Nnojotsü shiain tia. Süküjain tü Bibliakat nnojoluin mojuin tü nneetkat jee shiain eeka atuma tü mojulawaakat. Eesü wanee pütchi makat mayaa «shia kasitka tü nneetkat süpüshuaʼa tü kasa mojusü alatakat», sünüiki tia tü Bibliakat saashin wayuu. ¿Shiimainchejeʼe tia? Nnojo. Anuusaʼa sünüiki tü Bibliakat: «Wainma tü kasa mojusü alatakat namüin na wayuu kachiiruakana aaʼin washirüü» (1 Timoteo 6:10).

•  ¿Kasa süküjaka tü Bibliakat süchiki tü nneetkat?

•  ¿Jamüsü mojukaʼa maʼin kachiiruale waaʼin washirüü?

•  Tü weʼrakat sünainjee woonooin sümaa sünüiki tü Bibliakat

•  Tü sümakat tü Bibliakat süchiki tü nneetkat

 Süküjain tü Bibliakat aneerüin wakuwaʼipa anale watuma sukuwaʼipa tü nneetkat (Eclesiastés 7:12). Aküjünüsü suluʼu Bibliakat anakuwaʼipalin wanee wayuu eekai nüsülajülin jee nükaalinjain na wayuukana süka tü nneerü nümaʼanakat (Proverbios 11:25).

 Süküjapejeʼe tü Bibliakat nnojoluinjatüin shiain waaʼinmaain maʼin tü nneetkat. Anuu tü sümakat Hebreokana 13:5: «Nnojo kachiiruain jaaʼin washirüü, talata jaaʼin sümaa tü kasa eekat jümaʼana». ¿Kasa watüjaka sünainjee tia pütchikat? Shia nnojoluinjatüin waaʼinmaain maʼin tü nneetkat. Anainjatü waaʼin sümaa tü kasa eekat wamaʼana: maʼaka saaʼin tü weküinkat, tü washeʼinkat otta eere kepiain waya (1 Timoteo 6:8).

 Na wayuu keeʼireekana aaʼin naata kakorotshi nnojoleerü katüin noʼu waneepia (Éfeso 5:5). Na wayuu keeʼireekana aaʼin naata kakorotshi müshii naʼwaajakai aaʼin maleiwayaasü (Colosas 3:5). Otta nnojotsü naainjain tü anakat nümüin Maleiwa sutuma keeʼireein naaʼin naata kakorotshi. Shiaʼaya süküjaka tia Proverbios 28:20 «chi wayuu washireemaatakai, atüjaaneerü aaʼu tü kasa mojusü naainjakat». Eesüjaʼa nimeejeere wayuu saaʼu sünneetse, nuchuntule nneerü saaʼu nuunjulajüin süchiki wanee kasa, nütaʼürüle wayuu süpüla nuchuntuin nneerü saaʼu saakajiria jee shiale nuʼutuin saaʼin wayuu.

 Mayaainjeʼe nnojoluin waainjain wanee kasa mojukat maʼin, eesü süpüla mojuin wakuwaʼipa kachiiruale waaʼin washirüü. Müsü sünüiki tü Bibliakat: «Na wayuu kachiiruakana aaʼin washirüü, oonooshii naya sümaa tü kasa ooʼulakünakalü aka naaʼin jee müsü sütaʼülakai saaʼin nakuwaʼipa tia makat, eʼrüshii naya müliaa sutuma tü kasa mojusü suchuntaakat naaʼin, jama nnojoluin nayaawatüin saaʼu nakuwaʼipa» (1 Timoteo 6:9).

 Aneerü wakuwaʼipa otta talateechi Maleiwa wamaa kojutule wamüin tü nümakat jee nnojorüle waainjain wanee kasa mojusü süpüla wamaʼanamaatüin nneerü. Anuu tü naainjainjatkat wapüleerua kojutule wamüin tü nümakat: «Nnojoleechi pia tapütüin pümüiwaʼa» (Hebreokana 13:5, 6). Otta müshi niaya: «Chi wayuu waneepiakai nümaa Maleiwa, aapüneechi amüin kasa anasü» (Proverbios 28:20).