1 Samuel 28:1-25
-
Saúl oho espiritísta rendápe (1-25).
28 Upe tiémpope umi filisteo oñembyaty oñorairõ hag̃ua umi israelita kóntrape.+ Upémarõ, rréi Akís heʼi Davídpe: “Oime vaʼerã reikuaa voi hína nde ha nde soldadokuéra pehotaha avei orendive peñorairõ hag̃ua”.+
2 Ha David heʼi chupe: “Ndéngo reikuaáma la che ajapótava”. Upémarõ Akís heʼi Davídpe: “Che adesidi nde reĩtaha che ykerete, nde siémpre cheprotehéta”.+
3 Upérõ g̃uarã Samuel omanóma. Umi israelita heta hasẽ kuri hese, ha oñeñotỹ chupe iválle Ramápe.+ Upe tiémpope, Israélpe ndaiporivéi adivíno ni espiritísta oñekomunikáva umi omano vaʼekuéndi, pórke Saúl omosẽmba kuri chupekuéra.+
4 Umi filisteo oñembyaty ha oho omoĩ ikampaménto Sunémpe.+ Ha Saúl ombyaty avei umi soldádo israelítape ha omoĩ ikampaménto Guilbóape.+
5 Saúl ohechávo umi filisteokuéra kampaménto okyhyjeterei ha ipyʼa pererepa.+
6 Saúl heta oñemboʼe Jehovápe+ péro Jehová nokontestái chupe. Ñandejára noñeʼẽi Saúlpe iképe ni umi proféta rupive ha nokontestái ojepuru jave pe Urim.+
7 Upéi Saúl heʼi isiervokuérape: “Peheka chéve peteĩ kuña espiritísta+ aha hag̃ua hendápe”. Isiervokuéra heʼi chupe: “Oĩ hína peteĩ espiritísta En-Dórpe”.+
8 Upémarõ, Saúl oñemonde diferénte ani hag̃ua avave orrekonose chupe, ha oho pyharekue mokõi soldádondi. Og̃uahẽvo pe kuña rendápe, heʼi chupe: “Por favór, eipurúna nde podér remombeʼu hag̃ua chéve la oikótava.+ Che haʼéta ndéve mávandipa aipota reñeʼẽ”.
9 Péro pe kuña heʼi chupe: “Nde oiméne reikuaa hína la Saúl ojapo vaʼekue. Haʼe omosẽmbaite pe tetãgui umi espiritísta ha adivínope.+ Nde oiméne chemoñuhãse* reipotágui ou chejuka hikuái”.+
10 Upémarõ haʼe ohura pe kuñáme Jehováre ha heʼi: “Ahura Ñandejára Jehová oikovévare avave nandekastigamoʼãiha ko rejapótavare”.
11 Upéi pe kuña heʼi: “¿Mávandipa reñeʼẽse?”. Haʼe heʼi chupe: “Samuel ndive”.
12 Upéi pe kuñáme oñepresenta “Samuel”*+ ha haʼe osapukái hatãiterei ha heʼi Saúlpe: “Ndéngo Saúl hína. ¿Mbaʼéreiko la chembotavyse?”.
13 Rréi Saúl heʼi chupe: “Ani rekyhyje, emombeʼu katu chéve la rehecháva”. Ha pe kuña heʼi: “Ahecha peteĩ mbaʼe osẽva hína pe yvyguýgui ha ojoguáva peteĩ dióspe”.
14 Ha haʼe oporandu jey: “¿Mávape ojogua?”. Ha pe kuña heʼi: “Ahecha peteĩ karai ijedámava orekóva peteĩ ao ijyvakuareíva”.+ Ha upépe Saúl opilla haʼeha “Samuel”.* Pepete Saúl oñesũ, oñakãity ha upéi oñenoite pe yvýpe.
15 Haʼe heʼi Saúlpe: “¿Mbaʼére piko chemolesta ha cherenoika?”. Saúl heʼi: “Oiko ningo peteĩ mbaʼe ijetuʼúva. Umi filisteo ou oñorairõ hag̃ua Israel kóntrape, ha Ñandejára nopenavéi cherehe. Haʼe noñeʼẽvéi chéve che képe ni umi proféta rupive.+ Upévare rohenoika nde ere hag̃ua chéve la ajapo vaʼerã”.+
16 Haʼe heʼi chupe: “Jehová ningo oñemomombyrýma ndehegui ha nosẽvéi nde favórpe,+ ¿mbaʼére piko upéicharõ reñeʼẽse chéve?
17 Che roavisáma kuri la Jehová ojapótava, ha upéva oñekumplíta hína. Jehová oipeʼáta ndehegui ne rréino ha omeʼẽta Davídpe.+
18 Nde naneñeʼẽrendúi Jehovápe ha nerehundíri umi amalequítape+ haʼe heʼi haguéicha ndéve. Upévare Jehová ipochy ha koʼág̃a oñemomombyry ndehegui.
19 Jehová nentregáta ndéve ha umi ótro israelítape umi filisteo pópe.+ Koʼẽrõ nde+ ha nde raʼykuéra+ peĩtama chendive. Jehová ohejáta Israel ehérsito operde umi filisteo kóntrape”.+
20 Saúl ohendúvo koʼã mbaʼe okyhyjeterei, hoʼa pe yvýpe ha opyta ojepyso upépe. Haʼe ikangypaite pórke ojapóma un día ha una nóche ndokaruvéi hague.
21 Pe kuña ohechávo ojapo vaieterei hague Saúl rehe la oikóva, heʼi chupe: “Nemanduʼáke che karai che ajapónte hague la nde rejeruréva. Che cheñeʼẽrendu ndéve aikuaáramo jepe ikatuha amano.+
22 Koʼág̃a ikatúramo cherendumi. Taguerúna ndéve peteĩ pan pedáso reʼu hag̃ua. Péicha nembaretéta reho jey hag̃ua nde rógape”.
23 Péro haʼe ndoaseptái ha heʼi: “Ndaʼumoʼãi mbaʼeve”. Isiervokuéra ha pe kuña katu osegi heʼi chupe hoʼu hag̃ua álgo. Hasypeve Saúl opena hesekuéra, opuʼã pe yvýgui ha oguapy pe tupápe.
24 Pe kuña oreko hógape peteĩ toríto omongyra vaʼekue oikóvo. Upémarõ haʼe pyaʼe porã oho okarnea. Avei ogueru arína, oñepyrũ oamasa ha oprepara pan ilevaduraʼỹva.
25 Ha ogueraha koʼã mbaʼe Saúl ha isiervokuérape ha haʼekuéra hoʼu. Upéi, upe pyharépe voi opuʼã ha oho hikuái upégui.+
