Éxodo 36:1-38
36 “Bezalel ndive ombaʼapóta Oholiab ha entéro kuimbaʼe ivaléva. Koʼã kuimbaʼépe ningo Jehová ombokatupyry ha omoarandu oikuaa ha ojapo hag̃ua opa mbaʼe oñekotevẽtava, ikatu hag̃uáicha ojejapo pe tavernákulo Jehová ojerure hagueichaite”.+
2 Upémarõ Moisés ohenói Bezalel ha Oholiábpe, ha avei entéro kuimbaʼe ivaléva Jehová ombokatupyry vaʼekuépe.+ Enterove koʼã kuimbaʼe ningo ipyʼaporãgui ojeofrese ijeheguiete ombaʼapo hag̃ua.+
3 Upéi haʼekuéra ojagarra Moisésgui umi kontrivusión+ ogueru vaʼekue umi israelita ojejapo hag̃ua pe tavernákulo. Ha káda pyhareve, umi israelita osegi ogueru ikontrivusión.
4 Haʼekuéra oñepyrũ rire ojapo pe tavernákulo, enterove umi kuimbaʼe ikatupyrýva ou
5 ha heʼi Moiséspe: “Umi hénte ningo ogueru rasapáma umi mbaʼe oñekotevẽva ojejapo hag̃ua opa mbaʼe Jehová ojerure vaʼekue”.
6 Upémarõ Moisés heʼika entéro israelítape: “Anivéntema pegueru pene kontrivusión pe tavernákulope g̃uarã”. Péicha ojeʼe chupekuéra anivéma hag̃ua ogueru mbaʼeve.
7 Umi mbaʼe ojegueru vaʼekue ohupytypa ojejapo hag̃ua opa mbaʼe oñekotevẽtava, ha ipahápe hembypáma voi.
8 Umi kuimbaʼe ikatupyrýva ojapo hag̃ua pe traváho+ ojapo pe tavernákulo+ koʼã mbaʼégui: 10 téla de líno trensádo iporãvagui, ílo hovy, lána líla ha ílo pytã asývagui. Ha umi télare Bezalel ovorda keruvín* raʼanga.+
9 Káda téla ipuku 12 métro 46 sentímetro* ha ipe 1 métro 78 sentímetro.* Enterove umi téla oreko la mísma medída.
10 Upéi haʼe ombojoapy ojuehe 5 téla oiko hag̃ua chugui peteĩnte, ha ombojoapy avei ojuehe umi ótro 5 hembýva.
11 Umi téla oñembojoapy vaʼekue oríllare, un ládo pukukue omoĩ argollaʼi ojejapo vaʼekue ílo hovýgui. Ojapo avei upeichaite pe ótro ládo pe téla oríllare, pe lugár oñembojoapytahápe ojuehe.
12 Omoĩ pe téla oríllare 50 argollaʼi, ha pe lugár oñembojoapytahápe pe ótro téla guasu oríllare omoĩ avei 50 argollaʼi. Koʼãva opyta ojovái ikatu hag̃uáicha oñembojoapy.
13 Upéi ojapo avei 50 prendedór de óro ha oñembojoapy pype umi téla, upéicha oiko chugui peteĩ téla guasúnte ojepuru hag̃ua pe tavernákulo ári.
14 Haʼe ojapo avei 11 téla kavara raguekuégui pe tavernákulo ári g̃uarã.+
15 Káda téla ipuku 13 métro 35 sentímetro,* ha ipe 1 métro 78 sentímetro.* Umi 11 téla oreko la mísma medída.
16 Cinco téla ombojoapy ojuehe, ha umi ótro 6 ombojoapy avei ojuehe.
17 Upéi pe lugár oñembojoapytahápe ojuehe, haʼe ojapo ha omoĩ un ládo pukukue 50 argollaʼi pe téla guasu oríllare. Ha omoĩ avei 50 argollaʼi pe ótro téla guasu oríllare. Umi argollaʼi ojepuru oñembojoapy hag̃ua ojuehe umi téla guasu.
18 Haʼe ojapo avei 50 prendedór de kóvre oñembojoapy hag̃ua umi téla guasu, péicha oiko chugui peteĩ téla guasúnte.
19 Pe tavernákulo ári g̃uarã omoĩ avei ovecha mácho kuerokue oñeteñi vaʼekue pytãme, ha upéva ári oho jey avei fóka* pirekue.+
20 Ha pe tavernákulo kostadorã, ojapo armáhe ojoguáva ventána márkope madéra de akásiagui,+ ha koʼã armáhe oñemoñemboʼy.+
21 Káda armáhe ipuku 4 métro 45 sentímetro,* ha ipe 67 sentímetro.*
22 Káda armáhe oreko ivásepe mokõi puntaʼi oĩva ojoykére ojepurúva oñeenkastra hag̃ua. Péicha haʼe ojapo kompletoite pe tavernákulo armáhe.
