1 Crónicas 10:1-14
-
Saúl ha itaʼyrakuéra omano (1-14).
10 Umi filisteo oñorairõ hína kuri Israel ndive. Hetaiterei israelita omano Sérro Guilbóape,+ ha umi ótro osẽ odiparapa umi filistéogui.
2 Umi filisteo opersegi Saúl ha itaʼyrakuérape, ha haimete metéma ohupyty chupekuéra. Upéi umi filisteo ojuka Saúl raʼykuérape, umíva hína Jonatán, Abinadab ha Malki-Súa.+
3 Ha pe ñorairõ ijetuʼuve ohóvo Saúlpe g̃uarã. Upéi umi soldádo oipurúva árko ha flécha ohecha Saúlpe ha ojapi chupe hikuái.+
4 Upémarõ Saúl heʼi pe soldádo oguerahávape hiʼarmakuéra: “Eguenohẽ nde espáda ha chejuka, ani ág̃a ou umi filisteo kyʼa* ha oñemboharái vaipa+ cherehe”. Péro pe soldádo ndojaposéi upéva pórke okyhyjeterei. Upémarõ Saúl ojagarra pe espáda ha ojeity hiʼári.+
5 Ha pe soldádo ohechávo Saúl omanoha, ojeity avei ijespáda ári ha omano.
6 Péicha Saúl ha umi mbohapy itaʼýra omano, ha omanombaite avei umi hogaygua oĩ vaʼekue hendive.+
7 Ha umi israelita oikóva umi ñúme opillárõ guare Israel ehérsito odiparapa hague, ha Saúl ha itaʼyrakuéra omanóma hague, oheja hikuái umi isiuda ha odiparapa. Upémarõ umi filisteo ou ha opyta oiko umi siudápe.
8 Al ótro día oúrõ guare umi filisteo osakea hag̃ua umi ojejuka vaʼekuépe, Sérro Guilbóape+ otopa hikuái Saúl ha itaʼyrakuéra reʼongue.
9 Upémarõ osakea avei hikuái Saúlpe ha oñakãʼo chupe, ha oipeʼa chugui iñarmadúra. Upéi oikuaauka hikuái ko notísia umi filisteo território tuichakuére, ha avei idioskuéra témplope*+ ha pe puévlope.
10 Upéi omoĩ hikuái Saúl armadúra idioskuéra témplope* ha omosaingo pe iñakãngue Dagón témplope.+
11 Kompletoite umi oikóva Jabéspe+ oĩva Galaádpe, ohendúrõ guare opa mbaʼe ojapo vaʼekue umi filisteo Saúl rehe,+
12 enterovete umi gerréro opuʼã ha oho ogueru Saúl retekue ha umi itaʼýra retekue. Ha ogueraha chupekuéra Jabéspe ha oñotỹ umi hetekue Jabés yvyramáta guasu guýpe,+ ha oajuna hikuái 7 día aja.
13 Péicha omano Saúl naiñeʼẽrendúi rupi Jehovápe,+ pórke haʼe ndojeroviái kuri Jehováre, avei oho haguére peteĩ kuña espiritísta+ rendápe ombaʼeporandu hag̃ua,
14 oporandu rangue Jehovápe. Upévare Haʼe ojuka chupe ha omoĩ ogoverna hag̃ua hekovia David, haʼéva Jesé raʼy.+
