1, 2. ¿Kasa waaʼinrüinjatka wapüshuaʼa wayakana aʼyataakana nümüin Jeʼwaa? Piʼitaa wanee shiyaawase.

WAYAʼLAJÜINJANALE monku, kalapaasü, meruuna shiale, shia waneekaka tü saʼanasüinkaʼaya maʼin, tü eekai maluuluin, tü eekai anain süpüla ekünaa. Wasakirataalain joo jeʼrain süliayaa.

² Jekenale waya woutiisain, wachajaainjatü sukuwaʼipa süpüla laülaainjatüin waaʼin sünain anoujaa. Naashin Pablo, müleka aleewale na anoujashii chajanakana chaa Éfeso sünain tü anoujaakat nünain Jesuu, laülaajeerü naaʼin sünain anoujaa maʼaka naaʼin Jesuu (Éf. 4:13).

3. ¿Kasa wanaawaka aaʼujee nakuwaʼipa na wawalayuu chajanakana chaa Éfeso namaa na eekana maaʼulu yaa?

³ Wanaa sümaa nuluwataain Pablo wanee karaloukta namüin na anoujashii chajanakana chaa Éfeso, eejana wawalayuu laülaakana aaʼin sünain anoujaa, eetaashii joo na jekenakana sünain anoujaʼaya. Akaʼaya neʼe maaʼulu yaa, müsia neʼe sukuwaʼipa. Na wawalayuu  jekenakana woutiisain, ayatüshii naya ekirajaain nünain Jeʼwaa süpüla laülaainjatüin naaʼin sünain anoujaa. ¿Jama piakai? ¿Laülaa aaʼinchi pia sünain anoujaa? (Col. 2:6, 7.)

4, 5. (1) ¿Wanaawashiiche suluʼu nakuwaʼipa na wawalayuu laülaakana aaʼin sünain anoujaa? (2) ¿Kasa wanaawaka aluʼu nakuwaʼipa na wawalayuu laülaakana aaʼin sünain anoujaa? (Piirakaa sümüin tü ayaakuaa suluʼukat süpana 8.)

⁴ Niyaawatamaata aaʼu wayuu müleka maluurüle wanee monku jee shiale wanee meruuna, jakütüle wanee kalapaasü. Akaʼaya joo shiaʼayaa, eesü tü eekai miyoʼuin, eesü tü eekai joʼuuchoin. Akaataajaʼa neʼe nakuwaʼipa na wawalayuu laülaakana aaʼin sünain anoujaa, eeshi chi eekai jimaʼalin, eeshi chi eekai jaʼapüichin, eeshi chi eekai wayuuin, eeshi chi eekai alijunain. Wanaawapajaʼa nakuwaʼipa naya wawalayuukana süka laülaain naaʼin sünain anoujaa. ¿Kasa wayaawataka naaʼu wanee wawala laülaale naaʼin sünain anoujaa?

⁵ Na wawalayuu laülaakana aaʼin sünain anoujaa, oushikajaashii naya süchiirua nukuwaʼipa Jesuu (1 Pe. 2:21). «Alinjachi püpüla Jeʼwaa süka süpüshuaʼa paaʼin, süka süpüshuaʼa pukuwaʼipa otta süka tü jülüjakat paaʼin [...]. Anasü aire püpüla wayuu süpüshuaʼa maʼaka aijiraain pia püpülajiraa», müsü nünüiki Jesuu (Mat. 22:37-39, TNM). Chi wawala laülaakai aaʼin sünain anoujaa naaʼinrüin tia nuluwataakalü anain Jesuu. Shia alanaʼaleeka nümüin aleewainjachin nia nümaa Jeʼwaa ooʼulaka alinjatüin wayuu nüpüla.

6, 7. (1) ¿Jarat tü akuwaʼipaa jaʼyakat naaʼu na wawalayuu laülaakana aaʼin sünain anoujaa? (2) ¿Kasa wasakireʼerüinjatka anain waaʼin?

