Umi testígo de Jehová ojepyʼapyeterei iñermanokuérare (1 Pedro 2:17). Heta ñande apytépe oñeñandu avei oñeñandu haguéicha peteĩ ermána Keniagua hérava Tannis, haʼe heʼi: “Che avyʼaiterei voi aikuaa jave mbaʼépa oiko umi ñane ermanokuérare ko múndo tuichakuére”. ¿Mbaʼéichapa ore testígo de Jehová roikuaa umi mbaʼe oikóva ko múndo tuichakuére? Upéva ikatu roikuaa pe seksión “Notísia ha Anúnsio” rupive oĩva áño 2013 guive jw.org-pe.

 Ko seksión oreko umi notísia ikatúvare jajerovia oñeʼẽva umi projékto de konstruksiónre, umi lavóres de sokórrore ha umi evénto iñimportántevare. Por ehémplo, oñepresenta jave peteĩ Biblia pyahu. Avei oñeñeʼẽ ñandéve umi ermánore oñemondo vaʼekue kárselpe, ifiél haguére Jehovápe. Ha avei upépe jatopa umi experiénsia ñanemokyreʼỹva oikóva umi kampáña de predikasión aja ha pe Konmemorasión árape. ¿Mávapa ojapo koʼã notísia, mávapa oinvestiga ha mbaʼéicha ojeprepara?

 Pe Ofisína de Informasión Púvlika (OPI) oñenkarga pe seksión de notísia ha anúnsiore. Kóva ko departaménto oĩva pe Sentrál Mundiálpe ombaʼapo pe komite de Koordinadóres del Kuérpo Governánte poguýpe ha oipytyvõ chupekuéra mas de 100 ermáno ha ermána. Koʼãvagui heta oĩ ombaʼapóva mombyry guive. Koʼã ermáno oskrivi, oinvestiga, otradusi ha onohẽ umi fóto ha vidéo. Umi mbaʼe ojapóva apytépe avei oĩ umi oñeʼẽva umi autoridándi, umi médio de komunikasión ndive ha umi profesór universidapeguándi. Avei ko múndo tuichakuére oĩ mas de 80 Departaménto de Informasión Púvlika (PID), ombaʼapóva pe Ofisína de Informasión Púvlika ndive oĩva pe Sentrál Mundiálpe.

 Pe Ofisína de Informasión Púvlika ombaʼapo ojopóre umi Departaménto de Informasión Púvlika ndive ikatu hag̃uáicha oprepara umi notísia. Haʼekuéra oikuaa jave peteĩ istória ikatúva oiko chugui peteĩ notísia, oinvestiga ha oheka umi informasión ijexáktova. Okonsegi hag̃ua upéva ojapo jepi hikuái entrevísta térã oñeʼẽ peteĩ oikuaa porãvandi. Orekopa vove hikuái umi informasión oñepyrũ oskrivi, oedita ha okorrehi pe artíkulo. Upéi omoĩ umi fotokuéra ha omondo pe Komite de Koordinadórespe ikatu hag̃uáicha ojaprova upéva.

 ¿Mbaʼépa heʼi umi ñane ermanokuéra pe seksión de “Notísia ha Anúnsiore”? Peteĩ ermána oikóva Filipínaspe hérava Cheryl, heʼi: “Chegustaiterei ningo añepyrũ pe día aleévo umi notísia oñeʼẽva ñane organisasiónre ha ñane ermanokuérare”.

 Heta ningo ohechakuaa mbaʼéichapa idiferénte umi notísia oĩva jw.org-pe ha umi omeʼẽvagui umi notisiéro. Tatiana peteĩ ermána oikóva Kazajistánpe heʼi: “Amombaʼeterei ningo mbaʼéichapa umi notísia jw.org-pe oĩva ikatu jajerovia hese, pórke omombeʼu umi mbaʼe añeteguáva”. Alma peteĩ ermána Mexicogua heʼi: “Umi notisiéro ningo notísia vaímante omombeʼu, péro umi notísia jatopáva ñande sítio de Internétpe ningo oñeʼẽ umi notísia ñanemokyreʼỹvare”.

 Péro ko seksión de Notísiape ndahaʼéi ikatúnteva jatopa umi informasión ikatúvare jajerovia, síno omombarete avei ñande jerovia. Bernard, oikóva Kéniape, heʼi: “Umi notísia rupive ahecha koʼã ermánope che famíliaicha toĩ oĩháme. Roñemboʼe jave Jehovápe ikatu haʼe chupe umi ermanokuéra réra ha añeʼẽ umi mbaʼe ohasávare hikuái”. Bybron, peteĩ ermána oikóva avei Kéniape omombeʼu: “Avyʼaiterei ningo ahecha jave umi artíkulo oñeʼẽva pe traduksión del nuévo múndore, upéva chemomanduʼa Jehová ñanderayhuha enterovépe”.

 Avei umi notísia oñeʼẽva mbaʼéichapa ñane ermanokuéra ojepersegi hína ijerovia káusare ikatu ñanemokyreʼỹ. Epensamína la heʼívare Jackline oikóva Kéniape, haʼe heʼi: “Ajepyʼamongetávo mbaʼéichapa ipyʼaguasu ermanokuéra, upéva omombareteve che jerovia. Siémpre aheka jepi mbaʼépa la omombaretéva ijerovia oaguanta hag̃ua, ahechakuaa umi mbaʼe isensíllova. Por ehémplo, ñañemboʼe, jalee la Biblia ha umi purahéi oipytyvõha chupekuéra oaguanta hag̃ua”.

 Peteĩ ermána Costa Ricagua hérava Beatriz oagradese umi notísia oñeʼẽva umi desástre naturál rehe, haʼe heʼi: “Ahecharamoiterei mbaʼéichapa pyaʼe voi Ñandejára organisasión oipytyvõ umi ermáno oikotevẽvape, ha ojapo porãiterei upéva ha mborayhúpe. Upéva ohechauka chéve kóva haʼeha Jehová organisasión”.

 Jaagradesete ningo jareko haguére ko seksión Notísia ha Anúnsio oĩva ñande sítio jw.org-pe. Koʼa notísia rupive ñaĩ al día umi mbaʼe ohasávare hína ñane família ko yvy tuichakuére. Kóva ojehupyty umi donasión pemeʼẽva rupivénte donate.pr418.com-pe. Roagradeseterei peẽme pendepojera haguére.