1 Samuel 20:1-42
-
Jonatán ifiél Davídpe (1-42).
20 Upémarõ David odipara ha osẽ Nayótgui, oĩva Ramápe. Haʼe oho Jonatán rendápe ha heʼi chupe: “¿Mbaʼe mbaʼéiko che ajapo nde túare ajeve chejukase?*+ Eréna chéve mbaʼépe afalla, mbaʼe piko la che pekádo”.
2 Ha Jonatán heʼi chupe: “¡Anína ere vyrorei!+ Avave nandejukamoʼãi. Che túa ningo siémpre omombeʼupaite chéve la ojapótava, mbaʼeve nomokañýi chehegui, ¿mbaʼére guaʼu koʼág̃a nomombeʼumoʼãi chéve la oimérõ ndejukase? Haʼéngo ndojapomoʼãi nderehe mbaʼeve”.
3 Péro David heʼi chupe: “Nde túa oiméne oikuaáma nde che amigoha+ ha ni mbaʼevéicharõ nomombeʼumoʼãi ndéve la ojaposéva ani hag̃ua ndepochy. Péro ahura Ñandejára Jehová oikovévare ha nderehe* siertoha la haʼéva. Nde túa en kualkiér moménto chejukáta”.+
4 Upémarõ Jonatán heʼi chupe: “¿Mbaʼe piko ikatu ajapo roipytyvõ hag̃ua? Nde* eréva ajapóta”.
5 David heʼi chupe: “Koʼẽrõ oñemboaretéta pe jasy raʼy,+ ha katuete ohaʼarõta hikuái che aime upépe akaru hag̃ua pe rréi ndive. Péro haʼéta ndéve mbaʼépa ikatu jajapo. Nde repermitíramo chéve, che asẽta ko siudágui akañy pe ñúme ha apytáta ahaʼarõ upépe koʼẽambuérõ kaʼaru peve.
6 Nde túa oporandúramo cherehe, ere vaʼerã chupe remeʼẽ hague chéve permíso aha hag̃ua sapyʼaite Belénpe+ ajapo sakrifísio che hentekuérandi,+ rojapoháicha jepi káda áño.
7 Nde túa heʼíramo oĩ porãha, upéva heʼise che, nde siérvo, natekotevẽiha akyhyje. Péro ipochýramo, reikuaátama katuete chejukaseha.
8 Ehechaukána cherayhu añeteha,*+ pórke nde rejapóma kuri peteĩ kompromíso chendive Jehová renondépe.+ Péro oiméramo che ajapo raʼe ivaíva,+ ndete chejuka vaʼerã. Natekotevẽmoʼãi chentrega nde túape”.
9 Ha Jonatán heʼi chupe: “Ani voi ni repensa upéicha. Che aikuaa nderejapói hague mbaʼeve ivaíva. Péro apillárõ che túa ndejukaseha, katuete amombeʼúta ndéve”.+
10 Upémarõ David oporandu Jonatánpe: “¿Máva piko oúta omombeʼu chéve nde túa orreaksiona vaíramo?”.
11 Jonatán heʼi chupe: “Jaha amo ñúme”. Ha osẽ oho hikuái.
12 Jonatán heʼi Davídpe: “Ahura ndéve, Jehová Israel Jára renondépe, akumplitaha ko haʼétava. Koʼẽrõ térã koʼẽambuérõ che añeʼẽta che túandi aikuaa hag̃ua la ojaposéva. Ha oimérõ ndorekói mbaʼeve ne kóntrape, roavisáta.
13 Péro oimérõ che túa ndejukase, ha che namombeʼúi ndéve upéva ikatu hag̃uáicha reho rekañy, upéicharõ Jehová tachekastiga el dóvle. Jehová toĩ nendive,+ oĩ haguéicha che túa ndive.+
14 Aikove aja ha amano rire jepe, aipota nde cherayhu añete, Jehová ojapoháicha.+
15 Jehová ohundipáramo jepe ne enemigokuéra ko yvy ape árigui, aipota nde siémpre rehechauka rehayhuetereiha che familiakuérape”.+
16 Péicha Jonatán ojapo peteĩ kompromíso David ha ifamiliaréndi.* Ha heʼive: “Jehová okastigáta David enemigokuérape”.
17 Jonatán heʼi Davídpe ohura jey hag̃ua osegitaha ohayhu chupe. Jonatán ohayhu Davídpe ojehayhuháicha ijupe voi.*+
18 Entónse Jonatán heʼi Davídpe: “Koʼẽrõ oñemboaretéta pe jasy raʼy,+ ha che túa katuete oporandúta nderehe ohechávo nereimeiha.
19 Ha koʼẽambuérõ ohechávo nereimeiha, koʼýte oikuaaséta mbaʼépa oiko ndehegui. Ha nde eho vaʼerã pe lugár rekañy haguépe akokuehe. Epyta pe ita guasu ypýpe.
20 Ha apoíta mbohapy flécha pe ita ypýrupi ku ahaʼãrõguáicha algúna kósa.
21 Che ajúta peteĩ siérvo ndive ha haʼéta chupe: ‘Eho eheka umi flécha che apoítava’. Upéi haʼéramo pe siérvope: ‘Napépe nde ykére hína umi flécha, ejagarra katu’, upéva heʼise ikatuha reju jey. Ahura Ñandejára Jehová oikovévare ndaiporiha mbaʼeve rejepyʼapy hag̃ua.
