Pe músika ningo haʼe peteĩ rregálo iporãitereíva oúva Jehovágui, pórke ñanemoñeñandu porã ha ñanembovyʼa. Añetehápe peichaite ñañeñandu jepi ñahendu jave umi purahéi jatopáva JW Broadcástingpe. Hiʼarive koʼã purahéi ikatu ñanemoag̃uive Jehováre.

 Áño 2014 guive ojejapóma mas de 70 purahéi, ha umíva apytégui peteĩva oĩ voi mas de 500 idiómape. Upévare ikatu ñañeporandu: “¿Mávapa ojapo koʼã purahéi iporãitéva? ¿Ha mbaʼéichapa ojejapo?”.

 Pe ekípo de músika de Servísio de Áudio y Vidéo oĩva pe Komite de Enseñánsa del Kuérpo Governánte poguýpe oñenkarga umi puraheikuérare, tánto umi jatopáva JW Broadcástingpe ha avei umi ótro puraheikuéra. Pe ekípo de músikape oĩ 13 ermáno ha ermána. Haʼekuéra oñenkarga por ehémplo mbaʼérepa oñeʼẽta pe purahéi, pe melodía oguerekótava ha avei umi ótro traváho oñekotevẽva. Ikatu hag̃uáicha ojejapo koʼã traváho, pe Komite de Enseñánsa oaprova ikatu hag̃uáicha ermáno voluntário oĩva ko yvy tuichakuére oipytyvõ koʼãichagua projéktope. Umíva apytépe oĩ umi kompositór, ombopukuaáva umi instruménto ha avei umi opuraheikuaáva. Koʼã ermáno ningo iñumildeterei oipurúvo pe talénto oguerekóva ha ndoipotái ótro omombaʼeguasu chupe upévare.

 ¿Mbaʼéichapa ojejapo koʼã purahéi? Primero pe Komite de Enseñánsa ohecha mbaʼe párte de la Bíbliaguipa oñeguenohẽta umi puraheirã, ha mbaʼe sentimiéntopa otransmitíta. Upéi pe ekípo de músika ohecha mávapa ojapóta pe purahéi ha avei mávapa oskrivíta. Upéi ojapo hikuái peteĩ gravasión ikatu hag̃uáicha pe Komite de Enseñánsa ohecha ha omeʼẽ umi suherénsia. Upe rire pe ekípo de músika ojapo umi kámbio tekotevẽva ha oñepyrũma ograva. Koʼã purahéi ojegrava pe sukursálpe voi térã umi ermanokuéra rógape.

 Ikatu hag̃uáicha ojejapo ha ojegrava koʼã purahéi, umi ermáno oipuru diferénte prográma de komputadóra. Avei haʼekuéra oikotevẽ umi instruménto musikál, umi meskladór de áudio, umi amplifikadór, parlantekuéra ha avei mikrófono. Peteĩ mikrófononte voi ikatu ovale éntre 680.000 ha 6.800.000 guaranírupi térã hetave voi. Pe áño 2020-pe ojegasta haimete 800 millón de guarani umi ekípo de gravasión rehe.

 ¿Mbaʼépa ojejapo ikatu hag̃uáicha ojeaorrave? Oĩ rangue heta betelita ombaʼapóva pe ekípo de músikape, koʼág̃a oipytyvõ chupekuéra umi voluntário extérno. Upéicha rupi ograva rangue hikuái pe músika peteĩ lugárpe oñondivepa, ojapóntema hikuái upéva komputadóra rupive.

 Ñane ermanokuérape ningo ogustaiterei voi umi ñande puraheikuéra. Por ehémplo, Tara oikóva Alemániape heʼi: “Ajepyʼapyeterei jave umi purahéi chetrankilisa. Ha ahendu jave che ñeʼẽtépe katu haʼete voi ku Jehová cheañuã mbaʼéva”. Dimitri oikóva Kazajistánpe omombeʼu: “Chegustaiterei umi purahéi jaguerekóva, pórke natekotevẽi ajepyʼapy heʼírõ g̃uarã álgo ivaíva. Ha avei koʼã purahéi chepytyvõ apensa meme hag̃ua umi mbaʼe porã oúvare Jehovágui”.

 Delia oikóva Sudáfricape omombeʼu mbaʼéichapa oñeñandu ohendu jave umi ñande puraheikuéra. Haʼe heʼi: “Umi purahéi tuichaiterei chepytyvõ, koʼýte areko jave provléma térã añeñandu vai jave. Ahendu haguérente voi umi melodía oguerekóva añeñandu porãvéma. Haʼete voi chéve g̃uarãite mbaʼe ojejapóva”.

 Oĩ katu la oguerekóva voi la ikansión favoríta. Por ehémplo, Lerato oikóva avei Sudáfricape heʼi: “Umi purahéi Pe paraíso oĩma apete ha avei Pe múndo pyahu apetéma oĩ chemopensa mbaʼeichaitépa avyʼáta ág̃a che sy oikove jey vove. Káda ves ke ahendu koʼã purahéi haʼete voi ku ahechapáva che sýpe ouha che rendápe ha aañuã mbareteha chupe”.

 Oĩ peteĩ purahéi tuichaiterei oipytyvõ vaʼekue peteĩ mitãkuñáme oikóva Sri Lánkape. Haʼe omombeʼu: “Eskuélape che profesóra de siénsia hetaiterei mbaʼe vai heʼi chéve che haʼe haguére testígo de Jehová. Upéva tuichaiterei chemondýi ha ndaikuaái voi ni mbaʼépa haʼéta chupe. Ag̃uahẽre ógape, che sy heʼi chéve ahendu hag̃ua pe purahéi Restudia rupi nembarete. Pe purahéi ohechauka porã chéve tekotevẽha ajeprepara porã ambohovái mboyve peteĩ mbaʼe, ha upeichaite ajapo. Al día sigiénte añeʼẽma voi che profesóra ndive, haʼe cherendu porãnte ha heʼi chéve koʼág̃a ontende porãvemaha umi mbaʼe agueroviáva. Aagradeseterei ningo Jehová organisasiónpe ikatu haguére ojapo koʼãichagua músika ñanemokyreʼỹetéva”.

 ¿Mbaʼéichapa ojekuvri umi gásto ikatu hag̃uáicha ojejapo umi puraheikuéra? Ikatu ojejapo peẽ pejapo rupi pene kontrivusión pe óvra mundiálpe g̃uarã peipurúvo umi diferénte método jatopáva pe párte heʼihápe donate.pr418.com. ¡Roagradeseterei ningo peẽme pendepojeraiterei haguére!