1. ¿Jamüsü choʼujaaka aleewainjanain maʼin waya nümaa Jeʼwaa?

KOJUTÜSÜ maʼin wamüin wayakana aküjüliikana pütchi aleewain waya nümaa Jeʼwaa. Choʼujaapejeʼe wachajaainjatüin sukuwaʼipa süpüla aleewainjanain maʼin waya nümaa. Waainjain tia suulia keejiain wamüin tü naainjakat na wayuu nuluwataakana aaʼu Satanaa jee suulia waapüin waaʼin sünain aainjaa kasa mojusü.

2. (1) ¿Kasa naainjaka piamashii wayuu aleewajiraale maʼin naya? (Paashajeʼera tü nootakat.) (2) ¿Kasa paainjüinjatka süpüla aleewainjachin maʼin pia nümaa Jeʼwaa?

² ¿Aleewashiche pia nümaa Jeʼwaa? ¿Kasache paainjüinjatka süpüla aleewainjachin maʼin pia nümaa? Anuu tü paainjüinjatkat saashin Santiago 4:8: «Müleka jürütkaale nünainmüin Maleiwa, arütkaajeechi nia jünainmüin». Süpüla aleewainjachin pia nümaa Jeʼwaa, eesü tü kasa paainjüinjatkat. * Arütkaainjachi pia nünainmüin Jeʼwaa. Paainjüle tia, arütkaajeechi nia pünainmüinyaasa jee aleeweechi maʼin pia nümaa. Meerü paaʼin maʼaka naaʼin Jesuu wanaa sümaa  nümüin: «Ajütüüshi taya nütüma Maleiwa chi nnojoikai jiʼraajüin.» Nümakalaka süchikijee tia: «Teʼraajüin nia» (Juan 7:28, 29). Wekirajaa sünain tü waainjüinjatkat süpüla warütkaain maʼin nünainmüin Jeʼwaa.

3. ¿Kasa waainjüinjatka süpüla yootiraainjanain waya nümaa Jeʼwaa?

³ Müleka warütkaweere nünainmüin Jeʼwaa, yootuinjana maʼin waya nümaa. ¿Jamüinjatü sukuwaʼipa watuma tia? Jamüshijaʼa wattale kepiain wanee wayuu nuulia wanee naʼaleewain, aluwanaajiraashii naya mensaaje jee ayamaajiraashii naya. Akaataajaʼa joo aleeweere maʼin waya nümaa Jeʼwaa, acheküshii woʼuraajüinjanain waneepia nümüin (paashajeʼera Salmo 142:2). ¿Kasaka naainjüin Jeʼwaa süpüla yootuin nia wamaa? Waashajeʼerüle tü Wiwüliakat, müshi yootokai naaʼin wamaa. Müsüjeseʼe waashajeʼerüinjatüin shia waneepia sümaa jülüjüin waaʼin tü sümakat (paashajeʼera Isaías 30:20, 21). Waainjüle tia, aleeweena maʼin waya nümaa Jeʼwaa.

4, 5. (1) ¿Kasa naainjaka Jeʼwaa süpüla müinjachin yootokai naaʼin wamaa sükajee tü Wiwüliakat? (2) Püküja wanee sukuwaʼipa.

⁴ Watüjaa aaʼu jaloulin maʼin sümüin wayuu süpüshuaʼa tü sümakat tü Wiwüliakat. Sükaaliinjapejeʼe waya waneʼewaire wakua süpüla warütkaainjanain nünainmüin Maleiwa. Müsüjeseʼe jülüjüinjatüin waaʼin kasain antüin suluʼumüin waaʼin wanaa sümaa waashajeʼerüin shia. Jee müsia choʼujaasü waainjüinjatüin tü waashajeʼerakat suluʼujee tü Wiwüliakat. Waainjüle tia, müshi yootokai naaʼin Jeʼwaa wamaa. Wayaawatüle saaʼu nükaaliinjain waya Jeʼwaa, aleeweena maʼin waya nümaa (Heb. 4:12, TNM; Sant. 1:23-25).

