¿AKUMAJAASÜCHE KASA SÜMÜIWAʼA? ¿EETAAPA CHI KAKUMAJALAKAI SHIA?
Süwatia tü merüle kanüliakat mosca de la fruta
¿Eeirü pütaʼülüin wanee merüle? Kapüleesüsaʼa ataʼülaa shia, kaaʼinshaanasü. Mapüleesat sümüin süwatamaatüin.
Naashin waneinnua científico eesü waneirua merüle kanüliakat mosca de la fruta. Meematüsü aka saaʼin süwatia wanee katünasü süpülajatkat atkawaa, kawachirapejeʼe maʼin tia merülekat suulia tü katünasükat. Naashin wanee ekirajüi kanüliakai Michael Dickinson, atüjatüjülia awataa tü merülekat shiweetaiwaʼaya. Tia, müsü aka a saaʼin niʼitaanüle wanee joʼuu eeʼiwaikai jemelin süpüla süchupeetseinjachin nia wanee katünasü süpülajatkat atkawaa.
Na wayuu ekirajaakana süchiirua sukuwaʼipa tü merülekat nakürawaajüin shia wanaa sümaa suwatüin otta neʼrüin sünain kawachirain maʼin tü sütünakat sutuma, süʼwanüin shia maʼaka 200tua soʼu wanee sekunto. Eesü süpüla sujunüntamaatüin motsomüin sükajee tü sütünacheinkat.
¿Kasa saaʼinraka tü merülekat müleka sütaʼülanajatüle? Naashin na wayuu ekirajaakana süchiirua sukuwaʼipa tia merülekat, kawachirashaatasü shia. Kawachiraleesia shia suulia süchimira noʼu wanee wayuu. Naashin chi ekirajüikai Dickinson, kapüleesü tü saaʼinrakat tü merülekat. Kasale wayu alatüin, shiyaawatamaatüin motsomüin jalapünaainjatüin shia awatüin.
¿Jamakuwaʼipat süpüla müinjatüin süwatia tü merüle kanüliakat mosca de la fruta? Shiaʼaya wanee kasa matüjaajuukat aaʼu. Nekirajaa achiirua tia na ingenierokana.
Kasale wayu alatüin, shiyaawatamaatüin motsomüin tü merülekat jalapünaainjatüin shia awatüin.
¿Jamüsü saaʼin pümüin? ¿Aleinjatche sukuwaʼipa süwatia tü merüle kanüliakat mosca de la fruta nukumajataapa shia Maleiwa?