchiki tü nuluwataakalü anain. Na aapaakana sümaa tü pütchikat aküjüinjana naya pütchi maʼaka nüküjüin shia Jesuu (paashajeʼera Mateo 28:19, 20). ¿Kasa shikirajaka anain waya tia? Aküjüinjana waya pütchi wapüshuaʼaleʼeya, jaʼitainna nayain na chainjanakana iipünaa jee wayale wayakana yaainjanakana saaʼu tü Mmakat (Aluw. 10:42).

13. ¿Kasa shikirajaka anain waya tü niʼrakat Juan?

¹³ Saashin Alateetkat Mapeena eeinjana waneeinnua wayuu aküjaka pütchi wanaa namaa na aluwataainjanakana iipünaa. Niʼrüin chi aluwataaushikai Juan «tü nümüraajüinkat Cristo sünain «‹Jalaina›» sümüin namüin na wayuukana süpüla nasüin «tü wüin katakat atuma soʼu wayuu». ¿Kasa kayaakuayaaka tü nümüraajüinkat Kürisüto? Naya na 144.000 aluwataainjanakana nümaa chaa iipünaa (Alat. Map. 14:1, 3; 22:17, TNM). Tü wüinkat shiyaakuayaasü naapajiraain nikii Jesuu, tü taashinjatkalü atuma wayuu suulia kaainjalaa jee ouktaa (Mat. 20:28; Juan 3:16; 1 Juan 4:9, 10). Na aluwataainjanakana chaa iipünaa, nekirajüin maʼin na wayuukana sünain tü naainjüinjatkat süpüla anainjatüin nakuwaʼipa sutuma naapajiraain nikii Jesuu (1 Cor. 1:23). Sünain tü niʼrakat Juan eeshii waneeinnua wayuu yaainjanakana kepiain saaʼu tü Mmakat. Aluwataanüshii naya sünain maa: «Jalaina». Wayuukana naainnua nnojoishii nayain na chainjanakana iipünaa. Nounejaainjana na wayuukana sünain asaa «tü wüin katakalü atuma soʼu wayuu». Tü niʼrakat Juan, shikirajüin waya sünain waküjüinjanain pütchi wapüshuaʼaleʼeya.

14. ¿Kasa waaʼinrajatka süpüla waaʼinrüin «tü nüchekakat Cristo» wapüleerua?

¹⁴ Aküjüinjana waya pütchi süpüla  waaʼinrüinjatüin «tü nüchekakat Cristo» wapüleerua (Gal. 6:2). Wayakana wapüshuaʼa oonooinjana waya sümaa tü nuluwataakalü anain Jeʼwaa. Jamüshiijaʼa na israeliitakana oonooinjana sümaa tü nuluwataakalü anain Jeʼwaa, akaataajaʼa na nnojoliikana israeliitain, na kepiakana naʼaka, oonooinjana (Éx. 12:49; Lev. 24:22). Mayaapejeʼe nnojoluitpain choʼujaain wamüin woonooin sümaa tü pütchi aapünakat nümüin Moisés, oonooinjana waya sümaa «tü nüchekakat Cristo» wapüleerua jaʼitainna nayain na aluwataainjanakana iipünaa jee wayale wayakana kepiainjanakana saaʼu tü Mmakat. Wanee kasa waaʼinrajatka maʼin naashin Kürisüto shia aijiraainjanain waya (Juan 13:35; Sant. 2:8). Alinjachi wapüla Jeʼwaa nümaa Jesuu otta na wayuukana. Süpüla weeʼiyatüin alin wapüla na wayuukana, aküjüinjana waya pütchi namüin süchiki tü Nuluwataayakat Maleiwa (Juan 15:10; Aluw. 1:8).

15. ¿Jamüsü watüjaaka saaʼu waküjüinjanain pütchi wapüshuaʼa?

¹⁵ Tü nümakat Jesuu namüin palitchon nikirajüin, sümüinjatü wayuu wainma. Jamüsüjaʼa wanaa sümaa nüpansaajüin nünüiki Jesuu namüin na polookana waneemüin nikirajüin, nnojotsü namüinjatüin neʼe namüiwaʼa, namüinjatia shia na 144.000 aluwataainjanakana nümaa chaa iipünaa (Luc. 22:29, 30; Alat. Map. 5:10; 7:4-8). Akaʼaya süsoʼiraapa naaʼin Jesuu nüküjüin namüin palitchon nikirajüin naküjüinjanain pütchi (Aluw. 10:40-42; 1 Cor. 15:6). Namüinjatpajaʼa shia napüshuaʼa na nikirajüin eejanakana nükalioʼu (Aluw. 8:4; 1 Ped. 1:8). Akaʼaya wayakana, aküjüinjanaʼaya waya pütchi, jaʼitainna nnojoliin yalajanain waya wanaa sümaa nüküjüin Jesuu tia pütchikat. Eeshii maʼaka oocho miyoone wawalayuu aküjaka pütchi maaʼulu yaa. Süka waaʼinrüin tia, weeʼiyatüin sünain weʼitaain waaʼin nünain Jesuu (Sant. 2:18).

16-18. (1) ¿Kasa waaʼinrajatka süpüla wakaaliinjain na aluwataainjanakana iipünaa? (2) ¿Jamüshii wakaaliinjainjanaka maaʼulu na aluwataainjanakana iipünaa?

¹⁶ Nütüjaa aaʼu chi Yolujaakai sülüʼülüin maʼin nükalia süpüla ataʼünaa, müshijeseʼe eejiraain maʼin nia namaa na aluwataainjanakana iipünaa, na yaayüliikana saaʼu tü Mmakat (Alat. Map. 12:9, 12, 17). Nnojoliipajaʼa akanaluuin naya nüchiki, ayatüshiʼiya na wawalayuukana sünain oʼuniraa sukuwaʼipa tü aküjaakat pütchi. Aküjashaatashii naya pütchi maaʼulu sümüin wayuu maʼleekalia. Shiimainya niain Jesuu nekiipüʼüin otta akaaliinjüin na aluwataainjanakana iipünaa (Mat. 28:20).

¹⁷ Anasü maʼin waaʼin sutuma wakaaliinjain sünain aküjaa pütchi na aluwataainjanakana iipünaa. ¿Kasa maa waaʼinrajatka süpüla wakaaliinjain naya? Eeshii süpüla wasülajüin nneerü süpüla tü aküjaakat pütchi, wakaaliinjain sünain akumajaa piichi outkajaalee otta sünain akumajaa Weteet. Oonooinjana waya sümaa nanüiki na laülaashiikana otta waneeinnua wawalayuu neʼitaaka ajapuluʼu wanee aʼyatawaa «chi achepchiee oonookai otta kekiikai maʼin» (Mat. 24:45-47; Heb. 13:17).

¹⁸ Alüʼütsü maʼin süpüla kettaain nejeetse Maleiwa nanain na aluwataainjanakana iipünaa, na yaayüliikana saaʼu tü Mmakat. Süntalaa sümeetka tü müliaa miyoʼusükat (Alat. Map. 7:1-3). Süpülapünaa süntüin Armagedón, nümaajeena Jesuu chaa iipünaamüin na aluwataainjanakana nümaa (Mat. 13:41-43). Süpüla nüneeküinjanain waya Jesuu maʼaka süneekünüin tü anneetkalüirua, acheküshii wakaaliinjain na nuwalayuukana.