1. ¿Kasa wekirajaka anain na wayuukana waashajeʼerapa namüin Mateo 6:9-13?

WATTA SAALII wayuu atüjaaka saaʼu tü pütchi sümakat Mateo 6:9-13. Wayakana aküjüliikana pütchi nüchiki Jeʼwaa, wekirajawalin na wayuukana sünain tia nümakat Jesuu suluʼu karalouktaka Mateo. «Aluwataajeechi joo chi Maleiwakai saaʼu tü Mmakat jee anashaateerü shia nutuma», maʼwaisü wanüiki sümüin wayuu waashajeʼerapa tü pütchi «püntira tü puluwataayakat» makat. Weeʼiyatüin namüin tü nünüliakat Maleiwa shiimainsükat, wekirajüin naya sünain kojutüinjachin namüin Jeʼwaa süka niain chi Maleiwa wulekai akuwaʼipa. Waküjüin tia namüin waashajeʼerapa tü pütchi «wule putuma tü pünüliakat» makat (Mat. 6:9, TNM, noota).

2. ¿Jamüsü nnojoluinjatka weiteʼerakuʼu wamüinjatüin wanüiki woʼuraajapa?

² Eesü wayuu eiteʼerakuʼu maka sünüiki suʼuraajapa nümüin Maleiwa. Nnojotpajaʼa müinjatüin sukuwaʼipa tia naashin Jesuu. «Puʼuraajapa nümüin Maleiwa, nnojotsü piiteʼerakuʼu pümüinjatüin tü pünüikikat», müshinka nia (Mat. 6:7, TNM). Nikirajüinka Jesuu sünain oʼuraajaa na nikirajüinkana, nnojotpajaʼa ayatashaatain nünüiki maʼaka saaʼin tü palajatkat sukua  nutuma (Luc. 11:1-4, TNM). Tü nikirajeekalü anain waya Jesuu shia watüjaainjatüin saaʼu tü alanaʼaleekat süpüla wachuntüin nümüin Maleiwa.

3. ¿Jarat tü pütchi püsakireʼerüinjatkalü anain?

³ Sünain ekirajaayakat tüü, wekirajaajeerü anain tü waaʼinrüinjatkat woʼuraajapa naashin Jesuu. Wekirajaajeerü anain tiaʼaya sünain tü wanee ekirajaayakat. Sümaʼinruʼu pikirajaain sünain tia, anasü püsakireʼerüle paaʼin sünain pütchikat tüü: «¿Jamüshi tatüjeechika maʼin oʼuraajaa taaʼinrüle tü nümakat Jesuu? ¿Teʼitaainche suluʼu takuwaʼipa tü nümakat Jesuu?».

4. (1) ¿Jamaluʼulu nünüiki Jesuu wanaa sümaa «Taata Maleiwa» nümüin? (2) ¿Jamüshii nüchonniika Maleiwa na yaainjanakana kepiain yaa mmapaʼa?

⁴ «Taata Maleiwa», müsü nünüiki Jesuu nuʼttaiwaʼaya sünain oʼuraajaa. Tü nikirajeekalü anain Jesuu, shia niain Jeʼwaa süshin wayuu süpüshuaʼa (1 Ped. 2:17). Eeshii waneeinnua wayuu nüneekaka Jeʼwaa süpüla chainjanain naya chaa iipünaa. Chi nashikai naya wayuukana nia Jeʼwaa (Roma 8:15-17). Akaʼaya na yaainjanakana kepiain yaa mmapaʼa, nüchoin naya Jeʼwaa, süka jamüin, naapüin Jeʼwaa kataa oʼu namüin jee müsia naapüin namüin süpüshuaʼa tü kasa choʼujaakat namüin. Akaataajaʼa noʼtteʼennapa süchikijee tü miitkat juya, nüchoinjeena naya Jeʼwaa (Roma 8:21; Alat. Map. 20:7, 8).

