Piʼitaa paaʼin nünain Jeʼwaa sünain nükaaliinjeechin pia
«Jiʼitaa maʼin jaaʼin nünain chi Maleiwakai jiakana jüpüshuaʼa.» (SAL. 62:8, TNM)
1-3. ¿Jamüsü nütüjaashaataka aaʼu Pablo nükaaliinjüinchin nia Jeʼwaa? (Piirakaa sümüin tü ayaakuaakat.)
MÜLIAPUʼUSHII maʼin atumawaa na anoujashii chajanakana Roma. Nnojoishii nakaʼlirajüin na romajeʼewaliikana. Naashin nayakana, wayuu mojulaashii na anoujashiikana saaliijee naʼürülaain sooʼomüin wayuu jee naliʼrajüin nayain jotuin atuma tia pueulokot. Püreesashii naya atumawaa jee müshiʼiya waneeinnua, ojutünüshii saʼaka wüchii jashichi süpüla shikajaainjanain naya. Eeshii eekai nakachennüin sünain wunuʼu lotusü süpüla naʼajünüin katashiiroʼu. Aʼajünüshii naya aipaʼawai süpüla chuwatuuinjatüin tü mmapaʼakat natuma. Nayaawatapejeʼe aaʼu naya anoujashiikana eein süpüla sülatüin tia namüin waneʼewai nakua.
2 Soʼutpünaa tia, ataʼünüshi Pablo natuma na romajeʼewaliikana. Nnojotsü nütüjaain aaʼu Pablo nükaaliinjünüinjachire natuma na nuwalayuukana. Jülüjüsü naaʼin tia süka nnojoluinkain nakaaliinjain nia suʼunnaa niʼrüin müliaa chayaa. Naashin Pablo, nükaaliinjain nia Jeʼwaa nükajee Jesuu suʼunnaa tü müliaa niʼrakat jee müsia akatchinnüsü naaʼin nutuma süpüla nüchecherüin naaʼin suʼunnaa tü kasa alatakat nümüin. Shiküinjachinka Pablo wanee «wasashi» naashin (2 Tim. 4:16, 17, TNM). *
3 Nütüjaapejeʼe aaʼu Pablo nükaaliinjünüinjachin nutuma Jeʼwaa süka nnojoluin nüpütüin nia nümüiwaʼa wanaa sümaa niʼrapuʼuin müliaa. Nütüjaa aaʼu Pablo nükaaliinjünüinjachin nutuma Jeʼwaa süpüla nüchecherüinjatüin naaʼin süpüla eejiraain sümaa tü alatakat nümüin jee müsia tü kasa eekat süpüla sülatüin mapa. Niʼitaashaatain naaʼin Pablo sünain nujuʼitireechin nia Jeʼwaa saʼakajee kasa mojusü, jaʼitairü kapüleein maʼin tü alatakat nümüin (2 Tim. 4:18). Niʼitaashaatain naaʼin Pablo sünain nükaaliinjüinjachin nia Jeʼwaa nümaa Jesuu mayaainjeʼe nnojoluin nakaaliinjain nia na nuwalayuukana. Kanoulakaiche maʼin Pablo.
PIʼITAA MAʼIN PAAʼIN NÜNAIN JEʼWAA SUʼUNNAA PIʼRÜIN MÜLIAA
4, 5. (1) ¿Jarai chi akaaliinjeechikai pia waneepia? (2) ¿Kasa paainjüinjatka süpüla aleewainjachin maʼin pia nümaa Jeʼwaa?
4 ¿Eeiria alatüin pümüin kasa mojusü sümaa nnojolin jaralin akaaliinjain pia? Eeshijaʼa süpüla pujutünüichire suluʼujee piʼyataain jee shiale wanee kasa alataka pümüin koleejialuʼu. Eesüjaʼa mojule maʼin paaʼin suʼunnaa kasa mojusü süka nnojolin jaralin akaaliinjain pia. Eepejeʼe waneeirua kasa kapüleejeetka süpüla sunoukteʼerüin wayuu. ¿Kasaka paainjüinjatüin sülatüle tia pümüin? Piʼitaainjatü paaʼin nünain Jeʼwaa saashin tü Wiwüliakat (Prov. 3:5, 6). ¿Shiimainche nükaaliinjeenain waya Jeʼwaa weʼrapa müliaa? Jamüsaʼa. Suluʼu tü Wiwüliakat, aküjünüsü süchiki tü naainjakat Jeʼwaa süpüla nükaaliinjain na aʼyataashiikana nümüin.
