1. «Kürisüto nüpülainmaajachi Maleiwa», ¿jamüshi nümaka Pablo?

YAAIWAʼAYA Jesuu yaa Mmapaʼa, watta saalii kasa pülasü naainjaka. Suluʼusü tü Wiwüliakat süpüshuaʼa tia naainjakat, anasü waashajeʼerüle shia süpüla süchecheraain wanoula nünain Maleiwa (Mat. 9:35; Luc. 9:11). Makaʼa nuuntüin tia Jesuu shia süka naapüin Maleiwa nüpülain nümüin. «Kürisüto nüpülainmaajachi Maleiwa», müshijeseʼe nümüin Pablo (1 Cor. 1:24, TNM). ¿Kasa shikirajaka anain waya tü kasa pülasü naainjakat Jesuu?

2. ¿Kasa shikirajaka anain waya tü apünüinsükat kasa pülasü naainjaka Jesuu?

² Wainma tü watüjaakat aaʼu sutuma tü kasa pülasü naainjakat Jesuu (Aluw. 2:22). Nuluwataapeena soʼu tü miitkat juya, wainmeerü kasa pülasü naainjeetkat süpüla anainjatüin nakuwaʼipa na wayuu yaajeenakana yaa Mmapaʼa. Saaʼujee tü kasa pülasü naainjakat Jesuu, weʼraajeerü maʼin tü nukuwaʼipakat jee müsia nukuwaʼipa Jeʼwaa. Tü wekirajaainjatkalü anain jooluʼu shia tü apünüinsükat kasa pülasü  naainjaka Jesuu. Wekirajaainjatü anain tü waaʼinrüinjatkat süpüla washatüin nukuwaʼipa Jesuu maaʼulu yaa jee müsia watta kaʼi.

3. (1) ¿Kasa alataka suʼunnaa shikiira kasaalüü chaa Caná? (2) ¿Jamüsü naainjaka Jesuu tia kasa pülasükat napüleerua naya wayuukana?

³ Eejatüinkamaʼinka wanee miʼiraa shikiira kasaalüü chaa Caná. Nnojotsü eejatüin wiino süsüinjatkat wayuu suʼunnaa tia. Shiʼrüinjaʼa María choʼujaain tü wiinokot, arütkaasüjeseʼe shia nünainmüin Jesuu süpüla achuntaa kaaliinwaa nümüin, sütüjaa aaʼu pülain nia süka nüchoin nia Maleiwa (Luc. 1:30-32; 2:52). Wiinojaasü nutuma Jesuu tü wüin sulujutkat tü tünaashakat, 380 litro tia makat; shia saʼanasüinkaʼaya maʼin wiino tia. Palajatüyülia nukua Jesuu sünain aainjaa kasa pülasü suʼunnaa tia (paashajeʼera Juan 2:3, 6-11). Aisü wayuu nüpüla Jesuu müsüjeseʼe naainjüin tia kasa anasükat napüleerua naya wayuukana. Nüshatüin Jesuu nukuwaʼipa Jeʼwaa suluʼu nüsülajülin.

4, 5. (1) ¿Kasa shikirajaka anain waya wiinojaain tü wüinkat nutuma Jesuu? (2) ¿Kaseerü alataka Paʼaraiisüpa tü Mmakat?

⁴ Wiinojaasüinka nutuma Jesuu tü wüinkat, naainjüin tia süka naapüin Jeʼwaa pülaa nümüin. Tü shikirajakalü anain waya tia shia nüsülajülin Jeʼwaa jee aishii waya nüpüla, akaʼaya Jesuu müsia neʼe nukuwaʼipa. Akaweeria neʼe Paʼaraiisüpa tü Mmakat, watteerü saalii aʼttiee sümaʼana wayuu süpüshuaʼa (paashajeʼera Isaías 25:6).

⁵ Paʼaraiisüpa tü Mmakat, eejeerü wamaʼana kasa süpüshuaʼa. Kepieena waya, jouleerü eküülü wamaʼana. Talatashaatasü waaʼin jülüjawaipa waaʼin tia. Niainjachi Jeʼwaa aapaka wamüin tia.

6. (1) ¿Kasapülajachi naainjaka Jesuu kasa pülasü? (2) ¿Kasa waaʼinrüinjatka süpüla washatüinjatüin nukuwaʼipa Jesuu?

