«¡ALEJAITTAʼALEEJAʼA maka taya! ¿Jamüsü nuuʼulaaka Maleiwa sülatüin tia tamüin?», maa müsü naaʼin Sidnei, chejeʼewai nia Brasil, 24 nuuyase. Eewaashi nia suluʼu wanee tobogán jee ouktaleesia nüsaʼa suluʼujee tia.

«Niyüülajüin waya Maleiwa», eeshii na makana anüiki sutuma neewaain, sutuma ayuulin naya, sutuma ouktüin napüshi, sutuma müliain naya, sutuma sukutkujaain mma eere kepiain naya jee shiale sutuma eein kasachiki. Nnojoliipejeʼe nayain neʼe müin akuwaʼipa namüiwaʼa, eepuʼushii na makana akuwaʼipa sümaiwa paala. Jamüshijaʼa Job, wanaa sümaa sülatüin wainma kasa mojusü nümüin, nia niʼitaaka Maleiwa sünain niain kasirüin tü alatakat nümüin. Anuu nünüiki Job: «Achuntüshi taya kaaliinwaa pümüin, eeyaai neʼe pükaaliinjain taya; anasü takuwaʼipa puʼupala süpüla jülüjainjachin taya paaʼin. Pümaʼülapalashi neʼe taya; paainjüin kasa mojusü tamüin süka püpülain» (Job 30:20, 21, TNM).

Nnojotsü nütüjaain aaʼu Job jaralin maʼin kasirüin nia süpüla müinjachin nia müliain. Aluʼujasaʼa wayakana, watüjaa aaʼu jamüin sülataka kasa mojusü wamüin otta watüja aaʼu tü waaʼinrajatkat suʼunnaa tia. Watüjaa aaʼu tia süka süküjüin shia wamüin tü Wiwüliakat.

Anuu sünüiki tü Wiwüliakat nüchiki Maleiwa: «Lotusü sukuwaʼipa süpüshuaʼa tü kasa naainjakat Jeʼwaa otta ayatüsia nikeraajüin tü nümakat; matüjüinsai nia aainjaa kasa mojusü, lotusü nukuwaʼipa» (Deuteronomio 32:4, TNM). «Nia Maleiwa kasitka tü kasa mojusü alatakat wamüin», nnojoishii müinjanain waya, süka jamüin, matüjüin nia aainjaa kasa mojusü jee lotusü nukuwaʼipa.

Saashin tü Wiwüliakat, nnojoishi niain kasirüin Maleiwa tü kasa mojusü alatakat wamüin. Nnojotsü nuuʼulaküin waaʼin Maleiwa süka kasa mojusü (Santiago 1:13, TNM). Nukumajaiwaʼaya Maleiwa chi palajachikai wayuu jee tü palajatkat jierü, anashaatasü nakuwaʼipa nutuma saashin tü Wiwüliakat. Anashaatasü tü mma kalujunakat naya, anashaatasü naʼyataain otta naapüin namüin süpüshuaʼa tü choʼujaakat namüin süpüla talatüinjanain naya. «Anakaja kachonniire jia, jouluiwa na juuʼuliwoʼukana sainküin mmakat süpüshua süpüla laulaainjanain jia saaʼu [...] tü kasa mmapaʼajatkat süpüshuaʼale», müshi Maleiwa namüin (Génesis 1:28).

Nnojotsü anain sukuwaʼipa wayuu maaʼulu yaa. Watta saalii kasa mojusü alatüitka sümüin wayuu. Anuujeseʼe sünüiki tü Wiwüliakat: «Watüjaa aaʼulu sünain müliayülüinya süpüshua tü kasa akumajuushikalüirua, je keeʼireesü maʼi saaʼin taasheein shia suulia. Müliasü maʼi shia maa aka saaʼin wane wayuu eekai saʼalijaain» (Roma 8:22). ¿Jamüsüche makaʼa müliain maʼin wayuu?

Oʼttüsü wayuu sünain müliain soʼujee niʼrüijaain wayumüin wanee aapiee nümüin Maleiwa. Chia aapieekai, nia Satanaa chi Yolujaa münakai, nimeʼejüin naaʼin Adán sümaa Eva süpüla neʼrüinjanain wayumüin nümüin Maleiwa. Süka neküin süchon tü wunuʼu nüpülajakat Maleiwa noulia, naneeküin süka naaʼin namüiwaʼa tü anakat saaʼin namüin süpüla naaʼinrüin. Naashin Satanaa, nnojoleena ouktüin naya neküle süchon tia wunuʼukat, alaa neʼe Maleiwa naashin Satanaa. Nnojotsü nuuʼulaain Maleiwa süneeküin wayuu süka saaʼin sümüiwaʼa tü anakat süpüla saaʼinrüin naashin Satanaa (Génesis 2:17; 3:1-6). Akaʼaya nia, nüküjüin sünain aneerüin sukuwaʼipa wayuu nnojoire niain Maleiwa laülaain saaʼu. Shiasaʼa sutuma tia, sütüjawee aaʼu wayuu pütchikat tüü: ¿Niache anaka Maleiwa süpüla aluwatawaa waaʼu?

