“Ndaʼareiete, ni nañaimoʼãi kuri ikatutaha jarresivi pe aliménto espirituál Internet rupive”. Péicha heʼi vaʼekue ermáno Geoffrey Jackson pe sexto infórme omeʼẽvape pe Kuérpo Governánte áño 2020-pe. ¿Ndépa repensa avei upéicha? Ha upéi heʼive: “Péro koʼág̃a, posívlemente ñapensa hína mbaʼépa oikopa vaʼerãmoʼã ñandehegui ko pandémia aja ndajarekóirire JW Library. Jehová areterei guivéma ñandeprepara ñambohovái porã hag̃ua koʼãichagua situasión”.

 ¿Mbaʼéichapa Jehová ñandeprepara hína raʼe? ¿Mbaʼépa oñekotevẽ raʼe ikatu hag̃uáicha ojejapo pe aplikasión JW Library? ¿Ha mbaʼépa oñekotevẽ ikatu hag̃uáicha oñemantene al día ko aplikasión ha ojejapo mimi chupe umi kámbio oikotevẽva?

 Mayo 2013-pe Kuérpo Governánte onkarga pe Programasión de MEPS-pe, haʼéva peteĩ departaménto oĩva pe sentrál mundiálpe, ojapo hag̃ua hikuái peteĩ aplikasión oguerekóva pype pe Traducción del Nuevo Mundo. Paul Willies ombaʼapóva ko departaméntope heʼi: “Ore ningo núnka ndorojapóiva peteĩ aplikasión peichagua, ha rojapo hag̃ua tekotevẽ kuri romboyke algúno projékto roguerekóva, roarma peteĩ ekípo ha rombaʼapo umi ótro departaménto oĩvandi avei Betélpe. Heta roñemboʼe kuri Jehovápe, ha rohecha mbaʼéichapa haʼe orepytyvõ pórke 5 mése haguépente oĩmbáma kuri ko aplikasión, ha oñepresenta pe rreunión anuálpe”.

 Upéi rojecha peteĩ situasión ijetuʼuvévape, rojapo vaʼerã pe aplikasión JW Library-gui peteĩ vivliotéka oĩtahápe hetave puvlikasión heta idiómape. Enero 2015-pe ko aplikasión oguerekóma kuri la majoría umi puvlikasión ingléspe, ha 6 mése upe rire ikatúma kuri ojedeskarga koʼã puvlikasión hetave idiómape.

 Umi ñane ermanokuéra ombaʼapo jejopy ikatu hag̃uáicha pe aplikasión osegi omehora ohóvo. Por ehémplo, koʼág̃a oguerekóma umi videokuéra, ha ikatúma avei jajeprepara pype rreunionrã. Ha avei ikatúma jaheka umi rreferénsia oĩva peteĩ versíkulo bíblicope g̃uarã jaipurúvo pe puvlikasión Gía oipurúva testígo de Jehová.

 Káda mes 15 millón rasa oĩ oipurúva pe aplikasión JW Library ha umíva apytégui 8 millón oipuru káda día voi. ¿Mbaʼépa oñekotevẽ ikatu hag̃uáicha ko aplikasión ofunsiona porã, jepe oĩ hetaiterei oipurúva? Ermáno Paul Willies oexplika: “Ko aplikasiónre ningo siémpre oñembaʼapo vaʼerã. Por ehémplo, rosegi romoĩve pype umi funsión pyahu ha roñehaʼãmbaite ikatu hag̃uáicha ko aplikasión ifasilve ohóvo ojepuru hag̃ua. Umi dispositívo elektróniko pyʼỹinte ojeaktualisa rupi, ore tekotevẽ avei rombaʼapo pe aplikasión rehe ikatu hag̃uáicha ofunsiona porã umi dispositívo ipyahuvévape. Ha káda ves ojekarga rupi hetave gravasión ha puvlikasión JW Library-pe, tekotevẽ avei ore roaktualisa ha romantene porã pe aplikasión”. Koʼág̃arõ g̃uarã pe aplikasión JW Library oguereko amo 200.000 puvlikasión ha 600.000 rasa gravasión de áudio ha vidéo hetaiterei idiómape.

 Ojejapo hag̃ua ko projékto tekotevẽ kuri ojepuru heta komputadóra, selulár ha umícha. Péro ndahaʼéi upévante la ifáltava, pórke tekotevẽ kuri avei ojejogua heta prográma de komputadóra. Ha peteĩva koʼã prográmarente voi ojepaga 1.500 dólar al áño (mas de 10 millón de guarani). Avei pe departaménto de Programasión de MEPS ogasta amo 10.000 dólar rupi (68 millón de guaranírupi) ojogua hag̃ua umi dispositívo de diferénte márka káda áño. Koʼãva ojepuru ojeprova hag̃ua pe aplikasiónpa ofunsiona porã umi komputadóra, távlet ha teléfono ipyahuvévape.

