«MOʼOOSHI neʼe taya wanaa sümaa süküjünüin suluʼu tü outkajaaleekat nujuʼitinnüin chi tachonkai naʼakajee na anoujashiikana, nia epayaakai chia makai. Aishi maʼin nia tapüla, aishi taya nüpülaya, tamaapuʼushi nia sünain aaʼinraa wanee kasayaakejeʼe. Anamiapuʼushi maʼin chi tachonkai, sumojujaʼalaa sümaka nukuwaʼipa mapa. ‹¿Wayataaka neʼe kasirüin süpüla müinjatüin nukuwaʼipa chi wachonkai?›, maa müsü waaʼin. Aʼyalajüsü tü niikat weinshi, nnojotsü kasayaain tatuma», müsü nünüiki Julian.

Ojuʼitinnüshi wanee wayuu naʼakajee na anoujashiikana süka alin nia apülaa. «¿Jamakaʼa nujuʼitinnaka shiimainrejeʼe alin nia apülaa?», eeshiijaʼa eekai namüin. ¿Jamüsü saainjünüinjatka tia saashin tü Wiwüliakat? ¿Kasa maʼin naainjaka wanee wayuu makaʼa nujuʼitinnüin naʼakajee na anoujashiikana?

Makaʼa nujuʼitinnüin wanee wayuu naʼakajee na anoujashiikana shia süka naainjüin wanee kasa mojushaatasü maʼin jee nnojoishi nia ayaawajaain naaʼin suulia naainjala.

Tü keeʼireekat naaʼin Jeʼwaa shia woonooinjanain sümaa nünüiki, nnojoishii nuluwataain waya sünain aainjaa wanee kasa kapüleeka wamüin. Anuu süpüshi tü kasa nnojotkat waainjüinjatüin naajüin Jeʼwaa: nnojoluinjana waya aainjiraain wakuwaʼipa sümaa wanee wayuu nnojotkat waʼwayuusein, nnojoishii waya kamaleiwaseyaainjanain, nnojoishii waya aʼluwajüinjanain, nnojoishii waya weimmolojuinjatüin wayuu süpüla saapüin nneerü wamüin, nnojoishii waya oʼutüinjanain saaʼin wayuu, nnojoishii waya ooʼulakirüinjanain ouutsü (1 Cor. 6:9, 10; Alat. Map. 21:8).

Anasü tia kasa naainjakat Jeʼwaa wapüleerua jee nnojotsü shia kapüleein, ¿aashi müin? Kamalainsü sümüin wayuu süpüshuaʼa kottiraain shia sümaa wayuu eekai anamiain jee kojutüin atuma wayuu. Na wayuu makana akuwaʼipa, naya na aʼyataakana nümüin Jeʼwaa maaʼulu yaa. Anasü waaʼin namaa na wawalayuukana süka watüjaain saaʼu naaʼinreerüin tü kasa anasükat, süka jamüin, waküjüin woonooinjanain sümaa nünüiki Jeʼwaa soʼujeʼereʼeya waapüin waaʼin nümüin.

¿Kaseerü alataka nümüin wanee wawala müleka naainjüle wanee kasa mojushaatasü maʼin? Sümaiwa paala, aainjüshii kasa mojusü noʼutku na aʼyataapuʼukana nümüin Jeʼwaa. Jamüshijaʼa David, aainjiraashi nia nukuwaʼipa sümaa wanee wayuu nnojotkat nuʼwayuusein jee nuʼuta aaʼinchi suʼwayuuse tia jietkat. Nnojoipejeʼe nia niyüülajamaatüin Jeʼwaa. Mayaapejeʼe naainjain tia, anuu nünüiki Natán nümüin: «Nülatireerü puulia Jeʼwaa tü paainjalakat» (2 Sam. 12:13, TNM).

¿Jamüsü nülatiraka Jeʼwaa nuulia David tü naainjalakat? Shia süka niyaawajaain naaʼin David suulia naainjala (Sal. 32:1-5). Akaataajaʼa maaʼulu yaa, müleka niyaawajaale naaʼin wanee wawala suulia naainjala sümaa nuuʼulaain suulia, nnojoleechi nia ojuʼitinnüin naʼakajee na anoujashiikana (Aluw. 3:19; 26:20). Nnojoire niyaawajaain naaʼin, nojuʼitirüinjachi nia na laülaashiikana naʼakajee na anoujashiikana.