⁵ Anuu wanee sukuwaʼipa süpüla müinjachin yootokai naaʼin Jeʼwaa wamaa: waashajeʼerüle tü nümakat Jesuu suluʼu Mateo 6:19, 20, müshi nia yala: «Anakaja müleka nnojorule jünaajaain kasa anasü yaa mmaluʼu». Tü nüküjeekalü achiki Jesuu shia kojutüleeinjachin maʼin Jeʼwaa wamüin suulialeʼeya kasa süpüshuaʼa. ¿Jamüsü waaʼin sutuma waashajeʼerüin tia pütchikat? Talateerü waaʼin watüjaale saaʼu talatüin naaʼin Jeʼwaa sutuma tü waainjakat. ¿Jameetka waaʼin wayaawatüle saaʼu nnojoluin kachiiruain waaʼin aʼyatawaa nümüin Maleiwa sutuma waainjain waneeirua kasa? Wayaawateerü aaʼu nükaaliinjeein waya Jeʼwaa süpüla warütkaainjanain maʼin nünainmüin.

6, 7. (1) ¿Kasa waainjüinjatka süpüla aleewainjanain maʼin waya nümaa Jeʼwaa? (2) ¿Kasa tü waaʼinmaainjatkat wekirajaapa sünain tü Wiwüliakat?

⁶ Wanaa sümaa wekirajaain sünain tü Wiwüliakat,  wayaawata aaʼu tü wanoukteʼerüinjatkat sünain tü waʼyataainkat nümüin Maleiwa. Jee müsia weʼraajaleeinya tü nukuwaʼipakat Maleiwa sutuma otta wayaawata aaʼu anain süpüshuaʼa tü kasa naainjakat. Watüjaale saaʼu tia nüchiki Jeʼwaa, aireejeechia maʼin nia wapüla. Akaataajaʼa niakai, aireejeenaʼaya maʼin waya nüpüla. Shiasaʼa sünainjee tia, aleeweena maʼin waya nümaa Jeʼwaa (paashajeʼera 1 Corinto 8:3).

⁷ Warütkaweere nünainmüin Jeʼwaa, choʼujaasü wekirajaainjanain palajana sünain tü Wiwüliakat. Naashin Jesuu, kateerü woʼu waneepia müleka weʼraajüle maʼin tü nukuwaʼipakat Jeʼwaa (Juan 17:3, TNM). Shiimain wattain saalii tü kasa watüjakalü apüleerua suluʼujee tü Wiwüliakat. Nnojotpejeʼe shiainjatüin waaʼinmaain tia wekirajaapa sünain tü Wiwüliakat, tü waaʼinmaainjatkat shia weʼraajüinjachin maʼin Jeʼwaa (paashajeʼera Éxodo 33:13; Sal. 25:4).

8. (1) Sutuma tü naainjakat Jeʼwaa nümüin Azarías, ¿jamüsü sünüiki soʼutku wayuu süchiki tia? (2) Sutuma weʼraajüin maʼin Jeʼwaa, ¿kasa weʼitaainjatka anain waaʼin?

⁸ Waashajeʼerapa tü Wiwüliakat, «nnojotsü anain saaʼin tamüin tü naainjakat Jeʼwaa yaʼayaa», nnojoleena waya müin süka aleewain maʼin waya nümaa. Anuu wanee kasa alataka nümüin wanee wayuu aluwataapuʼukai saaʼu Judá, Azarías nünülia. Na wayuu nuluwataakana aaʼu, naʼwaajüin maʼin tü maleiwayaasükalüirua. Nnojotpejeʼe wanaawain nukuwaʼipa namaa. Saashin tü Wiwüliakat, ayatüsia naainjain tü kasa anasü nuluwataakalü anain Jeʼwaa (2 Rey. 15:1-5). Mayaainjeʼe müin nukuwaʼipa, nüntirüin Maleiwa nünainmüin chia wayuukai wanee ayuulii keemasü maʼin. ¿Jamüsü naainjaka tia Maleiwa nümüin? Nnojotsü aküjünüin suluʼu wetsiikulokalüirua tüü. «Mojutaʼaleesüjaʼa maʼin tü naainjakat Maleiwa nümüin chia wayuukai, eetaayaai kaainjalashin nia», eeshiijaʼa süpüla namayaa namüin noʼutku na wayuukana. Weʼraajapajaʼa maʼin Jeʼwaa sünain lotuin nukuwaʼipa naaʼinrajatpa wanee kasa (Jer. 30:11). Weʼitaashaatain maʼin waaʼin nünain Jeʼwaa sünain lotuin süpüshuaʼa tü kasa naainjakat.

9. ¿Jamüshi süsalaka naainjala Azarías nutuma Jeʼwaa?

