2 Reyes 2:1-25
2 Jehová ogueraha potaitérõ guare Elíaspe+ yvágape* peteĩ yvytu atãme,+ Elías ha Eliseo+ osẽ oho Guilgálgui.*+
2 Elías heʼi Eliséope: “Epytána koʼápe, pórke Jehová chemondo Betélpe”. Péro Eliseo heʼi chupe: “Che ndorohejamoʼãi, ha ahura ndéve upéva Ñandejára Jehová oikovévare ha nderehe* avei”. Upéi haʼekuéra ovahea ha oho Betélpe.+
3 Upéi peteĩva umi proféta* oĩva Betélpe ou Eliseo rendápe ha heʼi chupe: “¿Reikuaa piko koestedía Jehová oipeʼataha upe nemoakãvape ha nereimemoʼãveimaha ipoguýpe?”.+ Upépe haʼe heʼi: “Aikuaáma, anínte peje mbaʼeve”.
4 Upéi Elías heʼi Eliséope: “Eliseo, epytána nde koʼápe, pórke Jehová chemondo Jericópe”.+ Péro haʼe heʼi chupe: “Che ndorohejamoʼãi, ha ahura ndéve upéva Ñandejára Jehová oikovévare ha nderehe* avei”. Upémarõ oho hikuái Jericópe.
5 Upéi peteĩva umi proféta raʼy oĩva Jericópe ou Eliseo rendápe ha heʼi chupe: “¿Reikuaa piko koestedía Jehová oipeʼataha upe nemoakãvape ha nereimemoʼãveimaha ipoguýpe?”. Upépe haʼe heʼi: “Aikuaáma, anínte peje mbaʼeve”.
6 Upéi Elías heʼi Eliséope: “Eliseo, epytána nde koʼápe, pórke Jehová chemondo Jordánpe”. Péro haʼe heʼi chupe: “Che ndorohejamoʼãi, ha ahura ndéve upéva Ñandejára Jehová oikovévare ha nderehe* avei”. Upémarõ mokõivéva osẽ oho.
7 Ha 50 proféta raʼy oho avei, ha upéi opyta hikuái oñemboʼy ha omaña hesekuéra mombyrymi guive mokõivéva oñemboʼy aja pe Jordán oríllape.
8 Upéi Elías ojagarra ijao,*+ oipoka ha oinupã pype pe y, upépe pe rrío ojeavri ha ohasa hikuái pe yvy isekohárupi.+
9 Ha ohasamírente hikuái, Elías heʼi Eliséope: “Ejerure chéve la reipotáva ajapo nderehehápe, Ñandejára chepeʼa mboyve ndehegui”. Upémarõ Eliseo heʼi: “¿Ikatu piko remeʼẽ chéve el dóvle*+ pe espíritu Ñandejára omeʼẽ vaʼekuégui ndéve?”.+
10 Elías heʼi chupe: “Ijetuʼu la rejeruréva. Ág̃a cherecháramo Ñandejára chepeʼa vove ndehegui, oikóta upe rejeruréva, péro ndacherecháiramo ndoikomoʼãi upéva”.
11 Ha haʼekuéra oguata ha oñemongeta aja ohóvo, upeichaháguinte osepara chupekuéra ojuehegui peteĩ kárro de gérra hendypáva+ ha oitiráva umi kavaju hendypáva, ha Elías ojupi yvágape* peteĩ yvytu atãme.+
12 Eliseo ohecha aja la oikóva, osapukái: “¡Che ruvicha, che ruvicha!* ¡Emañamína, Israel kárro de gérra ha umi isoldádo kavaju arigua!”.+ Ha ndaikatuvéi rire ohecha chupe, haʼe omondoro ijao mbytépe.+
13 Upe rire ohupi pe ao+ hoʼa vaʼekue Elíasgui, ha ou jey opyta pe Jordán oríllape.
14 Upémarõ oinupã pe y Elías aokuépe ha heʼi: “¿Moõ piko oĩ Jehová, Elías Jára?”. Ha oinupãvo pe y, ojeavri pe rrío, ha Eliseo ohasa upérupi.+
15 Ha umi proféta raʼy oĩva Jericópe ohechávo chupe mombyrymi guive, heʼi: “Elías espíritu oñemeʼẽ Eliséope”.+ Upémarõ haʼekuéra oho ohug̃uaitĩ chupe ha oñesũ ha oñakãityete henondépe.