«Nnojotsü anain tü naainjakat na laülaashiikana», eeshiijaʼa süpüla wamüin, süka jamüin, nujuʼitinnüin wanee wapüshi jee niale wanee waʼaleewain. Eepejeʼe kasa anasü sünainjee nujuʼitinnüin wanee wayuu saashin tü Wiwüliakat.

Anale tü kasa naainjakat wanee wayuu, atüjaana aaʼuchi sünain wayuuin kekiishi nia naashin Jesuu (Mat. 11:19, TNM). Nujuʼitinnüle wanee wayuu kaainjalakai naʼakajee na anoujashiikana, nnojotsü mojuin tia, süka jamüin, eein kasa anasü sünainjee. Anuu apünüinsü kasa anasü eeka sutuma tia:

Anasü pütchi nüchiki Jeʼwaa. Atüjaana aaʼu waküjüliin pütchi nüchiki Jeʼwaa, anale wakuwaʼipa, aneerü pütchi nüchiki Jeʼwaa, mojule wakuwaʼipa, mojeerü pütchi nüchiki (Is. 43:10). Müsüjaʼa maʼaka nukuwaʼipa wanee wayuu eekai kachoin. Jamüsüjaʼa anale nukuwaʼipa chi jintüikai, aneerü pütchi nüchiki chi nüshikai, mojule nukuwaʼipa, mojeerü pütchi nüchiki. Na wayuu judíokana eʼraajünüshii sünain niain Jeʼwaa aluwataaka naaʼu, alatüsü tia eeiwajachia paala Ezequiel (Ezeq. 36:19-23). Müshiʼiya neʼe wayakana, atüjaana aaʼuchii waya sünain waküjüliin pütchi nüchiki Jeʼwaa. Anale wakuwaʼipa, aneerü pütchi nüchiki.

Müleka waainjüle kasa yarüttüsü, mojeerü sünüiki wayuu nüchiki Jeʼwaa. Anuujeseʼe nünüiki Pablo suulia waainjain tia: «Nnojo jüshatüin tü jukuaippakat paala nnojolüiwaʼaya jütüjaain saaʼu nüchiki chi Oʼtteʼerüikai, wanaa sümaa kaainjalapüʼüin jia. Saaʼu maainjalain chi Maleiwa kaneekajalakai jia, anakaja müleka juuʼulaale suulia kaainjalaa süpüla jüüjüüinjanain jia nümüin sünain süpüshua tü jaaʼinrakat, süka shiain nünüiki Maleiwa ashajuushikat paala suluʼu tü nüchikimaajatkat Maleiwa sünain müin mayaa: ‹Juuʼulaa suulia kaainjalaa süka maainjalain taya› » (1 Ped. 1:14-16). Müsüjeseʼe waaʼinrüinjatüin tü anasükat süpüla anainjatüin pütchi nüchiki Jeʼwaa.

Kiʼraichire sünain aainjaa kasa mojusü wanee aküjüi pütchi nüchiki Jeʼwaa, tia sütüjaamaata aaʼu wayuu. Nujuʼitinnapa chi wayuukai naʼakajee na anoujashiikana, sütüjaamaata aaʼu wayuu sünain nnojoluin anain namüin na aʼyataashiikana nümüin Jeʼwaa tü kasa mojusükat otta noonooin sümaa tü Wiwüliakat. Eejachinka wanee wayuu chayaa Suiza oʼunakai sünainmüin wanee outkajawaa, oʼunüshi nia süka nunoujeein nünain Jeʼwaa. Eejatü wanee nuwala aainjaka kasa mojusü, aainjiraasü sukuwaʼipa nümaa wanee wayuu nnojoikai suʼwayuusein, aküjüt pütchi tia nuwalakat. Sujuʼitinnaka mapa naʼakajee na anoujashiikana. Anasü tia aainjünakat sümüin naashin süka nnojoluin anain sümüin nupueulose Jeʼwaa tü kasa mojusükat. Müshijeseʼe niʼyataweein nümüin Jeʼwaa chia wayuukai.

Aaʼinmajünüshii na wawalayuukana suulia mojuin nakuwaʼipa. Nüküjüin Pablo namüin na wawalayuu corintojeʼewaliikana, mojeerüin nakuwaʼipa müleka eere naʼaka wanee anoujashi eekai naaʼinrüin kasa mojusü sümaa nnojoluin niyaawajaain naaʼin suulia naainjala. «Shijitünüle palitchon levadura saʼaka tü ariinakat, oolojoojeerü shia sutuma», müshi Pablo. Akaataajaʼa neʼe yalale wanee anoujashi kaainjarai naʼaka na wawalayuukana, numojujeʼereena akuwaʼipa. «Jujuittira jümaala chi kaainjaraikai jaʼakajee», müshi Pablo namüin naya wawalayuukana (1 Cor. 5:6, TNM; 1 Cor. 5:11-13).