Naashin Satanaa, aʼyataasü wayuu nümüin Maleiwa shiiʼiree neʼe anainjatüin sukuwaʼipa nutuma. Anuu nünüiki chi Yolujaakai nümüin Maleiwa nüchiki Job: «Paaʼinmajüin nia, paaʼinmajüin nüpüshi otta süpüshuaʼa tü kasa nümaʼanakat. Anasü putuma sukuwaʼipa tü kasa naainjakat [...]. Pajaʼlajeʼerüle süpüshuaʼa tü kasa nümaʼanakat, piʼrajaʼalaataajeerü mojuin nünüiki pümüin» (Job 1:10, 11, TNM). Mayaainjeʼe niain nüküjüin achiki Job chi Yolujaakai, maʼleesia sukuwaʼipa wayuu süpüshuaʼa naashin.

¿Kasa naaʼinraka Maleiwa süpüla sütüjaanüin aaʼu jaralin anain süpüla aluwatawaa? Süka kekiishaatain maʼin Maleiwa, anasü maʼin sukuwaʼipa tü naaʼinrakat (Roma 11:33). Jamüshijaʼa nia, nuuʼulaain naluwanaajiraain na wayuukana saaʼu nakuwaʼipa namüiwaʼa, sükajee tia, atüjaanüinjatü aaʼu jaralin anain süpüla aluwatawaa.

Mojusü maʼin tü mmapaʼakat maaʼulu yaa, eesü atkawaa, mojujirawaa otta amojujunüsü tü Mmakat. Sükajee tia, atüjaana aaʼu nnojoluin anain nuluwanaajiraale wayuu saaʼu nukuwaʼipa nümüiwaʼa. Müsüjeseʼe sümüin tü Wiwüliakat isain nüchiki chi wayuukai nuluwanaajiraain «saaʼu nukuwaʼipa nümüiwaʼa» (Jeremías 10:23, TNM). Eejeerü wanee anaa muloʼushaata maʼin otta talateena maʼin waya süpüla kaʼikat süpüshuaʼa niale aluwataain Maleiwa waaʼu; shiaʼaya keeʼireeka naaʼin Maleiwa wapüleerua tia (Isaías 45:18).

¿Jameetka sukuwaʼipa nutuma Maleiwa süpüla naaʼinrüin tia? Wanaa sümaa niʼiküin Jesuu na nikirajüinkana sünain oʼuraajaa, müshi nia: «Püntira tü puluwataayakat. Saainjüna tü keeʼireekat paaʼin yaa mmapaʼa maʼaka saainjünüin chaa iipünaa» (Mateo 6:10, TNM). Anta meerü tü kaʼi najaʼlajeʼereetkalü oʼu Maleiwa süpüshuaʼa tü kasa müliakalü atuma saaʼin wayuu. Naainjeerü tia sükajee Nuluwataaya (Daniel 2:44). Najaʼlajeʼerüinjatü Maleiwa tü müliaakat, tü ayuuliikat jee tü ouktaakat. Naashin Jeʼwaa, «nükaaliinjeechi chi wayuu mojushi achuntakai kaaliinwaa» (Salmo 72:12-14, TNM). Saashin tü Wiwüliakat, «nnojoleechi eein wanee wayuu eekai nümüin: ‹Ayuuishi taya›» (Isaías 33:24, TNM). ¿Jameerü nakuwaʼipa na wayuu ouktüinnakana? Anuu nünüiki Jesuu: «Nnojo jainkuuin aaʼin sütüma tü taküjainjatkat jooluʼu jümüin: Soʼuweena wane kaʼi, saapeerü tanüiki süpüshua tü wayuu ouktüsükalüirua sümaa sujuitteerüin mmaapüjee» (Juan 5:28, 29). ¡Anashaatasü maʼin tü naainjüinjatkat Maleiwa!

Poloo akaratshimüin juya süchikijee neewain Sidnei, müshi nia: «‹Nnojoishi taya naaʼinmajüin Maleiwa›, müshi taya wanaa sümaa teewaain. Tatüjaapejeʼe saaʼu nnojolin niain kasirüin Maleiwa tü alatakat tamüin. Eesü mojuwaire taaʼin sümaa taʼyalajüin sutuma ouktüin tasaʼa. Shiasaʼa taashajeʼerapa tü Wiwüliakat, tayaawata aaʼu nnojoluin niain Maleiwa kasirüin tü alatakat tamüin. Saashin tü Wiwüliakat, ‹eesü süpüla sülatalaa sümüin wanee kasa nümüin wanee wayuu›. Atütülaasü taaʼin otta achecheraasü tanoula sutuma toʼuraajawalin jee sutuma taashajeʼerawalin tü Wiwüliakat» (Eclesiastés 9:11, TNM; Salmo 145:18; 2 Corinto 4:8, 9, 16).

Waashajaʼawaire suluʼu waaʼin süchiki tü nuuʼulaakalü anainjee Maleiwa müliain wayuu, weʼitaajeerü waaʼin nünain Maleiwa. Weʼitaainya waaʼin nünain Maleiwa sutuma watüjaain saaʼu sülüʼülüin sükalia süpüla najaʼlajeʼerüin tü müliaakat. Shiimain maʼin naapeerüin Jeʼwaa kasa anasü namüin na achajaakana nia. Na wayuu eʼitaakana naaʼin nünain Jeʼwaa nümaa Jesuu, talateerü maʼin naaʼin namaa (Hebreokana 11:6, TNM; Roma 10:11).