 Ojepuru rupi pe aplikasión JW Library tuichaiterei ojeaorra, pórke koʼág̃a saʼivéma oñeimprimi ha oñeenvia umi puvlikasionkuéra. Jahechamína por ehémplo pe folléto Ñahesaʼỹijo Ñandejára Ñeʼẽ ára ha ára. Pe áño 2013-pe oñeimprimi kuri haimete 12 millón voi ko folléto, péro pe áño 2020-pe oñeimprimi sólamente 5 millónrupi, oĩvéramo jepe amo 700.000 puvlikadór ko yvy tuichakuére. ¿Mbaʼéicha rupípa upéva? Pórke koʼág̃a la majoría umi ermanokuéra oipuru pe aplikasión JW Library olee hag̃ua pe téxto káda diagua. a

 JW Library ikatu ideprovécho ndéve heta hendáicha. Por ehémplo Geneviève, oikóva Canadápe heʼi ko aplikasión oipytyvõha chupe ostudia porãve hag̃ua la Biblia. Haʼe heʼi voi: “La tekotevẽta guive aguenohẽ umi livrokuéra aguerekóva astudia hag̃ua ndajapomoʼãi kuri upéva káda pyhareve. Péro ko aplikasión rupive tuichaiterei ifásil chéve pórke amyendýntema la che távlet ha upépe ja arekopaitéma la aikotevẽva ikatu hag̃uáicha astudia porã. Astudia meme rupi la Biblia, chepytyvõ che jerovia imbareteve hag̃ua ha avei péicha añemoag̃uive Jehováre”.

 Ko aplikasión ningo ideprovechoiterei koʼytevéntema ko pandémia aja. Charlyn, oikóva Estados Unídospe heʼi voi: “Ko pandémiape che aretereíma ndahechavéi hague umi puvlikasión impréso, péro areko rupi pe aplikasión JW Library arekopaite umi mbaʼe aikotevẽva ikatu hag̃uáicha astudia porã la Biblia. ¡Aagradeseterei ningo Jehovápe ko rregálo porãitére!”.

 Oiméne ñaime de akuérdo ko heʼívare Faye oikóva Filipínaspe, haʼe heʼi: “Ko aplikasión ningo ndaijojahái, orekopaite umi mbaʼe aikotevẽva ikatu hag̃uáicha añemoag̃ui Jehováre. Aipuru pyharevete alee hag̃ua umi puvlikasión, avei ahendu hag̃ua umi áudio cherembiapo aja, aipuru ajeprepara hag̃ua rreunionrã ha astudia hag̃ua la Biblia. Che tiémpo lívrepe aipuru ikatu hag̃uáicha ahecha umi videokuéra, avei aime jave umi fílape ahaʼarõ aja aaprovecha ikatu hag̃uáicha alee umi puvlikasionkuéra ha avei la Biblia. ¡Añetehápe ko aplikasión ivaliosoiterei!”.

 Ko aplikasión oikoite avei japredika hag̃ua. Peteĩ ermána oikóva Camerúnpe omombeʼu ogustaiterei hague chupe peteĩ téxto oipuru vaʼekue pe ikompañéra de predikasión. Ha tiémpo rire haʼe oĩ aja predikasiónpe oipuruse avei upe téxto, péro hesarái mbaʼe partetépa oĩ. Haʼe heʼi: “Haʼetépe chemanduʼa peteĩ fráse pe téxtogui, upémarõ aavri pe aplikasión aike pe Bíbliape ha amoĩ pe fráse chemanduʼáva pe lupaʼi raʼangápe, ha ensegída voi atopa pe téxto. Ko aplikasiónpe ikatu atopa umi téxto bíblico heta vése cheresaráiva mbaʼe partetépa oĩ”.

 Umi donasión peẽ pejapóva rupive ikatu kuri ojejapo, oñemantene al día ha ojesegi oñemehora pe aplikasión JW Library. Upearã peipuru umi diferénte método jatopáva pe párte héravape donate.pr418.com. Ha péicha heta ñane ermanokuéra oikóva ko múndo tuichakuére oñevenefisia ko aplikasióngui. ¡Roagradeseterei ningo peẽme pendepojeraiterei haguére!

1. Octubre 2013: Oñeguenohẽ ko aplikasión, ha oreko pe Traducción del Nuevo Mundo inglespegua

2. Enero 2015: Oñemoĩ pype hetave puvlikasión ingléspe ha upe rire hetave idiómape

3. Noviembre 2015: Oñemoĩ chupe pe funsión ikatu hag̃uáicha oñemarka

4. Mayo 2016: Oñemoĩ chupe pe párte “Reuniones”

5. Mayo 2017: Oñemoĩ chupe pe funsión ojejapo hag̃ua umi nóta

6. Diciembre 2017: Oñemoĩ pype pe Biblia de estúdio inglespegua

7. Marzo 2019: Oñemoĩ pype umi funsión jadeskarga hag̃ua umi audiokuéra, jahecha hag̃ua umi vidéo en línea, ha avei ikatu hag̃uáicha jahecha umi rreferénsia oĩva pe puvlikasión héravape Gía ipurúva testígo de Jehová

8. Enero 2021: Oñemoĩ pype umi funsión ipyahúva ikatu hag̃uáicha jaipuru pype pe lívro pyahu ¡Jaikóta vyʼápe pára siémpre!