23 Haʼe ojapo 20 armáhe pe tavernákulo kostadorã, opytáva sur gotyo.
24 Upéi ojapo 40 vaseʼi de pláta ikuáva mbytépe, koʼãva omoĩ umi 20 armáhe guýpe: mokõi vaseʼi oho káda armáhe guýpe oñeenkastra hag̃ua umi mokõi puntaʼíre. Ha péicha ojejapo kompletoite umi ótro armáhe rehe.+
25 Haʼe ojapo avei ótro 20 armáhe pe tavernákulo kostadorã, opytáva nórte gotyo.
26 Haʼe ojapo avei ótro 40 vaseʼi de pláta ikuáva mbytépe, koʼãva oñemoĩ umi 20 armáhe guýpe: mokõi vaseʼi oho káda armáhe guýpe. Péicha ojejapo kompletoite umi ótro armáhe rehe.
27 Pe tavernákulo atukuperã haʼe ojapo 6 armáhe, péva opyta hína oéste gotyo.+
28 Haʼe ojapo avei mokõi armáhe ha oñemoĩ káda eskínape pe tavernákulo atukuperã. Koʼã armáhe oservi de puntál.
29 Káda armáhe ojejapo mokõi távlagui pe yvy guive, ha pe yvatete oñembojoaju ojuehe, oĩháme pe primer argólla. Péicha haʼe ojapo koʼã mokõi armáhe opytáva káda eskínape.
30 Upéicharõ ojejapo en totál 8 armáhe ha 16 vaseʼi de pláta ikuáva mbytépe: mokõi vaseʼi oho káda armáhe guýpe.
31 Haʼe ojapo avei yvyra puku de madéra de akásia oñembojoaju hag̃ua umi armáhe, ojejapo 5 yvyra puku oñemoĩ hag̃ua un ládo pe tavernákulo kostádore.+
32 Ha ojejapo 5 yvyra puku oñembojoaju hag̃ua umi armáhe oĩva pe ótro kostádope. Ojejapo avei ótro 5 yvyra puku oñembojoaju hag̃ua umi armáhe oñemoĩva pe tavernákulo atukuperã, péva oĩ hína oéste gotyo.
33 Haʼe ojapo pe yvyra puku ohóva mbytépe umi armáhe rehe. Ko yvyra puku noñembojoapýi, síno osẽ peteĩ púntagui ha oho hese pe ótro púnta peve.
34 Umi armáhe ha umi yvyra puku haʼe orrevesti órope, ha ojapo avei de óro umi argólla ohasahárupi umi yvyra puku.+
35 Upéi haʼe ojapo peteĩ kortína+ ílo hovýgui, lána líla, ílo pytã asýva ha líno trensádo iporãvagui. Haʼe ovorda pe kortínare keruvín+ raʼanga.+
36 Oñemosaingo hag̃ua pe kortína haʼe oipuru 4 orkón* de madéra de akásia ojerrevesti pyréva órope. Ha umi ganchoʼi oñemosaingoha pe kortína de óro avei. Oñemboyku avei pláta ojejapo hag̃ua 4 vaseʼi ikuáva mbytépe oñemoñemboʼy hag̃ua umi orkón.
37 Upéi haʼe ojapo peteĩ kortína oñemoĩ hag̃ua pe tavernákulo entrádape. Ha ojapo hag̃ua haʼe oipuru ílo hovy, lána líla, ílo pytã asýva ha líno trensádo iporãva.+
38 Ojejapo avei pe entrádape g̃uarã 5 orkón ha iganchoʼikuéra. Umi orkón ha umi ganchoʼi haʼe orrevesti órope, péro umi 5 vaseʼi ikuáva mbytépe ojejapo de kóvre.
Nóta
^ Hebréope: “4 codo”.
^ Hebréope: “30 codo”.
^ Hebréope: “4 codo”.
^ Fóka ningo peteĩ animál oikóva márpe ojoguáva kyjápe térã nútriape.
^ Hebréope: “10 codo”.
^ Hebréope: “1 codo imédio”.
^ Térã: “pilár”.
