2 Reyes 24:1-20
24 Jehoiaquim tiémpope rréi Nabucodonosor+ de Babilonia ou Jerusalén kóntrape ha Jehoiaquim opyta ipoguýpe 3 áño. Upéi Jehoiaquim opuʼã hese.
2 Ha Jehová oñepyrũ omondo Jehoiaquim kóntrape una partída soldádo caldeo,+ sirio, moabita ha ammonita. Jehová osegi omondo chupekuéra ohundi hag̃ua Judápe, haʼe heʼi hagueichaite+ iprofetakuéra rupive.
3 Koʼã mbaʼe oiko Judáre pórke Jehová voi omanda oiko hag̃ua upéicha, ikatu hag̃uáicha oipeʼa chupekuéra hesa renondégui+ entéro umi mbaʼe vaiete ojapo vaʼekuére Manasés,+
4 ha avei oñohẽ haguére hetaiterei hénte inosénte ruguy,+ pórke haʼe ojuka vaʼekue hetaitereípe Jerusalénpe, peteĩ púnta guive ótra púnta peve, ha Jehová noperdonaséi kuri upéva.+
5 Jehoiaquim istória oñemoĩmbaite pe lívro ojeskrivihápe umi mbaʼe oiko vaʼekue Judá rreikuéra tiémpope, upépe oñemombeʼu entéro mbaʼe ojapo vaʼekue.+
6 Upéi Jehoiaquim omano+ ha itaʼýra Joaquíngui oiko rréi hekovia.
7 Pe rréi de Egipto nomondovéi ijehérsito ótro ládo iterritóriogui, pórke pe rréi de Babilonia ojagarrapaite vaʼekue umi território haʼe vaʼekue pe rréi de Egipto mbaʼe,+ pe Egipto Yrape*+ guive Rrío Éufrates peve.+
8 Joaquín+ oreko vaʼekue 18 áño oikórõ guare chugui rréi, ha 3 mésere ogoverna Jerusalénpe.+ Isy héra vaʼekue Nehustá, haʼe hína Elnatán Jerusalengua rajy.
9 Joaquín ojapo meme ivaíva Jehová renondépe, haʼe ojapo entéro mbaʼe itúa ojapo hagueichaite.
10 Upe tiémpope ou Jerusalén kóntrape rréi Nabucodonosor de Babilonia ehérsito, ha omongora pe siuda.+
11 Rréi Nabucodonosor de Babilonia ou pe siudápe, ijehérsito omongora aja pe siuda.
12 Rréi Joaquín de Judá osẽ pe rréi de Babilonia rendápe+ isýndi, isiervokuérandi, umi iprinsipekuérandi ha umi ofisiál palasiopeguándi,+ ha oñentrega hikuái. Pe rréi de Babilonia ojagarra ha ogueraha chupe prisionéroramo, 8 áño ogoverna haguépe pe rréi de Babilonia.+
13 Upéi haʼe ogueraha kompletoite umi tesóro oĩ vaʼekue Jehová rógape ha pe rréi palásiope.+ Pe rréi de Babilonia ombojaʼopaite umi tembiporu de óro Salomón ojapo vaʼekue Jehová témplope g̃uarã.+ Koʼã mbaʼe oiko Jehová heʼi hagueichaite.
14 Pe rréi de Babilonia ogueraha prisionéroramo kompletoite umi hénte oĩvape Jerusalénpe, enterovete umi prinsipekuérape,+ kompletoite umi gerréro ipoderósova, ha enterovete umi artesáno ha errérope,+ haʼe ogueraha en totál 10.000 persónape. Umi imboriahúvape añoiténte ojeheja, ha upéi avavetépe ndojehejái Jerusalénpe.+
15 Péicha haʼe ogueraha Babilóniape+ prisionéroramo Joaquínpe,+ isýpe, pe rréi rembirekokuérape, umi ijofisiál palasiopeguápe, ha umi kuimbaʼe iñimportantevévape. Oraha chupekuéra Jerusaléngui prisionéroramo Babilóniape.
16 Pe rréi de Babilonia ogueraha vaʼekue prisionéroramo Babilóniape enterove umi gerrérope, en totál 7.000, avei 1.000 artesáno ha errérope, enterovete koʼã kuimbaʼe ipoderóso ha oñorairõkuaa vaʼekue.
17 Ha pe rréi de Babilonia omoĩ Mataníaspe rréiramo Joaquín rekovia, haʼe hína Joaquín tio.+ Upéi pe rréi okambia Mataníaspe héra, ha ombohéra chupe Sedequías.+
18 Sedequías oreko vaʼekue 21 áño oikórõ guare chugui rréi, ha 11 áñore ogoverna Jerusalénpe. Isy héra vaʼekue Hamutal,+ haʼe hína Jeremías Libnagua rajy.
19 Sedequías ojapo meme ivaíva Jehová renondépe, haʼe ojapo entéro mbaʼe Jehoiaquim ojapo haguéicha.+
20 Koʼã mbaʼe oiko Jerusalén ha Judápe Jehová ipochy ha orrenegaiterei rupi, péicha oiko haʼe oipeʼa peve chupekuéra hesa renondégui.+ Upéi Sedequías opuʼã pe rréi de Babilóniare.+