5, 6. (1) ¿Kasa nekirajüinjanaka anain nachonnii na wayuu kachonshiikana? (2) ¿Kasa naainjüinjatka na tepichikana waneʼewai nakua? (Piirakaa sümüin tü ayaakuaa suluʼukat süpana 23.)

⁵ Jüküja namüin na jüchonniikana niain Jeʼwaa nashin, pikiraja naya sünain tü nanüikinjatkat noʼuraajapa nümüin. Naashin wanee wawala, oʼuraajapuʼushi nia aipaʼa sümaa tü nüchoinkalüirua. Chia wawalakai, alapalaawaishi nia naaʼu na wawalayuukana chaa Sudáfrica. Saashin tia tepichikalüirua, anasü naaʼin sutuma tü nünüikikat chi nashikai nuʼuraajapa, shia sotoʼoleekaʼaya naaʼin tia. Oʼuraajawaishii na tepichikana nuʼupala chi nashikai süpüla nütüjaain saaʼu tü suluʼukat naaʼin na nüchonniikana. Müsü sukuwaʼipa nutuma süpüla nükaaliinjüinjanain naya süpüla anaʼleeinjatüin nanüiki nümüin Jeʼwaa noʼuraajapa.

⁶ Kakalia mapa, aishaatashi Jeʼwaa napüla naya tepichikana. Miyoʼuyuuinnapa naya maaʼulu yaa, kaʼwayuusejüinnapa jee aʼyataashii naya waneepia nümüin Jeʼwaa. Na wayuu kachonniikana, nekirajüinjana nachonnii sünain shiimain eein Maleiwa jee naʼaleewajaainjanain nümaa. Nayainjanapajaʼa na tepichikana aaʼinmajüin nakuwaʼipa nümaa Jeʼwaa (Sal. 5:11, 12; 91:14).

7. (1) ¿Kasa talataka atuma waaʼin wayakana aküjüliikana pütchi? (2) ¿Kasa wachuntüinjatka nümüin Maleiwa?

⁷ Talatashaatasü waaʼin wayakana aküjüliikana pütchi nüchiki Jeʼwaa süka watüjaain saaʼu kasaichin nünülia Maleiwa (Aluw. 15:14, TNM; Is. 43:10). «Wule putuma tü pünüliakat» müinjatü wanüiki naashin Jesuu woʼuraajapa nümüin Jeʼwaa. Wachuntüinjatü nümüin Jeʼwaa süpüla kojutüinjachin nia wamüin sükajee wanüiki jee sükajee tü kasa waaʼinrakat. Sümaiwa paala, eepuʼushii waneeinnua anoujashii nnojoliikana eʼitaain suluʼu nakuwaʼipa tü nekirajakalü anain wayuu. Nnojotsü müinjatüin wakuwaʼipa. Naashin Pablo, wainma neʼe pütchi nüliajatka Maleiwa sutuma müin naainjala naya wayuukana (Roma 2:21-24).

8, 9. ¿Kasa shiʼraka wanee wawala sutuma kaaliin shia nüpüla Jeʼwaa?

 ⁸ Wachajaainya sukuwaʼipa weinshi süpüla ayatüinjachin kojutüin wamüin Jeʼwaa. Saaʼinrüin tia wanee wawala chejeʼewatkat Noruega, ouktüshi chi suʼwayuusekai, niaka neʼe eeʼeraain sümaa wanee süchonchon. Anuu sünüiki tü wawalakat: «Mojushaatasü taaʼin saaliijee tia alatakat tamüin, tachuntapajaʼa nümüin Maleiwa weinshi nükatsüinrüinjatüin taaʼin süpüla nnojoluinjatüin miyoʼuleein tü mojuu eejatkat suluʼu taaʼin. ‹Pükaaliinja maa taya süpüla ayatüinjachin kojutüin pia tamüin›, maʼwaisü taya nümüin Jeʼwaa. Nnojotsü keeʼireein taaʼin meeʼerapalainjachin Jeʼwaa nutuma Satanaa saaʼujee wanee kasa mojusü taainjaka. Keeʼireesü taaʼin niʼrüinjachin chi tachonkai chi nüshikai süsoʼiraapa naaʼin suluʼu tü Paʼaraiisükat» (Prov. 27:11).

