Aneerü naaʼin wanee wayuu nütüjaale saaʼu tü sümakat tü Bibliakat. Jülüjashii naaʼin Maleiwa na nüchepchia ayuuikana. Anuu tü sümakat tü Bibliakat: «Ayuuire nia, aaʼinmajüneechi nutuma Jehová; piiʼirateerü nuʼula soʼunnaa ayuulin nia» (Salmo 41:3). Anuu apünüin kasa anaka süpüla paaʼinrüin mepire ayuulii pünain:

1.   Puʼuraaja süpüla katsüin paaʼin. Naapeerü Maleiwa pümüin «wane anaa»­ süpüla jutatüin paaʼin suulia shapawaa aaʼin. Katsüinjeerü paaʼin sünainjee tü anaa naapakat Maleiwa soʼunnaa ayuulin pia (Filipos 4:6, 7).

2.   Jülüja paaʼin kasa anasü. Anuu tü sümakat tü Bibliakat: «Aneerü naaʼin chi wayuu talatakai aaʼin. Akaisaʼa chi wayuu mojukai aaʼin, matsüinjeerü naaʼin» (Proverbios 17:22, Dios habla hoy [Versión Popular]). Mayaainjeʼe mojuin tü alatakat pümüin, aneerü paaʼin talatüle paaʼin.

3.   Punouja sünain tü naaʼinrajatkat Maleiwa. Talateerü naaʼin wanee wayuu naʼatapajüle kasa anasü mayaainjeʼe ayuulin nia (Roma 12:12). Süküjain tü Bibliakat eejeerüin wanee kaʼi eere nnojoleechin «ayuuishi taya» nümüin wanee wayuu (Isaías 33:24). Soʼu kaʼikat tia, alateerü nutuma Maleiwa tü ayuulii mepikat sümaʼana wayuu otta tottoonnuu. Jamüsüjaʼa, saashin tü Bibliakat, na laülaainnakana jimaʼaliijeena nachikuaʼa: «Kasataalejeseʼe anain nia nüchikuaʼa suulialeʼeya jimaʼaliiwaʼaya nia; kasataalejeseʼe nütchinruʼuin nia maʼakaapuʼu jimaʼaliiwaʼaya nia» (Job 33:25).

 Noota: Mayaashiijeʼe wanoujain waya Aküjaliikana pütchi sünain nükaaliinjeenain waya Maleiwa, watüjaa aaʼu weʼrajeʼerüinjanain sümaʼana tottoonnuu ayuuire waya (Marcos 2:17). Nnojoliipajaʼa «anasü tüü», «payala tüü» makuʼu müin waya süchiki wanee wunuʼu, jama watüjaain saaʼu shiain anain aluʼu neʼrajeʼerüle na wayuukana sümaʼana tottoonnuu.