2 Reyes 14:1-29
14 Jehoacaz raʼy haʼe hína Jehoás,+ pe rréi de Israel, ha 2 áño ogoverna haguépe Jehoás, Amasíasgui oiko rréi. Amasías hína Jehoás raʼy, pe rréi de Judá.
2 Amasías oreko vaʼekue 25 áño oikórõ guare chugui rréi, ha ogoverna 29 áñore Jerusalénpe. Isy héra vaʼekue Jehoadín Jerusalengua.+
3 Amasías ojapo meme iporãva Jehová renondépe, péro ndahaʼéi itúa ypykue David+ ojapo haguéicha. Haʼe ojapo entéro mbaʼe ojapo vaʼekue itúa Jehoás.+
4 Péro ndoipeʼapái umi lugár yvate,+ ha pe puévlo osegi ojapo sakrifísio ha omotimbo umi sakrifísio umi lugár ijyvatehápe.+
5 Upéi Amasías goviérno imbarete rire ipoguýpe, ensegída ojuka umi isiervokuéra ojuka vaʼekuépe itúape, pe rréipe.+
6 Péro haʼe ndojukái umi asesíno raʼykuérape, Jehová omanda haguéicha, pórke upéicha ojeskrivi voi Moisés lívro de la léipe: “Tuakuérape ndojejukái vaʼerã itaʼýra pekadokuére, ha umi taʼyrakuérape ndojejukái vaʼerã itúa pekadokuére. Peteĩ persónape ojejuka vaʼerã ipekádore añoite”.+
7 Amasías ojuka umi edomítape+ pe Válle de Sálpe,+ 10.000 kuimbaʼépe ojuka, ha oñorairõrõ guare ojagarra Sela,+ ha upéi oñembohéra Jocteel koʼag̃aite peve.
8 Upémarõ Amasías omondo mensahéro Jehoás rendápe, haʼéva hína Jehoacaz raʼy ha Jehú pe rréi de Israel niéto, ha heʼika chupe: “Eju ñañorairõ oñondive”.*+
9 Ha rréi Jehoás de Israel heʼika pe rréi de Judá Amasíaspe: “Pe ñuatĩ oĩva pe Líbanope heʼika pe sédrope oĩva pe Líbanope: ‘Emeʼẽna nde rajy che raʼýpe hembirekorã’. Péro peteĩ animál salváhe oĩva pe Líbanope ohasa ha opyrũmbaite pe ñuatĩre.
10 Nde ningo rehundíma Edómpe+ añete, upévare reñemombaʼeguasu. Evyʼa katu umi mbaʼe guasu rehupytývare, péro epytánte nde palásiope. ¿Mbaʼére piko rejapo vaʼerã sarambi ha eperde, ha ehundi avei nde rapykuéri Judápe?”.
11 Péro Amasías nopenái hese.+
Upémarõ rréi Jehoás de Israel oho ha oñorairõ rréi de Judá Amasías ndive Bet-Sémespe,+ opytáva Judápe.+
12 Israel ogana Judápe, upémarõ káda uno osẽ oho hógape.*
13 Ha Bet-Sémespe pe rréi Jehoás de Israel ojagarra rréi de Judá Amasíaspe, haʼéva Jehoás raʼy ha Ocozías niéto. Upéi ou hikuái Jerusalénpe ha haʼe oity Jerusalén murálla Efraín Rokẽ+ guive pe Okẽ Eskinapegua+ peve, en totál 178 métro.*
14 Haʼe ojagarra kompletoite pe óro, pláta ha entéro mbaʼe oĩ vaʼekue Jehová rógape ha pe rréi palásio tesoreríape, ha ogueraha avei heta prisionéro. Upéi haʼe oho jey Samáriape.
15 Jehoás istória oñemoĩmbaite pe lívro ojeskrivihápe umi mbaʼe oiko vaʼekue Israel rreikuéra tiémpope, upépe oñemombeʼu umi mbaʼe ojapo vaʼekue, mbaʼeichaitépa ipoderóso ha mbaʼéichapa oñorairõ vaʼekue rréi de Judá Amasías kóntrape.