5 Nnojoire jaralin akaaliinjain pia maaʼulu sünain tü kasa mojusü alatakat pümüin, nnojo püshapalaain aaʼin. Paainja tü naainjakat Pablo jee piʼitaa maʼin paaʼin nünain Jeʼwaa sünain nükaaliinjeechin pia suʼunnaa müliaa. Mayaa, piyaawateerü aaʼu sünain shiimain naaʼinmajüin pia Jeʼwaa suulia kasa mojusü. Paainjüle tia, piʼitaajeerü maʼin paaʼin nünain Jeʼwaa jee aleeweechi maʼin pia nümaa.
NNOJOIRE NUSOUKTAMAATÜIN JEʼWAA SHIʼIPAJEE TÜ PUCHUNTAKAT NÜMÜIN
6. ¿Kasa ashapalaajeetka atuma waaʼin weʼrapa müliaa?
6 Eesü shapaale maʼin paaʼin saaʼujee kapüleein pümüin tü alatakat pümüin. Otta eesü puchuntüirüle kaaliinwaa nümüin Jeʼwaa süpüla punoukteʼerüin shia; nnojo püshapalaain aaʼin otta piʼitaa paaʼin nünain Jeʼwaa sünain nükaaliinjeechin pia (paashajeʼera Salmo 62:8 otta 1 Pedro 5:7). Aleeweere maʼin pia nümaa Jeʼwaa, acheküsü piʼitaainjatüin paaʼin nünain sünain nükaaliinjeechin pia waneepia. Eejeerü soʼu wanee kaʼi ashapalaajeetka oʼu paaʼin süka kamaʼajeechin Jeʼwaa süpüla nusouktüin shiʼipajee tü puchuntakat nümüin (Sal. 13:1, 2; 74:10; 89:46; 90:13; Hab. 1:2).
7. ¿Jamüshi eeka süpüla kamaʼain Jeʼwaa süpüla nusouktüin shiʼipajee wanee kasa wachuntaka nümüin?
7 ¿Jamüshi eeka süpüla kamaʼain Jeʼwaa süpüla nusouktüin shiʼipajee wanee kasa wachuntaka nümüin? Saashin tü Wiwüliakat, nia Washikai Jeʼwaa (Sal. 103:13). Jamüshijaʼa wanee wayuu nnojotsü naapawalin sümüin nüchonnii süpüshuaʼa tü nachuntakat nümüin. Otta eeshi kamaʼawaire nia süpüla naapüin wanee kasa nachuntaka nümüin. Jee müshiʼiya na tepichikana kapüleeshii maʼin naya, eesü nachuntüle wanee kasa keeʼireeka naaʼin paala, shiasaʼa mapa nnojotsü kasajatüin namüin. Otta müshiʼiya na wayuu kachoinkana, jülüjüinjatü naaʼin anale jee mojule tü nachuntakat nachonnii namüin. Naapawaire na wayuu kachoinkana süpüshuaʼa tü nachuntakat nachonnii namüin, joojeena naya napüla. Natüjaapejeʼe aaʼu na wayuu kachoinkana kasain aneerüin atuma nakuwaʼipa nachonnii otta naapüin wanee kasa namüin choʼujaapa shia namüin. Akaataajaʼa tü naainjakat Jeʼwaa. Aishii waya nüpüla Jeʼwaa, nütüjaa aaʼu kasain choʼujaain wamüin otta naapüin wamüin wanee kasa choʼujaapa maʼin shia wamüin. Müsüjeseʼe nnojoluinjatüin ashapalaain waaʼin müleka kamaʼale nia süpüla naapüin tü wachuntakat nümüin (anasü paashajeʼerüle Isaías 29:16 otta 45:9).
8. ¿Kasa naaʼinreetka Jeʼwaa wapüleerua weʼrapa müliaa?
8 Nütüjaa aaʼu Jeʼwaa wounteerüle eejiraain waya sümaa wanee kasa (Sal. 103:14). Jee müsia nükatchinrüin waaʼin wanaa sümaa choʼujaain maʼin shia wamüin. Wanaa sümaa weʼrüin müliaa, pansaasü nünüiki Jeʼwaa wamüin sünain nükaaliinjeenain waya süpüla wachecherüinjatüin waaʼin suʼunnaa tia ( paashajeʼera 1 Corinto 10:13) Anasü maʼin waaʼin sutuma watüjaain saaʼu sünain nükaaliinjeenain waya Jeʼwaa suʼunnaa müliaa.
