1, 2. ¿Kasa naʼatapajawaika na aʼyataaliikana nümüin Jeʼwaa?

WANAA SÜMAA nüküjüin Jeʼwaa süchiki wanee kasa naainjüinjatka, naʼatapajüin maʼin na aʼyataashiikana nümüin shikeraajüin tia. Jamüshijaʼa Jeremías nüküjüin sajaʼttinnüinjatüin Judá sutuma Babilonia. Ekeraajüsü tia soʼu juyakat 607 süpülapünaa wakalia (Jer. 25:8-11). Akaataajaʼa Isaías, nüküjüin sünain taashinjanain na judíokana Babiloniajee nutuma Jeʼwaa sümaa naleʼejüinjanain noumainpaʼa nachikuaʼa. Müshijeseʼe nümüin Isaías: «Anataʼaleeshiijaʼa na aʼatapajakana shikeraajüin tü nümakat Maleiwa» (Is. 30:18, TNM). Nütüjaa aaʼu Miqueas sünain nikeraajüinjatüin Maleiwa süpüshuaʼa tü nümatüjütkalia. «Eejeerü taaʼin sünain tü nümakat Jeʼwaa», müshi nia süchiki tia (Miq. 7:7, TNM). Jee müsia kakalia maʼin naʼatapajüin na aʼyataaliikana nümüin Maleiwa niweetüinjachin chi Mesíaskai (Luc. 3:15; 1 Ped. 1:10-12). *

² Akaʼaya wayakana, waʼatapajüin maʼin shikeraajüin tü nümakat Maleiwa süchiki tü Nuluwataayakat. Nia aluwataainjachikai Jesuu saaʼu Nuluwataaya Maleiwa jee niainjachi ajaʼlajeʼeraka tü wayuu mojulaasükalüirua  süntapa sükalia süpüla sajaʼttinnüin tü kasakat süpüshuaʼa. Nüsünneʼereerü woulia tü müliakalü atuma waaʼin (1 Juan 5:19). Eejüinjatü maʼin waaʼin süka nnojoluin watüjaain aaʼu joujeerüin tia kaʼikat.

3. ¿Kasa eeka süpüla sülatüin namüin na kakaliainnakana sünain aʼatapajaa sajaʼttinnüin tü kasa mojusükat?

³ Waʼatapajüin maʼin tü kaʼi eeinjatüle «soonooin wayuu süpüshua yaa mmaluʼu» sümaa nünüiki Maleiwa (Mat. 6:10). Müleka kakaliainnale waya sünain aʼatapajaa joujainjatüin sajaʼttinnüin tü kasa mojusükat, eesüjaʼa süpüla sukulajaain waaʼin sünain aʼatapajaa.

4. ¿Jamüsü eejüinjatka waaʼin sünain aʼatapajaa sükalia sajaʼttinnüin tü kasakat süpüshuaʼa?

⁴ ¿Jamüsü eejüinjatka waaʼin sünain aʼatapajaa sükalia sajaʼttinnüin tü kasakat süpüshuaʼa? Shia süka nuluwataain waya Jesuu sünain eejüinjatüin waaʼin (Mat. 24:42; Luc. 21:34-36). Akaʼaya tü nupueulosekat Jeʼwaa saapirüin waya sünain eejüinjatüin waaʼin sünain aʼatapajaa tia kaʼikat sümaa weʼitaainjatüin waaʼin nünain Maleiwa sünain Paʼaraiiseerüin tü mmakat nutuma (paashajeʼera 2 Pedro 3:11-13, TNM).

5. ¿Jarat tü wanee kasa eejüinjatkat maʼin atuma waaʼin?

⁵ Na anoujashii namaiwajanakana, eeshaatasü naaʼin sünain aʼatapajaa nükalia Jeʼwaa. Eejaleeinjatia maʼin waaʼin maaʼulu yaa süka chaichipain Jesuu aluwataain chaa iipünaa soʼujee 1914 otta süka sülüʼülaain süpüla sajaʼttinnüinjatüin süpüshuaʼa tü kasakalüirua. Jamüsüjaʼa tü mmapaʼakat maaʼulu yaa, mojuleeipaʼaya maʼin. Anuutaa joo aküjünüin tü pütchi süchikikat Nuluwataaya Maleiwa. Ekeraajüsü tü nümatüjütkalia Jesuu (Mat. 24:3, 7-14). Nnojotsü nüküjüin Jesuu jeʼrainjatüin kaʼi alataka süpüla süntüinjatüin tü kaʼi sajaʼlajaainjatkalü oʼu kasa süpüshuaʼa, alüʼütpajaʼa maʼin shia. Eejashaatainjatsejeʼe waaʼin süpüla kaʼikat tia.

6. ¿Jamüsü watüjaaka saaʼu mojulaajeerüin maʼin shiʼipaʼaya wayuu?

