Nünüiki Maleiwa münüsü tü Bibliakat. Nnojotsü pütchin neʼe ashajuushi. Anuu sünüiki tü Bibliakat: «Aapünüsü tia pütchikat wamüin waya anoujashiikana wapüshua nütüma chi Naaʼinkai Maleiwa» (2 Timoteo 3:16). Wainma tü kasa watüjaakalü aaʼu sünain shiimain tü sümakat tia pütchikat. Anuu waneirua:

•   Nnojoishi eeichin wanee wayuu eeʼiyatakai alawaain tü sümakat tü Bibliakat, ekeraajüsü tü aküjünakat sümaiwa paala.

•   Na wayuu ashajakana tü Bibliakat, nnojotsü nounjulajüin süchiki wanee kasa, jaʼitairü shiain tü kasa mojusü naaʼinrakat, nashajüinya shia. Sükajee müin nakuwaʼipa, eesü süpüla wanoujain sünain tü sümakat tü Bibliakat.

•   Pansaasü maʼin tü sümakat tü Bibliakat. Süküjain wamüin niainjachin Maleiwa aluwataain nüchikuaʼa naaʼu na wayuukana otta sükajee tü Nuluwataayakat, nikeraajeerü tü keeʼireekat naaʼin süpüleerua tü Mmakat.

•   Mayaapejeʼe kakaliairüin ashajuushin tü Bibliakat, pansaasü maʼin tü sümakat suulia tü namakat na científico eejanakana namaiwa.

•   Wainma maʼin pütchi ekeraajüitpaka suluʼujee tü Bibliakat.