⁶ Aipüralii wayuu na wawalayuu laülaakana aaʼin sünain anoujaa (Gal. 5:22, 23). Kamaneeshii naya, anamia naya ooʼulaka nnojotsü ashapataain naaʼin saaʼu wanee kasa. Jamüsüjaʼa sülatüle wanee kasachiki namüin, naikkaleʼerüin naaʼin, nachecherüin naaʼin. Akaʼaya naya, ekirajaashii naya sünain tü Wiwüliakat, naaʼinrüin tü kasa anasükat jee nayouktüin tü kasa mojusükat. Shia naaʼinraka waneepia maʼin tü nuluwataakalü anain naya Jeʼwaa suulialeʼeya tü anakat neʼe saaʼin namüin, nnojotsü yaletayaain naaʼinyaasaʼa. * Yalayala aaʼinchii naya sünain naküjüin tü pütchikat, naaʼinrüin tü kasa anasükat süpüla paaʼinwain na wawalayuukana.

⁷ «¿Kasache tü taaʼinrajatkat süpüla toushikajaainjachin süchiirua nukuwaʼipa Jesuu?», müinjana waya suluʼu waaʼin waneʼewai wakua. Süpüla laülaainjatüin waaʼin sünain anoujaa maʼaka naaʼin Jesuu, weʼitaainjatü suluʼu wakuwaʼipa apünüinsü kasa, joʼu wekirajaai sünain.

8. ¿Kasa naainjaka Jesuu sutuma nütüjüin maʼin süpüleerua tü pütchi suluʼukat tü Wiwüliakat?

⁸ Atüjashaatashi maʼin Jesuu süpüla tü pütchi suluʼukat tü Wiwüliakat, müshijeseʼe chajachin nia yootuin namaa na karalouktamaajanakana suluʼu tü piichi aʼwaajüleekat Maleiwa, 12 nuuyase Jesuu soʼu tia. «Tü wayuu aapajüsükalüirua, ponüsü maʼi saaʼin tü nümakat chi jintüikai namüin na laülayuukana, süka nütüjüin maʼi asouktaa neʼipajee» (Luc. 2:46, 47). Süka nütüjüin maʼin Jesuu süpüleerua tü Wiwüliakat, ooʼulaaleeshiʼiya na fariseokana suulia asakiijaa nia (Mat. 22:41-46).

9. (1) ¿Kasa waaʼinrüinjatka laülaweere waaʼin sünain anoujaa? (2) ¿Kaseerü wayaawataka aaʼu wekirajaale sünain tü Wiwüliakat?

⁹ Laülaweere waaʼin sünain anoujaa maʼaka naaʼin Jesuu, acheküshii wekirajaain sünain  tü pütchi kapüleekat suluʼu tü Wiwüliakat. Naainjüle tia wanee anoujashi, shiimain sünain yapain nia süpüla naaʼinrüinjatüin tü sümakat tü Wiwüliakat (Heb. 5:14). Choʼujaasü maʼin wayaawatüin saaʼu tü pütchi suluʼukat tü Wiwüliakat (Éf. 4:13, TNM). Müleka wounteere tia, acheküsü waashajeʼerüin tü Wiwüliakat weinshi, ekirajaainjana waya sünain tü Wiwüliakat wamüiwaʼa ooʼulaka sümaa wapüshi. Wekirajaapa sünain wanee pütchi suluʼu tü Wiwüliakat, wayaawateerü aaʼu jamüin nünüiki Jeʼwaa süchiki wanee kasa. Weʼitaale suluʼu wakuwaʼipa tü kasa anasü wekirajaakalü anain suluʼujee tü Wiwüliakat, aneerü sukuwaʼipa tü kasa waainjakat ooʼulaka aleeweena maʼin waya nümaa Jeʼwaa.

10. ¿Kasa naainjaka na wawalayuu kojutükana amüin tü nümakat Jeʼwaa jee tü nuluwataakalü anain naya?

¹⁰ Na wawalayuu laülaakana aaʼin sünain anoujaa kojutüsü namüin tü nümakat Jeʼwaa jee tü nuluwataakalü anain naya. Naainjain tia wanaa sümaa jüüjüüin naya sümüin tü nümakat Maleiwa, jaʼitasü neeʼiranajaainjatüin naaʼin süpüleerua tia jee neeʼiranajaainjatüle nakuwaʼipa. Waneepiashii naya nümaa Maleiwa jee lotusü sukuwaʼipa natuma tü kasa naainjakat, nia nashataka akuwaʼipa Jesuu ( paashajeʼera Éfeso 4:22-24). Tü pütchi suluʼukat tü Wiwüliakat nia kanüikika Maleiwa süka niain kashajiralain shia. Müleka naashajeʼerüle wanee wawala tü Wiwüliakat, wainmaleejeeria nütüjüin nutuma chi naaʼinkai Maleiwa,  aipüraijeechi nia wayuu ooʼulaka aleewaleejeechia joo nia nümaa Jeʼwaa.