22 Péro haʼéramo pe mitãrusúpe: ‘Umi flécha oĩ mombyry nde reĩhágui’, upéva heʼise Jehová oipotaha reho koʼágui.
23 Jehová hína ñande testígo pára siémpre.+ Haʼe oikuaa porã ñande jajapo hague peteĩ kompromíso”.+
24 Upémarõ David oho okañy pe ñúme. Ha og̃uahẽvo pe jasy raʼy, pe rréi oguapy ilugárpe okaru hag̃ua.+
25 Pe rréi oguapy jepiveguáicha pe pare kóstare, Jonatán oguapy pe rréi renondépe ha Abner+ pe rréi ykére. Péro David lugárpe ndaipóri avave.
26 Saúl ndeʼíri mbaʼevete pe primer día, pórke opensa: “Oiméne oiko algúna kósa ha David ikyʼa Ñandejára renondépe,+ ha upévare oiméne ndoúi”.
27 Pe segundo día David lugár nandi jey, ha Saúl oporandu Jonatánpe: “¿Mbaʼére piko ndoúi okaru Jesé raʼy+ koestedía ni kuehe?”.
28 Jonatán heʼi itúape: “David ningo ojerure asy chéve ameʼẽ hag̃ua chupe permíso oho hag̃ua Belénpe.+
29 Haʼe heʼi: ‘Emeʼẽna chéve permíso aha hag̃ua pe siudápe ajapo sakrifísio che família ndive. Che ermáno ningo cherenoika kuri. Upévare repermitíramo chéve, che aháta pyaʼe porã avave opillaʼỹre. Ahasénteko ahecha che ermanokuérape’. Upévarente David ndoúi okaru koʼápe ñanendive”.
30 Upémarõ Saúl ipochyeterei ha heʼi Jonatánpe: “¡Nde traisionéro reikóva!* ¿Reimoʼã piko ndapillaiha reipytyvõha Jesé raʼýpe? Péicha rejapóvo, reñemotĩ nde, ha remotĩ avei nde sýpe.
31 David oikove aja, ndehegui ndoikomoʼãi rréi.+ Upévare emondo peteĩ siérvo ha tojegueru chupe koʼápe. Haʼe omano vaʼerã”.+
32 Upémarõ Jonatán heʼi itúape: “¿Mbaʼére piko ojejuka vaʼerã chupe?+ Haʼe ningo ndojapói mbaʼeve”.
33 Upepete Saúl ojagarra ilánsa ha ohaʼã Jonatánpe.+ Upéicha Jonatán opilla itúa ojapotaha oimeraẽ mbaʼe ojuka hag̃ua Davídpe.+
34 Ensegída Jonatán opuʼã pe meságui pórke ipochyeterei, ha ndoʼúi mbaʼevete upe día. Haʼe orrenegaiterei itúa oñeʼẽ vai haguére David rehe+ enterove rovake.
35 Pyharevete Jonatán ha peteĩ isiérvo oho pe ñúme opyta haguéicha David ndive.+
36 Jonatán heʼi pe mitãrusúpe: “Edipara ha eheka umi flécha che apoítava”. Upémarõ pe mitãrusu ou vaʼekue hendive oho, ha Jonatán opoi pe flécha mombyryve pe siérvo oĩhágui.
37 Pe mitãrusu og̃uahẽvo ohóvo pe flécha oĩháme, Jonatán osapukái chupe: “Pe flécha oĩ mombyryve hína”.
38 Jonatán osapukái jey chupe: “¡Ejapurána, pyaʼe tereho!”. Ha pe mitãrusu ojagarra umi flécha ha ogueraha jey Jonatánpe.
39 Pe siérvo nontendéi mbaʼeve, Jonatán ha David añoite oikuaa mbaʼépa la oikóva.
40 Upémarõ Jonatán omeʼẽ pe mitãrusúpe iflécha, hiʼárko ha heʼi chupe: “Egueraha koʼã mbaʼe pe siudápe”.
41 Pe mitãrusu oho rire, David opuʼã pe lugár okañy haguégui ha ou oñesũ Jonatán renondépe ha 3 vése oñakãity. Haʼekuéra oñoañuã* ha hasẽ, péro David hetavéntema hasẽ.
42 Ha Jonatán heʼi Davídpe: “Tereho katu pyʼaguapýpe pórke mokõivéva jahura kuri+ Jehová rérare, ha jaʼe kuri: ‘Jehová oĩta ñanendive ha oĩta ñane familiakuérandi pára siémpre’”.+
Upémarõ David osẽ oho upégui ha Jonatán katu oho jey pe siudápe.
Nóta
^ Térã: “oheka che álma”.
^ Térã: “ne álmare”.
^ Térã: “Ne álma”.
^ Hebréope: “David rógandi”.
^ Térã: “ohayhuháicha hiʼálma”.
^ Térã: “Kuña rrevélde memby”.
^ Hebréope: “oñohetũ”. Yma oñohetũvo ojehechauka vaʼekue oñoamigoiteha.
