Jehová ningo omboʼeseterei isiervokuérape, upévare iñorganisasiónpe oĩ heta eskuéla ikatu hag̃uáicha oñembokatupyry umi estudiántepe okumpli hag̃ua iñasignasión. Umíva apytépe oĩ pe Eskuéla de Evanhelisadór, ha umi áño ohasa vaʼekuépe Jehová organisasión omehora pe enseñánsa ha avei umi lugár ojepurúva ojejapo hag̃ua koʼã eskuéla. ¿Mbaʼérepa? Umi estudiánte ha umi instruktór odisfrutave hag̃ua ostudiávo la Biblia. ¿Mbaʼéichapa pene kontrivusión oipytyvõ Jehová organisasiónpe ojehupyty hag̃ua koʼã mbaʼe?

 Heta áñore umi eskuéla ojejapo jepi umi Salón del Reino térã Salón de Asambléape. Péro koʼág̃arupi oñemopuʼã térã oñembopyahu unos kuánto lugár ojepurúva ojejapo hag̃ua sólamente koʼã eskuéla, ¿mbaʼérepa ojejapo koʼã kámbio? Jahechamína mbohapy rrasón.

 Oĩ hetave nesesida. Christopher Mavor, peteĩ ermáno ombaʼapóva pe Komite de Servísio del Kuérpo Governántepe, heʼi ke heta sukursál oinformaha oĩha hetaiterei nesesida. Por ehémplo, pe sukursál de Brasil año 2019-pe heʼi oñekotevẽha 7.600-rupi ojegraduáva pe Eskuéla de Evanhelisadórgui, ikatu hag̃uáicha ojekuvripa pe nesesida oĩva upe sukursál territóriope. Pe sukursál Estados Unidosgua heʼi oñekotevẽtereiha heta prekursór ikatupyrýva, ikatu vaʼerã omboʼe umi ótrope opartisipa hag̃ua pe predikasión metropolitánape, opredika hag̃ua umi puértope ha opredika hag̃ua umi kárselpe. Pe sukursál heʼi avei oñekotevẽtereiha ombaʼapo vaʼerã pe departaménto de LDC-pe ha pe Komite de Enlásendi, ha umi ojegraduáva pe Eskuéla de Evanhelisadórgui ikatu oipytyvõ koʼã mbaʼépe.

 Oĩ hetaiterei umi ohoséva. Heta sukursál ningo heʼi orresivi hague hetaiterei solisitu umi ermáno ohosévagui pe Eskuéla de Evanhelisadórpe, péro ndaikatúi oaseptapa hikuái. Por ehémplo Brasílpe, un áñope oñemondo kuri 2.500 solisitu, péro ndaipóri rupi heta lugár ojeasepta 950 solisitúnte.

 Umi lugár ojepytaha ikomodove hag̃ua. Anteve umi estudiantekuéra oasisti jave pe eskuélape umi Salón del Reino térã Salón de asambléape, opytámi umi ermanokuéra rógape. Péva ningo oĩ porã kuri umi lugár saʼihápe ojejapo umi eskuéla káda áño. Péro ojejapóramo heta vése pe eskuéla, umi ermanokuéra ndaikatuvéima orresivi chupekuéra hógape. Upévare koʼág̃a ojejapo umi lugár opyta hag̃ua umi estudiantekuéra, ha oĩva ag̃ui pe lugár oñemeʼẽhágui umi kláse. Ha koʼã lugár ojeprepara ojerekóvo enkuénta mbaʼépa oikotevẽ umi estudiánte.

 Heta ningo ojegasta vaʼerã ikatu hag̃uáicha umi 30 estudiánterupi ha umi instruktorkuéra oreko peteĩ sála de kláse, peteĩ lugár opyta hag̃ua iporãmíva ha orekopaitéva umi komodida oñekotevẽva. Ha la présio odepende jey káda sónare.

