1 Samuel 29:1-11
-
Umi filisteo ndojeroviái David rehe (1-11).
29 Umi filisteo+ ombyatypaite ijehersitokuéra Afécpe, ha umi israelita kampaménto katu oĩ Jezreélpe,+ peteĩ arrójo kóstare.
2 Umi governánte filisteo ha umi soldádo oñepyrũ oho en órden. Oĩ grúpo de 100 ha grúpo de 1.000. David ha isoldadokuéra katu oho tapykuépe rréi Akís ndive.+
3 Péro upéi umi governánte filisteo heʼi rréi Akíspe: “¿Mbaʼe piko ojapo koʼápe koʼã hebreo?”. Ha pe rréi heʼi chupekuéra: “Kóva ningo David, rréi Saúl siérvo. Ojapo un áño térã hetave voi haʼe oiko hague che territóriope.+ Ou guive haʼe ndofallái chendive mbaʼevetépe”.
4 Péro umi governánte filisteo ipochyeterei Akís ndive ha heʼi hikuái: “Emondo koʼágui upe kuimbaʼépe.+ Ere chupe toho jeýnte pe lugár nde remeʼẽ vaʼekuépe chupe. Ani repermiti oho ñanendive gerrahápe pórke haʼe ikatu hína oñemoĩ ñane kóntrape.+ Ani ág̃a opyta porãségui rréi Saúl ndive, oñepyrũ ojuka ñande soldadokuérape.
5 ¿Péva piko ndahaʼéi hína David? Haʼe oúrõ guare gerrahágui umi hénte ojeroky ha opurahéi kóicha:
‘Saúl ojuka mas de 1.000-pe,ha David katu ojuka mas de 10.000-pe voi’”.+
6 Upévare Akís+ ohenoika Davídpe ha heʼi chupe: “Che aikuaa nde siémpre rejapoha iporãva ha ahura Ñandejára Jehová oikovévare siertoha la haʼéva. Nde reju guive nderefallái chendive mbaʼevetépe,+ upévare avyʼa nde reĩ haguére che ehérsitope.+ Péro umi ótro governánte ndojeroviái nderehe.+
7 Upévare, eho jeýnte pyʼaguapýpe ha ani rejapo mbaʼevete ikatúva ombopochy umi ótro governántepe”.
8 Péro David heʼi Akíspe: “Che karai, ¿mbaʼe mbaʼéiko che ajapo raʼe? ¿Mbaʼépe piko afalla nendive aju guive koʼápe? ¿Mbaʼére la ndaikatúi aha nendive añorairõ hag̃ua ne enemigokuérandi?”.
9 Upémarõ Akís heʼi Davídpe: “Che ningo ni michĩmi ndadudái nde nevuenoha, ndéngo haʼete voi peteĩ ánhel.+ Péro umi governánte filisteo heʼíma chéve ani hag̃ua apermiti reho orendive gerrahápe.
10 Upévare, epuʼã koʼẽrõ voi porã, nde ha umi kuimbaʼe nemoirũva, ha koʼẽmíre ja pehóma vaʼerã koʼágui”.
11 Upémarõ, al ótro día David ha iñirũnguéra opuʼã voi porã ha oho jey umi filisteo territóriope, ha umi filisteo oho Jezreélpe.+