⁹ Kojutüshi maʼin Jeʼwaa sümüin tia wawalakat. Müsüjeseʼe Kaaliin shia nüpüla. Nütütüleʼerüin saaʼin nakajee na wawalayuukana, shiasaʼa sutuma tia, süchecherüin saaʼin otta anasü sukuwaʼipa sünain tü kasa saainjakat. Jaʼrai juya süchikijee tia, kasaatsü tü wawalakat nümaa wanee laülaashi. Woutiisaichipa süchon tü wawalakat jee piamairü shikii nuuyase. «Talatashaatasü taaʼin sutuma nükaaliinjain taya chi taʼwayuusekai sünain epijaa chi tachonkai», müsü sünüiki.

10. ¿Kaseerü naainjaka Jeʼwaa süpüla wuleinjatüin nutuma tü nünüliakat?

¹⁰ Wuleerü nünülia Jeʼwaa najaʼlajeʼerapa napüshuaʼa na ayouktakana nia jee na nnojoliikana acheküin nia süpüla niainjachin aluwataain naaʼu (paashajeʼera Ezequiel 38:22, 23). Süchikijee tia, kateerü noʼu na wayuukana süpüla kaʼikat süpüshuaʼa. Naʼwaajeechi Jeʼwaa napüshuaʼa na yaainjanakana kepiain yaa Mmapaʼa jee na chainjanakana chaa iipünaa jee müshia kojuteechi nia namüin. Nieechikalaka laülaain Jeʼwaa saaʼu kasakat süpüshuaʼa (1 Cor. 15:28).

11, 12. ¿Kasa naainjaka Jeʼwaa soʼu juyakat 1876?

¹¹ Süpülapünaa nuʼunüinjachin Jesuu chaa iipünaa, asakinnüshi nia natuma na nikirajüinkana joujeerüin süntüin tü Nuluwataayakat Maleiwa. «Nnojotsü aapüna ekii jümüin süpüla jütüjaainjatüin saaʼu joujainjatüin sülatüin tüü», müshi Jesuu namüin. Tü nuluwataakalü anain naya Jesuu shia naaʼinmaainjatüin tü aküjaakat pütchi (paashajeʼera Aluwataaushikana 1:6-8). Nuluwataain naya sünain achuntaa nümüin Maleiwa süpüla süntamaatüinjatüin tü Nuluwataayakat. Nuluwataain naya süpüla jülüjüinjatüin naaʼin tü kaʼi süntajatkalü oʼu. «Püntira tü puluwataayakat», müshiijeseʼe wamüin nümüin Jeʼwaa.

¹² Oʼttüshi Jesuu sünain aluwatawaa soʼu juyakat 1914, natüjaa aaʼu na aküjüliikana pütchi tia süka nükaaliinjain naya Jeʼwaa sünain ayaawataa saaʼu. Natüjaa aaʼu tia soʼujee juyakat 1876 soʼu nüshajüin chi wawalakai Russell wanee pütchi makat mayaa: «¿Cuándo terminan los tiempos de los gentiles?». Tü «akaratshi kaʼi» aküjünakat suluʼu Daniel, shiaʼaya neʼe nümaka Jesuu süchiki «tü kaʼi aapünakat namüin [na gentiilekana] nütüma Maleiwa süpüla aluwatawaa» (Dan. 4:16, TNM; Luc. 21:24). Saashin tia pütchikat, ooʼulaainjana na gentiilekana suulia aluwatawaa suʼttaiwaʼaya tü juyakat 1914. *

13. (1) ¿Kasa alataka soʼujee juyakat 1914? (2) ¿Kasa atüjaanaka aaʼu sutuma tü alatakat soʼujee 1914?