16 Haʼekuéra heʼi chupe: “Koʼápe ore apytépe ningo oĩ 50 kuimbaʼe ivaléva. Ehejána koʼãva toho toheka nde ruvichápe, ikatu oime Jehová espíritu* ohupi raʼe chupe ha ogueraha oity peteĩva umi montáñape térã umi ñúme”.+ Péro Eliseo heʼi chupekuéra: “No, anínte pemondo”.
17 Péro haʼekuéra heʼi jey jey chupe, ha upéi haʼe otĩma chuguikuéra, upévare heʼi: “Pemondo katu upéicharõ”. Upémarõ omondo hikuái umi 50 kuimbaʼépe, ha haʼekuéra oheka chupe 3 día aja, péro ndotopái hese.
18 Ou jeýrõ guare hikuái, Eliseo opyta hína kuri Jericópe.+ Ha haʼe heʼi chupekuéra: “Chéko haʼe voi kuri peẽme ani hag̃ua peho”.
19 Tiémpo rire, umi kuimbaʼe upe siudapegua heʼi Eliséope: “Ore ruvicha, nde ningo rehecha ko siuda oĩha peteĩ lugár porãme,+ péro la y ikyʼa ha ko yvy ndoprodusíri mbaʼeve”.*
20 Upépe haʼe heʼi chupekuéra: “Pegueru chéve peteĩ mbaʼyru ipyahúva ha pemoĩ pype juky”. Upémarõ ogueru chupe hikuái.
21 Upéi haʼe oho pe ykua yvu oĩháme ha oity pype pe juky,+ ha heʼi: “Péicha heʼi Jehová: ‘Che amopotĩma ko y, upévare ndojukamoʼãvéima avavépe ha ndaiporimoʼãvéima kuña ikatuʼỹva imemby’”.*
22 Ha pe y opyta ipotĩ koʼag̃aite peve, Eliseo heʼi hagueichaite.
23 Upéi Eliseo osẽ upégui ha oho Betélpe. Ha oarrivávo pe tapére, unos kuánto mitãʼi osẽ pe siudágui ha oñepyrũ oñembohory Eliséore,+ ha heʼi chupe hikuái: “¡Tereho koʼágui ne mbaʼe akã perõ! ¡Tereho koʼágui ne mbaʼe akã perõ!”.
24 Upémarõ haʼe ojere omaña umi mitãre ha Jehová rérape omaldesi chupekuéra. Upéi osẽ pe kaʼaguýgui mokõi ósa+ ha odeskuartisa 42 mitãme umi mitãnguéra apytégui.+
25 Haʼe okontinua la hape ha oho Sérro Carmélope,+ ha upégui ou jey Samáriape.
Nóta
^ Térã: “yvate, ovevehápe umi guyrakuéra”.
^ Kóva ndahaʼéi pe Guilgal oĩva Jericó ypýpe, síno pe oĩva umi serroháre Betel ypýpe.
^ Térã: “ne álmare”.
^ Hebréope: “umi proféta raʼy”. Amalisia péicha ojeʼe avei peteĩ eskuélare oñemboʼehápe umi profétape, térã peteĩ grúpo de profétare oñopytyvõmbáva.
^ Térã: “ne álmare”.
^ Térã: “ne álmare”.
^ Térã: “pe proféta ao”.
^ Térã: “2 párte”.
^ Térã: “yvate, ovevehápe umi guyrakuéra”.
^ Hebréope: “¡Che ru, che ru!”.
^ Térã: “yvytu”.
^ Ikatu avei: “omboperde umi kuñáme imemby”.
^ Ikatu avei: “ndaiporimoʼãvéima kuña operdéva imemby”.