⁶ Saashin tü Wiwüliakat, «sülüʼütpa sükalia sajaʼttüinjatüin tü kasakat süpüshua», keemashaateerü maʼin tü mmapaʼakat (2 Tim. 3:1, 13; Mat. 24:21; Alat. Map. 12:12). Kooʼomüin kooʼomüin meerü tü kasa mojusükat yaa mmapaʼa. ¿Keemashaatainjatche tü mmapaʼakat süpüla sajaʼttüinjatüin tü kasakat süpüshuaʼa?

7. ¿Kasa wayaawataka sünainjee tü sümakat Mateo 24:37-39?

⁷ Süpülapünaa süntüin tü müliaa miyoʼusükat, alinjatü maʼin jamü naashin waneeinnua wayuu, jouluinjatü maʼin ayuulii jee eeinjatü atkawaa suluʼupünaa mmaka süpüshuaʼa (Alat. Map. 7:14). Nnojotpejeʼe müinjatüin sukuwaʼipa tia. Shiyaawatüinje aaʼu wayuu süpüshuaʼa shikeraajüin nünüiki Maleiwa, jaʼitakajeʼe chi eekai manoujain niyaawatüinje saaʼu tia. Maaʼulu yaa, nnojoleerü shiyaawatüin aaʼu wayuu sülüʼülüin sükalia süpüla sajaʼttüinjatüin kasaka süpüshuaʼa naashin Jesuu. Ainkeerü neʼe saaʼin wayuu süntapa tia kaʼikat (paashajeʼera Mateo 24:37-39). Tü wayaawatakat sünainjee tü nümakat Jesuu shia keemaitpain maʼin tü mmapaʼakat otta nnojoleerüin shiyaawatüin wayuu sülüʼülüin tü müliaa miyoʼusükat (Luc. 17:20, TNM; 2 Ped. 3:3, 4).

8. ¿Kasa weʼitaashaatainjatka anain waaʼin?

⁸ Maaʼulu yaa, ekeraajüsü süpüshuaʼa tü nümakat Jesuu, alüʼütsü sükalia süpüla sajaʼttüinjatüin kasaka süpüshuaʼa. Na wawalayuu jülüjakana aaʼin shia, nayeena ayaawataka saaʼu shikeraajüin maaʼulu yaa (Mat. 24:27, 42). Soʼujee 1914 sünainmüinreʼeya maaʼulu yaa, weʼrüirü sünain shikeraajüin soʼutku tü kasa alatajatkat naashin Jesuu sajaʼttiamüin tü kasakalüirua. Weʼitaashaatain waaʼin sünain sülüʼülüin sükalia süpüla sajaʼttinnüinjatüin tü kasa mojusükat. Nükatalüitpa Jeʼwaa wanee kaʼi süpüla tia.

9. ¿Jamüsü eejüinjatka waaʼin?

⁹ Eejüinjatü waaʼin süpüla woonooinjanain  sümaa nünüiki Kürisüto. Jee müsia eejüinjatü waaʼin süka shikeraajüirüin tü nümakat Jesuu. Nnojoishii waya anoujain süpaʼa mma, wanouja anainrü tia saaʼujee shikeraajüin tü sümakat tü Wiwüliakat.

10, 11. (1) ¿Jamüsü nünüiki Jesuu namüin na nikirajüinkana süpüla eejüinjatüin naaʼin? (2) ¿Kasa ayatüinjatka waaʼinrüin jaʼitairü wattayülüin saaʼin wamüin nükalia Maleiwa? (Piirakaa sümüin tü ayaakuaa suluʼukat süpana 14.)

¹⁰ Wainma na wawalayuu kakaliainnakana sünain aʼatapajaa nükalia chi Maleiwakai. Jaʼitainna kakaliainnain waya sünain aʼyatawaa nümüin Jeʼwaa, ayatüinjanaʼaya waya eejüin waaʼin süpüla tü kaʼi najaʼlajeʼerüinjatkalü oʼu Jesuu tü kasa nuluwataakalü aaʼu Satanaa. Naapirüin Jesuu na nikirajüinkana süpüla eejüinjatüin naaʼin sünain tü nanoulakat süka nnojoluin natüjaain saaʼu joujainjatüin sajaʼttinnüin tü kasa mojusükat. Müshi Jesuu namüin: «Meena aka jia saaʼin nüchepchiairua wane wayuu naaʼinmajirüin tü nükorolokot nüchikiruʼu. Eʼitaanüshii naya süpüla tü aʼyatawaakat waneʼewai nakua. Eeshi wane eʼitaanüin süpüla eeinjatüin naaʼin soʼuluʼu tü miichikat sümaʼinruʼu nüleʼejüin chi kepiashikai. Je sükajee tia, anakaja müleka eere jaaʼin tapüla tayakai chi kepiashikai, süka nnojolüin jütüjaain aaʼu müleka taleʼejeechire kaʼapü aikat, süseʼeruʼupünaa ai, maalia, je wattaʼachon maalü shiale. Antalaa meechi taya. Anasü eere jaaʼin waneepia sümaʼinruʼu jaʼatapajüin taya suulia tantajüin jaaʼu sünain atunkaa. Tü tamüitpakat jümüin, süpülajatü wayuu süpüshuaʼaya: ‹Ee jumata jaaʼin tapüla›» (Mar. 13:33-37).