16 Upéi Jehoás omano ha oñeñotỹ chupe Samáriape+ umi rréi de Israel oñeñotỹhápe, ha itaʼýra Jeroboángui*+ oiko rréi hekovia.
17 Amasías,+ haʼéva pe rréi de Judá Jehoás raʼy, oikove 15 áño omano rire Jehoás,+ pe rréi de Israel Jehoacaz raʼy.+
18 Amasías istória oñemoĩmbaite pe lívro ojeskrivihápe umi mbaʼe oiko vaʼekue Judá rreikuéra tiémpope, upépe oñemombeʼu umi mbaʼe haʼe ojapo vaʼekue.
19 Upe rire oĩ opuʼãva ñemiháme Amasías kóntrape+ Jerusalénpe, ha haʼe oho okañy Lakíspe, péro oñemondo hapykuéri unos kuánto kuimbaʼe ha ojuka chupe hikuái Lakíspe.
20 Upémarõ ogueraha chupe hikuái peteĩ kárrope ojetiráva kavajúpe, ha oñeñotỹ chupe umi ituakuéra ypykuéndi Jerusalénpe pe Siuda de Davídpe.+
21 Upéi pe puévlo de Judá kompletoite omoĩ rréiramo Azaríaspe*+ itúa Amasías rekovia,+ upérõ Azarías oreko vaʼekue 16 áño.+
22 Rréi Amasías omano rire, haʼe omopuʼã jey Elat+ ha omoĩ jey Judá poguýpe.+
23 Ha 15 áño ogoverna haguépe Amasías, pe rréi de Judá Jehoás raʼy, Jeroboángui+ oiko rréi Samáriape. Haʼe hína rréi de Israel Jehoás raʼy, ha ogoverna 41 áñore.
24 Haʼe ojapo meme ivaíva Jehová renondépe, ndohejái umi mbaʼe vai Nebat raʼy Jeroboán ojapo vaʼekue, haʼe ningo ojapoka Israélpe umi mbaʼe vai haʼe voi ojapo vaʼekue.+
25 Haʼe orrekupera jey Israel frontéra, Lebó-Hamat*+ guive Mar de Arabá*+ peve, Israel Jára Jehová heʼi haguéicha isiérvo Jonás+ rupive, haʼe hína Amitái raʼy, Jonás ningo hína pe proféta Gat-Hefergua.+
26 Jehová ohecha kuri mbaʼeichaitépa osufri ha oñembyasy Israel.+ Ndaipóri vaʼekue avavete ikatúva oipytyvõ Israélpe, ni peteĩ iñarruinádova ni ikangýva jepe.
27 Péro Jehová opromete vaʼekue ndoipeʼaitemoʼãiha Israel réra ko yvy ape árigui.+ Upémarõ osalva chupekuéra Jehoás raʼy Jeroboán rupive.+
28 Jeroboán istória oñemoĩmbaite pe lívro ojeskrivihápe umi mbaʼe oiko vaʼekue Judá rreikuéra tiémpope, upépe oñemombeʼu umi mbaʼe ojapo vaʼekue, mbaʼeichaitépa ipoderóso ha mbaʼéichapa oñorairõ ha orrekupera vaʼekue Damasco+ ha Hamat+ oĩ jey hag̃ua Judá poguýpe Israélpe.
29 Upéi Jeroboán omano ha oñeñotỹ chupe umi rréi de Israel oñeñotỹhápe, ha itaʼýra Zacarías+ opyta rréiramo hekovia.
Nóta
^ Térã: “jajotopa frénte a frénte”.
^ Hebréope: “hóga kárpape”.
^ Kóva hína Jeroboán Segundo.
^ Heʼiséva: “Jehová oipytyvõ”. 2Re 15:13; 2Cr 26:1-23; Is 6:1 ha Zac 14:5-pe heʼi Uzías.
^ Upéva hína pe Mar Salado, térã Mar Muerto.
^ Térã: “Hamat entráda”.