⁹ Suluʼu waneeirua karaloukta ashajuushika suluʼu tü Wiwüliakat, aküjünüsü sooʼomüin süchiki nukuwaʼipa Azarías, Uzías münapuʼushi joo niayaa (2 Rey. 15:7, 32). Suluʼu 2 Crónicas 26:3-5, 16-21, aküjünüsü sünain naainjain tü kasa nuluwataakalü anain Jeʼwaa. Aküjünapejeʼe yala sünain yaletüin maʼin naaʼin mapa. Soʼu wanee kaʼi antajaasü suluʼu naaʼin naainjeein amüin wanee kasa aluwataanaka anain neʼe na sacerdootekana. «Mojusü tü paainjeekat amüin», müshii na 81 sacerdootekana nümüin Azarías. Sünainjee naʼalijirüin nia suulia tia, aashichijaashi nia nooʼomüin. Aluʼuwatchia makaʼa nia eʼrülin wayumüin. Süka watüjaaitpain saaʼu tü kasa mojusü naainjakat Azarías, wayaawatüitpa aaʼu jamüin süsalaka naainjala nutuma Jeʼwaa.

10. (1) ¿Jamüsü nnojotka choʼujaain watüjaain saaʼu süpüshuaʼa tü kasa naainjakat Jeʼwaa? (2) ¿Kasa waainjüinjatka süpüla weʼitaainjatüin waaʼin sünain lotuin sukuwaʼipa süpüshuaʼa tü kasa naainjakat Jeʼwaa?

¹⁰ Wayaawatüitpa aaʼu sünain jamüin süsalaka naainjala Azarias nutuma Jeʼwaa. Suluʼu tü Wiwüliakat, eesü nnojorüle süküjünüin kasanainjeejatüin naainjaka Jeʼwaa wanee kasa. «Nnojotsü müin anakai saaʼin tamüin tü naainjakat Jeʼwaa yaʼayaa», ¿müinjanache waya waashajeʼerapa wanee kasa aküjünaka suluʼu tü Wiwüliakat? ¿Weʼitaataajeetpa waaʼin nünain Maleiwa sünain lotuin sukuwaʼipa süpüshuaʼa tü kasa naainjakat? (Deut. 32:4.) Suluʼu tü Wiwüliakat, aküjünüsü wamüin tü choʼujaakat süpüla weʼraajüinjachin Jeʼwaa jee wanoujainjanain sünain nünüiki. Weʼraajüle maʼin tü nukuwaʼipakat Jeʼwaa sümaa miyoʼuin naalii wapüla, nnojoleerü choʼujaain watüjaain  saaʼu süpüshuaʼa tü kasa naainjakat. Süpüla weʼitaainjatüin waaʼin sünain lotuin sukuwaʼipa süpüshuaʼa tü kasa naainjakat Jeʼwaa, acheküshii wekirajaainjanain sünain tü Wiwüliakat. Waainjüle tia, aleeweena maʼin waya nümaa Jeʼwaa (Sal. 77:12, 13).

11-13. ¿Jamüsü watüjaaka saaʼu sünain naapüin Maleiwa wanüiki woʼuraajapa nümüin? (Piirakaa sümüin tü ayaakua suluʼukat süpana 19.)

¹¹ Wanaa sümaa woʼuraajüin nümüin Jeʼwaa, waʼwaajüin nia, waapüin analuʼut nümüin jee achuntüshii waya kaaliinwaa nümüin. Arütkaashii waya nünainmüin waainjüle tia (Sal. 32:8). Aleeweere maʼin waya nümaa Jeʼwaa, acheküsü wanoujainjatüin sünain naapüin wanüiki woʼuraajapa nümüin.

¹² Makaʼa woʼuraajüin nümüin Jeʼwaa shia süka naapüin tü wanüikikat, eepejeʼe wayuu manoujainka sünain tia. Naashin nayakana, oʼuraajüshii neʼe waya süpüla anain waaʼin jee süpüla wakumajüin sukuwaʼipa wanee kasa alataka wamüin. Shiimainsaʼaya anain sukuwaʼipa watuma wanee kasa müleka woʼuraajüle. Oʼuraajüshii waya süka watüjaain saaʼu naapüin Maleiwa tü wanüikikat. ¿Jamüsü watüjaaka saaʼu tia?