9. Nnojoire nusouktamaatüin Jeʼwaa shiʼipajee tü puchuntakat nümüin, ¿kasa paainjüinjatka?
9 Nnojoire nusouktamaatüin Jeʼwaa shiʼipajee tü puchuntakat nümüin, nnojo püshapalaain aaʼin. Jülüja paaʼin nükaaliinjeechin pia Jeʼwaa wanaa sümaa choʼujaain shia pümüin. Saashin tü Wiwüliakat, nükaaliinjeena waya Jeʼwaa soʼu tü kaʼi choʼujaakalü oʼu shia wamüin jee nümülialüin waaʼin suʼunnaa kasa mojusü, süka jamüin, lotuin sukuwaʼipa süpüshuaʼa tü kasa naainjakat. Talatüshii maʼin na wayuu eʼitaakana naaʼin nünain Jeʼwaa (Is. 30:18).
SUʼUNNAA KASA MOJUSÜ
10-12. (1) ¿Jamüsü kapüleeka maʼin aaʼinmajaa wanee wapüshi eekai ayuulin? (2) Weʼitaale waaʼin nünain Jeʼwaa suʼunnaa müliaa, ¿kasa nükaaliinjeenaka aka waya? Püküja tü alatakat sümüin wanee wawala.
10 Sünain tü pütchikat 2, aküjünüsü wamüin sünain shiküinjachinkain Pablo wanee «wasashi» (2 Tim. 4:17, TNM). Kapüleere maʼin pümüin tü alatakat pümüin maʼaka kapüleein tü alatakat nümüin Pablo, ¿kasa paainjüinjatka? Piʼitaa maʼin paaʼin nünain Jeʼwaa sünain nükaaliinjeechin pia. Jamüshijaʼa paaʼinmajüle wanee püpüshi eekai ayuulin, watüjaa aaʼuchi pia sünain puchuntüin kaaliinwaa nümüin Jeʼwaa süpüla püchecherüinjatüin paaʼin jee süpüla pütüjaain saaʼu tü anakat süpüla paaʼinrüinjatüin. * Paainjüle tia, nnojo püshapalaain aaʼin, süka jamüin, nütüjaain aaʼu Jeʼwaa kapüleein maʼin tü alatakat pümüin. Piʼitaa paaʼin nünain Jeʼwaa sünain nükaaliinjeechin pia süpüla püchecherüinjatüin paaʼin suʼunnaa tü müliaa piʼrakat jee süpüla ayatüinjachin paaʼinrüin kasa anasü waneepia (Sal. 32:8).
11 «¿Jamüshiche eera nnojoikai nükaaliinjain taya Jeʼwaa?», eeshijaʼa süpüla pümüin. Eesüjaʼa nnojorüle pansaain nanüiki na tottootkana süchiki tü naainjüinjatkat nüka chi püpüshi ayuuikai. Eesüjaʼa süpüla piʼitaain paaʼin paala sünain sümülialaainjatüin naaʼin paalii na kasayuukana pünain; mojusü neʼe paaʼin natuma. Sülatüle pümüin tia, püküja nümüin Jeʼwaa nükatchinrai paaʼin jee ayata pürütkaain nünainmüin (paashajeʼera 1 Samuel 30:3, 6). Shiasaʼa mapa, piyaawatapa saaʼu tü naainjakat Jeʼwaa süpüla nükaaliinjain pia, aleeweechi maʼin pia nümaa.
12 Anuu tü saainjakat wanee wawala, Linda sünülia. * Saashin shiaka, kakalia müliachoin saaʼin sünain aaʼinmajaa chi süshikai sümaa tü shiikat kataiwaʼaya noʼu. Eesü isawaire nüchiki nüchecherüin naaʼin chi suʼwayuusekai, chi suwalakai jee müsia shiaka saashin. «Wainmairü kasa waainjaka, ¿kasache anaka namüin?», eeshii namüle sümaa mojuin maʼin naaʼin. Shiasaʼa maaʼutpünaa yaa, nayaawatüitpa aaʼu sünain nükaaliinjain maʼin naya Jeʼwaa suʼunnaa tü kasa mojusü neʼrakat paala. Saashin Linda, nüchecherüin maʼin saaʼin Jeʼwaa süpüla eejiraain sümaa tü alatakat sümüin.