11. ¿Kasa jaʼyaka naaʼu na wayuu kasakana nünain Jesuu?

¹¹ Wanaa sümaa yaajachinkain Jesuu yaa Mmapaʼa, wayuu maainjalasai nia. Aluʼuinjaʼa na kasakana nünain, naleʼeruʼusü tü kaainjalaakat maʼaka saaʼin tü niikat, chi nüshiyaashikai ooʼulaka süpüshuaʼa tü wayuu eʼraajakat nia. Akaʼaya na nikirajüinkana Jesuu, jaʼyasü naaʼu yaletüin naaʼin jee kachumüraliin naya, oʼttüshiijeseʼe «naya sünain aʼülüjaajirawaa saaʼu jaralin chii miyoʼuin naʼakajee» (Luc. 22:24). Mayaapejeʼe müin nakuwaʼipa naya wayuukana, niyaawatatüjülia aaʼu Jesuu sünain laülaajeerüin naaʼin sünain anoujaa mapeena. Achuntüshijeseʼe nia nümüin Maleiwa sünain maa: «Taataa, achuntüshi taya pümüin naaʼu na anoujashiikana napüshua süpüla wanaawajiraainjatüin naaʼin. Maa aka saʼaniraain pukuaippa tamaa je saʼaniraain takuaippa pümaʼaya [...] maa aka wayakana sünain wanaawajiraain waaʼin» (Juan 17:21, 22).

12, 13. (1) ¿Kasa waaʼinrüinjatka waneʼewai wakua? (2) ¿Kasa naainjaka Uwe süpüla wanaawajiraain naaʼin na wawalayuukana?

¹² Na wawalayuu laülaakana aaʼin sünain anoujaa, wainma kasa anasü naainjaka süpüla wanaawajiraain naaʼin na wawalayuukana (paashajeʼera Éfeso 4:1-6, 15, 16). Anasü müleka nnojorüle yaletüin waaʼin, wanaawajiraainjatü waaʼin namaa na wawalayuukana waneʼewai nakua. Aire wamüin wanee kasa naainjaka wamüin wanee wawala, acheküsü wakumajüin sukuwaʼipa tia süka anakalü akuwaʼipa. Müle shia watuma, jaʼyeerü waaʼu sünain laülaain waaʼin sünain anoujaa.

¹³ Eeshi wanee wawala Uwe münüshi, aashichijaʼawaishi nia müleka nuʼtchejaale wanee wawala sünain wanee kasa. Shiajeseʼe soʼu wanee kaʼi, nikirajaaka sünain nukuwaʼipa David, shia nikirajaaka aka tü Wiwüliakat jee tü karalouktakat Perspicacia. Makaʼa nikirajaain chia wawalakai sünain nukuwaʼipa David shia süka wainmain tü kasa mojusü alatakat nümüin David. Oʼutünüinjachiaa aaʼin paala David nutuma Saúl, aʼinaʼannüinjachiaa paala nia sutuma tü israeliitakalüiruaya. Shimeeʼerainpalashi nia tü nuʼwayuusekalia (1 Sam. 19:9-11; 30:1-6; 2 Sam. 6:14-22). Mayaapejeʼe müin nukuwaʼipa David atumawaa, ayatüshia alin Jeʼwaa nüpüla otta müsia niʼitaain naaʼin nünain. Amülialaasü naaʼin saalin wayuʼuya. Aʼwanajaasü naaʼin Uwe sutuma tü nikirajaakalü anain. Nnojoluitpa jülüjüin naaʼin tü kasa noʼtchejaakalü amaa na wawalayuukana. Chia wawalakai, aainjüshi nia kasa anasü maaʼulu yaa süpüla wanaawajiraainjatüin naaʼin na wawalayuukana. Anasü washatüle nukuwaʼipa chia wawalakai.

14. ¿Jaralii na nütünajütkana Jesuu?