⁶ «Puluwataa türa ipakat shiiʼiranajaaiwa pan», müshi Satanaa nümüin Jesuu. Nnojoishi jaa müin Jesuu sümaa nünüiki Satanaa, süka jamüin, nnojoluin shiain jülüjüin naaʼin nukuwaʼipa nümüiwaʼa (Mat. 4:2-4). Aainjüshi Jesuu kasa pülasü süpüla nükaaliinjainjatüin tü wayuukalüirua. Akaataajaʼa wayakanaʼaya, wakaaliinjüinjatü tü wayuukalüirua naashin Jesuu (Luc. 6:38). Anashii weenajaale na wawalayuukana wepialuʼumüin süpüla nekaainjanain wamaa. «Tawala, süchikijee outkajawaakat, makata pia motsomüin süpüla paapajüin wanee pütchi tekirajüinjateetka anain», nümüle wanee wawala wamüin, anashii makatüle waya nümaa. Eeshi süpüla wakaaliinjain wanee wawala sünain aküjaa  pütchi müleka jekechiyüire nia sünain tia aʼyatawaakat. Waainjüle tia, washatüin nukuwaʼipa Jesuu.

7. ¿Kasa alataka maaʼulu sutuma niain aluwataain Satanaa?

⁷ Nnojotsü eiwaʼalajatüin wayuu sünain müliain, kakaliairü maʼin tia. «Ayateechia eein chi wayuu müliakai yaa mmapaʼa», müsüinka nünüiki Jeʼwaa namüin na israeliitakana (Deut. 15:11, TNM). «Na wayuu müliakana, eejeena jümaa waneepia», müsü nünüiki Jesuu kakalia mapa süchikijee tia (Mat. 26:11). Nnojoleena ayatüin müliain waneepia na wayuukana, eejeerü wanee kaʼi eere aneerüin wayuu süpüshuaʼa, maluʼulu tü nünüikikat Jesuu. Sutuma niain Satanaa aluwataain saaʼu mmakat maaʼulu yaa, ayateeria eein wayuu eekai müliain. Aneerüinjaʼa nukuwaʼipa wayuu Paʼaraiisüpa tü mmakat, jouleerü eküülü.

8, 9. (1) ¿Jamüsü wattajaaka saalii pan sümaa jime nutuma Jesuu? (2) ¿Jamüsü paaʼin sutuma tü naainjakat Jesuu?

⁸ Saashin tü Wiwüliakat, naapüin Jeʼwaa namüin na wayuukana süpüshuaʼa tü kasa choʼujaakat namüin (Sal. 145:16). Wanaa sümaa yaajachinkain Jesuu yaa Mmapaʼa, ayatüsiaʼaya naaʼinrüin tü naaʼinrakat chi Nüshikai, nükaaliinjain wayuu. Naaʼinrüin tia Jesuu süka alin naya nüpüla (paashajeʼera Mateo 14:14-21). Watta saalii wayuu akoʼuka nüchiirua Jesuu, antayaa müshii suluʼujee mma wattajee (Mat. 14:13). Aipoʼupa mmakat, mapüsajüsü maʼin tü wayuuirua aapajakat nünüiki Jesuu, ouktataashii joo naya jamü. «Anasü müleka püjütüleirua suʼunaiwa suluʼumüin tü pueulokalüirua nayalajaaiwa tü neküinjatkat», müsü nanüiki na nikirajüinkana nümüin Jesuu.

⁹ Watta saalii wayuu nikiraka Jesuu süka jaʼraisü pan jee piamasü neʼe jime. Naainjüin tia süka alin wayuu nüpüla jee jülüjüin naya naaʼin. Emirasü wayuu süpüshuaʼa nutuma jee apütaasü eküülü süchikijee tia. Katsüinjaasü naaʼin mapa sutuma tü nekakat, aleʼejüshiijeseʼe naya nepialuʼumüin süchikijee (Luc. 9:10-17). Akotchojünüsü tü napütaalakat, eetaasü maʼaka 12 cestas.

10. ¿Kaseerü naapaka Jeʼwaa sümüin wayuu soʼu palitchon kaʼi?