¹³ Jamüshijaʼa Jesuu süpülapünaa nüntüin yaa mmapaʼamüin, niʼrüin tü naainjakat Jeʼwaa süpüla nusouktüin shiʼipajee tü nachuntakat nümüin na wayuukana. Shiasaʼa yaapa nia mmapaʼa, oʼuraajüshi nia nümüin Maleiwa süpüla nüküjüin nümüin tü jülüjakat naaʼin jee jamüin tü naaʼinkat. Siraasüinka wanee ai naaʼu Jesuu sünain oʼuraajaa (Luc. 6:12; 22:40-46). Jee müsia nikirajüin na aluwataaushiikana sünain oʼuraajaa nümüin Jeʼwaa. Nnojotsüjeʼe naainjüin tia, müleka nnojorüle naapüin Jeʼwaa nanüiki na oʼuraajakana nümüin. Müshijeseʼe nümüin Jesuu: «Tatüjaa aaʼuchi pia sünain paapüin tanüiki meinshi» (Juan 11:41, 42). Jee müshiʼiya wayakana, wanoujashaata anainrü sünain naapüin Maleiwa tü wanüikikat woʼuraajapa nümüin (Sal. 65:2).

14, 15. (1) ¿Jamüsü pansaainjatka wanüiki nümüin Jeʼwaa woʼuraajapa nümüin? (2) ¿Kasa saainjaka wanee anoujasü süpüla aleewainjatüin shia nümaa Jeʼwaa?

¹⁴ Nnojorüle pansaain wanüiki nümüin Jeʼwaa wachuntapa wanee kasa nümüin, nnojoleerü watüjaain saaʼu jamüin nusouktia  shiʼipajee tü wachuntakat nümüin. Aluʼusaʼa pansaale wanüiki woʼuraajapa nümüin, watüjaajeerü aaʼu jamüin nusouktia shiʼipajee tü wachuntakat nümüin. Sutuma tia, aleeweena maʼin waya nümaa. Waküjüle nümüin Jeʼwaa süpüshuaʼa tü shapaakalü atuma waaʼin, arütkaweechi nia wanainmüin.

¹⁵ Jülüja waaʼin tü saainjakat wanee anoujasü, Carmen sünülia. * Saashin shiaka, mamalainpuʼusat sümüin aküjaa pütchi. Wanaa sümaa süpensionaajüin, aashajaashi wanee laülaashi sümaa süpüla nüküjüin sümüin anain pürekutsoorüle rekulaat shia. Pürekutsootkalaka shia saaʼujee tü nümakat chi laülaashikai. Shiasaʼa shiaka, oʼuraajawaisü weinshi nümüin Jeʼwaa süpüla nükaaliinjain shia süpüla kamalainjatüin sümüin aküjaa pütchi. ¿Naapüinche Jeʼwaa sünüiki? Jamüsaʼa. Maaʼulu yaa, apünüinrü juya Carmen sünain pürekutsoolüin. Saashin shiaka, atüjüsü maʼin aküjaa pütchi sutuma sujuʼitawalin waneepia sünain aküjaa pütchi jee süka sükaaliinjünüin natuma na wawalayuu jieyuukana. Makalaka kamalainpain maʼin sümüin aküjaa pütchi otta aleewasü maʼin shia nümaa Jeʼwaa. Saaʼujee suʼuraajüin Carmen nümüin Jeʼwaa, aleewaitpa maʼin shia nümaa.

16, 17. (1) ¿Kasa ayatüinjatka waainjain süpüla aleewainjanain maʼin waya nümaa Jeʼwaa? (2) ¿Kasa ekirajaanajatka sünain tü wanee ekirajaayakat?

¹⁶ Eeshii süpüla warütkaain waneepia nünainmüin Jeʼwaa. Ayataʼaya waashajeʼerüin tü Wiwüliakat süpüla müin yootokai waaʼin nümaa Jeʼwaa otta ayataʼaya woʼuraajüin nümüin. Waainjüle tia, aleeweena maʼin waya nümaa Jeʼwaa jee müshia niakai, nükaaliinjeena waya suʼunnaa tü kasa mojusü eekat sülatüin wamüin.

¹⁷ Eesüjaʼa süpüla wainmain tü kasa mojusü alatakat wamüin mayaainjeʼe woʼuraajüin waneepia nümüin Jeʼwaa. Suluʼujee tia, eesü süpüla nnojoluin weʼitaain waaʼin nünain Jeʼwaa, eesü süpüla süntajaain suluʼu waaʼin nnojoluin naapüin Jeʼwaa wanüiki woʼuraajapa nümüin otta nnojoluin aleewain nia wamaa. ¿Kasa waainjüinjatka suluʼule wekii tia kasakalüirua? Wekirajaajeerü anain tia sünain tü wanee ekirajaayakat.