Oiko aja pe gérra Ucrániape, heta líder rrelihióso omboliga umi héntepe oñemoĩ hag̃ua peteĩva ládo. Emañamína mbaʼéichapa umi líder rrelihióso oapoja chupekuéra ko ñorairõme:

•   Pe metropolitano Epifanio Primero de Kiev heʼi: “Ñamombaʼe ha jaagradese entéro umi ñande gerrérope, odefendéva ipaís Ucrániape iñenemigokuéragui [...]. Roñemboʼe penderehe, peime ore korasõme ha siémpre perekóta ore apójo” (Jerusalem Post, 16 de marzo de 2022).

•   “Pe omoakãva pe Iglésia ortodoxa Rusiapegua ojapo kuri pe domingo peteĩ servísio rrelihióso espesiál umi soldádo rúsope g̃uarã. Omokyreʼỹ chupekuéra odefende hag̃ua ipaís ‘umi rúsonte ojapokuaaháicha’, ha upe aja Moscú osegi gueteri ikampáña militár Ucrániape” (Reuters, 3 de abril de 2022).

 ¿Iporã piko kristianokuéra oapoja umi gérra? ¿Mbaʼépa heʼi la Biblia?

 La Biblia ohechauka porã umi añetehápe osegíva Jesucrístope, ndohói vaʼerãha gerrahápe.

•   “Eñongatu jey nde espáda, pórke entéro umi oipurúva pe espáda hapicha kóntrape, ojejukáta espádape” (Mateo 26:52).

   Peteĩ persóna oapojáramo pe gérra térã ñorairõ, ¿iñeʼẽrendúpa hína Jesúspe?

•   “Ameʼẽ peẽme peteĩ mandamiénto pyahu: pejoayhu vaʼerã. Che pohayhu haguéicha, peẽ pejoayhu vaʼerã avei. Peẽ pejoayhúramo, entéro umi hénte oikuaáta peẽ haʼeha che disípulo” (Juan 13:34, 35).

   Peteĩ persóna oapojáramo pe gérra, ¿ohechaukápa ohayhuha hapichápe Jesús omanda haguéicha ojapo vaʼerã idisipulokuéra, oséa entéro osegíva chupe?

 Eikuaasevéramo ko témagui elee ko informasión: “Ohovaʼerãpa gerrahápe umi oservíva Ñandejárape?”.

 ¿Ikatu piko añetehápe kristianokuéra okumpli la Biblia heʼíva ha ndoapojái umi gérra? Si ikatu. Ñandejára Ñeʼẽ heʼíma vaʼekue voi ke “umi ára pahápe”, oséa ko ñane tiémpope, oĩtaha hénte diferénte paisgua ojapóva la Jesús heʼi vaʼekue. La Biblia heʼi: “Noñemboʼemoʼãvéima chupekuéra mbaʼéichapa oñorairõ vaʼerã” (Isaías 2:2, 4).

•   Eikuaave hag̃ua, elee umi artíkulo osẽ vaʼekue Ñemañaháme hérava: “¿Mbaʼépa Ñandejára opensa umi gérrare?”.

 Koʼẽrõitéma Jehová, a haʼéva “Ñandejára omeʼẽva pyʼaguapy”, oguerúta Irréino yvagapegua. ¿Mbaʼépa ojapóta ko Rréino? La Biblia heʼi: “Heta hénte osufri umi governánte iñañáva poguýpe, péro pe rréi osalváta chupekuéra” (Filipenses 4:9; Salmo 72:14).

•   Ehechamína mbaʼéichapa oikóta upéva, ko vidéo héravape: ¿Mbaʼépa hína Ñandejára Rréino?