 Normálmente umi lugár ojejapotahápe umi eskuéla itrankílo vaʼerã ha noĩri vaʼerã peteĩ siuda tuichávape. Iporãve avei opytáramo ag̃ui umi lugár ohasahárupi umi kolektívo, ha oĩháme heta puvlikadór. ¿Mbaʼérepa? Ikatu hag̃uáicha haʼekuéra oipytyvõ umi traváho ojejapóvape pe eskuélape ha ojapo mantenimiénto.

 Umi lugár ojejapohápe umi eskuéla oreko jepi vivliotéka, peteĩ koty ikatuhápe oho hikuái ostudia, oĩ komputadóra, impresóra ha hetave mbaʼe. Oguereko jepi avei peteĩ komedór ikatuhápe umi estudiánte ha umi instruktór okaru oñondivepa. Ha oĩ avei lugár ikatuhápe ojejapo ehersísio ha ojediverti hikuái oñondivepa.

 Oñeñatende porã mbaʼéichapa oñediseñáta pe sála de kláse. Ermáno Troy, ombaʼapóva pe Departamento Mundial de Diseño y Construcciónpe heʼi: “Roñemongeta umi oĩvandi pe Departamento de Escuelas Teocráticaspe. Péicha roikuaa mbaʼeichagua ambiéntepa oipytyvõta umi estudiantekuérape oaprende porãve hag̃ua. Umi ermáno orepytyvõ rodiseña hag̃ua umi sála de kláse. Omombeʼu oréve mbaʼéichapa tuicha vaʼerã, mbaʼeichagua lus, ekípo de áudio ha vidéopa oñekotevẽ”. Peteĩ ermáno hérava Zoltán, haʼéva instruktór Hungríape heʼi: “Al prinsípio, ore ndoroguerekói kuri mikrófono, entónse roʼe vaʼerã umi estudiántepe hatã oñeʼẽ hag̃ua. Péro koʼág̃a roguerekóma mikrófono káda eskritóriope ha oñesolusionáma la ore provléma”.

 ¿Mbaʼéichapa koʼã mehóra oipytyvõ umi instruktór ha umi estudiántepe? Angela peteĩ ermána oho vaʼekue pe Eskuéla de Evanhelisadórpe Palm Coast, Florida Estados Unídospe, heʼi: “Ikatu ningo rostudia pyʼaguapýpe. Oñepensapaite ningo umi detállere, tahaʼe pe sála de klásepe térã pe lugár ropytahápe. Upévare ikatu roñekonsentrave rostudia hag̃ua”. Peteĩ instruktór Hungriagua hérava Csaba omombaʼeterei ikatu haguére okaru umi estudiántendi. Haʼe heʼi: “Péicha jave umi estudiánte oñeñandu porãve omombeʼu hag̃ua oréve mbaʼéichapa oñeñandu, ha umi mbaʼe ohasa vaʼekue. Upéicha rupi ore ikatu romboʼe porãve chupekuéra, asegún umi mbaʼe oikotevẽva hikuái”.

 Umi instruktór ha estudiantekuéra omombaʼeterei koʼã lugár pyahu. Haʼekuéra ohechakuaa umíva haʼeha peteĩ rregálo oúva pe “Mboʼehára Ijojahaʼỹva” Jehovágui (Isaías 30:20, 21). Peteĩ ermána Filipinasgua oho vaʼekue peteĩva umi lugár pyahu ojejapóvape pe eskuelarã, heʼi: “Pe ambiénte oĩva pe eskuélape oremomanduʼa ore ndahaʼeiha estudiánte reínte, síno roñeñandu haʼeramoguáicha Jehová invitádo. Rohechakuaa Jehová oipotaha rodisfruta rostudia porãvo Iñeʼẽ”.

 Umi donasión pejapóva jepi donate.pr418.com rupive, ojepuru ikatu hag̃uáicha oñemopuʼã, oñemyatyrõ ha oñemantene umi lugár ojepurúva koʼã eskuelarã. ¡Roagradeseterei ningo peẽme pende pojera haguére!