¹⁴ Anamia maʼin Jesuu, arütkaasü wayuu maʼleekalia nünainmüin, tepichi, tooloyuu, jieyuu ooʼulaka na jaʼapüinnakana. Nnojotpejeʼe nütünajütüin Jesuu wayuu maʼleekalia. Anuu nünüiki namüin na aluwataaushiikana: «‹Tatünajüt› meechi taya jümüin müleka joonoole waneepia sümaa tü taluwataakat anain jia» (Juan 15:14). Na nütünajütkana Jesuu naya na waneepiakana nümaa ooʼulaka na aʼyataakana nümüin Jeʼwaa süka alin nia napüla. Aire Jeʼwaa nüpüla wanee wayuu, nia anaka süpüla watünajütüinjachin. ¿Jamüshi niainjachika watünajütüin wanee wayuu makai akuwaʼipa?

15. ¿Kasa anasü niʼreetka chi jimaʼaikai jee tü majayütkat naʼaleewajaale nümaa wanee wawala kakaliaichikai sünain anoujaa?

¹⁵ Tü maluutkalü atuma tü monkukot, tü  meruunakat shia nutuma naaʼayula chi Kaʼikai. Akaataajaʼa neʼe wayakanaʼaya, laülaajeerü waaʼin sünain anoujaa müleka aipüraliire na wawalayuukana. Piakai tawala jimaʼaikai, piakat majayütkat, nnojoyürüle jütüjaain saaʼu kasain wayuu tü palajanainjatkat jutuma suluʼu jukuwaʼipa, shia anaka aluʼu jaʼaleewajaale nümaa wanee wawala kakaliaichikai aʼyataain nümüin Jeʼwaa jee aaʼinrakai kasa anasü napüleerua na wawalayuukana. Müle shia jutuma, nükaaliinjeena jia sünain tü jaaʼinrüinjatkat. Naya wawalayuukana, natüjaa aaʼu kasain aneerüin atuma jukuwaʼipa, süka jamüin, wainmain tü kasa eejiraakalü amaa paala naya. Laülaajeerü jaaʼin sünain anoujaa natuma naya wawalayuukana müleka waneepiale jia namaa (paashajeʼera Hebreokana 5:14).

16. ¿Kasa saaʼinraka wanee wawala sutuma nakaaliinjain shia wanee wawalayuu kakaliainnakana sünain anoujaa?

¹⁶ Saashin wanee wawala Helgaka anülia, wanaa sümaa sükanajüinjatüin tü bachilleratokat, «ekirajaainjana waya suluʼu tü universidaakat», müsü nanüiki na koleejiajiraakana sümaa saashin. Aluʼuinjaʼa shiakat, aashajaasü palajana namaa waneeinnua wawalayuu kakaliainnakana sünain anoujaa. Tü naküjakat sümüin tia wawalakat sütütülüin saaʼin süpüla pürekutsoolüin shia soʼu jaʼrai juya, majayütchon shia wanaa sümaa tia. «Talatashaatasü taaʼin sutuma taʼyataain nümüin Jeʼwaa majayülüiwaʼaya taya», müsü sünüiki tü wawalakat Helga.

17, 18. ¿Kasa waaʼinrajatka süpüla kooʼomüin waʼyataain nümüin Jeʼwaa?

¹⁷ Woushikajaale süchiirua nukuwaʼipa Jesuu, laülaajeerü waaʼin sünain anoujaa, aleeweena maʼin waya nümaa Jeʼwaa jee kamalainreejeeria wamüin aʼyatawaa nümüin. «Akaajaa jiakana, müleka jaaʼinrüin waneepia tü anasükat suʼupala wayuu. Je sükajee neʼrüin tü kasa anasü jaaʼinrakat, nayaawateerü aaʼu nukuaippa Maleiwa je naʼwaajeechin nia», müsü nünüiki Jesuu namüin na nikirajüinkana (Mat. 5:16).

¹⁸ Na wawalayuu laülaakana aaʼin sünain anoujaa, nakaaliinjain na wawalayuukana sünain aaʼinraa kasa anasü. Akaʼaya naya wawalayuukana, wulesü naaʼin. ¿Jamüsü aneetka wakuwaʼipa wulere waaʼin? ¿Kasa waaʼinrüinjatka süpüla kojutüin wamüin tü jülüjakat naaʼin na wayuukana? Wekirajaajeerü anain tia sünain tü wanee ekirajaayakat.