«Eesü süpüla mamalain pümüin aashajeʼeraa tü Bibliakat. Mamalainjeerü shia pümüin nnojorüle pütüjaain saaʼu tü paashajeʼerüinjatkalü achiki», müshi wanee jimaʼai kanüliakai Will.

 ¿Pütüjawee aaʼu tü paaʼinrajatkat süpüla kamalain pümüin aashajeʼeraa tü Bibliakat? Sükaalinjeechi pia ekirajaayakat tüü.

•  Müinjatü piʼrakai saaʼin tü paashajeʼerakalü achiki suluʼu tü Bibliakat

•  Pikiraja süchiirua

•  Tü namakat waneinnua jimaʼalii jee majayünnüü

 Anuu wanee sukuwaʼipainjatka putuma süpüla müin piʼrakai saaʼin tü paashajeʼerakalü achiki:

1.   Püneeka süchiki wanee kasa pikirajaweekalü anain. Maʼaka saaʼin wanee aküjalaa suluʼujeejatka tü Bibliakat, wanee karaloʼuta nüchikimaajatka Jesucristo otta müsia tü pütchi aapajünajatkat suluʼujee tü Bibliakat eeka suluʼu jw.org.

2.   Paashajeʼera tü pikirajaweekalü anain. Eesü süpüla paashajeʼerüin shia sümaa miyoʼuin pünüiki namaa püpüshi jee paʼaleewainyuu. Püneeka wanee akuentajayaainjachikai otta na waneinnua naashajeʼereerü nanüiki na eekana suluʼu tü Bibliakat.

3.   Anuu soʼutku tü eekat süpüla paaʼinrüin:

   •   Püdibujaaja shiyaakua wanee aküjalaa eekai sülatüirüin otta müsia jamüin shikeraajia. Püshaja süchiki tü kasa alatakat.

   •   Püshajaa süchiki tü pikirajaakalü anain maʼaka saaʼin nüchiki wanee wayuu kanoulakai maʼin, sünainpünaa tü naaʼinrakat, tü nukuwaʼipakat otta müsia tü kasa anasü niʼrakat.

   •   Maa püsakirakai naaʼin na paashajeʼerakana achiki otta na wanee eejanakana sünain tia alatakat suluʼu tü Bibliakat.

   •   Jülüjataa paaʼin mojule süneekia wanee kasa jee anale shia nutuma chi paashajeʼerakai achiki, maʼaka naaʼin Pedro wanaa sümaa mojuin naaʼin sutuma nuunjulajüin nüchiki Jesuu (Marcos 14:66-72). ¿Kasachejeʼe eeka süpüla naaʼinrüin Pedro wanaa sümaa süpüleeruaanüin naaʼin?

   •   Talatüle paaʼin sümaa tü paashajeʼerakat, püshaja süchiki tü alatakat pümüin pansaasü sümaa tü sümakat tü Bibliakat. Püshaja süchiki tü pütüjakat sünainjee tia (Roma 15:4).

 Jülüjale maʼin paaʼin süchiki tü pikirajaakalü sünain tü Bibliakat, pünteerü anain kaaʼürüi suluʼu. Eesü püntüle sünain waneesia jee piamasü pütchi anaka maʼin saʼakajee.

 Maʼaka saaʼin puʼwanaawajireʼerüle Mateo 28:7 sümaa Marcos 16:7.

•    ¿Jamüsü nüküjaka Marcos niiʼiyataainjachin Jesuu namüin na nikirajüinkana otta müsia «nümüin Pedro»?

•  Wanee shiyaawatia: Nnojoishi eejachin Marcos, eeshijaʼa niale Pedro kaküjalain nümüin tia alatakat.

•  Kaaʼürüi suluʼujeejatü tü Bibliakat: ¿Jamüsü anaka naaʼin Pedro sutuma niʼreein nia Jesuu nüchikuaʼa? (Marcos 14:66-72). ¿Kasa niiʼiyataka akajee Jesuu aleewain maʼin nia nümaa Pedro? ¿Jamüsü süpüla püshatüin nukuwaʼipa Jesuu süpüla aleewain pia sümaa wayuu?

 Müle chakai paaʼin sünain tü pikirajaakalü anain suluʼu tü Bibliakat, talateerü maʼin paaʼin sünain aashajeʼeraa.