¹⁰ Makaʼa müliain maaʼulu yaa tü wayuukalüirua süpüshuaʼa shia sutuma tü kasa mojusü naainjakat na sülaülashiikana mma. Jaʼitakajeʼe neʼe noʼutku na wayuu aʼyataakana nümüin Jeʼwaa, müliashii naya süka eein palit eküülü namaʼana. Soʼu palit kaʼi, naapeerü Jeʼwaa süpüshuaʼa tü kasa choʼujaakat sümüin wayuu. Najaʼttirüinjatü süpüshuaʼa tü kasa mojusükat (paashajeʼera Salmo 72:16). Na wayuu oonookana nümaa Jeʼwaa maaʼulu yaa, aneerü joo nakuwaʼipa.

11. (1) ¿Jamüsü watüjaaka saaʼu aneerüin sukuwaʼipa wayuu nutuma Jesuu? (2) ¿Kasa paainjeeka amüin anapa tü mmapaʼakat nutuma Jesuu?

¹¹ Soʼu yaajachinkain Jesuu yaa Mmapaʼa, wainma kasa pülasü naainjaka (Mat. 15:24). Akaataajaʼa nuluwataapeena soʼu miit juya, anashaateerü tü Mmapaʼakat nutuma (Sal. 72:8). Watta saalin kasa pülasü naainjaka Jesuu yaaiwaʼaya nia yaa mmapaʼa, weʼitaashaatain waaʼin sünain naainjeerüin shia süchikuaʼa soʼu palit kaʼi. Sutuma tia, wakaaliinjain wayuu süpüla anainjatüin sukuwaʼipa (Sal. 45:1; 49:3). Tü  waaʼinrüinjatkat shia wekirajüinjanain na wayuukana sünain tü pütchi anasü suluʼukat tü Wiwüliakat. Shia waʼyataainkaʼaya maʼin tia (Roma 1:14, 15).

12. Nütüjaa aaʼu Jesuu sukuwaʼipa sukumajia tü Mmakat, ¿jamüsü watüjaaka saaʼu tia?

¹² Wanaa sümaa nuʼttüin Jeʼwaa sünain aainjaa tü Mmakat, eejachi Jesuu nümaa sünain akaaliinjaa nia sünain akumajaa tü kasakat süpüshuaʼa (Prov. 8:22, 30, 31; Col. 1:15-17). Nütüjaa aaʼu Jesuu jamüin sukuwaʼipa sukumajia tü Mmakat. Nuuntüin süpüla niimaleʼerüin tü jouktaikat jee tü palaakat.

13, 14. ¿Jamüsü watüjaaka saaʼu pülain Jesuu?

¹³ Sutuma naapüin Maleiwa pülaa nümüin Jesuu, nüchiaainka wanee wawai katsüinshaatasü (paashajeʼera Marcos 4:37-39). Naashin wanee wayuu ekirajaakai sünain sukuwaʼipa tia makat, tü wawai eejatkat soʼu kaʼikat tia, eesüjaʼa süpüla katsüinshaatain maʼin shia, eesüjaʼa süpüla sirumashaatain tü mmapaʼakat jee sütüttashaatain tü juyakat. Jee müshia Mateo, nüküjüin süchiki tia wawaikat (Mat. 8:24).

¹⁴ Keemashaatasü maʼin tia alatakat suʼunnaa tia. Tü sümünakat palaa, sütsaajashaatain tü anua kalujunakat naya wayuukana. Epirajüsü wüin tü anuakat, koʼlotüinshaatasü tü wawaikat, seetaa, chaataa majüsü neʼe tü anuakat sutuma. Eeyaai neʼe nütüjaain aaʼu Jesuu tü alatakat, atunkashaatashi nia sutuma mapüsain maʼin nia. Ayoʼujaashaatasü naaʼin na nikirajüinkana suʼunnaa tia, nachijirüinjeseʼe nia süka neʼrüin ouktaaka nooʼomüin (Mat. 8:25). «Nüshaʼwalaakalaka Jesús sünain nüchiajaain tü wawaikat ‹Jimata pia›, nümakalaka sümüin» (Mar. 4:39). Ejimalaa müsia joo tia sutuma nünüiki. Nuuntüin Jesuu niimaleʼerüin tia wawaikat sutuma pülain nia.

15. ¿Kasa naainjaka Jeʼwaa süpüla jaʼyainjatüin naaʼu pülain maʼin nia?