 ¹³ Watta saalii wayuu ouktaka sutuma jamü suʼunnaa wanee atkawaa eejatkat sainküin mmakat süpüshuaʼa. Oʼttüsü tia atkawaakat soʼujee juyakat 1914. Soʼujee juyakat 1918, antüsü wanee shunui aishaatasü maʼin, watta saalii wayuu ouktaka sutuma. Shiaʼaya maʼin alatajatka tia naashin Jesuu (Mat. 24:3-8; Luc. 21:10, 11). Sükajee tia alatakat, atüjaana aaʼu sünain nuʼttüin Jesuu sünain aluwatawaa chaa iipünaa, oʼttüshi nia soʼujee juyakat 1914. Soʼujee juyakat tia, atkaashi nia «maa aka naaʼin wane surulaat eekai nüshutüinjachin saaʼu nüʼünüü süpüla nüyamülüinjatüin» (Alat. Map. 6:1, 2). Nujutüin Jesuu yaa Mmapaʼamüin Satanaa namaʼaleʼeya na yolujaakana. Müsüjeseʼe shikeraajüin tü pütchi makat yaa: «Jia kepiakana sainküin mmakat süpüshuaʼale, müleʼo maʼi tü müliaa jiʼreetkat, süka nujutünüichipain chi Yolujaakai jaʼakamüin. Je jashichishaatashi maʼi nia, süka nütüjaain saaʼu sünain sülüʼülüin nükalia süpüla ataʼünnaa» (Alat. Map. 12:7-12).

14. (1) ¿Jamüsü choʼujaaka «püntira tü puluwataayakat» wamüinjanain nümüin Jeʼwaa? (2) ¿Kasa ayatüinjatka waaʼinrüin maaʼulu yaa?

¹⁴ ¿Jamüsü sülataka watta saalii kasa mojusü suʼunnaa nuʼttüin Jesuu sünain aluwatawaa? Süküjüin tia Alateetkat Mapeena kapiitulo 12. Aluwataashi Jesuu maaʼulu yaa chaa iipünaa, Satanaa aluwataashi nia yaa Mmapaʼa. Soʼu palit kaʼi, najaʼlajeʼereerü Jesuu tü kasa mojusü eekat yaa mmapaʼa jee najaʼttireena na nüʼünüükana. Woʼuraajapa nümüin Jeʼwaa, «püntira tü puluwataayakat» müinjana waya nümüin. Sümaʼinruʼu shikeraajüin tia, ayataʼaya waya sünain waküjüin tü pütchi anasükat  süchiki Nuluwataaya Maleiwa. Ekeraajüsü tü nümakat Jesuu wanaa sümaa nümüin: «Aküjüneerü sainküin mmakat süpüshua süpüla saapünüinjatüin sütüma wayuu süpüshua. Je kettaapa shia, anteerü sükalia sajaʼlajaainjatkat oʼu tü kasakat süpüshua» (Mat. 24:14).

15, 16. «Saainjüna tü keeʼireekat paaʼin yaa mmapaʼa», ¿müinjanache neʼe waya nümüin Maleiwa? ¿Eetaapa wanee kasa waaʼinrajatka?

¹⁵ Aainjünapuʼusü tü keeʼireekat naaʼin Jeʼwaa yaa Mmapaʼa sümaiwa paala, alatüirü maʼaka 6.000 juya süchikijee tia. Müsüjeseʼe anain maʼin shia naashin Maleiwa (Gén. 1:31). Shiasaʼa mapa, eʼrüijaashi wayumüin Satanaa nümüin Maleiwa, müsüjeseʼe mojuin tü mmapaʼakat, süka jamüin, niʼikeʼerüin wayuu süpüshuaʼa sünain kasa mojusü süpüla nnojoluinjatüin naaʼinrüin tü keeʼireekat naaʼin Maleiwa. Eepejeʼe wayuu aaʼinrakana tü keeʼireekat naaʼin Maleiwa maaʼulu yaa, alatüshii suulia oocho miyoone. Naya makana, naaʼinrüin tü keeʼireekat naaʼin Jeʼwaa, nnojotsü nachuntüin neʼe shia. Akaʼaya naya, nekirajüin wayuu sünain tü saaʼinrajatkat Nuluwataaya Maleiwa.