13. ¿Kasa akaaliinjaka Rosa süpüla süchecherüinjatüin saaʼin suʼunnaa tü müliaa shiʼrakat?
13 Weʼitaale maʼin waaʼin nünain Jeʼwaa, nükaaliinjeena waya süpüla wachecherüinjatüin waaʼin suʼunnaa müliaa. Tia, shia tü saainjakat wanee wawala, Rosa sünülia. Manoujainsai chi suʼwayuusekai jee ooʼulaashi nia suulia. Jee müshia chi suwalakai, antünüsü nünain wanee ayuulii keemasü maʼin. Maʼaka jeʼra kashi süchikijee tia, ouktalaa müsü nuʼwayuuse chi suwalakai. Müliachonsü maʼin saaʼin Rosa sutuma müin sukuwaʼipa. Shiasaʼa anatchonpa saaʼin süchikijee tü alatakat sümüin, pürekutsootsü rekulaat shia. Anainjatiaa sukuwaʼipa saashin, shiasaʼa ouktalaa sümaka joo tü shiikat. ¿Kasaka akaaliinjain shia süpüla süchecherüinjatüin saaʼin suʼunnaa tü müliaa shiʼrakat? Oʼuraajüsü shia waneepia nümüin Jeʼwaa jee süküjüin nümüin süpüshuaʼa tü kasa alatakat sümüin. Saashin shiaka, aleewasü maʼin shia nümaa Jeʼwaa otta shiʼitaain maʼin saaʼin nünain sünain nükaaliinjainjatüin shia. Shiyaawata aaʼu Rosa nükaaliinjain shia Jeʼwaa saaʼujee nnojoluin jaʼijaawalin sümüin wanee kasa. Müsü shiʼyataajiraakai saaʼin nümaa Jeʼwaa saashin.
Niainjachi alanaʼleekai aalii Jeʼwaa wapüla (Paashajeʼera pütchi 14 sünainmüin 16)
14. ¿Kasa nükaaliinjeechika anain pia Jeʼwaa nujuʼitinnüle wanee püpüshi naʼakajee na wawalayuukana?
14 Eesü müliale maʼin paaʼin saaliijee nujuʼitinnüin wanee püpüshi naʼakajee na wawalayuukana. Pütüjaa aaʼu tü sümakat tü Wiwüliakat sünain nnojolinjachin pia yootuin nümaa (1 Cor. 5:11; 2 Juan 10). Shiasaʼa sutuma alin maʼin püpüla chi püpüshi ojuʼitinnakai, müsü kapüleekai saaʼin pümüin paainjain tü nuluwataakalü anain Jeʼwaa. ¿Kasaka naainjain Jeʼwaa süpüla nükaaliinjainjachin pia? Nükatchinreerü paaʼin süpüla paainjain tü kasa anasükat jee süpüla poonooinjachin nümaa. Piʼitaa maʼin paaʼin nünain Jeʼwaa otta jüüjüü pia sümüin tü nümakat süpüla pürütkaainjachin maʼin nünainmüin.
15. ¿Jamüshi moonooinka Adán sümaa nünüiki Jeʼwaa?
15 Tü naainjakat chi püpüshi ojuʼitinnakai mojusü maʼin maʼaka mojuin maʼin tü naainjakat Adán. Jamüshijaʼa Adán, nütüjaa aaʼu ouktajachin nia niküle tü süchon wunuʼu saapakat Eva nümüin. Saashin tü Wiwüliakat, nnojoishi emeejuushin Adán (1 Tim. 2:14). ¿Jamakaʼa noonooka sümaa sünüiki tü nuʼwayuusekat suulia nünüiki Jeʼwaa? Shia süka sülanaʼaleein saalin tü jietkat nüpüla nuulialeʼeya Jeʼwaa (Gén. 3:6, 17). ¿Kasa shikirajaka anain waya tia?
16. ¿Jarai chi alanaʼleeinjachikai aalii wapüla suulialeʼeya wanee kasa? ¿Jamüsü waainjüinjatka tia?