Makaʼa nujuʼitinnajachin chia wayuu nüküjakai achiki Pablo, shia süka naainjiraain nukuwaʼipa sümaa wanee jierü nnojotkat nuʼwayuusein. Maapülinsai chia wayuukai sünain aaʼinraa tia kasa mojusükat. Nnojotsü mojuin saaʼin namüin waneeinnua wawalayuu chajanaka Corinto tü naainjakat chia wayuukai (1 Cor. 5:1, 2). Nnojoire nujuʼitinnüin chia wayuukai, amaʼüjiraayaa müshiije nakuwaʼipa na wanee wawalayuu chajanaka Corinto süka shiain maʼin naainjapuʼuin tia na wayuu suluʼujeejanakana tia mmakat. Akaajaa neʼe maaʼulu yaa, nnojoire nujuʼitinnüin wanee anoujashi aaʼinrakai kasa mojusü naʼakajee na wawalayuukana, mojuteerü namüin na wawalayuukana tü nuluwataakalü anain naya Jeʼwaa (Ecl. 8:11). Maaʼin aaʼinchii na anoujashii aainjakana kasa mojusü sümaa nnojoluin nayaawajaain aaʼin suulia naainjala. Namojujeerü nakuwaʼipa na wawalayuukana (Jud. 4, 12).

Ayaawajaajeechi naaʼin suulia naainjala chi kaainjalakai. Eejachinkamaʼinka wanee jimaʼai, maaʼin aaʼinchi naashin Jesuu, oʼunajaashi nia nipialuʼujee. Najaʼttirüin tü nünneetsekat süpüshuaʼa sünain tü kasa mojusü suchuntaakat niʼiruku. Mojushaatasü maʼin naaʼin mapa süka niʼrüin nümüliala, ayaawajaashijeseʼe nia naaʼin süchiki tia, aleʼejüshi nia nipialuʼumüin (Luc. 15:11-24). Talatüshi maʼin chi nüshikai nümaa wanaa sümaa nüleʼejüin. Akaʼaya neʼe Jeʼwaa, aishaatashii waya nüpüla, müshijaʼa aka naaʼin nüshi chia jimaʼaikai. Mojusü naaʼin Jeʼwaa müleka numuloire wanee wawala suluʼu akuwaʼipaa mojusü, tü keeʼireekat naaʼin Jeʼwaa shia niyaawajaainjachin naaʼin chia wayuukai suulia naainjala süpüla katüinjatüin noʼu (Ezeq. 33:11).

Müleka nujuʼitinnüle wanee wayuu naʼakajee na wawalayuukana, nnojoluichipa naʼaleewain nia. Eesüjaʼa mojushaateerüle naaʼin saalin niʼrüin nnojoluinnapain aleewain na nuwalayuukana nümaa. Sutumajee tia, eeshi niyaawajaale naaʼin süpüla nüleʼejüinjachin nüchikuaʼa naʼakamüin na anoujashiikana. «Anapuʼusü takuwaʼipa wanaa sümaa naʼaleewainpuʼuin taya Jeʼwaa, taʼaleewainpuʼushii na tawalayuukana», eesüjaʼa maa müle  naaʼin. Müle nukuwaʼipa wayuukai chia, eeshijaʼa süpüla nüleʼejüin nünainmüin Jeʼwaa.

Süpüla nüleʼejüinjachin wanee wayuu naʼakamüin na anoujashiikana, acheküsü shiiʼiyatünüin nümüin tü naaliinkat, ayatüinjatpajaʼa naaʼinrüin tü münakat nümüin wanaa sümaa nüchiaanüin. «Kalioʼulejeʼeya taya nutuma wayuu eekai lotuin nukuwaʼipa shia süka alin taya nüpüla. Nüchiaalejeʼeya taya, müsü aka saaʼin wanee seita oʼyotunaka saaʼu tekii, nnojoleerü tayouktajaain amaa», müshi David (Sal. 141:5, TNM). Süpüla wayaawatüin saaʼu tia, anashii wekirajaale sünain tüü: ittüle nuuʼui wanee wayuu suukalakai asha jee itta itta sümüle nüsaʼa sutuma tia, amaanamaatüinjachi nia pitaaruluʼumüin, nnojoire nümaanüin sümaʼanamüin tottoot, eeshi süpüla ouktüin nia. «Wachotooinjatü püsaʼa süpüla anainjachin pia», namüle na tottootkana nümüin, mojeerü naaʼin chia wayuukai sümaa alin nümüin tü aainjünajatkat nüka. Shiapejeʼe shipin tia süpüla nnojolinjachin ouktüin nia. Akaʼaya David, aisü nümüin nüchiaanaiwaʼaya, nütüjaapajaʼa saaʼu aneerüin nukuwaʼipa sutuma tia.

