Pe marzo de 2020, pe Organización Mundial de la Salud heʼírõ guare pe COVID-19 haʼeha peteĩ pandémia, oiméne oĩ saʼi opensáva raʼe ohotaha hese mas de un áño ha ohupytytaha ko múndo tuichakuére. Ko pandémia káusare ningo hetaiterei tapicháma ohasa asy ivai rupi pe situasión, ha umíva apytépe oĩ avei heta testígo de Jehová. ¿Mbaʼéichapa oñeorganisa umi testígo de Jehová ikatu hag̃uáicha oipytyvõ umi iñermanokuérape ko situasión ijetuʼuetévape?

 Pe Komite de Koordinadór del Kuérpo Governánte de los testigos de Jehová omoĩ mas de 950 Komite de Sokórro ko yvy tuichakuére, ikatu hag̃uáicha oñepytyvõ umi ohasa asývape pe pandémia káusare. Koʼã komite oipytyvõ umi ermáno oikotevẽvape, ha oĩ avei umi oaseptáva umi ajúda omeʼẽva pe goviérno. Jahechamína koʼág̃a mbaʼéichapa umi Komite de Sokórro oorganisa umi ajúda ikatu hag̃uáicha oñepytyvõ umi oikotevẽvape ko múndo tuichakuére.

 Jahechamína mbaʼépa oiko Paraguáipe. Peteĩ diário heʼi: “Heta paraguáyope ijetuʼueterei ohupyty hag̃ua la hoʼumi vaʼerã ivai rupi pe situasión ekonómika pe pandémia káusare”. Péro pe Komite de Sokórro Paraguaipegua oñepyrũma kuri orreparti umi kit de aliménto ikatúva oipuru 2 semánare peteĩ família oĩva éntre 4. Káda kit de aliménto ovale amo 200.000 guaranírupi, ha oĩ avei pype umi artíkulo de limpiésa.

 ¿Mbaʼépa ojapo umi voluntariokuéra ikatu hag̃uáicha ojeprotehe pe COVID-19-gui ha péicha oprotehe umi ótrope? Haʼekuéra oipuru tapavóka, omantene pe distánsia físika, ha ojasegura umi oproveéva chupekuéra umi aliménto ombaʼapoha umi lugár ipotĩháme ha osegiha umi nórma de segurida. Umi opreparátava umi kit de aliménto katu oipuru umi ekípo de proteksión personál, odesinfekta ha omopotĩ pe veíkulo oguerahátava umi kit de aliménto, ha oñongatu umi kit peteĩ depósito oñedesinfekta porã vaʼekuépe. Upéi umi orrepartíva umi kit omantene pe distánsia físika oñentregáta jave umíva umi ermanokuérape.

 Enero de 2021-pe g̃uarã pe Komite de Koordinadór oaprova oipurutaha mas de 170.000 millón de guarani, oipytyvõ hag̃ua umi ermáno oĩvape afektádo pe pandémia káusare. Umi sukursál ha umi Komite de Sokórro oñatende porã ikatu hag̃uáicha oipuru porã umi donasión ojoguáta jave umi prodúkto oĩ vaʼerã pe kit de aliméntope. Por ehémplo Chílepe, umi ermáno voluntário ojoguase kuri 750 kílo de lentéha, péro upe méspe tuichaiterei ojupi pe lentéha présio ha umi ermáno ojoguátama kuri upe présio pyahúpe. Péro upéi, 2 óra rire, pe vendedór oavisa chupekuéra peteĩ kompradór odevolvepa jey hague umi lentéha ojogua vaʼekue, upévare koʼág̃a ovendéta chupekuéra ipresiokuépe umi lentéha.

 Upéi, umi ermáno ohótarõ guare ogueru umi lentéha pe vendedór heʼi chupekuéra okanselataha pe tráto. Heʼi hesekuéra iñinhustoha orreparti jave umi kit de aliménto ha ojoguaha umi ótra organisasiónpe ojapóva avei upéicha. Peteĩva umi ermáno oñemboʼe mbykymi ipyʼapýpe, ha upe rire heʼi pe vendedórpe umi kongregasión ohecháma hague mávapa oikotevẽ añetehápe umi kit de aliménto. Umi ermáno oexplika avei chupe oprepara jave umi kit de aliménto oguerahaha enkuénta mbaʼépa oikotevẽta káda família oreko rupi diferénte kultúra. Upéicha rupi ikatúta oñemoĩ pype umi mbaʼe añetehápe oikotevẽtava hikuái. Avei oexplika porã chupe hikuái umi traváho ha umi donasión orresivíva umi testígo de Jehová haʼeha voluntário. Upéva oimpresionaiterei pe vendedórpe ha omantene pe kontráto, ha pe sigiénte pedídope odona chupekuéra 400 kílo de lentéha.

 Lusu haʼe peteĩ ermána viúda ijedámava oikóva Libériape, ha haʼekuéra oiko éntre 6 la hógape. Peteĩ pyhareve orambosa ha olee aja hikuái pe téxto diário, peteĩ inietoʼi de 7 áño ohechakuaa ndaiporiveimaha tembiʼu pe ógape, ha upévare oporandu chupe: “Avuéla, ¿ha koestedía mbaʼe jakarúta?”. Ijavuéla otrankilisa hag̃ua chupe omombeʼu haʼe oñemboʼéma hague Jehovápe ikatu hag̃uáicha oipytyvõ chupekuéra. Upe kaʼarúpe voi umi ansiáno ohenói Lúsupe ha heʼi chupe oho hag̃ua orretira umi aliménto ifamíliape g̃uarã. Lusu omombeʼu: “Che niéto ohecha rupi mbaʼéichapa Jehová okontesta che ñemboʼe, haʼe koʼág̃a oĩma segúro Jehová ohenduha umi ñemboʼe jajapóva chupe”.

 Peteĩ kuñakarai oikóva República Democrática del Cóngope, ohechávo umi ivesinokuéra haʼéva testígo de Jehová orresiviha umi kit de aliménto heʼi: “Ohasapa rire ko pandémia oikóta ñandehegui testígo de Jehová pórke haʼekuéra ojepreokupa iñermanokuérare koʼã tiémpo ijetuʼuetévape”. Upémarõ iména heʼi chupe: “¿Oikóta ndehegui testígo de Jehová una vólsa de arro rehe?”. Ha haʼe heʼi chupe: “Nahániri, péro pe arro vosa ohechauka mbaʼéichapa haʼekuéra ojoayhu añete”.

 Umi donasión peẽ pejapóva rupive, umi testígo de Jehová ikatu oipytyvõ pyaʼe umi ermáno oikotevẽvape ko pandémia aja. Roagradeseterei ningo peẽme umi donasión peẽ pejapóva peipurúvo umi diferénte método jatopáva pe párte heʼihápe donate.pr418.com.