16 Niainjachi alanaʼaleeka aalii wapüla Jeʼwaa suulialeʼeya wayuu ( paashajeʼera Mateo 22:37, 38). Waainjüle tia, aneerü nakuwaʼipa na wapüshikana, jaʼitainna maʼyataainre naya nümüin Jeʼwaa. Müshijeseʼe alinjachin maʼin püpüla Jeʼwaa otta piʼitaainjatüin maʼin paaʼin nünain. Shapaale maʼin paaʼin sutuma nujuʼitinnüin wanee püpüshi naʼakajee na wawalayuukana, püküja nümüin Jeʼwaa jamüin paaʼin sutuma tia (Roma 12:12; Filip. 4:6, 7). * Püchechera maʼin paaʼin süpüla aleewainjachin maʼin pia nümaa Jeʼwaa, jaʼitairü mojuin paaʼin naaliijee chi püpüshi ojuʼitinnakai. Paainjüle tia, piʼitaajeerü paaʼin nünain Jeʼwaa sünain nükaaliinjeechin pia jee aneerüin pukuwaʼipa poonoole nümaa waneepia.
TÜ PAAINJÜINJATKAT
Waaʼinmaale tü aküjaakat pütchi, weeʼiyatüin sünain weʼitaain maʼin waaʼin nünain Jeʼwaa (Paashajeʼera pütchi 17)
17. Waaʼinmaale maʼin tü aküjaakat pütchi, ¿kaseerü naapaka Jeʼwaa wamüin?
17 ¿Jamüshi nükaaliinjünaka Pablo nutuma Jeʼwaa wanaa sümaa najachijuushinkain sutuma «wasashi»? Naashin Pablo, nükaaliinjain nia Jeʼwaa süpüla ayatüinjachin nüküjüin tü pütchikat jee süpüla nikettaajüin tü aʼyatawaa eʼitaanakat najapuluʼu nutuma (2 Tim. 4:17, TNM). Jee müshiʼiya wayakana, niʼitaain Jeʼwaa wajapuluʼu tü aküjaakat pütchi jee aishii waya nüpüla süka waʼyataajiraain nümaa (1 Cor. 3:9; 1 Tes. 2:4). Waaʼinmaale maʼin tü aküjaakat pütchi, nnojoleerü jaʼijaain kasa wamüin süka naapeerüin Jeʼwaa wamüin süpüshuaʼa tü kasakalüirua (Mat. 6:33, TNM). Jee müsia nnojoleerü ashapalaain waaʼin kamaʼale Jeʼwaa süpüla nusouktüin shiʼipajee tü wachuntakat nümüin.
18. ¿Kasa waainjüinjatka süpüla aleewainjanain maʼin waya nümaa Jeʼwaa otta süpüla weʼitaainjatüin maʼin waaʼin nünain?
18 Ayataʼaya püchajaain sukuwaʼipa süpüla aleewainjachin maʼin pia nümaa Jeʼwaa. Sülatüle kasa mojusü pümüin, püchecheraa maʼin nünain Jeʼwaa. Pikirajaa sünain tü Wiwüliakat jee pükatala kaʼi süpüla jülüjüin paaʼin tü sümakat. Ayataʼaya puʼuraajüin waneepia nümüin Jeʼwaa otta ayataʼaya piʼyataain maʼin nümüin. Paainjüle tia, piʼitaajeerü maʼin paaʼin sünain nükaaliinjeechin pia Jeʼwaa suʼunnaa tü müliaa piʼrakat maaʼulu yaa jee tü piʼreetkat mapeena.
^ par. 2 Nnojotsü watüjaain saaʼu wasashire chi ajachijakai Pablo jee nayale na nüʼünüükana ajachajüin nia.
^ par. 10 Suluʼu waneeirua rewiisüta, aküjünüsü tü naainjüinjatkat na ayuuikana jee müshiʼiya na aaʼinmajakana naya. Süpüshi tia pütchikalüirua, puusüteerü anain suluʼu ¡Despertad! ojuʼitaka peʼureeroʼu 8 soʼu juyaka 1994, peʼureeroʼu 8 soʼu juyaka 1997, maayoʼu 22 soʼu juyaka 2000 otta eneeroʼu 22 soʼu juyaka 2001.
^ par. 12 Nnojotsü shiain tü nanülia shiimainsükat.
^ par. 16 Suluʼu waneeirua rewiisüta, aküjünüsü tü naainjüinjatkat na wawalayuukana nojuʼitinnüle wanee napüshi naʼakajee na wawalayuukana. Puusüteerü anain suluʼu Aapiria Wayuu ojuʼitaka settienpüroʼu 1 soʼu juyaka 2006, süpana 17 sünainmüin 21, otta tü ojuʼitakat eneeroʼu 15 soʼu juyaka 2007, süpana 17 sünainmüin 20.