¹⁵ Makaʼa niimaleʼerüin Jesuu tü wawaikat shia süka nüpülainmaajachin nia Jeʼwaa. Mapüleesat nümüin Jeʼwaa niimaleʼerüin tü wawaikat. «Akaratshipa kaʼi, aʼiteerü wane juya miyoʼushaata maʼi tatüma sainküin mmakat süpüshua. Wataaweerü kaʼi je saʼwai soʼu pienchi shikii kaʼi sünain aʼitaa», shia nünüikikat Jeʼwaa tia süpülapünaa niʼitirüin wanee juya miyoʼushaata (Gén. 7:4). Paala sümaiwa, ojutajaasüinka pasanainpünaa sünain tü palaakat nutuma Maleiwa. Nüntirüin wanee jouktai wüinpejeekuat süpüla naainjüin tia (Éx. 14:21). Eejatüinka wanee juya miyoʼushaata jee wawaimaasü chaa pasanain sünain tü palaakat. Nia katumaka Maleiwa (Jon. 1:4). Anashaateerü Paʼaraiisüpa tü Mmakat, nüchiajaajeerü Maleiwa tü wawaikat jee nnojoleerü jashichin tü palaakat.

16. ¿Jamüshii nnojoleenaka waya mmoluin nuluwataapeena Jesuu saaʼu Mmakat?

¹⁶ Nuluwataapeena Jesuu saaʼu tü Mmakat, nnojoleena waya mmoluin. Nnojoleerü alatüin kasa mojusü wamüin süka nnojoleerüin juʼrakan, tsunami, volcán jee nnojoleerü akutkujaain tü Mmakat. Nükaaliinjeenaʼaya waya Jeʼwaa. Shiimainshaata nükaaliinjeerüin Jeʼwaa tü wayuukalüirua (Alat. Map. 21:3, 4). Naaʼinmajeena waya Jesuu suulia sülanaʼalüin kasa mojusü  wamüin süka naapüin Jeʼwaa pülaa nümüin.

17. ¿Kasa waaʼinrüinjatka süpüla washatüin nukuwaʼipa Jeʼwaa nümaa Jesuu?

¹⁷ Süpüla washatüinjatüin nukuwaʼipa Maleiwa nümaa Jesuu, wakaaliinjüinjana na wawalayuukana (paashajeʼera Proverbios 3:27). Wakaaliinjüinjana na wawalayuukana neʼrapa namüliala otta watütüleʼerüinjatü naaʼin (Prov. 17:17). Wakaaliinjüinjana naya sujuʼichajaale nepia sutuma wawai. Majatüinka wanee wawala oukta aʼwayuuset, ajaʼttaleesia shipia sutuma wanee juʼrakan. Naapapa na wawalayuukana süchiki tü alatakat sümüin tia wawalakat, awataamaatüshii naya sünain akumajaa shipia tü wawalakat. Talatashaatasü saaʼin tü wawalakat süka natütüleʼerüin saaʼin süka tü sümakat tü Wiwüliakat. Saashin shiakat, talatashaatasü saaʼin süka süküjülüin pütchi nüchiki Jeʼwaa. Majatüinkaʼaya wanee wawala maʼwayuusesat, ajaʼttüsü shipia sutuma wawai, nakumajamaatüin na wawalayuukana tü shipiakat. Miyoʼu maʼin tü talataa eejatkat suluʼu saaʼin tia wawalakat. «Anashaatasü süka pükaaliinjain taya Jeʼwaa», sümaka nümüin Maleiwa. Anataʼaleeshiijaʼa waya süka eein waʼaka na wawalayuu akaaliinjüliikana. Talatashaatasü waaʼin nümaa Jeʼwaa süka naaʼinmajüin waya, akaʼaya neʼe nümüin Jesuʼuya.

18. ¿Jamüshi naainjaka kasa pülasü Jesuu süpüleerua wayuu? ¿Jamüsü ponoko paaʼin tia?

¹⁸ Soʼu yaajachinkain Jesuu yaa mmapaʼa, jaʼyasü naaʼu nüpülainmaajachin Maleiwa nia. Aisü wayuu nüpüla Jesuu müsüjeseʼe naainjain kasa pülasü napüleerua. Tia shia tü wekirajaajeetkat anain sünain tü wanee ekirajaayakat.