¹¹ Wanaa sümaa nüikkalaain Jesuu sünain aluwatawaa chaa iipünaa soʼu 1914, nayaawata aaʼu na anoujashiikana pejein maʼin sükalia süpüla sajaʼttinnüin tü kasa mojusükat. Müshiijeseʼe naküjüin maʼin tü pütchikat sümüin wayuu. Suluʼu Marcos 13, nüküjüin Jesuu nnojoluin natüjaain aaʼu na achepchieekana joujeechin niweetüin chi nalaamainkai, müsüjeseʼe eejüinjatüin naaʼin waneepia sümaʼinruʼu naʼatapajüin chi nalaamainkai. Tü shikirajakalü anain waya tia, shia eejüinjatüin waaʼin sümaʼinruʼu waʼatapajüin nükalia Maleiwa. Jaʼitainna kakaliainnain waya sünain aʼatapajaa tia, jaʼitairü wattayülüin saaʼin wamüin tia kaʼikat, ayatüinjanaʼaya eejüin waaʼin süpüla tia.

12. (1) ¿Jamüsü nünüiki Habacuc nümüin Jeʼwaa? (2) ¿Jamakaʼa nünüiki Jeʼwaa nümüin Habacuc?

¹² Jülüja waaʼin tü naainjakat Habacuc, wanee nünüikimaajachi Maleiwa. Kakalia nia sünain naapirakuʼu nümüin na wayuukana sünain sajaʼttinnüinjatüin Jerusalén. Nüpülapünaa paala Habacuc, eejana wanee nünüikimaajana Maleiwa aküjakana süchiki sajaʼttinnüinjatüin Jerusalén. Niʼrüin Habacuc sünain mojulaaleein maʼin wayuu soʼu kaʼikat tia, müshijeseʼe nuchuntüin  kaaliinwaa nümüin Jeʼwaa. Anuu nünüiki nümüin: «Jeʼwaakalee, ¿jeʼratuainjachikai maʼin taya achuntüin kaaliinwaa pümüin? ¿Jamüsükai moʼuyaaka pikii suulia pajaʼttirüin na mojulaashiikana?». Nnojotsü nüküjüin Jeʼwaa nümüin Habacuc joujainjatüin sajaʼttinnüin Jerusalén, shia neʼe nüküjaka eejüinjatüin naaʼin süpüla tia kaʼikat. «Nnojoleerü kamaʼain shia», müshi Jeʼwaa nümüin (paashajeʼera Habacuc 1:1-4 otta 2:3).

13. (1) ¿Jamüsüje nünüiki Habacuc müleka nüshapataale aaʼin? (2) ¿Kasaje alataka nümüin Habacuc müleka nnojorüle eejüin naaʼin?

¹³ Nnojotsüjeʼe anain nukuwaʼipa Habacuc nümaa Jeʼwaa müleka nukulajaale aaʼin sünain aʼatapajaa tü kaʼi sajaʼlajeʼennüinjatkalü oʼu Jerusalén. «¿Joujeetkalia maʼin sajaʼttinnüin Jerusalén? Akulajaaitpa taaʼin sünain aʼatapajaa. Amülashi neʼe taküjakuʼu tamüin tü pütchikat», müshije nia nüshapataale aaʼin. Nnojorüleje eejüin naaʼin Habacuc, ouktüshije nia wanaa namaa na chejeʼewaliikana Jerusalén.

14. ¿Jameerü paaʼin Paʼaraiisüpa tü mmakat?

¹⁴ Paʼaraiisüpa tü mmakat jee piʼrapa shikeraajüin süpüshuaʼa tü nümakat Jeʼwaa süchiki tü alatüinjatkat sajaʼttinnapa tü kasakalüirua, ¿aashin talateerüin maʼin paaʼin sutuma nikeraajeerüin Jeʼwaa süpüshuaʼa tü nümakat? ¿Aashin piʼitaaleejeerüin maʼin paaʼin nünain Jeʼwaa? (Paashajeʼera Josué 23:14.) Talateerü maʼin paaʼin nümaa Jeʼwaa süka najaʼttirüin süpüshuaʼa tü kasa mojusükat wanaa sümaa choʼujaain sajaʼttinnüin. Jee müsia talateerü paaʼin süka naapirüin na aʼyataashiikana nümüin suulia ouktajüin naya (Aluw. 1:7; 1 Ped. 4:7).

