Anuu nünüiki Paul, wayuu kaʼwayuuseshi chia jee piamashii nüchonnii: «Sutuma maliajaain tü nneetkat chaa toumainpaʼa, apaliʼirajüsü tü eküütkat sümaa kojutüin maʼin shia. Eeshi taainjapuʼule wanee koola miyoʼushaata süpüla tayaʼlajüinjachin eküülü. Shiasaʼa tekerotapa, eesü nnojorüle eküülü tapüla. Watta naalii wayuu oʼuchichajaakana sutuma jamü otta eeshii eekai jiipüin neʼe. Maliasat tü nneetkat otta ayalejaasü sülia tü kasakalüirua. Watta saalii miyoone oʼunaka sünain palitchon eküülü. Emeʼraanaa aaʼu tü nneerü tanaajaakat suluʼu banco, tü seguro eejatkat tamaʼana jee müsia tü pensiónkat».

Nütüjaa aaʼu Paul nüchajaainjatüin sukuwaʼipa süpüla naapüinjatüin tü choʼujaakat sümüin nüpüshi (Proverbios 3:21). Müshi Paul: «Aʼyataai taya sünain anaataa luusa. Tachajaaka aʼyatawaa ‹jaʼitairü paliʼirüin takanain, aʼyataajeechi taya›, maa müshi taya. Eeshii wayuu eekai naapapuʼuin eküülü tamüin saaʼu taʼyataain jee shiale naapüin tamüin wanee kasa choʼujaaka tamüin piichipaʼa. Saapünapuʼule pienchisü jabón tamüin, toikkapuʼuin piamasü. Tayaʼlajüinka 40 kaliinachein süpüla tepijüin shia. Shiasaʼa miyoʼupa shiairua, toikküin, tayaʼlajakaʼa 300 kaliinachein shiiʼiraka. Soʼu wanee kaʼi, taʼwanajaain 50 kaliina saaʼu 100 kiilo ariina. Kakalia wapüla tü ariinakat otta wekiraain shia sümaa waneeirua wayuu».

Niyaawata aaʼu Paul shiain anain niʼitaale naaʼin wayuu nünain Maleiwa. Nükaaliinjain waya Maleiwa woonoole sümaa nünüiki. Nnojotsü shapaainjatüin waaʼin sutuma tü kasa wepijaainjatkalü aaʼu naashin Jesuu. «Soto jaaʼin sünain nütüjaain saaʼu chi Jüshikai Maleiwa tü cheʼojaakat jümüin», müshinka Jesuu (Lucas 12:29-31).

Niʼikeʼerapajaʼa wayuu Satanaa. Naashin niakai, shia choʼujaʼaleeka sümüin wayuu wainmainjatüin korolo sümaʼana. Wainma na oonookana sümaa naʼalain Satanaa. Watta naalii na wayuu shapaakana aaʼin sutuma naʼyataain maʼin süpüleerua ayaʼlajaa  kasairua nnojotka choʼujaain namüin. Eeshii na aʼanapajitkana wainma nneerü süpüleerua tia. Saashin tü Wiwüliakat, «chi wayuu kojuyaalakai nüchepchiashi nia chi aʼanapirakai nia nneerü» (Proverbios 22:7, TNM).

Eeshii wayuu eekai nnojoluin anain tü naneekakat saaʼujee shapaain maʼin naaʼin. Anuujeseʼe nünüiki Paul: «Watta naaliin na wayuu oʼunakana suluʼu wanee mma shiiʼiree aʼyatawaa. Maapujuupajaʼa aʼyatawaa namüin sutuma makaralouksein naya. Ounjulaakuʼu müshii naya suulia tü pulusiiakat otta eeshii natunküle kaayeruʼu. Oʼunajaashii naya sutuma nnojoluin neʼitaain naaʼin nünain Maleiwa. Aluʼujasaʼa wayakana, makatüshii waya yaa woumainpaʼa otta weʼitaain waaʼin nünain Maleiwa süpüla eejiraain waya sümaa tü alatakat wamüin».

Anuu sooʼomüin nünüiki Paul: «Naashin Jesuu, nnojotsü anain washapataale aaʼin saaʼu tü alateetkat waneemüin kaʼi, süka wainmeerüin tü kasa jülüjüinjatkat waaʼin waneemüin kaʼi. ‹Nnojotsü anain jushapataale aaʼin saaʼu kasa wainma maaʼulu yaa›, müshi Jesuu. Müshijeseʼe tachuntawalin nümüin Maleiwa süpüla naapüin wamüin ‹weküin süpüla waneʼewai kaʼi›. Naapüin Maleiwa wamüin weinshi tü kasa choʼujaakat wamüin. Eepajaʼa kaʼi nnojotkalü weküin oʼu tü keejiakat wamüin. Aainjüshinka taya koola süpüla ayaʼlajaa eküülü, yogur neʼe tü oikkaanakat suluʼu tü tientakat. Meejiasat tamüin tü yogurkat. Wekapajaʼa shia soʼu aikat tia. Taapashaatain analuʼut nümüin Maleiwa saaʼu nnojoluin sülatirüin jamü tapüshi, keküinshii waya waneepia nutuma». *

»Anainnapa waya maaʼulu yaa. Jee müsia, watüjaaitpa aaʼu shiain anain weʼitaale waaʼin nünain Jeʼwaa * süpüla nnojoluinjatüin shapaain waaʼin. Nükaaliinjeena waya Jeʼwaa waaʼinrüle tü keeʼireekat naaʼin. Shiimain tü sümakat Salmo 34:8: ‹Jiyaawata saaʼu süka jukuwaʼipa jümüiwaʼa anain Jeʼwaa; anataʼaleeshijaʼa maʼin chi wayuu [...] eʼitaakai naaʼin nünain›, müsün. Maliajaale süchikuaʼa tü nneetkat yaa woumainpaʼa, nnojoleerü shapaain waaʼin saaʼujee tia.

»Shia neʼe choʼujaaka nümüin wanee wayuu niküinjachin süpüla nnojoluinjachin ouktüin nia. Müsüjeseʼe keeʼireein waaʼin shikeraajüin pütchikat tüü: ‹Wainmeerü süchon tü apünajuushikat saaʼu tü mmakat›. Sümaʼinruʼu shikeraajüin tia, talateeshii waya eere wamaʼana tü weküinjatkat jee tü washeʼinjatkat. Anuu sünüiki tü Wiwüliakat: ‹Anakaja müleka nnojoliire keeʼireein jaaʼin washirüü. Shia anaka aluʼu müleka talatüle neʼe jaaʼin waneʼewai jukua sümaa tü eekai eein jümaʼana, sükajee nümüin wamüin chi Maleiwakai: Nnojoleechi taya oʼunüin jümaʼanajee. Nnojoleena tapütüin jia jümüiwa›. * Shiimain maʼin sütütüleʼerüin waaʼin pütchikat tüü.»

Kanoulainjachi maʼin wanee wayuu süpüla niainjachin Maleiwa oʼuniraka nukuwaʼipa. Tia shia tü naainjakat Paul sümaa nüpüshi (Génesis 6:9). Wainma kasa eeka süpüla watüjüin sünainjee tü nakuwaʼipakat. Müliale waya sutuma alin maʼin shiiʼiree tü nneetkat, jülüjeesü waaʼin tü naainjakat Paul.

¿Jama shapaale waaʼin saaʼu wapüshi? ¿Kasa waaʼinrajatka?