Nnojo. Wanaʼlapa waneirua koopia sümaiwajatü sümaa tü eekat maaʼulu yaa, antüna anainrü pansaain tü sümakat tü Bibliakat. Mayaainjeʼe sülatüirüin watta saalii juya otta süshajünüin sünain kasa jookat süpüla ajaʼttaa.

 Antüna anainrü watta saalii koopia ashajuushika suluʼujee tü Bibliakat. Mayaainjeʼe nnojoluin wanaawain süshajia, nnojotsü aʼwanajaain tü nüküjeekalü achiki Maleiwa. Eepejeʼe waneinnua wayuu aʼwanajaweekana tü nünüikikat Maleiwa. Wekirajaweerü anain piamasü kasa süchiki tia.

1.   Suluʼu waneirua Biblia sümaiwajatü, nashajüin suluʼu 1 Juan 5:7 niainya neʼe Maleiwa chi nüchonkai jee tü nüpülainkat. Nnojotpejeʼe müin shia sünain tü koopiairua sümaiwajatkat, ashajuushi neʼe shia mapa. a Müsüjeseʼe nnojoluin shia suluʼu tü Biblia eekat maaʼulu.

2.   Ashajünüsü nünülia Maleiwa suluʼu watta saalii koopia sümaiwajatü sünainjee tü Bibliakat. Shiasaʼa suluʼu waneirua Biblia, aʼwanajaanüsü nünülia Maleiwa süka «Señotkai» jee «Maleiwa».

 Süka jouluin maʼin maaʼulu yaa sukoopiain Bibliairua, mapüleesat ayaawataa saaʼu müleka suʼwanajaanüle wanee pütchi suluʼujee. b Sükajee tüü, ¿eesüche süpüla weʼitaain waaʼin sünain pansaain maʼin tü sümakat tü Bibliakat maaʼulu yaa?

•   Süchiki tü karaloʼuta ashajuushikat süka Hebreo (tü Antiguo Testamento münakat), müsü nünüiki wanee ekirajaai süchiirua sukuwaʼipa tü Bibliakat, William Henry Green: «Nnojotsü eein wanee karaloʼuta sümaiwajatü eekai anain maʼin sukoopiain maʼaka saaʼin tüü».

•   Chi ekirajaaikai süchiirua sukuwaʼipa tü Bibliakat Frederic Bruce, müsü nünüiki süchiki tü ashajuushikat süka Griego jee Nuevo Testamento: «Tü koopiairua ousütünaka anain süchiki tü Nuevo Testamento, wainmaleesia maʼin shia suulia waneirua karaloʼuta ashajuushika wanaapünaa sümaa tia, nnojotpejeʼe jamajüin sünüiki wayuu süchiki tia».

•   Sir Frederic Kenyon wanee wayuu ekirajaai süchiirua sukoopiain tü Bibliairua sümaiwajatkat, müsü nünüiki: «Eeshi süpüla niʼitaain naaʼin wanee wayuu sünain nünüikin Maleiwa tü sümakat tü Bibliakat süka pansaain maʼin tü sümakat, mayaainjeʼe sülatüirüin wainma juya süchikijee tia».

•   Na judío jee na anoujashii akopiaajakana tü sümakat tü Bibliakat, ayatüsia nashajüin süchiki tü saainjalakat tü nupueulosekat Maleiwa, nnojotsü naʼwanajüin tü sümakat (Números 20:12; 2 Samuel 11:2-4; Galacia 2:11-14). c Nashaja namüsia süchiki moonooloin naya nümüin Maleiwa jee süchiki waneirua pütchi nnojotka pansaain sümaa tü nuluwataakalü anain Maleiwa (Oseas 4:2: Malaquías 2:8, 9; Mateo 23:8, 9; 1 Juan 5:21). Sükajee nnojoluin naʼwanajaain tü nakopiaajakat, atüjaana aaʼulu wayuuin loto akuwaʼipachii naya jee kojutuin namüin tü nünüikikat Maleiwa.

•   Nnojotsü nuuʼuleʼerüin Maleiwa suʼwanajaanüin tü sümakat tü Bibliakat süka nünüikin shia (Isaías 40:8; 1 Pedro 1:24, 25). d Keeʼireesü naaʼin Maleiwa jaloulinjatüin wamüin tü sümakat tü Bibliakat, nnojotsü neʼe jaloulinjatüin sümüin wayuu sümaiwajannuu (1 Corinto 10:11). Anuu sünüiki tü Bibliakat: «Aamasü maʼi wamüin süpüshua tü pütchi ashajünakat paala suluʼu tü karaloukta nüchikimaajatkat Maleiwa süpüla wekirajaajiraain sünain. Müleka weʼrüle müliaa, akaaliijünüshii waya sütüma tü pütchikat süpüla süchecherüinjatüin waaʼin suʼutpünaa tü müliaakat. Je müleka süshapajaale waaʼin sünain waʼatapajüin tü naaʼinrüinjateetkat chi Maleiwakai wamüin, katsüinsü waaʼin sütüma tü pütchikat sümaʼinruʼu waʼatapajüin» (Roma 15:4).

•   Nnojotsü wainmajüin naaʼin Jesús namaa na nikirajüinkana müleka pansaale tü pütchi nachuntakat suluʼujee tü ashajuushikat süka Hebreo (Lucas 4:16-21; Aluwataaushikana [Hechos] 17:1-3).