¹⁶ Wekirajaa sünain tü saaʼinrakat wanee misioneera chakat kepiain África, woutiisasü shia soʼu tü juyakat 1948. Maaʼulu yaa, 80 suuyase tia wawalakat. Anuu sünüiki: «Tachuntüin nümüin Jeʼwaa nükaaliinjaiwa tü wayuu ekirajaweekat nüchiki maaʼulu yaa. Taküjüinjatpa pütchi sümüin wanee wayuu, tachuntüin nümüin Jeʼwaa naapaiwa tamüin tü nütchinkat süpüla saapaainjatüin sümaa tü tamakat sümüin. Tachuntüin nümüin Jeʼwaa nükaaliinjüinjanain waya süpüla waaʼinmajüin na ekirajaakana sünain tü Wiwüliakat». Watta saalii wayuu anoujakana nünain Jeʼwaa sutuma wawalakat tia. Eeshiijaʼa süpüla piʼraajüin waneeinnua wawalayuu aaʼinrakana tü keeʼireekat naaʼin Jeʼwaa süka süpüshuaʼa naaʼin (paashajeʼera Filipos 2:17).

17. ¿Kaseerü naainjaka Jeʼwaa soʼu palit kaʼi?

¹⁷ Wayakana aʼyataakana nümüin Jeʼwaa, ayateenaʼaya waya achuntüin saainjünüinjatüin tü keeʼireekat naaʼin Jeʼwaa yaa Mmapaʼa najaʼlajeʼeraleepaʼaya na nüʼünüükana. Süchikijee tia, paʼaraiiseerü tü Mmakat jee asoʼiraajeerü naaʼin na ouktüshiikana. «Soʼuweena wane kaʼi, saapeerü tanüiki süpüshua tü wayuu ouktüsükalüirua sümaa sujuitteerüin mmaapüjee», müshi Jesuu (Juan 5:28, 29). Talatashaateerü waaʼin weʼrapa nasoʼiraain naaʼin na wapüshikana. «Müiria nnojolüin ouktaa» naashin Maleiwa (Alat. Map. 21:4). Asoʼiraajeerü saaʼin wayuu «eekai saaʼinrüin tü anasükat otta türa eekai saaʼinrüin tü mojusükat». Na wayuu asoʼiraainjanakana aaʼin sümaa naaʼinrapuʼuin tü mojusükat, naya na nnojoliikana ekirajünüin nünain Jeʼwaa jee nünain Jesuu. Wekirajeena naya sünain aaʼinraa tü keeʼireekat naaʼin Maleiwa süpüla katüinjatüin noʼu süpüla kaʼikat süpüshuaʼa (Aluw. 24:15; Juan 17:3, TNM).

18. ¿Kasa tü aneetkalü atuma sukuwaʼipa wayuu?

¹⁸ Soʼu palit kaʼi, nikeraajeerü Jeʼwaa tü apünüinsükat kasa nikirajaka anain Jesuu süpüla woʼuraajüinjanain nümüin Maleiwa. Soʼu palit kaʼi, nüntireerü Maleiwa tü Nuluwataayakat, wuleerü nutuma tü nünüliakat jee suʼwaajeechi nia wayuu süpüshuaʼa. Sükajee tia, naapeerü Maleiwa tü aneetkalü atuma sukuwaʼipa wayuu. Sünain tü wanee ekirajaayakat, wekirajaajeerü anain süpüshi tü waaʼinrajatkat woʼuraajapa nümüin Jeʼwaa.