1 Crónicas 15:1-29
15 Ha David osegi omopuʼã hogarã Siuda de Davídpe, ha oprepara avei peteĩ lugár Ñandejára tee árkape g̃uarã ha omoĩ peteĩ óga kárpa hendag̃ua.+
2 Upémarõ David heʼi: “Umi levita añoite ogueraha vaʼerã Ñandejára tee árka, aníke avave ótro ogueraha, pórke Jehová oiporavóma chupekuéra ogueraha hag̃ua Jehová árka ha siémpre oservi hag̃ua chupe”.+
3 Upéi David ombyaty kompletoite umi israelítape Jerusalénpe ogueraha hag̃ua Jehová árka, pe lugár oprepara haguépe chupe g̃uarã.+
4 David ombyaty Aarón familiarépe+ ha umi levítape:+
5 umi cohatita apytégui Uriel, pe omoakãva chupekuéra ha 120 iñermanokuéra,
6 umi merarita apytégui Asaya,+ pe omoakãva chupekuéra ha 220 iñermanokuéra,
7 umi guersomita apytégui Joel,+ pe omoakãva chupekuéra ha 130 iñermanokuéra,
8 Elizafán+ familiare apytégui Semaya, pe omoakãva chupekuéra ha 200 iñermanokuéra,
9 Hebrón familiare apytégui Eliel, pe omoakãva chupekuéra ha 80 iñermanokuéra.
10 Uziel+ familiare apytégui Aminadab, pe omoakãva chupekuéra ha 112 iñermanokuéra.
11 David ohenói avei umi saserdóte Sadoc+ ha Abiatárpe,+ ha umi levita Uriel, Asaya, Joel, Semaya, Eliel ha Aminadábpe,
12 ha heʼi chupekuéra: “Peẽ ningo pemoakã hína umi levita tuakuéra ypykue familiarépe. Peñesantifika peẽ ha pene ermanokuéra, ha pegueraha Israel Jára Jehová árka pe lugár aprepara vaʼekuépe chupe g̃uarã.
13 Peẽ ndapeguerahái rupi pe primera ves,+ Ñandejára Jehová ipochyeterei ñanderehe,+ pórke nañaporandúi kuri mbaʼéichapa ojejapo vaʼerã upéva”.+
14 Upémarõ umi saserdóte ha umi levita oñesantifika, ikatu hag̃uáicha ogueraha Israel Jára Jehová árka.
15 Upéi umi levita ogueraha Ñandejára tee árka ijatiʼy ári, ha oipuru umi yvyra puku ogueraha hag̃ua,+ Jehová omanda haguéicha chupekuéra Moisés rupive.
16 Upémarõ David heʼi umi kuimbaʼe omoakãvape umi levítape onkarga hag̃ua umi iñermanokuéra opurahéivape vyʼápe opurahéi hag̃ua, ha oñembopu hag̃ua umi instruménto musikál: umi instruménto de kuérda, árpa+ ha platíllo.+
17 Upémarõ umi levita oiporavo itrívugui Hemánpe,+ haʼéva Joel raʼy, Asáfpe,+ haʼéva Berekías raʼy, ha Etánpe,+ haʼéva Cusayá raʼy, haʼéva umi merarita família apytégui.
18 Oĩ avei hendivekuéra pe segundo grupopegua:+ Zacarías, Ben, Jaaziel, Semiramot, Jehiel, Uní, Eliab, Benaya, Maaseya, Matitías, Elifelehu, Micneyá, avei Obed-Edom ha Jeiel umi guárdia oñangarekóva okẽre.
19 Umi kantánte: Hemán,+ Asaf,+ ha Etán ombopu vaʼekue platíllo+ de kóvre.
20 Ha Zacarías, Aziel, Semiramot, Jehiel, Uní, Eliab, Maaseya ha Benaya ombopu umi instruménto de kuérda oñeafina vaʼekue oñembopu hag̃ua nóta áltape,*+
21 ha Matitías,+ Elifelehu, Micneyá, Obed-Edom, Jeiel ha Azazías ombopu umi árpa oñeafina vaʼekue nóta váhape,*+ odirihi hag̃ua umi músikope.
22 Kenanías,+ pe omoakãva umi levítape, oñenkarga ojegueraha hag̃ua pe árka, pórke haʼe ningo ivaleterei vaʼekue upévape.
23 Berekías ha Elcaná haʼe vaʼekue guárdia oñangarekóva pe árkare.
24 Umi saserdóte Sebanías, Josafat, Netanel, Amasái, Zacarías, Benaya ha Eliezer ombopu hatã porã umi trompéta Ñandejára tee árka renondépe,+ ha Obed-Edom ha Jehías oñangareko vaʼekue avei pe árkare.
25 Upéi David, umi kuimbaʼe omoakãva* Israel ha umi héfe de 1.000 soldádo oho vyʼápe+ ogueru hag̃ua Jehová Árka del Pákto Obed-Edom rógagui.+
26 Ha Ñandejára tee oipytyvõ rupi umi levita oguerahávape Jehová Árka del Pákto, haʼekuéra osakrifika 7 tóro raʼyrusu ha 7 ovecha mácho.+
27 David oreko ijehe peteĩ ao ijyvakuareíva ojejapo vaʼekue téla iporãvagui, ha upéicha avei oñemonde enterove umi levita ogueraháva pe árka, umi opurahéiva ha Kenanías, pe oñenkargáva umi opurahéivare ha umi oguerahávare pe árka. David oreko avei ijehe peteĩ delantál* de líno.+
28 Enterovete umi israelita ogueru Jehová Árka del Pákto ha vyʼápe opurahéi oúvo,+ ombopu hikuái turu, trompéta,+ platíllo, ha hatã porã ombopu avei umi instruménto de kuérda ha umi árpa.+
29 Péro Jehová Árka del Pákto oikévo pe Siuda de Davídpe,+ Mical+ haʼéva Saúl rajy omaña pe ventánarupi, ha ohecha rréi Davídpe ojeroky ha opopo oúvo, ha upévare oñepyrũ odespresia chupe ipyʼapýpe.+
Nóta
^ Hebréope: “ansianokuéra”.
