«Chi Nüchonkai Maleiwa» münawaishi Jesús suluʼu tü Bibliakat (Juan 1:49). Sükajee tü pütchikat «chi Nüchonkai Maleiwa» makat, wayaawata aaʼu niain Maleiwa Kakumalain kasa süpüshuaʼa otta niain Shikiin tü kataakalü oʼuu, nukumajüinjeseʼe Jesús (Salmo 36:9; Alateetkat Mapeena [Apocalipsis] 4:11). Mayaapejeʼe kachooin Maleiwa, nnojotsü süküjain tü Bibliakat kachooin nia maʼaka naaʼin na kaʼwayuuseshiikana. Naata sukuwaʼipa süpüla kachooin nia.

 Saashin tü Bibliakat, nüchonnii Maleiwa na aapiee chakana iipünaa (Job 1:6). Otta müsia süküjain nüchoin Maleiwa chi palajachikai wayuu, chi Adánkai anülia (Lucas 3:38). Süküjapejeʼe tü Bibliakat niain Jesús chi Nüchon Maleiwa alanaʼleekai sünain kojutuin süka niain nukumajüin palajana otta nnojoishi jaraliin eejachin nümaa Maleiwa sünain akumajaa Jesús.

•  ¿Chajaiche Jesús chaa sirumatuʼu süpülapünaa nüntüin yaa mmapaʼamüin?

•  ¿Kasa naainjapuʼuka Jesús chaa sirumatuʼu süpülapünaa nüntüin yaa mmapaʼamüin?

 Aa, süpülapünaa nüntüin yaa mmapaʼamüin chapuʼushi nia iipünaa eere chi Maleiwakai. Anuujeseʼe nünüiki Jesús: «Ashakatüshi taya yaamüin chajee iipünaajee» (Juan 6:38; 8:23).

 Nia Jesús chi palajachikai nukumajüin Maleiwa. Anuu tü sümakat tü Bibliakat nüchiki Jesús:

•   Nia «chi palajachikai nukumalain Maleiwa» (Colosas 1:15, TNM).

•   Nia nukumajatüjüikaʼaya palajana süpülapünaa kasakat süpüshuaʼa (Alateetkat Mapeena 3:14, TNM).

 Ekeraajüsü nutuma tü pütchi aküjünatüjütkalia süchiki eetüjülin nia süpülapünaa kasa süpüshuaʼa (Miqueas 5:2; Mateo 2:4-6).

 Kojutusü maʼin tü niʼyataapuʼukalü anain chaa sirumatuʼu. Anuu tü nuchuntakat Jesús nümüin Maleiwa süchiki tia aʼyatawaakat: «Taataa, anakaja müleka kojutüle taya pütüma [...] maa aka kojutpüʼüin taya pütüma sümaiwa paala nnojolüiwaʼaya sükumajünüin tü kasakat süpüshua» (Juan 17:5).

 Aʼyataajiraashi nia nümaa chi Nüshikai sünain akumajaa süpüshuaʼa tü kasakalüirua. Eejachi Jesús sünain nukumajiraain süpüshuaʼa tü kasakalüirua wanaa nümaa Maleiwa (Proverbios 8:30). Anuu tü sümakat tü Bibliakat nüchiki Jesús: «Jee nükajee niakai akumajünüsü süpüshuaʼa tü kasakalüirua chaa iipünaa jee müsia yaa mmapaʼa» (Colosas 1:16).

 Nukumajüin Maleiwa nükajee Jesús süpüshuaʼa tü kasakalüirua, tü shiʼrakat wayuu jee tü nnojotkat shiʼrüin maʼaka naaʼin na aapieekana (Alateetkat Mapeena 5:11). Aʼyataajiraashi Jesús nümaa Maleiwa maʼaka niʼyataajiraain wanee kuʼyamai piichi nümaa wanee arquitecto. Chi arquitectokai nüküjain jamüinjatüin sukumajia tü piichikat süpüla naainjainjatüin shia mapa chi kuʼyamaikai.

 «Pütchi» münüshi. Saashin tü Bibliakat, «Pütchi» münapuʼushi Jesús süpülapünaa nüntüin yaa mmapaʼamüin (Juan 1:1). Nükajee chi Nüchonkai nüküjain Maleiwa namüin na aapieekana tü naainjainjatkat otta waneirua kasa natüjaainjatka aaʼu.

 Akaʼaya nia, nünüikimaajachi Maleiwa namüin na wayuukana. Eeshijaʼa niale nünüikeʼejachin Jehová wanaa sümaa nüküjain nümüin Adán sümaa Eva tü naainjainjatkat soʼu chajanain naya suluʼu tü apainkat Edén (Génesis 2:16, 17). Eeshijaʼa niale Jesús chi aapiee oʼunirakai na israeliitakana nalatapa tü anoouishiikat otta eeshijaʼa niale noonooinjachin amaa anüiki (Éxodo 23:20-23). a