15, 16. ¿Jamüsü waaʼinmaainjatka tü aküjaakat pütchi?

¹⁵ Nikirajüin waya Jeʼwaa sükajee tü nupueulosekat sünain kojutüinjatüin wamüin tü waʼyataainkat nümüin. Sutuma tia, achecheraashii waya sünain tü waʼyataainkat nümüin Jeʼwaa jee aküjüshii maʼin waya tü nünüikikat. Weʼitaain maʼin waaʼin sünain shikeraajeerüin tü nümakat Jesuu süchiki tü alatajatkat sülüʼütpa sükalia süpüla sajaʼttinnüin tü kasakalüirua. Pejechonsü maʼin tia kaʼikat. Tü waaʼinmaainjatkat shia tü waʼyataainkat nümüin Jeʼwaa otta tü aküjaakat pütchi süchiki Nuluwataaya (Mat. 6:33, TNM; Mar. 13:10, TNM).

¹⁶  Alüʼülaasü maʼin tü kaʼi sajaʼttajatkalü oʼu tü kasa nuluwataakalü aaʼu Satanaa, müshiijeseʼe waapirüinjanain na wayuukana suulia ouktajüin naya. Choʼujaasü maʼin waaʼinrüin tia. Soʼu 1945, emerojoosü wanee anua jee ouktakalaka watta saalii wayuu suʼunnaa tia. Apütaʼalaashii neʼe palit, eejachi wanee wayuu sümaa nuʼwayuuse, aküjüliishii naya pütchi nüchiki Jeʼwaa mapa. Naashin nayakana, eejatü wanee laülaa isaka maʼin saaʼin süchiirua süüliijana, sücheʼese, sajapüna jee aʼwaatüsü maʼin wanaa sümaa shiʼrüin shimerotuin tü anuakat sümaa tü kasa sümaʼanajatkat. Jee müshiʼiya na waneeinnua, shia jülüjaka naaʼin nakaaliinjain wayuu suulia wüinsirajüin. Tü waaʼinmaainjatkat, shia waküjüinjatüin tü pütchikat sümüin wayuu süpüla suʼttaainjatüin. Ayataʼaya wakaaliinjain wayuu maaʼulu yaa süpüla suʼttaainjatüin.

17. ¿Jamüsü nnojoluinjatka jülüjüin waaʼin wattayülüin nükalia Maleiwa?

¹⁷ Ekeraajüsü tü sümakat tü Wiwüliakat maaʼulu yaa, antalaa meerü sükalia süpüla sajaʼttüinjatüin tü kasakalüirua süpüshuaʼa. Alüʼülaasü maʼin tü kaʼi sajaʼlajeʼennüinjatkalü oʼu tü iküleesia nnojotkat shiimain sutuma Organización de las Naciones Unidas (Alat. Map. 17:16). Nnojotsü jülüjüinjatüin waaʼin wattayülüin tia, süka jamüin, eein süpüla niʼitaain Jeʼwaa jooluʼu suluʼu naaʼin na sülaülashiikana mma süpüla najaʼlajeʼerüinjatüin tü iküleesia nnojotkat shiimain (Alat. Map. 17:17). Pejechonsü maʼin tü kaʼi sajaʼttinnüinjatkalü oʼu tü kasa nuluwataakalü aaʼu Satanaa. Anuu nünüiki Jesuu wamüin: «Müleka jülüjüle jaaʼin neʼe emiʼijaa, eperuwaa ooʼulaka ekawaa, je müleka jüshapataale aaʼin saaʼu tü jiküinjatkat, nnojoliishiijaʼa yapain jia sünain aʼatapaa taya sükajee tia» (Luc. 21:34, 35; Alat. Map. 16:15). Ayataʼaya eejüin waaʼin süpüla nuʼtteʼerüin waya Jeʼwaa otta waaʼinmaainjatü tü waʼyataainkat nümüin (Is. 64:4).

18. ¿Kasa wekirajaajeetka anain sünain tü wanee ekirajaayakat?

¹⁸ Ayataʼaya wachecherüin wanoula nünain Jeʼwaa, woʼuraaja weinshi nümüin otta aleewaa maʼin waya nümaa sümaʼinruʼu waʼatapajüin sajaʼttinnüin tü kasakalüirua süpüshuaʼa. Tia, shia tü anakat süpüla waainjain naashin Judas. Waainjüle tia, kateerü woʼu waneepia nutuma Jeʼwaa (Jud. 20, 21). ¿Kasa waaʼinrajatka süpüla suluʼuin waya tü Paʼaraiisükat? Wekirajaajeerü anain tia sünain tü wanee ekirajaayakat.