Nnojo, nnojoleerü ajaʼttinnüin, aʼajünüin jee keeʼirakain tü Mmakat. Saashin tü Bibliakat nukumajüin Maleiwa tü Mmakat süpüla kepiainjatüin wayuu waneepia saaʼu.

•   «Nayeena kepiaka suluʼu tü mmakat süpüla kaʼikat süpüshuaʼa na lotokana akuwaʼipa» (Salmo 37:29).

•   «Nia kakumalaka tü Mmakat jee tü kasa eekat saaʼu otta nnojotsü jaralüinjatüin ajaʼttirüin shia, eeinjatü shia süpüla kaʼikat süpüshuaʼa» (Salmo 104:5).

•   «Tü mmakat, ayateeria eein shia waneepia» (Eclesiastés 1:4).

•   «Chi kakumalakai tü mmakat, anasü maʼin sukumajia nutuma, nnojotsü nukumajaʼalüin neʼe shia, nukumajüin süpüla kepiainjatüin wayuu suluʼu» (Isaías 45:18).

 Nnojoleerü nuuʼulaain Maleiwa najaʼttirüin na wayuukana tü Mmakat sükajee yarüttüin shia natuma, atkawaa jee sünainjee waneirua kasa. Maʼaka süküjain tü Bibliakat najaʼlajeʼereena Maleiwa na amojujakana tü Mmakat (Alateetkat Mapeena [Apocalipsis] 11:18). ¿Jameerü sukuwaʼipa nutuma?

 Najaʼlajeʼereena Maleiwa na aluwataalii eekana saaʼu tü Mmakat, na nnojoliikana anain atuma sukuwaʼipa. Niʼitaajeetkalaka sukuwaʼipa nuluwataaya (Daniel 2:44; Mateo 6:9, 10). Nieechi aluwataakai Jesucristo nutuma saaʼu tü Mmakat (Isaías 9:6, 7). Wanaa sümaa yaajachin Jesús yaa mmapaʼa niimaleʼerüin sütsüin tü wawaikat jee tü palaakat (Marcos 4:35-41). Nuluwataapeena Jesús saaʼu tü Mmakat nuunteerü nunoutuin süpüshuaʼa tü kasa eekat saaʼu. Meerü sukuwaʼipa tü Mmakat nutuma maʼaka saaʼin tü apain eejatkat chaa Edén (Mateo 19:28; Lucas 23:43).

 Nnojo. Shia süka nnojoluin nayaawatüin maʼin saaʼu tü pütchi sümakat 2 Pedro 3:7, eere sümüin: «Sutumaʼaya nee tü pütchikat tü sirumatuʼu eekalü maaʼulu ooʼulaka tü mmakat anaajünüsü süpüla siki». Wekirajaa joo sünain piamasü kasa akaalinjeenaka waya süpüla wayaawatüin saaʼu tia pütchikat:

1.   Wainma sukuwaʼipa eeka süpüla jamaluʼuluin wanee pütchi suluʼu tü Bibliakat maʼaka saaʼin tü pütchikalüirua sirumatuʼu, mmakat otta siki. Jamüsüjaʼa Génesis 11:1 suluʼu waneirua Biblia müsü mayaa: «Paala sümaiwa, waneesiaiwaʼaya neʼe sünüiki tü mmapaʼakat». Wanaa sümaa «mmapaʼakat» sümüin tü Bibliakat yaʼayaa naya süküjeeka achiki na wayuukana.

2.   Tü pütchi suluʼukat 2 Pedro 3:7 süküjain jamaluʼuluin «tü sirumatuʼukat», «tü mmakat» otta «tü sikikat». Jamüsüjaʼa tü wetsiikulokot 5 otta 6 aküjasü süchiki tü Juya Miyoʼu eejatkat nükalioʼu Noé. Ajaʼttinnüshii na wayuu eejanakana soʼu tia, nnojotpejeʼe ajaʼttinnüin tü Mmakat. Tü sajaʼttirakat tü Juya Miyoʼusükat soʼu tia naya na wayuu mojulaakana eejanaka saaʼu tü mmakat (Génesis 6:11). Otta müsia ajaʼttinnüsü tü sirumatuʼu eejatkat. Tia, nayaakuasü na aluwataakana saaʼu wayuu soʼu kaʼikat tia. Nnojotyülia ajaʼttinnüin tü Mmakat naya neʼe ajaʼttakana wayuu mojulaashiikana. Soʼunnaa sajaʼttinnüin mmakat soʼu tia, nia neʼe Noé oʼttaakai nümüiwaʼa sümaa nüpüshi jee wainmashii wayuu süchikuaʼaya sutuma nüikeyuu (Génesis 8:15-18).

 Maʼaka sajaʼttinnüin tü wayuu mojulaasükalüirua sutuma tü Juya Miyoʼusükat, tü siki süküjeekat achiki 2 Pedro 3:7 sajaʼttireeria tü wayuu mojulaasükalüirua, nnojoleetpejeʼe sajaʼttirüin tü Mmakat. Nüküja achiki Maleiwa eejeerüin wanee sirumatuʼu jeketü otta müsia wanee Mma jeketü eejeetkat aluʼu loto akuwaʼipa (2 Pedro 3:13). Tia «mma jeketü» aküjünakat achiki naya na wayuu eejeenakana otta müsia tü sirumatuʼukat shia tü Aluwatawaa eejeetkat nutuma Maleiwa aneetka atuma tü Mmapaʼakat otta eejeetkat atuma jimata aaʼin (Alateetkat Mapeena 21:1-4).