Eesü shiale choʼujaain nümüin wanee wayuu kaainjalakai nujuʼitinnüle naʼakajee na wawalayuukana, eeshi süpüla niyaawajaain naaʼin sutuma tia. Maʼaka poloo juya mapa süchikijee nujuʼitinnüin chi nüchonkai Julian, aleʼejüshi nia naʼakamüin na wawalayuukana, nuuʼulaain tü kasa mojusü naainjapuʼukat. Maaʼulu yaa, laülaashitchipa nia suluʼu tü outkajaaleekat. «Nnojoirejeʼe tojuʼitinnüin naʼakajee na wawalayuukana, nnojotsüjeʼe tatüjaain aaʼu mojuin maʼin tü alatakat tamüin. Shiaʼaya neʼe choʼujaaka tamüin tojuʼitinnüin», müshi chi nüchonkai Julian (Heb. 12:7-11).

Shiimain sünain nnojoluin anain naaʼin wanee wayuu müleka nujuʼitinnüle naʼakajee na anoujashiikana, eepejeʼe süpüla nüleʼejüin nüchikuaʼa mapa. Süpüla anainjatüin sukuwaʼipa tia, acheküshii waaʼinrüin tü aluwataanakalü anain waya.

Na laülaashiikana aipüraliinjana naya wayuu maʼaka naaʼin Jeʼwaa. Naainjüinjatü tia naküjüinjatpa nümüin wanee anoujashi sünain nujuʼitinnüinjachin naʼakajee na wawalayuukana. Yootuinjana naya nümaa süka anakalü akuwaʼipa, naküjüinjatü nümüin chia anoujashikai tü naaʼinrüinjatkat müleka nüleʼejeere nüchikuaʼa. Müleka jaʼyale naaʼu mapa sünain nüleʼejeein nüchikuaʼa, acheküshi nuwaraijaanüin aaʼu natuma na laülaashiikana soʼu wanee kaʼi. Naküjüinjatü nümüin tü naaʼinrüinjatkat müleka nüleʼejeere nünainmüin Jeʼwaa. *

Na wawalayuu kapüshikana chia wayuu ojuʼitinnakai, kojutüinjatü namüin tü naaʼinrakat na laülaashiikana, müle shia natuma neeʼiyatüin sünain alin na wawalayuukana napüla jee müshia chi wayuu ojuʼitinnakai. «Ayatshia alin tapüla chi tachonkai, nnojoitpajaʼa taya aleewapuʼuin nümaa süka nnojoluin anain tü naainjakat», müshi Julian.

Na wawalayuukana, nnojoishii naya aashajaainjanain nümaa chia wayuu ojuʼitinnakai, nnojoishi nasaküinjachin niayaʼasa. Müle shia natuma, neeʼiyateerü sünain alin nia napüla (1 Cor. 5:11; 2 Juan 10, 11). Naainjüle tia na wawalayuukana, niyaawateerü aaʼu chi wayuu ojuʼitinnakai nnojoluin emiʼijawaain tia aainjünakat nüka nutuma Jeʼwaa nakajee na laülaashiikana. Nnojoliinjanapejeʼe waya akayalaain noulia na wawalayuu kapüshikana chia wayuukai, nnojoishii nayain ojuʼitinnüin. Makalaka alinjanain naya wapüla jee wakaaliinjüinjana naya sünain tü choʼujaakat namüin, piʼrüinche mojuin maʼin naaʼin (Roma 12:13, 15).

«Makaʼa nujuʼitinnüin wanee wayuu naʼakajee na anoujashiikana shia süpüla watüjaainjatüin saaʼu kojutüinjatüin wamüin nünüiki Jeʼwaa. Mayaapejeʼe alin tia nümüin chi wayuu ojuʼitinnakai, anasü nukuwaʼipa sutuma mapa. Müleka nnojoire jamajachin nia tamüin jee tooʼulaale nia naainjüin tü naainjeekalü amüin, nnojoishijeʼe nia anoujain maaʼulu yaa», müshi Julian.