Éxodo 3:1-22
3 Moisés ningo pastór vaʼekue ha oñangareko isuégro Jetró+ ovechakuérare. Jetró hína Madianpegua saserdóte. Peteĩ díape, Moisés ogueraha umi ovechakuéra oéste gotyo pe desiértope ha upéi og̃uahẽ Horébpe, Ñandejára tee montáñape.+
2 Ha upépe Jehová ánhel ojechauka chupe tatarendýicha peteĩ yvyramataʼi* paʼũme.+ Moisés omaña hese ha ohecha mbaʼéichapa pe yvyramataʼi* hendy péro ndokáiri.
3 Upévare Moisés heʼi: “¿Mbaʼeichakue piko pe yvyramataʼi* hendy péro ndokáiri? Aháta arrevisami ko mbaʼe iñextrañoitéva”.
4 Jehová ohechávo Moisés oñembojaha ohecha hag̃ua la oikóva, ohenói chupe pe yvyramataʼi* guive ha heʼi: “¡Moisés, Moisés!”. Ha haʼe katu heʼi chupe: “Ápe aime”.
5 Upépe Ñandejára heʼi chupe: “Pepevéntema eñemboja. Eipeʼa ne sandália, pórke sagrádo hína ko lugár repyrũha”.
6 Ha Ñandejára heʼive chupe: “Che hína nde tuakuéra ypykue Jára; Abrahán,+ Isaac+ ha Jacob+ Jára”. Upépe Moisés omoʼã hova okyhyjégui omaña hag̃ua Ñandejára teetére.
7 Jehová heʼive chupe: “Ahechapaite hína mbaʼeichaite pevépa ohasa asy che puévlo oĩva Egíptope. Ha ahendu avei mbaʼeichaitépa hasẽ ha ojerure asy chéve aipytyvõ hag̃ua chupekuéra, pórke oñemombaʼapo pohyieterei chupekuéra. Che ahechapaite hína mbaʼéichapa ohasa asy hikuái.+
8 Chete aguenohẽta chupekuéra umi egipcio poguýgui.+ Ha agueraháta chupekuéra upégui peteĩ yvy iporã ha tuichávape, upe yvýpe ningo osyry kamby ha eirete.+ Upe yvy oĩ hína umi cananeo territóriope, oĩháme umi hitita, amorreo, perizita, heveo ha jebuseo.+
9 Che ahendu mbaʼeichaitépa umi israelita hasẽ ha ojerure asy chéve aajudami hag̃ua chupekuéra, ha ahecha avei mbaʼeichaitépa umi egipcio omombaʼapo pohýi chupekuéra.+
10 Koʼág̃a katu romondóta faraón rendápe reguenohẽ hag̃ua Egíptogui che puévlo Israélpe”.+
11 Péro Moisés heʼi Ñandejára teépe: “Che ningo ndahaʼéi mbaʼeve aha hag̃ua faraón rendápe ha aguenohẽ Egíptogui umi israelítape”.
12 Upémarõ Ñandejára heʼi chupe: “Che aiméta nendive,+ ha reime hag̃ua segúro chete romondoha hína, ajapo ndéve ko promésa:* reguenohẽ rire umi héntepe Egíptogui, peẽ pejúta ko montáñape+ ha cheadoráta* chéve, Ñandejára teetépe”.
13 Péro Moisés heʼi Ñandejára teépe: “Ñamoĩ chupe ahaha umi israelita rendápe ha haʼe chupekuéra: ‘Pende tuakuéra ypykue Jára ningo chembou pene rendápe’. Ha haʼekuéra ikatu heʼi chéve: ‘¿Mbaʼéichaiko héra?’.+ Péicha heʼíramo chéve hikuái, ¿mbaʼe piko che haʼéta chupekuéra?”.
14 Upévare Ñandejára heʼi Moiséspe: “CHEHEGUI* OIKÓTA CHE AIPOTÁVA”.*+ Upéi heʼive: “Péicha ere vaʼerã umi israelítape: ‘Chembou hína pene rendápe CHEHEGUI OIKÓTA CHE AIPOTÁVA’”.+
15 Ñandejára heʼi avei Moiséspe:
“Péicha ere vaʼerã umi israelítape: ‘Jehová, pende tuakuéra ypykue Jára; Abrahán,+ Isaac+ ha Jacob+ Jára chembou pene rendápe’. Péicha hína che réra opa árare+ ha ko téra rupive enterove henerasión imanduʼáta cherehe.
16 Koʼág̃a tereho embyaty umi kuimbaʼe omoakãvape* Israel ha ere chupekuéra: ‘Jehová, pende tuakuéra ypykue Jára, Abrahán, Isaac ha Jacob Jára, ojechauka chéve ha heʼi: “Che ahechakuaa mbaʼeichaitépa pehasa asy Egíptope.+
17 Upévare che adesidíma poguenohẽtaha Egíptogui anivéma hag̃ua pehasa asy,+ ha pogueraháta umi cananeo yvýpe, oĩháme umi hitita, amorreo,+ perizita, heveo ha jebuseo.+ Upe yvýpe ningo osyry kamby ha eirete”’.+
18 Haʼekuéra katuete nerendúta reñeʼẽ vove chupekuéra.+ Upéi nde ha umi kuimbaʼe omoakãva Israel pehóta pe rréi de Egipto rendápe, ha peje vaʼerã chupe: ‘Jehová, umi hebreokuéra+ Jára, oñeʼẽ kuri orendive. Upévare rojerure ndéve permíso roviaha hag̃ua 3 día rog̃uahẽ meve pe desiértope, ha upépe rojapóta sakrifísio ore Jára Jehovápe’.+
19 Upéicharõ jepe, che aikuaa porã napoipytyvõiramo che podér rupive, pe rréi de Egipto nopermitimoʼãi peẽme peho.+
20 Upévare aipurúta che podér Egíptope ha ajapóta heta milágro ambohasa asy hag̃ua umi egípciope. Ha upe rire ae pe faraón opoíta pendehegui.+
21 Ha che amomýita umi egípciope imbaʼeporã hag̃ua penendive. Upévare pesẽ vove upégui, ndapehomoʼãi po nandi.+
22 Káda kuña israelita ojerure vaʼerã umi kósa de pláta, de óro ha avei ao umi ivesínape ha umi kuña egipcia oikóvape hendivekuéra. Ha peẽ pemoĩ vaʼerã koʼã mbaʼe pende raʼykuéra ha pende rajykuérare. Peẽ pemoperõta umi egípciope”.+
Nóta
^ Térã: “yvyramataʼi hatĩmbáva”.
^ Térã: “yvyramataʼi hatĩmbáva”.
^ Térã: “yvyramataʼi hatĩmbáva”.
^ Térã: “yvyramataʼi hatĩmbáva”.
^ Hebréope: “ameʼẽ ndéve ko señál”.
^ Hebréope: “cheservíta”.
^ Térã: “CHEGUSTÁVA”.
^ Hebréope: “ansianokuéra”.
